ENGARI uarhipiringa, ¿néna pʼikuarherapirini chíti nándi engakini ménderu tsípiti exepiringa? ¡Ima kánikua tsípipirindi! Peru, ¿nema enga uarhikia ua ménderu irentani? ¿Úkuarhiski ménisï i ambe?

Exe dibujurhu achaatini, uarhitini ka sapini. Achaati profeta Eliasisti. Ka uarhiti, tsïndi máesti Sarepta anapu ka sapi, uájpesti. Ma jurhiatikua sapi pʼamenchasïndi. Uinhamu jarhasïndi ka uarhisïndi. Jiájkani Eliasi arhisïndi uarhitini: ‘Íntskurini sapini’.

Eliasi pásïndi sapini kuarturhu enga karhakua jarhajka ka kamarhu apojtsïtasïndi. Jiájkani kómarhikua úsïndi: ‘O Jeoba ú eska i sapi tsíntaaka’. ¡Jiájkani sapi uénasïndi jirejtantani! Ka Eliasi késkuntasïndi ka arhisïndi uarhitini: ‘¡Exe, chíti uájpa tsipiti jarhasti!’. I ambe kánikua sési pʼikuastasïndi amambani.

Máteru ambakiti profeta Jeobaeri, arhinhasïndi Eliseu, ka i Eliasini jarhuatasïndi. Sánderu orhepatini Jeoba úsïndi eska Eliseujtu uáuaka milagruechani. Ma jurhiatikua nirasïndi ireta Sunemi, jima, uarhiti ma kánikua sési kámasïndi. Ístu tátsekua, i uarhiti kánguarhisïndi uájpani ma.

Enga i sapi sánderu kʼéjkia, ma tsípa nirasïndi juátarhu, jima enga imeri táti ánchikuarhijka. Ka repentku uinhachasïndi: ‘¡Éjpu pʼamerhaxaka!’. Engaksï pántajka chenemba, uarhisïndi. ¡Kánikua kómu pʼikuarherasïndi imeri nándi! Ka sóntku nirasïndi Eliseuni jirinhani.

Enga Eliseu niárajka, inchasïndi kuarturhu jima enga tataka uarhirini jarhajka. Kómarhisïndi Jeobani, ka sapiirhu kápatsesïndi. Sóntku sapi uarhiri, jorhepentasïndi ka siete uelta tsúsïndi. ¡Kánikua tsípisïndi amamba enga inchajka ka enga exejka eska uájpa tsípiti jarhaska!

Peru uánikua kʼuiripuechaksï uarhistia. Ka i ambe kánikua no sési pʼikuastaasïndi imeri familiembani ka ístu amiguechani. Jucha no úsïnga tsítaantani uarhirichani. Peru Jeoba kʼóru. Tátsekuachi exeaka eska Jeoba uáka eska miioni jimbo kʼuiripuechaksï ménderu irentaka.