ULTIMU libru enga Bibliarhu jaka —Jaŋaskuecha o Apokalipsisi— ambakiti erokakua ma íntskuasïndi kʼuiripuechani. I libru enga apostuli Juanu karaka, jukanharhiasti jánhaskuecha engaksï sánderu orhepatini úkuarhini japiringa, ka i libru kʼamarhukusïndi ima ambe jingoni enga Tata Diosï uéjka úni.

Orheta jánhaskuarhu, Jesusi enga auandarhu jarhajkia, uinhaperantasïndi ka jurhimberantasïndi máru kúnguarhikuechani. Máteru jánhaskua jimbo, xarhatachisïndijtsïni nani enga Tata Diosï uaxakatini jaka auandarhu ka na engaksï ánjilicha kʼéri ambe arhini jarhajka.

Enga niárani jarhajkia jurhiatikua para úkuarhini ambe enga Tata Diosï uéjka úni, Karichi sapichu (Jesukristu) intsïnhasïndi sïranda irhikukata ma enga sieti seiu jukajka. Enga mítajka tʼámu seiuechani, uérasïndiksï tʼámu kabaiu jataricha. Orheta kabaiu jatari jindesti Jesusi, enga Juramuti únhakia ka kabaiu urapiti ma jimbo jatarini niraxati. Máteru tanimu, niraxatiksï jatarini máteru jásï kolori kabaiuechani, íksï arhikuekasïndi uarhiperakua, kʼarhingua, ka pʼamenchakua, i ambesti enga úkuarhini jaka parhakpinirhu, joperu nóteru ióni jimbo kʼamajkunhati. Enga mítakuarhijka septimu seiu, kurhakuarhesïndi kústanhani sieti trompetecha, i arhikuekasïndi eska niáraskia jurhiatikua para Tata Diosï jusgarpini mámaru ambe jimbo. I ambe úsïndi eska jauaka máteru sieti no sési jásï ambe, enga xarhatajka na enga xáni no sési ikiani jaka Tata Diosï.

Tátsekua, Juanu exesïndi eska charhaku ma andajpenusïnga, i arhikuekasïndi eska Tata Diosïri Juramukua uénaskia juramuni auandarhu. Uarhiperakua ma úkuarhesïndi ka Satanasi ka imeri demoniuecha petanhantasïndiksï auandarhu ka kʼuanijpanhasïndiksï Echerirhu. Jiájkani kurhakuarhesïndi uinhamu uandani jarhani nema enga arhiamka: “Lastima cha engaksï parhakpinirhu [...] jaka”. ¿Andi? Jimboka No Ambakiti mítiska eska nóteru ióni pakarakusïngia ka kánikua ikiaxati (Jaŋaskuecha 12:12).

Jesusi ménderu xarharasïndi auandarhu isï komueska karichi sapichu ma, ka imeri jájtakurhini jarhasïndiksï 144,000 kʼuiripu erakukatecha ka i “juramuatiksï [...] imani jingoni”. Libru Jaŋaskuecharhu, jindesti nani engachi újka mítini eska japiringa máteru uarhitiri uájpecha engaksï ánchikuarhipiringa Jesusini jingoni ka íksï jindepirindi 144,000 (Jaŋaskuecha 14:1; 20:6).

Tátsekua, juramuticha Parhakpinirhu anapuecha tánguarhintasïndiksï Armagedonirhu, “paraksï uarhiperani imani kʼéri jurhiatikua jimbo Diosïni jingoni enga iámindu ambe újka úni”, ka uarhiperasïndiksï kabaiu urapiti jatarini jingoni enga jindeka Jesusi ka ánjilichani jingoni. ¿Néna kʼamarukusïni i uarhiperakua? Iámindu juramukuecha kʼamajkunhasïndiksï ka Satanasi ónhanhasïndi. Jesusi ka 144,000 juramusïndiksï auandarhu uératini Parhakpinirhu mili uéxurhini, ka enga na kʼamakurhijkia mili uéxurhini, Satanasi uándikunhasïndi (Jaŋaskuecha 16:14; 20:4).

Enga Kristu Juramuni jauakia Mili Uéxurhini ¿ambe uá imechani jimbo engaksï kurhajchani jauaka? Juanu karasïndi: “[Jeoba] kutsunharhikuauati iámindu uekua, ka nóteru jauatia uarhikua, ka ni uandanhiata, ka nóteru nema uérati, o pʼamenchani, jimboka nitamakia iámindu uénani anapu ambe” (Jaŋaskuecha 21:4). Jo ísïsti, ¡Echeri ménderu sési jándentasïndi!

Isï, Jaŋaskuecharhu libru kʼamarhukusïndi uandantani ambe enga Biblia uandajka: Mesiasiri Juramukua jimbo, Jeoba pímbinhajkuntati imeri arhinhakuani ka uaxastati para méntkisï eska imajku jindeska enga jatsika sésikua para juramuni.

(Pʼitakata jarhasti Jaŋaskuecha jimbo.)