1-3. ¿Náki ikiatspitijtsïni jámaxaki andanguni, ka andichisï sési pʼikuarherajki mítini ambe enga jorhentpijka Biblia inderi ambe?

ERANHASKA je eskajtsï sïpakuarhikuxaka nemani engaksïni kánikua ikiachijka, ima sánderu uinhapisti ka sánderu uiriisïndi eska cha. Mítiskajtsï eskaksïni no pʼamojkuaka engaksïni jupikaska, jimbokajtsï exeskia eska uándikuaskia uánikua chári amiguechani. Ka nájkirukajtsï uinhamu uiriijka, ima jimaterku jurhasïndia. Ísï xarharasïndi enajkijtsï nóteru uáia sïpakuarhikuni. Peru ma repentku, jurhasïndi jarhuajpiri ma enga sánderu uinhapitika eska chári ikiatspiti ka arhisïndiksïni eskaksïni jarhuaataka. ¡Chájtsï sési pʼikuarherantasïnga!

² Iásï, jámaxatiksïnia andanguni nema enga ísïka eska i ikiatspiti. Jo, iámindu juchantsïni jámaxatiia andanguni. Eskachi na exekia máteru kapitulurhu,  Biblia uandasïndi eska uarhikua ikiatspiti máeska. Nochi úsïnga sïpakuarhikuni ka ni andani, ka sáno iáminduchi exeskia eska uándikuskia nemani enga jucha uékaenga. Peru Jeoba sánderu uinhapitisti eska uarhikua. Ka ima jindesti juchari Jarhuajpiri, engajtsïni kuájpintajka. Jeoba xarhatastia eska uáka andani uarhikuani ka aiatspesïndi eska kʼamajkuaka para méntkisï. Biblia uandasïndi: “Ka últimu ikiatspiti enga andanhaaka jindeati uarhikua” (1 Korintu 15:26). ¡I kánikua ambakiti ambesti!

³ Ju je eratsini na engachi xáni no sési pʼikuarherajka engachi uarhirajka nemani. Ka ísïchi uáka kurhanguni na enga xáni sésiika i ambe: Jeobajtsïni aiachesïndi eskaksï uarhiricha tsípikua intsïnhantaaka (Isaías 26:19). Jeoba uáti eskaksï uarhiricha ménderu irentaaka, i erokuarhikuasï jindeti tsíntskua.

4. a) ¿Andisïchi újki mítini na enga pʼikuarherajka Jeoba, engachi exejka na enga pʼikuarherapka Jesusi enga uarhipka imeri amigu ma? b) ¿Neechani jingoni sési pájperasïreni Jesusi?

⁴ ¿Uarhiraskijtsï ménisï nemani engajtsï kánikua uékaenga? Ma kánikua no sési pʼikuarherasïndi, ka ístu ma kómu pʼikuarherasïndi enga no ma ambe újka úni paraka ima no uarhiaka. Jiánichisï sánderu uétarhinchajka eskajtsïni sési pʼikuastaaka Tata Diosïri Karakata (arhinta je 2 Korintu 1:3, 4). Bibliajtsïni jorhendasïndi na engaksï pʼikuarherajka Jeoba ka Jesusi, enga nema uarhijka. Aiangusïndijtsïni na  enga xáni no sési pʼikuarherapka Jesusi, enga uarhipka imeri amigu ma, ka mítiskachi eska Jesusi sési xarhatasïrenga na enga jásïka Tátemba (Juanu 14:9). Enga Jesusi niraenga Jerusaleni, pʼorhembisïrendi Lasaruni ka imeri ermanuembechani, Mariani ka Martani, engaksï Betania irekapka, Jerusaleni no iauani. Xániksï sési pájperasïrendi enga Biblia jamberi niárajka uandani: “Jesusi meru tsípisïrendi exeni Martani ka imeri jingonikuembani ka ístu Lasaruni” (Juanu 11:5). Peru eskachi na exekia kapitulu 6 jimbo, Lasaru uarhispti.

5, 6. a) ¿Néna pʼikuarheraspi Jesusi enga exepka eskaksï ueraxapka Lasarueri amiguecha ka parienticha? b) ¿Andijtsïnisï uinhaperantajki mítini eska Jesusi no sési pʼikuarheraspka?

