UÁNIKUAKSÏ jukaparharasïndi ka respetarinksï krusini. Enciclopedia Hispánica jamberi uandasïndi, eska krusi jindeska “enga jimbo mítinhajka kristianuecha”. Peru, ¿sési jaki eskaksï kristianuecha úraaka krusini?

 Orheta, jukaparhakuesti mítini i ambe: tata Jesukristu no uarhisti krusirhu ma. I uandakua “krusi” griegu jimbo, jindesti staurós ka arhikuekasïndi “posti o chkari jurhimbiti”. I uandakua “no méni arhikuekasïndi tsimani chkari engaksï uanangurhika [...]. [Nuebu Testamenturhu] enga griegu jimbo karakuarhika, no ma ambe jarhasti enga sikiera xarhatajka eska i uandakua tsimani chkarichani arhikuekasïnga” (The Companion Bible).

Engaksï karaka Bibliani, úrasïndiksï máteru uandakuani máru textuechani jimbo, paraksï arhikuekani nani enga uándikunhaka Jesusi. I uandakua griegu jimbo jindesti xýlon, ka arhikuekasïndi “chkari” (Hechos 5:30; 10:39, Biblia Latinoamericana); 13:29, TNM; Gálatas 3:13, Biblia Latinoamericana; 1 Pedro 2:24, Reina-Valera).

Jorhenati Hermann Fulda uandasïndi andisï chkari ma úranhaeni enga nema uándikunhapiringa, uandasïndi: “Jimesïsï engaksï páenga nemani paraksï uándikuni, nóksï méntkisï jarhasïrendi anhatapuecha. Jimboksïsï anhantskaendi chkari ma ka jimaksï tirhipaasïrendi o cháparhataani no sési úrichani, ka tarhatakuasïrendiksï jájkichani paraksï jójkuani o chájkuani, ka chándukuasïrendiksï” (Das Kreuz und die Kreuzigung [Krusi ka na engaksï tirhipanhaenga krusirhu]).

Peru Tata Diosïri Karakatajtsïnisï sánderu sési eiangujti íri ambe. Apostuli Pablu karasti: “Kristujtsïni euajpintasti para eskachi no xukajchakatepiringa Leini jimbo, jimboka ima xukajchanhaska juchantsïni jimbo eska na karakata jaka: ‘Xukajchakateuati iámindu ima enga cháparhatanhaaka chkari ma jimbo’”, o eska na uandajka Biblia Latinoamericana, “un madero” (Gálatas 3:13, TNM). Apostuli Pablu, pʼitaspti ini uandakuechani Deuteronomio 21:22, 23 uératini ka jima chkariri ma uandasïndi, ka no krusini ma. Enga nema chkarirhu ma tirhipanhaenga “xukajchakata” úkuarhesïrendi. Jimboksïsï kristianuecha no ma ambe jatsijti kʼumanchikuarhu enga xarhataaka tata Jesukristuni krusirhu ma cháparhatakata jarhani.

Uánikua ambe jarhasti enga xarhatajka ambe úkuarhispi enga Jesusi uarhipkia. Tresientu uéxurhini ísï tátsekua enga Jesusi uarhipkia, imecha engaksï uandaenga eskaksï kristianuespka nóksï méni úrasti krusini imecheri kómarhikuarhu. Peru, siglu IV jimbo, juramuti Konstantinu niáraspti relijioni  ma jingoni úkuarhini engaksï uandaenga eskaksï kristianuespka, peru engaksï nóteru uéngia ambe enga Jesusi uandapka. Ka ima úndasti kánikua úrani krusini para mítinhantani imeri relijioni. Peru ambe uéjki jimbo enga Konstantinu úndaka úrani krusini, krusi no ma ambe jimbo terokuntasïndi Kristuni jingoni. Krusi, relijioni no jurhimbitirhu uérasti. Libru katoliku ma uandasïndi: “Krusi úranhasïrendia ante de Kristu echerirhu jurhani, ka ístuksï úrasïrendi imecha engaksï no jamberi jakajkuenga Kristuni” (New Catholic Encyclopedia). Máteru jorhenatichaksï uandasïndi eskaksï krusini úrasïrenga paraksï jurhiatani kómarhini ka pʼindekuecharhu engaksï ísku jándikua ambe uénga imecha engaksï no marhuakuaenga Tata Diosïni.

Jiájkani, ¿andiksïsï xáni úraeni krusini? Jimbokaksï ísï úpiringa antsitaani imechani engaksï no jatsipka relijioni ma, paraksï niárani seguni “kristianu úkuarhini”. Peru Biblia uandasïndi eska ma no jatsiska para úrani imani ambe engaksï relijioni no jurhimbiticha úrajka (2 Korintu 6:14-18). Ístuchi no jatsiska para diosï úkatechani kómarhiani (Éxodo 20:4, 5; 1 Korintu 10:14). Jimbosï ima enga meru kristianueka no úrajti krusini para Tata Diosïni kómarhini. *