1. ¿Nanichi uá mítini ambe úkuarhia sánderu orhepatini?

ENGAJTSÏ exeajka notisiechani, ¿niáraskijtsï kurhamarhikuarhini néna kʼamarhukua i parhakpini? Ini jurhiatikuecharhu, no nema úsïndi uandani ambe úkuarhia pauandikua, jimboka no sési jásï ambe sóntku úkuarhisïnga ka no nema erokuarhisïndi (Santiagu 4:14). Pero Jeoba kʼóru mítisti ambe úkuarhia sánderu orhepatini (Isaías 46:10). Iónistia enga Biblia uandapka i no sési jásï amberi enga iásï úkuarhini jaka, peru ístu uandaspti eska ambakiti ambe úkuarhiaaka sánderu orhepatini.

2, 3. Jorhenguarhiticha, ¿ambeksï kurhamarhispi Jesusini, ka ambe arhiaspi ima?

² Jesukristu, uandaspti Tata Diosïri Reinueri ambe, ima gobiernu enga kʼamajkuaka no sési jásï ambeni ka enga uáka eska Echeri paraisu máeuaka (Lukasʌ 4:43). Imecha engaksï kurhajchapka Jesusini, uékasïrendiksï mítini káni jupirini ima Reinu. Imeri jorhenguarhitichaksï kurhamarhispti: “¿Káni úkuarhia i ambe? ¿Ka ambe mínda jaua enga i ambe úkuarhini jámaaka?” (Lukasʌ 21:7). Ima arhiaspti eska Tata Diosï Jeobajkusï mítipka káni kʼamakurhia  no sési jásï ambe parhakpinirhu (Mateu 24:36). Peru Jesusi kʼóru uandaspti, ambe enga úkuarhini japiringa Parhakpinirhu, ante de Tata Diosïri Reinu pínandikua ka sési irekakua ma juáni. Ka úkuarhixatiia ambe enga Jesusi uandapka.

³ Ante de exenchi imani ambe enga xarhatajka eska “kʼamaraxamkia i tiempu”, orhetachi jorhenguarhiaka guerreri ma, enga no ma kʼuiripu úka exeni. Jimboka i auandarhu úkuarheska, engaksï ánjilicha irekaka, ka na enga i guerra kʼamarhupka, kánikua jukaparhakuesti para jucha.

4, 5. a) ¿Ambe úkuarhispi auandarhu ísï tátsekua enga tata Jesukristu úndapka juramuni? b) ¿Ambe uandasïni Jaŋaskuecha 12:12 eska úkuarhipiringa imani guerra jimbo enga auandarhu úkuarhipiringa?

⁴ Kapitulurhu enga nitamakia, exeskachi eska tata Jesukristu 1914 jimbo uénaska juramuni auandarhu (arhinta je Daniel 7:13, 14). Ka ísï no ióni, úspti ambe ma. Biblia uandantasïndi: “Jarhaspti ma kʼéri guerra auandarhu, ánjili Migueli [máteru Jesusiri arhinhakua] ka imeri ánjilicha uarhiperaxaptiksï dragonini [Satanasi] jingoni, ka dragoni ka imeri ánjilicha Miguelini jingoni”. * Noambakiti ka imeri demoniuechaksï no úspti andani ka Parhakpinirhuksï kʼuanijpanhasti. Tata Diosïri ánjilichaksï kánikua tsípispti, jimboka Satanasi ka imeri demoniuechaksï nóteru auandarhu irekaspkia. Peru kʼuiripu no úpirindi májkueni pʼikuarherani. Biblia uandaspti: “Lástima cha engajtsï parhakpinirhu [...] jaka, jimbokaksïni Noambakiti jurhaska andarhierani chánksïni kánikua ikiaparini, jimboka mítiska eska nóteru ióni pakaraaka” (Jaŋaskuecha [Apocalipsis] 12:7, 9, 12).

