1, 2. ¿Andichisï uandajki eska Biblia ambakiti regalu máeska Tata Diosïri?

¿MIÁSÏNTSÏ engaksïni amigu ma sési jásï regalu ma íntskupka? Jamberijtsï tsípipka ka sésijtsï pʼikuarherani. Jimboka indeni jimbo, chári amigu xarhataska na engaksïni xáni uékajka, ka chájtsï meiamukua íntskuntapka.

² Biblia, Tata Diosïri regalu máesti ka jatsiskachi para jukaparharani. I ambakiti librujtsïni aiangusïndi ambe ma engachi no úpiringa mítini támisï. Aiangusïndijtsïni néna kueraanhaski auanda, jóskuecha, Echeri ka orheta temungurhiri. Ístujtsïni jorhendasïndi nákiskiksï mandamientuecha engajtsïni jarhuatajka uandanhiatechani jingoni. Bibliajtsïni ístu aiangusïndi ambe uá Tata Diosï para sánderu sési jánhaskuarheni Parhakpinirhu. ¡Jimbosï xáni ambakiti regalu máeti!

3. ¿Ambe xarhataski Jeoba íntskuparintsïni Bibliani, ka andijtsïnisï i regalu sési pʼikuastajki?

³ Biblia, ístu regalu máesti engajtsïni sési pʼikuastajka, jimbokajtsïni jorhendasïnga imeri ambe enga úka ini regaluni, Jeoba. Jeoba uékasïndi eskachi sési mítiaka,  jimbojtsïnisï íntskuti Bibliani. Bibliajtsïni jarhuatasïndi parachi úni andarherani Jeobani.

4. ¿Ambeksïni ísku pakatasïni mítini na enga Biblia etsakuarhini jaka?

⁴ Engajtsï jatsikuarheka Bibliani, nójtsï chájkueska. I libru, iámindu o ma parti, jukari dosmili seisientu idioma jimbo jarhasti, ísï jimbo, iámu parhakpinirhu, sáno iámindu kʼuiripuechaksï jatsisti Bibliani. Jukari ma miioni Bibliaecha etsakunhasïndi mándani semana, ka uánikua miioni Bibliaechaksï únhastia iámu o ma parti. Ísï jimbo, no ma libru jarhasti enga májkuenika eska Biblia.

5. ¿Andichisï uandajki eska Biblia Tata “Diosïni jimboes[ka]”?

⁵ Ístu, Biblia “Diosïni jimboesti” (arhinta je 2 Timoteo 3:16). ¿Ambe arhikuekasïni i uandakua? Bibliamindu uandasïndi: “Ima pímbinharhati achaticha Diosïni jimbosïksï uandaendi ka eska Espiritu Santu na uandarauanga” (2 Pedru 1:21). Ísïsti komueska enga ma táti kurhakujka imeri uájpani eska karta  ma karaaka. Jimboka tátemba arhisïnga ambe enga karaaka, i karta no uájperisti sino tátemberi. Májkuenisti, Biblia, Tata Diosïri eratsikuani jukanharhisti no kʼuiripuecheri engaksï karaka. Ísï jimbo, iámu Biblia jindesti “uandakua Diosïri” (1 Tesalonika 2:13).

6, 7. ¿Andisï iámu karakata enga Bibliarhu jaka májku eratsikue?

⁶ Biblia mili seisientu uéxurhini jimbo karakuarhisti, ima achaticha engaksï karaka, mámaru jurhiatikuechani jimboksï irekaspti ka mámaru jásï kʼuiripuesptiksï: máruksï echerini ánchitarhasïrendi, máruksï kurucha pʼitamatispti ka máru karichi eranguticha, profetecha, juesicha ka reicha. Ka Lukasï, enga Ebanjeliuni ma karantaka, doktorispti. Peru nájkirukaksï mámaru jásï kʼuiripuepka, Biblia májku jásï eratsikua jingoni jorhentpesïndi desde primeru pájinarhu asta últimurhu, ka iámindu ambe sési terokuntasïndi. *

