¿AMBEJTSÏ eratsisïni engajtsï kurhauajka uandakuechani alma ka espiritu? Uánikuechaksï uandasïndi eskaksï i jindeska ma ambe engachi incharini jataka, enga no xarharajka ka enga no uarhijka. Uandasïndiksï eskajtsïni i uérhintasïnga engachi  uarhijka, ka eska seguirisïnga irekani máteru nani ísï. Uánikuechaksï ísï jakajkusïndi, jimboksïsï ísku pakarajti engaksï mítijka eska Biblia no jorhentpesïnga i ambe. Jiájkani, ¿ambe jorhentpisïni Biblia eska jindeska alma ka espiritu?

Orhetachi almeri uandaaka. Eskachi na jorhenguarhikia, sáno iámu Biblia, uénakuarhu, ebreu ka griegu jimbo karakuarhisti. Engaksï karaka Bibliani, paraksï arhikuekani almani, úrastiksï uandakua ma enga ebreu jimbo jindeka néfesch ka griegu jimbo psykjé. Íksï uandakuecha, jukari ochosientu uelta jukanharhisti Bibliarhu, ka Traducción del Nuevo Mundo úrasïndi uandakua “alma”, ménisï texturhu o notecharhu. ¿Néna úrakuarhisïni Bibliarhu, i uandakuecha “alma” ka “almecha”? Úrakuarhisïndiksï para tanimu ambe, 1) kʼuiripuecha, 2) animalicha ka 3) kʼuiripuecheri ka animalicheri tsípikua. Exeakachi máru textuechani engaksï xarhatajka i ambe.

Kʼuiripuecha. Noeri jurhiatikuechani jimbo “kuájpinhasptiksï ochu kʼuiripuecha [psykjé] itsïrhu.” (1 Pedru 3:20.) Ixú xarharasïndi eska “psykjé” kʼuiripuechani arhikuekasïnga: Noeni, témbani, tanimu uájpechani ka tarhambechani. Ístu Éxodo 16:16 jimbo, israelitechaksï juramuminhaspti eskaksï kʼarhantapiringa mana “para xáni kʼuiripuecha [almecha nota] engaksï kʼumanchikuarhu irekaka”. Ixú arhikuekaxapti, eskaksï xáni kʼarhantapiringa na enga xáni kʼépiringa familia. Ístu ini textuecharhu, uandakuecha “néfesch” ka “psykjé” kʼuiripuni arhikuekasïndi máruksï notarhu jarhasti: Génesis 46:18, Josué 11:11, Ukuecha 27:37 ka Roma 13:1.

Animalicha. Orheta libru Bibliaeri enga uandajka néna kueraanhaski iámu ambe, uandasïndi: “Jiájkani Tata Diosï uandaspti: ‘Eska uinimiaka itsïcharhu animalicha engaksï tsípiti jauaka [almecha, nota], ka eskaksï jauaka animalicha engaksï káraaka echerirhu auandarhu ísï’. Ka tátsekua Tata Diosï uandaspti: ‘Eska echeri íntspiaka animali tsípitichani [alma, nota] seguni eskaksï naeka mándani, animalicha kʼumanchikuarhu anapuecha ka animalicha engaksï antsikukuarhijka ka animalicha juátarhu anapu eskaksï naeka mándani’. Ka ísï úkuarhispti” (Génesis 1:20, 24). Ini texturhu, úrakuarhisïndi i andakua:  “almecha”, para kuruchecha, animali kʼumanchikuarhu anapuecha ka animali juátarhu anapuecha. Para pájaruecha ka máteru animalicha ístu úrakuarhisïndi i uandakuajtu ini textuecharhu notecharhu: Génesis 9:10, Levítico 11:46 ka Números 31:28.

Kʼuiripuecheri tsípikua. Ménichani, i uandakua “alma” kʼuiripueri tsípikuani arhikuekasïndi. Ma uelta Jeoba arhispti Moisesini: “Uarhistiksïa iámindu imecha engaksïni uékani japka uándikuni [“engaksï jirinhani japka chíti almani” nota]” (Éxodo 4:19). ¿Ambeksïsï uékani japi úni Moisesiri ikiatspiticha? Uékaxaptiksï Moisesiri tsípikuani. Ístu Biblia uandasïndi eska uánikua uéxurhini antesi, enga Rakeli Benjaminini jingoni ambakintani japka, “uéraspka imeri tsípikua (uéraspka imeri alma, nota)” (Génesis 35:16-19). Jiájkani, Rakeli tsïtaspti imeri tsípikuani. Ístuchi úpiringa ini Jesusiri uandakuechani eratsiani: “Ji jindeska ambakiti karichi eranguti; ka ambakiti karichi eranguti, tsípikua [psykjé] íntspesïndi karichichani jimbo” (Juanu 10:11). Jesusi íntspespti “psykjé” o tsípikuani, kʼuiripuechani jimbo. Íksï textuecha o notechani jimbo xarhatasïndi eska inde uandakuecha “néfesch” ka “psykjé” kʼuiripuecheri tsípikuani arhikuekasïnga. Ístuksï ísï úrasïndi ini uandakuechani ini textuecharhu o notecharhu 1 Reyes 17:17-23, Mateu 10:39, Juanu 15:13 ka Ukuecha 20:10.