 ⁵ Exe je ambe úkuarhipirini indeni guerrani jimbo: Noambakiti kánikua ikiapirindi ka uánikua uandanhiatechani juákuapirindi kʼuiripuni Echerirhu. Eskachi na exeaka, irekaxakachia ini jurhiatikuechani jimbo enga xáni no sési jánhaskuarheni jaka. Peru no ióniipirindi, Satanasi mítisti “eska nóteru ióni pakaraaka”. Biblia ini tiempuni arhisïndi “últimu jurhiatikuechani” (2 Timoteo 3:1). ¡Tsípisïngachi mítini eska no ióni jimbo Tata Diosï kénditaaka Noambakitini! Ju je exeni máru ambe enga Biblia uandapkia eska úkuarhipiringa ka enga iásï úkuarhini jakaia. Iámindu i ambe engachi exeaka, xarhatasïndi eskachi últimu jurhiatikuechani jimbo irekaxakaia ka eska no ióndani, Tata Diosïri Reinuni jimbo, uánikua kóntperatechaksï jauati para imecha engaksï kánikua uékajka Jeobani. Peru orheta, ju je exeni tʼámu ambe ima míndaeri enga Jesusi uandapka ka engaksï iásï úkuarhini japiringa.

6, 7. ¿Néna úkuarhixaki iásï ambe enga Jesusi uandapka guerrecheri ambe ka kʼarhingueri ambe?

⁶ “Ma nasioni anapuecha jauaraa[ti] paraksï uarhiperani máteru nasioni  anapuechani jingoni, ka ístu ma juramukuarhu anapuecha máteru juramukuarhu anapuechani jingoni.” (Mateu 24:7.) Últimu sieni uéxurhinichani jimbo, uánikua miioni kʼuiripuechaksï uarhistia guerrechani jimbo. Achati ma, Gran Bretaña anapu enga istorieri ambe uandajka, karasti: “Desde 1901 asta 2000 jamberi, no méni xáni uánikua kʼuiripu uarhixapti guerrechani jimbo. [...] Indeni uéxurhinicha jimbo, kasi nóksï méni kʼamakurhisti guerrecha, jimbokaksï ma tiempujkusï kʼamakurhienga ka ménderu máteru uénani”. Karakata ma enga Instituto Worldwatch petaka, uandasïndi: “Tanimu uelta sánderu uarhinhasti uéxurhinichani 1901 asta 2000 jamberi, eska imani guerrechani jimbo engaksï úkuarhipka desde tata Jesukristueri jurhiatikuechani jimbo, asta 1899 jimbo”. Desde 1914 jimbo, sánderu de sieni miioni kʼuiripu uarhisti guerrechani jimbo. Jamberijtsï chájtu uarhiranchaka nemani guerrani jimbo. Ka eranhaska je iámindu imechani engaksï ístu uarhiranchaka nemani guerrani jimbo.

⁷ “Jauati [...] kʼarhingua.” (Mateu 24:7.) Inbestigadorichaksï uandasïndi eska últimu treinta uéxurhinichani jimbo, sánderu kánikua tʼirekua ambe jarhaska. Peru útasï uánikua kʼuiripuechaksï no ma ambe  jatsikuarhesïndi para tʼireni, jimbokaksï no jatsiska echeri nani engaksï uáka jatsikuni ambe ma, ka ni tumina para tʼirekua ambe piárani. Paisicharhu engaksï pobrika, sánderu de mili miioni kʼuiripuechaksï sántku tumina jingoni irekasïndi: no jamberi ma dólari para ma jurhiatikua. Ka para sáno iámindu i kʼuiripu, imecheri kʼarhimakua pʼamenchakua úkuarhistia. Kúnguarhikua ma enga arhinhajka Organización Mundial de la Salud uandasïndi eska ma ambe enga újka eska sánderu de sinku miioni sapiichaksï uarhiaka ma uéxurhini jimbo, jindesti jimbokaksï no sési tʼiresïnga.

8, 9. ¿Ambe xarhatasïni eskaksï úkuarhixaka profesiecha enga Jesusi uandaapka jenchekuecheri ambe ka pʼamenchakuecheri ambe?