⁵ ¿Néna pʼikuarheraspi Jesusi enga uarhipka imeri amigu ma? Biblia uandasïndi eska ima niraspka pʼorhembiani Lasarueri amiguechani ka parientichani engaksï uerani japka, jimboka Lasaru uarhispka. Enga exeapka “kánikua no sési pʼikuarheraspti ka ístu uandanhiani” ka tátsekua “pʼiarasti uerani” (Juanu 11:33, 35). ¿Andisï xáni no sési pʼikuarherapi? Andi ¿nóteru ambe ma jarhaspia para úni? Jo, Jesusi úpirindi úni ambe ma. Jesusi mítispti eska kánikua ambakiti ambe úkuarhipiringa (Juanu 11:3, 4). Peru útasï ísï, kánikua no sési pʼikuarheraspti enga Lasaru uarhipka.

⁶ Uinhaperantasïndijtsïni mítini na enga pʼikuarherapka Jesusi. Ka jorhendasïndijtsïni eska Jesusi ka imeri Tátemba ikichasïngaksï uarhikuani. Ístu, Jeoba jatsisti uinhapikua para andani uarhikuani. Exeakachi milagru ma enga Jesusi úpka imani uinhapikuani jingoni enga Tata Diosï íntskupka.

7, 8. ¿Andiksïsï uánikuecha engaksï jima japka úpirini eratsini eska nóteru ambe ma úpiringa úkuarhini Lasaruni jingoni, peru ambe úspi Jesusi?

⁷ Lasaru kueba ma jimbo jatsinhantaspti ka Jesusi uandaspti eskaksï kénditapiringa tsakapuni enga ómutaenga kuebani. Peru Marta arhispti eska tʼámu jurhiatikua páxapkia uarhirini ka eska jamberi úpiringa tereni jarhania (Juan 11:39, TNM). Kʼuiripuechaksï eratsendi eska nóteru ambe ma úpiringia úkuarhini.

⁸ Engaksï kénditapkia tsakapuni, Jesusi uinhachaspti: “Lasaru, juni uéntani”. ¿Ambe úkuarhispi? “Uarhiri luejku uéntaspti.” (Juanu 11:43, 44.) ¿Eranhaskasïntsï na engaksï xáni tsípipka iáminduecha? Lasarueri ermanaecha, parienticha, amiguecha ka besinuecha mítisptiksï eska ima uarhispkia; peru iásï jima jarhasptia ménderu imechani jingoni. Jamberiksï no uáendi jakajkuni eska i ambe ísï úkuarhixapka. Uánikuechaksï tsípikua jingoni kamajchakuntaspti. ¡Úsïngachi exeni eska Jeoba jatsiska uinhapikua para andani uarhikuani!

9, 10. a) ¿Néna xarhataspi Jesusi nésï íntskupi uinhapikua para tsítantani Lasaruni? b) ¿Nénajtsïni jarhuatasïni arhintani uandantskuechani engaksï tsíntskueri ambe uandajka?

⁹ Jesusi no uandaspti eska jandiajku úspka ini milagruni. Ante de Lasaruni uandajpani, kómarhikua ma úspti, enga jimbo xarhatapka eska Jeobasï újka eska nema tsíntaaka (arhinta je Juanu 11:41, 42). Peru Jeoba no jiájkantkusï ísï úrapti imeri uinhapikuani. Tata Diosïri Karakata uandasïndi eska Jeoba úraska máteru ochu uelta imeri uinhapikuani  para tsítantaani uarhirichani. * Arhiantani ka jorhenguarhiani ini uandantskuechani, sésijtsïni pʼikuastasïndi. Jorhendasïndijtsïni eska Tata Diosï no máruechantku uékaasïnga, jimboka tsítantaaska kʼérati ka sapirhatichani, achati ka uarhiitichani, Israeli ka no Israeli anapuechani. ¡Ka ini uandantskuechani jimbo, exesïngachi na engaksï xáni tsípipka imecha! Enga Jesusi tsítantapka uátsïni ma, uátsïri tátembecha, “kánikuaksï sési pʼikuarheraspti” (Marcos 5:42, TNM). Jo, Jeoba íntskuaspti ambe ma engaksï no méni mirikurhipiringa.

¹⁰ Imechani enga Jesusi tsítantaapka, ménderuksï uarhispti. ¿Arhikuekasïni i ambe eska no marhuaspka enga ísï tsítantaapka? Nómbe, no ísïsti. I uandantskuecha engaksï Bibliarhu jaka, xarhatasïndi eska ísïska ambe enga Biblia jorhentpijka.

11. ¿Néna xarhatasïni Lasarueri tsíntskua eska ísïska eska na enga uandajka Eclesiastés 9:5?