Engajtsï seguiriska jorhenguarhini Bibliani, exeakajtsï eska no ma textu jataska, enga uandajka “alma enga no uarhijka” o “alma enga irekajka para méntkisï”. Sánderu sési, Biblia xarhatasïndi eska alma úsïnga uarhini, jo uarhisïndi (Ezequiel 18:4, 20). Jimbosï enga Biblia uandajka nemaeri enga uarhikia arhisïndi “alma uarhiri” (Levítico 21:11, nota).

Ju je exeni néna úrasïni Biblia uandakua “espiritu”. Máruksï jakajkusïndi eska espiritu májkueniska eska “alma”. Peru no ísïsti. Bibliajtsïni aiangusïndi eska “espiritu” ka “alma” nóksï májkueniska. ¿Andiksïsï no májkueni?

Engaksï Bibliani karaka, úrastiksï ma uandakua ebreu jimbo enga jindeka rúaj ka griegu jimbo pnéuma engaksï arhikuekaenga “espiritu”. Biblia mísmu uandasïndi ambe engaksï  arhikuekajka. Salmo 104:29 uandasïndi Jeobaeri ambe: “Engari euantaska imecheri espirituni [rúaj], uarhisïndiksï, ka tʼupuriksï úkuarhintasïndi”. Ístu Biblia uandasïndi eska “kuerpu no espiritu jingoni [pnéuma] uarhiri jarhasïnga” (Santiago 2:26, TNM). Íksï textuecha xarhatasïndi, eska uandakua “espiritu”, arhikuekasïnga ima ambe enga újka eska ma kuerpu tsípiti jauaka, enga no i ambe jimboepiringa kuerpu no tsípiti japirindi. Ísï jimbo, uandakua rúaj, Bibliarhu no solu jindesïndi “espiritu”, sino ístu “uinhapikua”, jo, uinhapikua enga tsípikua íntspijka. Ante de Jeoba Dilubiu ma axani echerirhu uandaspti: “Kʼéri Janikua ma juaaka para kʼamajkuani echerirhu imechani engaksï uinhapikua [rúaj] tsípikuerini jimbo manakuarhini jaka” (Génesis 6:17; 7:15, 22). Ísï jimbo, “espiritu” arhikuekasïndi uinhapikua ma enga no xarharajka, ma ambe enga újka eska jucha ka animalicha tsípiti jauaka.

Alma no májkuenisti eska espiritu. Kuerpu espiritu uétarhinchasïndi para úni irekani, májkueni eska na úkuarhijka radiu ma jingoni enga lusi uétarhinchajka. Eratsiakachi radiuni ma enga pila jatantajka. Engachi pila jatsirantajkia, elektrisidadi enga pilecharhu jarhajka, tixatantasïndi radiuni. Radiu no úsïndi tixantani enga no jataaka pila. Ka májkuenisti radiuechani jingoni engaksï lusi uétarhinchajka. Ístu sáno májkueni úkuarhesïndi espirituni jingoni: espiritu uinhapikua máesti enga tsípikua íntskujka kuerpuni. Ísï eska lusi, espiritu no pʼikuarherasïndi ka no úsïndi eratsini. Ísïsti, espiritu uinhapikuajku máesti. Peru enga i espiritu, o uinhapikua enga tsípikua íntspijka, nóteru jarhajkia kuerpurhu, úkuarhisïndi ambe enga salmista uandapka: “Uarhisïndiksï ka tʼupuriksï úkuarhintasïndi”.

¿Ambe úkuarhisïni enga nema uarhijka? Lukasʌ 23:46 uandasïndi: “Jimajkani Jesusi uinhachaparini arhispti: ‘Táti, ji chíti jájkicharhu  patsasïnga juchiti espirituni’. Ka eska na ísï uandapka, uarhispti”. Enga espiritu o uinhapikua enga tsípikua íntspijka jurajkujka kuerpuni, kuerpu uarhisïndi ka niántasïndi nani enga uéraka: echerirhu. Májkueni úkuarhisïndi uinhapikua jingoni enga tsípikua íntspejka, indejtu jima niántasïndi enga uéraka: Tata Diosïni jingoni (Job 34:14, 15; Salmo 36:9). I ambe no arhikuekasïndi eska uinhapikua enga tsípikua íntspejka auandarhu niántasïnga. Arhikuekasïndi eska enga nema uarhijka, Jeobajkusï újti uandani uá ménderu tsípiti jarhani sánderu orhepatini o nómbe. I arhikuekasïndi eska kʼuiripueri tsípikua Tata Diosïri jájkirhu pakarasïnga. Tata Diosïri uinhapikuajkusï újti nemani ménderu espiritu íntskuntani, o uinhapikua enga tsípikua íntspejka paraka ménderu irekaaka.

¡Sésichi pʼikuarherasïnga mítini ambe enga Tata Diosï uáka imechani jingoni engaksï mintsikuarhini jaka “inchatsikurini”! (Juanu 5:28, 29.) Enga niáraakia jurhiatikua para Jeoba tsítantaani, jimbanhi kuerpu ma íntskuantauati ka tsítantauati íntskuaparini espiritu o uinhapikua enga tsípikua íntspejka. ¡Kánikua tsípikua jauati!

Parajtsï sánderu mítini na engaksï úrakuarhijka Bibliarhu uandakuecha “alma” ka “espiritu”, kánikuaksïni jarhuatati foietu: ¿Qué nos sucede cuando morimos? ka libru, Razonamiento a partir de las Escrituras pájinecharhu 32 a 36 ka 136 a 140. Engaksï Jeobaeri testiguecha uáka.