⁸ “Kʼérati jencheati.” (Lukasʌ 21:11.) Ma kúnguarhikua enga arhinhajka Servicio Geológico de Estados Unidos, uandasïndi eska ma uéxurhini jimbo, diesinuebi kʼérati jenchekuechaksï jauaka. Xánksï kʼératiuati engaksï jamberi uáka edifisiuechani chararaani ka echerini arhakuni. Ka sáno mándani uéxurhini, jarhasïndiksï jenchekuecha engaksï niárajka edifisiuechani xerendurhiantaani. Ka mítikuarhesti eska desde uéxurhini 1900 jimbo, jenchekuechaksï uándikuaskia  jukari tsimani miioni kʼuiripuechani. Karakata ma uandasïndi: “Nájkiruka iásï jakaia uánikua ambe enga kʼuiripu úrajka para mítini káni úkuarhia ka na xáni uinhapia jenchekua ma, útasïksï sáno májkueni xáni uánikuecha uarhisïndi”.

⁹ “Jauati [...] pʼamenchakua.” (Lukasʌ 21:11.) Nájkiruka ambakiti medisina ambe jaka, uinindesti kʼérati pʼamenchakuecha, engaksï iónisï jakaia ka engaksï apenasi xarharani jaka. Karakata ma uandasïndi eskaksï iásï sánderu etsakuarhiskia beinte pʼamenchakuecha engaksï mítikatepkia ka íksï pʼamenchakuecha jindesti tuberkulosisi, paludismu (o malaria) ka kólera, ka jarhastiksï máteru pʼamenchakuecha, enga kánikua úkua jukaka eska nema ambakintaaka medisina jimbo. Ka jarhastiksï máteru treinta pʼamenchakuecha engaksï jimbanhika ka máru i járhati, uándikusïndiksï kʼuiripuni ka iásï jamberi, útasï no jarhasti medisina para inde pʼamenchakuecha.

10. Eska na uandajka 2 Timoteo 3:1-5, ¿ambejtsï exesïni eska úsïnga kʼuiripu?

¹⁰ Biblia uandasptia ambe enga úkuarhipiringa parhakpinirhu últimu  jurhiatikuecharhu, ka uandaspti eska kʼuiripu ménderueni jásïpiringa. Apostuli Pablu uandaspti na enga jásïpiringa sáno iámindu kʼuiripu. Arhisïndijtsïni: “Ístu uétarhisïndi eskari mítitini jauaka eska últimu jurhiatikuechani jimbo jauaka peligru” (arhinta je 2 Timoteo 3:1-5). Pablu uandaspti eska kʼuiripu i ambe xarhatapiringa:

• solu pendientiksï pákuarhipirindi para imechajku sési uérani

• jukariksï jatsikuarhikuekapirindi

• nóksï janhanharhiapirindi tátembechani

• nóksï janhanharhipirindi Tata Diosïni

• nóksï uékperapirindi familiarhu

• nóksï ma ambe jimbo pʼíngukuarhipirindi

• no sésiksï kámpipirindi

• tsitipirindiksï tsípikuarhini pekaduni jimbo ka eska Tata Diosïni uékani

• ísïksï jámapirindi enajkiksï janhanharhijka Tata Diosïni, peru úkuechanksï jingoni xarhatapirindi eska no ísïska

11. ¿Ambe uandasïndi Salmo 92:7 eskaksï úkuarhinchaaka kʼuiripu no sési úricha?

¹¹ ¿Ísïski kʼuiripu chári iretarhu? Jo, ísïiti. Iásï, iápurisï jarhasti kʼuiripu enga ísïka eska na uandajka Biblia. Iámindu i ambe xarhatasïndi eska no ióni jimbo, Tata Diosï uáka ambe ma, jimboka Biblia uandasïnga: “Engaksï no ambarhati kʼuiripuecha uánijka ísï eska uitsakua na kánijka, ka engaksï iámindu no sési úricha tsïpajka, jindesti parakaksï kʼamajkunhaaka para méntkisï” (Salmo 92:7).

12, 13. ¿Ambe xarhatasïni eska “jurhimbiti jánhaskakua” kánikua úkuarheska iásï ini “últimu jurhiatikuechani jimbo”?

¹² Eska Biblia na uandapka, ini últimu jurhiatikuecharhu kánikua no sési jánhaskuarhexati. Peru Jeobaeri kúnguarhikuarhu ambakiti ambe úkuarhixati.