¹¹ Biblia jorhentpesïndi eskaksï uarhiricha “no ma ambe mítis[ka]” (Eclesiastés 9:5). I ambe arhikuekasïndi eskaksï no ma ambe mítisïnga ka eskaksï no nani tsípiti jarhasïnga. Ísï xarhatasïndi ambe enga úkuarhipka Lasaru jingoni. Enga ima tsíntapka, ¿aianguaspi kʼuiripuechani néna jándespi auandarhu? ¿Chéraaspi aianguaparini na enga xáni no sésipka infiernurhu? Nómbe. Biblia no ma ambe  uandasïndi. I tʼámu jurhiatikua enga Lasaru uarhirini japka, “no ma ambe mítispti”. Ima kʼuíxapti uarhikuarhu (Juanu 11:11).

12. ¿Andichisï jakajkujki eska Lasarueri tsíntskua ísï úkuarhiska?

¹² Lasarueri tsíntskua, jorhendasïndijtsïni eska tsíntskua no jindeska ambe ma enga ísku újtsïkuarhinhantaka, sino ambe ma enga ísï úkuarhika. Uánikuaksï jarhaspti jima enga Jesusi tsítantapka Lasaruni. Asta relijioniri orhejtsïkuticha jamberi, engaksï ikiakuenga Jesusini, jiókuarhisptiksï eska i ambe ísï úkuarhespka, jimboksïsï uandapti: “¿Ambechi uá jucha jimboka i achati uánikua milagruechani uaaxaka?” (Juanu 11:47). Uánikuaksï niraspti exeni Lasaruni enga tsíntapka ka jakajkusptiksï Jesusini. Engaksï exepka Lasaruni, jánhaskaptiksï eska Tata Diosïsï axapka Jesusini. Jimboksïsï máru relijioniri orhejtsïkuticha, engaksï kánikua no ambakipka, úndapti jirinhani néna uándikuni Jesusini ka Lasaruni (Juanu 11:53; 12:9-11).

13. ¿Andichisï uá seguru jarhani eska Jeoba uáka tsítantaani uarhirichani?

¹³ ¿Sési jaki eskachi jakajkuaka tsíntskuani? Jo, jimboka Jesusi aiatspeska eska “iámindu imecha engaksï inchatsikurini jaka” tsíntaakaksï (Juanu 5:28). Jeoba jindesti enga kueraaka iámindu jásï tsípikuani, jimajkani, ¿no uá Jeoba ménderu tsípikua íntskuantani kʼuiripuechani? Seguni eska na xáni uáka miáni Jeoba. ¿Úsïni Jeoba miáuani imechani engachi uékauenga ka engaksï uarhikia? Eratsi je i ambe: ¡Tata Diosï mítisti arhinhakua iámindu imani miioni jóskuecheri engaksï auandarhu jaka! (Isaías 40:26.) Ísï jimbo, ima iámindu ambe  miásïndi imecheri engachi jucha uékauenga ka engaksï uarhikia, ka ístu uékaxati tsítantaani.

14, 15. Eska na uandapka Jobu, ¿na xáni uékaxaki Jeoba tsítantaani uarhirichani?

¹⁴ Peru ¿na xáni uékaxaki Jeoba tsítantaani uarhirichani? Biblia jorhentpesïndi eska Jeoba uékaxaka ísï úni. Jobu, achati ma enga marhuakuenga Tata Diosïni kurhanguarhispti: “Enga kʼuiripu ma uarhiaka, ¿uá ménderu irentani?”. Jobu ístu uandaspti eska inchatsikurini erokuarhipiringa astaka Tata Diosï miápiringa. Jimbosï arhipti Jeobani: “Tʼurini uandajpaaka, ka jíkini mókuchiaka. Kánikuari uékaaka ísï úni chíti kueraakatani jingoni” (Job 14:13-15).

¹⁵ Eratsi je i ambe: Jeoba kánikua uékaxati tsítantaani uarhirichani. Sésijtsïni pʼikuastasïndi mítini eska Jeoba uékaxaka tsítantaani uarhirichani, ¿no ísïski? Peru ¿néna úkuarhia i tsíntskua? ¿Néksï tsíntaa ka nani?

16. ¿Nénaksï irekaa imecha engaksï tsíntaaka?

