¿NENAKSÏ úpirini kʼuiripuecha mítintani Mesiasini? Tata Diosï uandantapirindi né jindepirini Mesiasi. Kuatrosientu uéxurhini tátsekua enga na kʼamakurhipkia karakuarhini Karakata Ebreaecha, ánjili ma enga Gabrieli arhinhaenga, xarhakuspti Mariani, iurhitskiri ma enga irekapka norti de Galilea isï, jini Nasareti. Gabrieli arhispti Mariani eska charhakuni ma kánguarhipiringa. Nájkiruka Maria no méni apondini japka achati ma jingoni, Tata Diosï úpirindi eska Maria kánguarhipiringa charhakuni ma, imeri uinhapikua jimbo o espiritu santu jimbo. I sapi niárapirindi jindeni ima Juramuti enga Tata Diosï eiatspipka ka enga juramupiringa para méntkisï. Tata Diosï peeraspti Jesusiri tsípikuani Mariaeri matrisirhu, ante de i ambe úkuarheni, Jesusi irekaxapti jini auandarhu Tata Diosïni jingoni.

Maria kánikua kaxumbikua jingoni jiókuarhispti i ambakiti kóntperatani. Jose, tumbi ma enga karpinteruepka, ka enga kurhajkuarhitini japkia Mariani, jiájkani tembuchaspti imani jingoni astaka Tata Diosï axapka ánjilini ma para arhini andisï Maria charhakuni ma kánguarhipirini. Joperu ju je míantani eska Tata Diosï uandaspka, eska Mesiasi Beleni andajpenupiringa, no Nasareti (Miqueas 5:2). Beleni 150 kilometru isï iauani jarhaspti Nasareti uératini, ¿néna úkuarhepirini jiájkani i ambe?

Sánititu tátsekua, juramuti Roma anapu juramuspti eska úkuarhipiringa sensu ma, ka iáminduksï jatsispti para karakuarhini nani engaksï andajpenupka. Jose ka Mariaeri familiecha Beleni anapuesptiksï, isï jimbosïksï nípti Beleni, ka jiáni isï Maria nóteru ióni kueratanchasïrendia para charhakuni kánguarhini (Lukasʌ 2:3). Jesusi, jima andajpenuspti engaksï ueechani patsauenga ka apontskasptiksï nani engaksï ueecha tʼireanga. Jiájkani jima no iauani pakua ma jimbo uánikua ánjilicha xarhakuasptiksï máru karichi erangutichani ka aianguasptiksï eska andajpenuspkia Mesiasi o Kristu enga Tata Diosï eiatspipka.

Ístu japirindi máteru kʼuiripuecha engaksï uandantapiringa eska Jesusi jindespka Mesiasi enga Tata Diosï eiatspipka. Profeta Isaiasi uandaspti eska japiringa achati ma enga ambantskakupiringa xanharuni, para ima ambakiti ánchikuarhita enga Kristu úpiringa (Isaías 40:3). I achati Juanu el Bautistespti. Ma jurhiatikua enga Juanu exepka Jesusini, isï uandaspti: “¡Exe je Diosïri Karichi sapichuni enga késtatajka parhakpini anapuecheri pekaduechani!”. Jirejiresï uánikua engaksï Juanuni chúxapaenga, Jesusiri jorhenguarhiri úkuarhesptiksï. Ma uandaspti: ‘Exentaskachia Mesiasiniʼ (Juanu 1:29, 36, 41).

Joperu xarharapirindi máteru ambe paraka sánderu jakajkunhapiringa eska Jesusi Mesiasispka. Enga Juanu itsï atapkia Jesusini, Jeoba Mesiasi úspti espiritu santuni jimbo, ka uandaspti: “I jindesti juchiti Uátsï engani ji xáni uékajka ka engani jimbo xáni tsípikuarhijka” (Mateu 3:16, 17). ¡Iásï kʼóru niárasptia Mesiasi enga Tata Diosï eiatspipka!

Joperu, ¿káni úkuarhiski i ambe? Uéxurhini 29 d. de J., jiájkani enga andangupkia 483 uéxurhini enga Danieli uandapka. Íksï jindesti máru ambejku enga xarhatajka eska Jesusi jindespka Mesiasi. Joperu iásï, ¿ambe uandantapirini Jesusi Parhakpinirhu?

(Pʼitakata jarhasti Mateu kapituluecha 1 a 3, Markusʌ kapitulu 1, Lukasʌ kapitulu 2 ka Juanu kapitulu 1.)