¹³ “Jurhimbiti jánhaskakua kánikua úkuarhintaati”, i ambe uandaspti Biblia, Danieliri librurhu. ¿Kániksï úkuarhipirini i uandakuecha? “Últimu jurhiatikuecharhu.” (Daniel 12:4.) Desde 1914 uénani, Jeoba jarhuataaxati imechani engaksï uékajka marhuakuni, parakaksï uáka sánderu sési kurhanguni jurhimbikua Bibliaeri ambe enga kánikua jukaparhakueka. Ka íksï jindesti máru ambe engaksï niáraka kurhanguni, jurhimbikua Tata Diosïri arhinhakueri ambe, mítistiksï ambesï uékajki úni Tata Diosï, andisï uarhi Jesusi, na engaksï jaka uarhiricha ka eska jauaka tsíntskua ma. Imecha engaksï Jeobani marhuakujka, jorhenguarhistiksïa sési irekani paraka sési nikuauaka ka parakaksï sési pakataaka Tata Diosïni. Sánderuksï sési kurhangusti ambeski Tata Diosïri Reinu ka na enga inde Reinu sési peentaaka iámindu ambe ixú Echerirhu. ¿Ambeksï úsïni imani ambe jingoni engaksï jorhenguarhijka? Parachi úni mítini ini mókuntskuani, ju je máteru profesiani exeni enga iásï úkuarhini jaka.

14. ¿Asta nani jamberi eianhpinhaxaki ambakiti eianhperakua Tata Diosïri Reinueri ka néksï eianhpixaki?

¹⁴ “Ambakiti eianhperakua Diosïri juramukueri, eianhpinhaati iápuru parhakpinirhu”, i ambe uandaspti tata Jesukristu eska úkuarhipiringa enga “kʼamarani jáma[piringia] i tiempu” (arhinta je Mateu 24:3, 14). Iámu parhakpinirhu, eianhpinhaxati ambakiti eianhperakua Tata Diosïri Reinueri, jo, eianhpinhaxati ambeeski Tata Diosïri Reinu, ambe enga uáka ka ambe engachi  uáka, parachi intsïnhaani kóntperatechani enga i Reinu juauaka. I ambakiti ambe, eianhpinhaxati jukari dosientu treintaisinku paisi jimbo ka uánikua idiomechani jimbo. Jeobaeri testiguechaksï uánikua miionisti ka jindestiksï “iámindu nasionicharhu ka iámindu tribuecharhu ka iretecharhu anapuecha” ka iáminduksï tsípikua jingoni nirasïndi eianhpini ambakiti eianhperakua Tata Diosïri Reinueri (Jaŋaskuecha 7:9). Ka ístu, jorhendasïndiksï Bibliaeri ambe uánikua imechani engaksï uékajka mítini ambemindusï jorhentpejki Biblia, ka nóksï ma tumina kobrarpisïndi. Ískujtsïni pakatasïndi exeni na enga úkuarhini jaka i profesia, ka sánderu engachi mítijka eska tata Jesukristu arhiaspka imeri chúxapatichani: “Kʼuiripuechaksïni no exenchaati” (Lukasʌ 21:17).

15. a) ¿Jakajkusïntsï eskachi últimu jurhiatikuecharhu irekaxaka, ka andi? b) Enga “kʼamaraa[ka] i tiempu”, ¿ambeksï úkuarhincha imecha engaksï no uékajka kurhajchani Jeobani ka ambeksï intsïnhaa imecha engaksï kurhajchaaka Jeobaeri gobiernuni?