¹⁶ Engachi arhintajka Bibliarhu ima tsíntskuecheri engaksï ióntki úkuarhipka, uánikua ambechi jorhenguarhisïnga enga sánderu orhepatini úkuarhiaka. Imecha engaksï tsíntapka, úsptiksï ménderu Echerirhu jarhani imechani jingoni engaksï xáni uékauenga. Ísï jimbo, ima tsíntskua enga jauaka, sáno májkueniuati, peru iauani sánderu sési. Eskachi na exekia kapitulu 3 jimbo, Tata Diosï uékasïndi eska i Echeri paraisu ma úkuarhintaaka. Ísï jimbo, jiáni engaksï uarhiricha tsíntaaka, nóteru  jauatia uarhiperakuecha, atajperakuecha ka ni pʼamenchakuecha. Kánikuaksï sési irekaati ka pínandikua jingoni, para méntkisï.

17. ¿Namuni kʼuiripuechaksï tsíntaa?

¹⁷ ¿Néksï tsíntaa? Jesusi uandasti eskaksï “iámindu imecha engaksï inchatsikurini jaka [enga Jeoba miáuani jaka], kurhaaka imeri uandakuani, [...] ka tsíntaatiksï” (Juanu 5:28, 29). Ístu Biblia uandasïndi: “Mari íntspiantasti uarhirichani engaksï jima japka, ka uarhikua ka sepultura ístuksï íntspiantasti uarhirichani engaksï jima japka” (Revelación [Apocalipsis] 20:13, TNM). (Exe apendisini “¿Ambeeski Seol ka Hades?” ini librurhu.) Engaksï uánikua ima miioni kʼuiripuecha tsíntaakia, nóteru nema pakaraatia jima engaksï uarhiricha mintsikuarhini jaka iásï. Apostuli Pablu uandaspti: “Tsíntaa[tiksï] uarhiricha imecha engaksï ambarhatika, ka ístu imecha engaksï malueka” (Ukuecha 24:15). ¿Ambeksï arhikuekasïni i uandakuecha?

18. ¿Néskiksï máru “ambarhati” kʼuiripuecha engaksï tsíntaaka, ka nénaksïni marhuachisïni mítini eska jauaka tsíntskua?

¹⁸ Máru “ambarhati” kʼuiripuecha, jindestiksï imecha engaksï Bibliarhu jaka ka engaksï irekapka ixú ante de Jesusi jurhani Echerirhu, komueska Noe, Abraani, Sara, Moisesi, Ruti, Esteri ka ístu máteruecha. Ebreu kapitulu 11 uandasïndi máru i kʼuiripuecheri engaksï mintsikapka Tata Diosïni. Peru ístu máteru “ambarhati” kʼuiripuecha, jindestiksï imecha engaksï iásï marhuakujka Jeobani ka engaksï niárajka uarhini. Mítini eska jauaka tsíntskua, úsïndi eskachi no chéaka uarhini ísï eskaksï na chéjka máteruecha (Ebreu 2:15).

19. ¿Néskiksï imecha engaksï “malueka”, ka ambe sésikua íntsaua Jeoba?

 ¹⁹ Uánikua miioni kʼuiripuechaksï no méni ústi mítini Jeobaeri ambe, jimboksïsï no méni úti marhuakuni. ¿Ambe úkuarhia ícha jingoni enga Biblia arhiajka eskaksï “malueska”? Tata Diosï no mirikurhiauati. Ima tsítantauati, ka tiempu íntsauati parakaksï mítiaka ka parakaksï marhuakuaka. Jeoba mili uéxurhini íntspiati parakaksï uarhiricha tsíntaaka, ka i kʼuiripuecha, márkuksï marhuakuati Jeobani echerirhu imechani jingoni engaksï no méni jurajkuka. I mili uéxurhini, ambakiti tiempu máeuati, ka Biblia ini tiempuni arhisïndi: Jurhiatikua para Tata Diosï Jusgarpini. *

20. ¿Ambeski Gehena, ka néchaksï nirasïni jima?

²⁰ ¿Arhikuekasïni i ambe eskaksï iámindu uarhiricha tsíntaaka? Nómbe. Biblia uandasïndi eskaksï máru uarhiricha “Gehenarhu” jarhaska (Lucas 12:5, TNM). ¿Ambeski Gehena? Ióntki Gehena, jindespti jima enga basura kʼuanikunhenga jini Jerusaleni uéramanisï, ménichani, jimaksï kurhirasïrendi basurani ka ístu máru uarhirichani. ¿Náki uarhirichanksï jima kʼuanijpaasïreni? Imechani engaksï judiuecha exeanga eskaksï no sésikua jatsispka para jatsinhantani ka ni paraksï tsítanhantani. Ísï jimbo, Gehena arhikuekasïndi eska kʼamajkunhaaka para méntkisï. Jesusi jarhuajpiati para uarhirichani jusgariani, peru Jeoba jindesti sánderu Kʼéri Juesi (Ukuecha 10:42). Ka Tata Diosï no méni tsítantauati imechani  enga ima mítika eskaksï no sési úriska ka engaksï no uékajka mójtakurhini.

