ENGA Dabidi uénajkia juramuni Jerusaleni, Jeoba úsïndi eska imeri ejersitu uánikua uarhiperakuechani andauaka. Jeoba aiakuasptia israelitechani eska íntskuapiringa echeri Kanaani anapuni. Ka iásï Jeobaeri jarhuajperakuani jimbo, imecheristia iámu echeri eska na eiakuapka.

Dabidi ambakiti juramutisti. Ka uékasïndi Jeobani. Ísï jimbo, enga mínguarhijkia Jerusalenini, ma ambe enga orheta újka, jindesti páni Jeobaeri arka pakatperakuerini jima. Ka uékasïndi templu ma úni para jima peerani.

Máru uéxurhinicha tátsekua, Dabidi kʼéri pekadu ma úsïndi. Ima mítisti eska no sési jarhaska jupikani ambe ma enga máteru nemariuaka. Peru ma chúrikua enga asotearhu jarhajka, sési jásï ma uarhitini eraasïndi. Bat-seba arhinhasïndi ka imeri uámba Uriasi Dabidiri sondaduesti.

Dabidi xáni tsitisïndi Bat-sebani, jimbosï pʼitarkuarhijti. Imeri uámba iauani jámaxati uarhiperani. Dabidi apondisïndi imani jingoni ka tátsekua mítisïndi eska Bat-seba charhakuni ma kánguarhiaka. Dabidi kánikua uandanhiasïndi ka arhisïndi Joabini ejersitueri juramutini, eska orhepani paaka Uriasini para uarhiperakuarhu uarhini. Enga Uriasi uarhijkia, Dabidi tembusïndi Bat-sebani.

Jeoba kánikua ikiasïndi Dabidini jingoni. Axasïndi Natanini paraka arhiaka Dabidini ambe enga úka. Úsïniri exeni ixú Natanini Dabidini jingoni. Dabidi kánikua no sési pʼikuarherasïndi imani ambe jimbo enga úka, ka Jeoba no uándikusïndi. Peru arhisïndi: ‘Jimbokari i no sési jásï ambe úska, uánikua uandanhiatechaksï jauati chíti kʼumanchikuarhu’. ¡Ka kʼérati uandanhiatechani jatsiasïndi Dabidi!

Orheta, Bat-sebaeri uájpa uarhisïndi. Tátsekua Amnoni, Dabidiri uájpa kʼéri, afuersa apondisïndi imeri piremba Tamarini jingoni. Absaloni, máteru Dabidiri uájpa ikiasïndi ini ambe jimbo ka uándikusïndi Amnonini. Tátsekua, Absaloni úsïndi eskaksï uánikuecha imani jingoni úkuarhiaka ka úsïndi eskaksï juramuti uáka. Dabidi andasïndi Absalonini uarhiperakuarhu ka Absaloni uarhisïndi. Jo, Dabidi uánikua uandanhiatechani jatsiasïndi.

Enga i ambe úkuarhini japka, Bat-seba kánguarhisïndi Salomonini. Enga Dabidi tʼarhepijkia ka enga pʼamenchani jarhajka, imeri uájpa Adoniasi jámasïndi juramuti úkuarhini. Jiájkani, Dabidi úsïndi eska ma saserdoti enga arhinhajka Sadoki aseiti atajtsikuaka Salomonini, para xarhatani eska Salomoni juramutiuaka. Tátsekua Dabidi uarhisïndi enga 70 uéxurhini jatirijkia. Juramusti 40 uéxurhini. Iásï, Salomoni juramutistia.