DIESI jurhiatikua tátsekua enga Jesusi karhanchintapkia auandarhu, kʼuinchikua Pentekostesiri engaksï judiuecha úntani japka uéxurhini 33 jimbo, tánguarhisptiksï kʼumanchikua ma jimbo sientu beinti Jesusiri jorhenguarhiticha Jerusaleni. Ka ma repentku isï kurhakuarhespti enajki kʼéri ma tarhiata jupi ka jirejiresï Jesusiri jorhenguarhiticha úndasptiksï máteru idiomechani uandani engaksï no míteapka. ¿Andisï isï úkuarhini japi? Jimboka Tata Diosï, espiritu santu íntskuaspka.

Ini kʼéri iretani jimbo, uánikua kʼuiripu jarhaspti engaksï máteru paisichani jimbo uératini jupka ini kʼuinchikuani nitamani. Engaksï exepka eska Jesusiri jorhenguarhiticha úsïrenga uandontskuarhini imechani jingoni imecheri idiomani jimbo, iáminduechaksï ísku pakaraspti. Paraksï úni kurhanguni andisï isï úkuarhini japi, Pedru míatantaspti eska profeta Joeli uandaspkia eska Tata Diosï íntskuapiringa espiritu santu imechani engaksï marhuakuni japiringa, ka eska ini espirituni jimbo úpiringaksï milagruechani uáni (Joel 2:28, 29). Ini milagruni jimbo enga úkuarhipka, xarharaspti eska iásï Kristueri kúnguarhikua jindespkia enga jatsipka Tata Diosïri jeiapanhintskua ka nóteru Israeli anapuecha. Isï jimbo, jima para orhepatini iámindu imecha engaksï uékapiringa Tata Diosïni marhuakuni, jatsisptiksï para kristianu úkuarhini.

Joperu imecha engaksï Kristuni ikiakuenga, uénasptiksï no sési káni Jesusiri jorhenguarhitichani. Ma jurhiatikua, máru Jesusiri jorhenguarhiticha ónhanhasptiksï, joperu chúrikua jurhaspti ánjili ma ka petaantaspti, ka arhiaspti eskaksï nipiringa ménderu aianhpini. Enga erandipkia sóntkuksï inchaspti templurhu ka úndastiksï Jesusiri ambe eianhpini. Joperu imecha engaksï religionirhu orhejtsïkuenga, kánikuaksï ikiaspti ka juramukuasptiksï eskaksï nóteru jámapiringia Jesusiri ambe aianhpini. Joperu apostulicha méntku no sáni chéparini mókukuasptiksï: “Uétarhisïndi eska jucha sánderu janhanharhiaka Diosïni ka eska kʼuiripuechani” (Ukuecha 5:28, 29).

Imecha engaksï ikiakuauenga nóksï jurajkuaspti, sino úndasptiksï sánderu no sési kánksï. Judiuecha máru uándikusptiksï Estebanini Jesusiri jorhenguarhirini ma tsakapu jimbo, jimbokaksï uandasïrenga eska no sési uandaspka Tata Diosïri ambe. Ma enga exepka na engaksï uándikupka Estebanini jindespti Saulu Tarsu anapu, tumbi ma enga kánikua ikiakuauenga kristianuechani. Tátsekua Saulu niraspti Damasku jimboka uékasïrenga iámindu Jesusiri jorhenguarhitichani jupikani para ónhaani. Enga nirani japkia Damasku tʼíntskua ma auandarhu uératini tsónhastaspti ka siegu pakataspti. Jiájkani, kurhaspti uandakua ma enga arhiamka: “Saulu, Saulu, ¿andisïrini xáni no sési kámajki?”. Ka ima arhispti: “¿Néskiri tʼu Tata?”. Ka ima arhispti: “Ji jindeskani Jesusi” (Ukuecha 9:3-5).

Tanimu jurhiatikua tátsekua, Jesusi axaspti imeri jorhenguarhiri Ananiasini para úni eska Saulu ménderu éskantapiringa. Saulu itsï atakuarhispti ka uénaspti tsípikua jingoni eianhpini. Sánderu tátsekua niáraspti mítikuarhini eska apostuli Pablu, kristianu ma enga no méni kuatantapka nirani iauani isï jamberi aianhpini.

Uénakuarhu, Jesusiri jorhenguarhiticha judiuechantku ka samaritanuechantku aianguasïrendiksï Tata Diosïri Juramukueri ambe. Joperu ma jurhiatikua, ánjili ma xarhakuspti Korneliuni enga sondaduecheri juramutipka ka enga jakajkuenga Jeobani, i arhispti eska pʼitarkuarepiringa apostuli Pedruni. Apostuli Pedru niáraspti Korneliueri kʼumanchikuarhu máteru jorhenguarhitichani jingoni, ka uénaspti aianguani Jesusiri ambe Korneliuni ka imeri kʼumanchikuarhu anapuechani. Enga útasï Pedru uandani japka, i jakajkuticha intsïnhasptiksï espiritu santu, ka Pedru juramuspti eskaksï Jesusiri arhinhakuani jimbo itsï atakuarhipiringaksï. Jima para orhepatini, nani uéjki anapu kʼuiripu ma úpirindi jatsini sésikua para intsïnhani tsípikua para méntkisï. Jo ísïsti, ambakiti eianhperakua aianhpinhapirindi iámindu nasionichani jimbo.

(Pʼitakata jarhasti Ukuecha jimbo 1:1–11:21.)