⁷ Orheta libru Bibliarhu anapu, uandasïndi na enga uénakuarhika kʼuiripuecheri uandanhiatecha, ka últimu libru uandasïndi na enga Echeri sési jándekua ma o jardini ma úkuarhintaaka. Iámu inde ambe enga Bibliarhu karakata jaka, uandantasïndi kʼuiripuecheri irekakua enga kuatru mili uéxurhini ísï jimbo úkuarhika, ka iápuru Bibliarhu uandasïndi ambe enga Tata Diosï uékajka úni. Ískujtsïni pakatasïndi exeni na enga karakata jaka Biblia, peru jindeesti jimboka Tata Diosïni jimboeska.

8. Íntspia je ejempluechani engaksï xarhatajka eska Biblia jurhimbitiska.

 ⁸ Biblia jurhimbitisti. Ióni tiempu antesi, tʼuini uandasïrendia ambe ma engaksï kʼuiripuecha apenasi no ióni mítika. Exe je, Lebitikueri libru uandasïrendi máru leichani enga Israeli jatsipka para úni, paraksï no pʼamenchani ka paraksï no kérikuarhiani máru pʼamenchakuechani ka ini ambe, máteru nasionichaksï no mítispti. Ióntki, mámaru uandanhasïrendi na enga jásïpka Echeri, peru Biblia tʼuini uandasïrendia eska Echeri uirhipitispka (Isaías 40:22). Ístu uandasptia eska Echeri “no ma ambe jimbo” tirhipakata jarhaspka (Job 26:7). Nájkiruka Biblia no jindeeka libru ma enga eskuelecharhu úranhajka, jurhimbitijtsïni eiangusïndi enga kʼuiripuecheri ka echeriri ambe uandajka. ¿Nochi i ambe erokuarhipirini Tata Diosïri libruni jimbo?

9. a) ¿Biblia néna jurhimbitiski ka mintsinharhikueni enga ióntki anapu ambe uandajka? b) Engaksï Bibliani karaka, ¿andiksïsï kara iámindu ambe enga úkuarhipka?

⁹ Ístu Biblia jurhimbitisti ka mintsinharhikueni, jimboka uandantasïnga iámu ambe enga ióntki úkuarhipka. Uandasïndi máru kʼuiripuecheri, ka ístu imecheri ióntki anapu parientembecheri. * Uánikua kararicha nóksï karantasïndi engaksï imecheri iretecha tsïtajka uarhiperakuechani. Peru imecha engaksï Bibliani karaka, iámindu ambeksï jatsikusti asta imani ambe enga imecha mísmu ka imecheri nasioni no sési úpka. Númerusiri librurhu, jatasti ejemplu ma, Moisesi uandantasïndi eska no sési jásï ambe úspka ka eska imani ambe jimbo, uinhamu xukanhaspka  (Números 20:2-12). Peru i ambe no xarharasïndi máteru libruecharhu enga ióntki anapu ambe uandajka, peru Bibliarhu kʼóru jo: jimboka Tata Diosïriska.

10. ¿Andisï no úkua juka kurhanguni eska Biblia, libru máeska engajtsïni kánikua marhuachijka?

¹⁰ Jimboka Biblia Tata Diosïni jimboeska, “marhuasïndi  para jorhentpini, para jánhastpini, ka para arhistatspini” (2 Timoteo 3:16). Libru máesti engajtsïni marhuachijka. Iámu Bibliarhu, xarharasïndi eska ima enga Úka Bibliani sési mítiska ambe engachi uétarhinchajka. Ka i ambe ísïsti jimboka ima enga Úka Bibliani, jindeeska juchari Kueraajpiri Jeoba. Ima sánderu sési mítisti eska jucha, na engachi pʼikuarherajka ka ambe engachi eratsijka. Ka mítisti ambechi uá ka ambechi no uá parachi sési irekani.