21, 22. a) ¿Ambe máteru jásï tsíntskua jarhaski? b) ¿Né uénaski tsítanhantani komueska espiritu ma?

²¹ Bibliajtu jorhentpesïndi eska jauaka máteru jásï tsíntskua, enga jindeuaka para auandarhu nirani irekani. Tata Diosïri Karakata uandasïndi májku kʼuiripueri enga i jásï tsíntskua jatsipka: tata Jesukristu.

²² Jesusi uándikunhaspti ixú enga kʼuiripu máepka, peru Jeoba no jurajkuspti eska imeri Uájpa Sepulturarhu pakarapiringa (Salmo 16:10; Ukuecha 13:34, 35). Tsítantasti, peru no kuerpu ma jingoni enga ísïka eska kʼuiripueri ma. Apostuli Pedru uandasïndi Kristueri ambe: “Jimboka imeri kuerpu uándikunhaspka, peru tsítanhantasti kuerpu ma jingoni enga no xarharajka” (1 Pedro 3:18, TNM). ¡Xáni kʼéri milagru ma! Jesusi ménderu tsípiti jarhasptia komueska espiritu uinhapiti ma (arhinta je 1 Korintu 15:3-6). Ima jindesti enga uénapka ísï tsítanhantani, peru no imajkusï ísï tsítanhantapirindi (Juanu 3:13).

23, 24. ¿Naniksï irekaa “namunitku karichicha”, ka namuniskiksï?

²³ Jesusi mítispti eska sóntku níntapiringa auandarhu, jimbosï arhiapti imeri jorhenguarhitichani engaksï no méni jurajkupka, “jimajkani nipachkanderhuksïni sési jántskachini” (Juanu 14:2). Imechani engaksï auandarhu nipiringa arhiaspti, “juchiti namunitku karichicha” (Lucas 12:32, TNM). ¿Namuni kʼuiripuecheskiksï ini grupu sapichurhu? Jaŋaskuecha  14:1 jimbo, apostuli Juanu uandaspti: “Ji ménderu eraspkani [...] Karichi sapichuni [Jesukristu] Sioni anapu juáta jimbo, ka imani jingoni jarhasptiksï siento kuarentaikuatro mili kʼuiripuecha engaksï imeri nombri ka ístu imeri Tátemberi nombri jukarini japka tserhukuarhu”.

²⁴ Ini 144,000 kristianuechani —engaksï ístu, Jesusiri apostulicha kuenta úkuarhejka—, Tata Diosï  tsítantaasïndi paraksï auandarhu irekani. ¿Káni úkuarhisïni i tsíntskua? Apostuli Pablu karasti eska jindepiringa ima tiempu jimbo enga Kristu juramuni japiringia auandarhu (1 Korintu 15:23). Ka eskachi na exeaka kapitulu 9 jimbo, iásï indeni jurhiatikuechani jimbochi irekaxaka. Iásï, i grupueri engaksï jindeka 144,000 nóteruksï uánikuestia engaksï pakarajka ixú echerirhu. Engaksï ícha uarhiaka, jirejiresïksï tsíntaati paraksï auandarhu irekani (1 Korintu 15:51-55). Peru sáno iámindu kʼuiripuecha, arinksï mintsikakuani jatsisti, tsíntani, paraksï ixú Echerirhu irekani paraisurhu.

25. ¿Ambechi exeni jaua máteru kapitulu jimbo?

²⁵ Chájtsï uáka seguru jarhani eska Jeoba andaaka juchari ikiatspitini, uarhikuani, ka eska kʼamajkuaka para méntkisï (arhinta je Isaías 25:8). Perujtsï jamberi kurhamarhikuarhijka: “¿Ambeksï uá auandarhu imecha engaksï jini tsíntaaka?”. Íksï, juramuati Tata Diosïri Reinurhu. Máteru kapitulu jimbo, exenchi jauaka sánderu i Reinueri ambe.