IÓNI sési nikuasptia israelitechani Ejiptu ka uánikuaksï úkuarhisptia. Jiájkani niáraspti juramuni máteru faraoni enga no mítipka Joseni ka i no sési kámpisïrendi ka no pʼamojpisïrendi. I exespti eska israelitecha jukari uánispkia, isï jimbo, jantspiri uáspti ka uandaspti eska iámindu israeliteri uájpecha engaksï andajpenupiringa ka tatakenksï kʼuanimaapiringaksï iorhekua Nilurhu paraksï jima uarhimini. Joperu israelita ma no chéspti ka tsïkiata ma jimbo jatsiraspti imeri charhakuni ka jima jískaspti enga uitsakua jatamipka. Faraoniri uátsï exentaspti, Moisesi arhiraspti ka kʼuiriperaspti juramutiri kʼumanchikua jimbo.

Enga Moisesi 40 uéxurhini jatiripka uandanhiata ma jirinhakuarhispti, jimboka kuájpintaspka israelitani ma enga Ejiptu anapu achati ma no sési kámani japka, isï jimbo iauanisï niraspti sïpakuarhini. Enga 80 uéxurhini jatiripkia, Tata Diosï arhispti eska kʼuanhatsintapiringa Ejiptu para juramukuni faraonini eska jurajkuapiringa israelitechani.

Faraoni, mátirku uandaspti eska no jiánguantapiringa, jimbosï Tata Diosï, diesi no sési jásï ambe axakupti Ejiptuni. Ante de Jeoba no sési jásï ambe axakuni, Moisesi nirasïrendi faraonini uandontskuarhikuni para arhini ambe enga úpiringa. Joperu faraoni méntkisï kʼéri pʼikuarheraspti ka arhisïrendi Moisesini eska no isï úpiringa, ka eska no kurhajchapiringa Jeobani. Ultimu no sési jásï ambe enga úkuarhipka jindespti, enga Jeoba ánjilini ma axapka para uándikuani iámindu ejipsiu uájpechani engaksï orheta kánguarhiapka. Joperu imani kʼumanchikuechani jimbo engaksï israelitecha kurhajchapka Jeobani ka karichiri iurhiri atamutanksï puertecharhu, ánjili no nemani uándikuspti. Paraksï míantani ambe enga úkuarhipka imani jurhiatikua, israelitecha uénasptiksï kʼuinchikua ma úntani mándani uéxurhini: Paskua.

Enga faraoni uarhiri exepkia imeri orheta uájpani, juramukuspti Moisesini ka israelitechani eskaksï uéakuntapiringa Ejiptu. Íksï sóntku uéakuntaspti. Joperu tátsekua, faraoni eratsispti eska no sési úspka jurajkuani, ka niraspti andanguani sondaduechani jingoni ka karretechani jingoni engaksï úraenga para uarhipetarani. Engaksï israelitecha andamukuerapkia mari Charhapitirhu, isï xarharasïrendi enajkiksï nóteru nani úpirinia sïpakuarhini. Joperu Jeoba xanharu ma mítakuaspti marirhu, ka úsptiksï parhikuni echeri jimbo enga kʼarhindepka. Engaksï ejipsiuecha andanguani japkia, Tata Diosï úspti eska itsï ménderu isï niántapiringa eska na japka, ka faraoni ka imeri sondaduecha jimaksï uarhimispti.

Ióni jimbo tátsekua, israelitecha juata Sinai jandukutini jimbo pakarasptiksï irekani, ka jima, Jeoba pakatperakua ma úspti imechani jingoni. Moisesini úraparini eska imeri uandakua pári, juramukuechani íntskuaspti enga jurhimberapiringa ka kuájchakuapiringa iápurhu ka nani uéjki isï engaksï jámapiringa. Engaksï méntkisï kurhajchapiringa ka nóksï méni jurajkuni Jeobani, ima méntkisï japirindi imechani jingoni ka máteru nasionicha újchakuranhapirindiksï imechani jimbo.

Joperu sáno iáminduechaksï xarhataspti eskaksï no mintsinharhisïrenga Tata Diosïni. Isï jimbo, Tata Diosï úspti eskaksï kuarenta uéxurhini isï jámapiringa desierturhu. Jiájkani Moisesi erakuspti Josueni, israelitani ma enga kánikua mintsinharhienga Tata Diosïni paraka úpiringa Moisesiri ánchikuarhitani. Tátsekua niáraspti jurhiatikua engaksï israelitecha inchapiringia echerini jimbo enga Tata Diosï imecheri ióntki anapu parientemba Abranini aiakupka.

(Pʼitakata jarhasti Éxodo, Levítico, Números, Deuteronomio, Salmo 136:10-15 ka Ukuecha 7:17-36 .)