11, 12. a) ¿Ambe ka ambe jorhentpespi Jesusi imeri arhijtsïkperatarhu? b) ¿Ambe máteru ambe jorhentpisïni Biblia, ka andisï méntkisï marhuajki ambe enga Biblia uandajka?

¹¹ Eranhaska je Jesusiri arhijtsïkperatani enga Mateu kapitulu 5 a 7 jimbo jaka. Ini ambakiti arhijtsïkperakua jimbo, Jesusi uánikua ambe jorhentpesti, jorhentpesti néna sési irekani, néna sési pájperani máteruechani jingoni, néna úni kómarhikua ka néna exeni jatsikuarhekuani. Ka imeri uandakuechaksï májkueni marhuasïndi iásï, eska jiáni enga uandaapka.

¹² Máru ambe enga Biblia uandajka, familieri ambeesti, ánchikuarhiteri ka néna pájperani máteruechani jingoni. Ka ambe enga jima uandajka, jindeesti para iáminduecha ka marhuachisïndijtsïni. Bibliarhu anapu jánhaskakua, i uandakuechani jimbo xarharasïndi enga Tata Diosï, profeta Isaiasini arhipka: “Ji, Jeoba, jindeeska chíti Tata Diosï, Ima engakini jorhendajka parakari sési jauaka” (Isaías 48:17).

13. ¿Jeoba ambe arhispi Isaiasini eska karapiringa Babiloniaeri ambe?

¹³ Biblia uánikua profesiaechani uandaasïndi, ka uánikuaksï úkuarhistia. Exeakachi ejemplu ma. Profeta Isaiasini jimbo —enga irekapka sánderu de setesientu  uéxurhini ísï ante de Jesusi—, Jeoba uandaspti eska Babilonia kʼamajkunhapiringa (Isaías 13:19; 14:22, 23). Ka ístu uandaspti néna úkuarhipirini i ambe. Ejersitu ma anhaxustapirindi iorhekuani enga jimesïsï nitamaenga, ka inchapirindiksï iretarhu ka nóksï jamberi uarhipepirindi. Ka no indejku ambe uandaspti. Ístu profesia uandaspti eska Siru arhinhapiringa ima juramuti enga kʼamajkupiringa Babiloniani (arhinta je Isaías 44:27–45:2).

14, 15. ¿Néna úkuarhispi ambe enga Isaiasi karapka Babiloniaeri ambe?

¹⁴ Dosientu uéxurhini ísï tátsekua, 5 de oktubri chúrikua, uéxurhini 539 ante de Jesusi, Babilonia no iauani, ejersitu ma jarhaspti. ¿Né orhekupaaxapi? Siru, juramuti Persia anapu. Ísïsti, iámindu ambe jarhasptia paraka inde profesia úkuarhipiringa. Peru ¿úpirini Sirueri ejersitu inchaakuni iretarhu no uarhipeparini, ísï eska na uandakata japkia?

¹⁵ Babiloniuechaksï kʼuínchikua ma úxapti ima chúrikua ka nóksï chésïrendi jimboka kʼérati bardechaksï  uirhipandaspka iretani. Enga ísï úkuarhini japka, Siru úspti eska itsï enga Babilonia ísï nitamaenga máteru nani ísï nipiringa, ísï jimbo, nóteru jauamisptia ka sondaduechaksï úspti parhimeni paraksï andamukuerani iretarhu. Peru, ¿nénaksï úpirini uanajchakuani bardechani? ¡Babiloniuechaksï no kuenta íntskukuarhispti eska iretarhu anapu puertechaksï mítakata pakaraspka!

16. a) Eska na uandapka Isaiasi, ¿ambe úkuarhinchapirini Babilonia? b) ¿Néna úkuarhiski profesia enga Isaiasi uandapka eska nóteru nema irekapiringa jima?

¹⁶ Jeoba i ambe uandaspti Babiloniaeri ambe: “Nóteru méni irekanhaati jima, ísï pakaraati para méntkisï. Ka jima árabe, no méni irekaati, ka no ma karichi eranguti jurajkuati eska imeri karichichaksï jima apoakuaka” (Isaías 13:20). I profesia uandaspti eska Babilonia kʼamajkunhapiringa, ka ístu eska nóteru méni irekanhapiringa jima. Chájtsï uáka exeni eska i ambe ísï úkuarhiska. Jini Iraki, 80 kilometru ísï jima uératini enga iásï Bagdadi jaka, jimaksï jarhasti tsakapuecha enga ióntki Babiloniaepka. Nóteru nema irekastia jima, i ambe xarhatasïndi eska úkuarhiska ambe enga  Jeoba uandapka Isaiasini jimbo: “Eskoba kʼamajkukuerini jingoni kʼarhatantaaka” (Isaías 14:22, 23). *

17. ¿Andisï uinhaperantajki juchari mintsikakuani mítini eska úkuarhisïnga ambe enga Biblia uandajka?

¹⁷ ¿A no eska uinhaperantasïnga juchari mintsikakuani, mítini eska úkuarhisïnga ambe enga Biblia uandajka? Ísïsti, ióntki Jeoba ústi ambe enga aiatspipka, ka i ambe úsïndi eskachi mintsikaaka eska ístu juaaka paraisuni engajtsïni aiachini jaka (arhinta je Números 23:19). Jo ísïsti, jatsiskachi para “méntku erokani ja[rhani] indeni tsípikuani enga jindeeka para méntkisï, enga Diosï enga no újka chkuanderani, eiatspika desdeka parhakpini nótki jindeanga” (Titu 1:2). *

18. ¿Ambe ambakiti ambe uandaspi apostuli Pablu Tata “Diosïri uandaku[eri]”?

¹⁸ Ambe engachi exekia ixú, xarhatasïndi eska no jarhaska máteru libru enga ísïka eska Biblia. Peru Biblia no inde ambe jimbojkusï jukaparhakueti jimboka iámu ambe terokuntasïnga, o jimboka jurhimbiti uandasïnga kʼuiripueri ka echeriri ambe, o ambe enga ióntki úkuarhika, o jimbokajtsïni jarhuatasïnga irekakuarhu, o jimboka ambakiti profesiechani uandaasïnga. Útasï uánikua ambe jatasti. Apostuli Pablu karasti: “Jimboka  Diosïri uandakua tsípitiska ka uinhapitini ka sánderu atarani ka eska nákinterku ma espada tsimani filueri, ka andajkuarhisïndi niárani asta almarhu ka espiriturhu ka kutukuecharhu ka asta únicharhu jamberi inchaakusïndi. Ka tsʼéjkusïndi indeni ambe enga ma kʼuiripu eratsijka ka pʼikuarhinhini imeri mintsitarhu” (Ebreu 4:12).

19, 20. a) ¿Nénajtsïni jarhuatasïni Biblia parachi exekuarhini? b) ¿Nénajtsï uá cha xarhatani eskajtsï jukaparharasïnga Bibliani, Tata Diosïri regaluni?

¹⁹ Arhintani Tata Diosïri “uandakuani” enga Bibliarhu jaka, uáti úni eskachi mójtakuaka juchari tsípikuani. Jarhuatasïndijtsïni parachi úni exekuarhini. No solu uétarhisïndi uandani eskachi uékasïnga Tata Diosïni. Seguni eskachi na jiókuarhiaka ambe engajtsïni Tata Diosï arhistachijka Bibliarhu, xarhataati na engachi jásï kʼuiripueka.

²⁰ Ísïsti, Biblia Tata Diosïni jimboesti. Biblianchi jatsiska para arhintani, para jorhenguarhini ka parachi uékani. Jorhenguarhi je útasï ka ísïjtsï xarhataaka eskajtsï jukaparharasïnga Tata Diosïri regaluni. Ístujtsï exeaka na enga xáni jukaparhakueka ambe enga Tata Diosï eratsini jaka úni. Máteru kapitulu jimbo, exeakachi ambesï uékajki úni Tata Diosï ka néna ísï uá.