¹⁵ Uánikua profesiecha engaksï Bibliarhu jaka, úkuarhixatiksïa iásï, i ambe xarhatasïndi jiájkani eskachi últimu jurhiatikuechani jimbo jarhaska, ¿no ísïski? Ambakiti eianhperakuecha Tata Diosïri Reinueri, eianhpinhaatiksï jiáni jamberi enga Jeoba sési exeaka, ka tátsekua, “kʼamaraati i tiempu” (Mateu 24:14). Enga i textu uandajka “kʼamaraati i tiempu”, arhikuekasïndi imani jurhiatikuani enga Tata Diosï kénditaaka iámindu no sési jásï ambeni enga úkuarhini jaka Parhakpinirhu. Jeoba, tata Jesukristuni ka ánjilichani úraauati para kʼamajkuani imechani engaksï no uékajka kurhajchani (2 Tesalonika 1:6-9). Satanasi ka imeri demoniuechaksï nóteru uátia támisï jánhastani kʼuiripuni. Enga na nitamaakia i ambe, Tata Diosïri Reinu uánikua kóntperatechani juáuati para imecha engaksï  kurhajchaaka Tata Diosïri gobiernuni (Jaŋaskuecha 20:1-3; 21:3-5).

16. ¿Ambe sési japirini eskajtsï cha úpiringa?

¹⁶ Satanasiri parhakpini kʼamajkunhaatia nóteru ióndani, jimbosï kánikua jukaparhakueti eskachi kurhamarhikuarhiaka: “¿Ji ambe jatsiski parani úni jarhani?”. Sánderu ambakiti ambe engachi jatsika para úni, jindesti seguirini jorhenguarhini Jeobaeri ambe ka jánguarhintani mítini ambe uékasïni eskachi uáka (Juanu 17:3). Jánguarhinta je arhintani Bibliani ka kurhanguni. Pʼinde je méntkisï tánguarhini imechani jingoni engaksï jánguarhintajka úni ambe enga Jeoba uékajka (arhinta je Ebreu 10:24, 25). Niára je mítini Jeobani, jorhenguarhiparini ambe enga Biblia uandajka, ka mójtaku je chári jánguani paraksïni Tata Diosï jaiapanhintani (Santiagu 4:8).

17. ¿Andisï sáno iámu kʼuiripu no erokuarhia engaksï no sési úricha kʼamajkunhaaka?

¹⁷ Jesusi uandaspti eskaksï sáno iámindu kʼuiripuecha, no jakajkupiringa eskachi últimu jurhiatikuechani jimbo irekaxaka. No sési úricheri kʼamajkukua mátirku janoati enga no nema erokuarhini jauaka ka sáno iámindu kʼuiripuechaksï no erokuarhiati, jimboka ísï janokuauaka eska sïpari ma enga chúrikua inchatspijka jiáni enga no nema erokuarhini jarhajka (arhinta je 1 Tesalonika 5:2). Tata Jesukristu uandaspti eska májkueni eskaksï naepka Noeri jurhiatikuecha, eska májkuenipiringa ima tiempu enga tata Jesukristu juramuni japiringa Tata Diosïri Reinurhu, últimu jurhiatikuechani jimbo. Jesusi uandaspti: “Jimboka enga nótki janoaenga kʼéri janikua, tʼirenhaxapka ka itsïmanhani. Tembuchanhaxapti ka uambuchanhani asta imani jurhiatikua jimbo enga Noe jatapka barkurhu. Ka útasï nótkiksï jánhaskasïrendi [o nóksï kasu úspti, TNM] astaka úndapka janini, ka iáminduecha ogarinksï. Ka ístu úkuarhiati enga Uájpa Achatiri junguaka” (Mateu 24:37-39).

18. ¿Náki Jesusiri uandakuechanchi jatsiski para jukaparharaani?

 ¹⁸ Jimbosï Jesusi uandapti: “Xékuarhiparini chájkumindu para eskajtsï no puru tʼirekueri ambe tantiarini jauaka o kauini jámani, o sánderu tsitini iásï anapu ambe, ka inde jurhiatikua ma repentkuksïni janocheni. Jimboka ima jurhiatikua ísï janokuauaka iámindu kʼuiripuechani engaksï parhakpinirhu irekani jauaka, komueska ma eperukua. Jimajkani jingontku je, ka méntku jauenani kómarhini para eskajtsï exenhaaka eskajtsï jukanchaska kuájpinhani para iámindu indeni no sési jásï ambe jingoni enga jatsika para úkuarhini, ka para eskajtsï méntku jauaka anhaxurhitini [eskajtsï jaiapanhinhantaaka] Uájpa Achatiri japarini” (Lukasʌ 21:34-36). Jatsiskachi para kánikua jukaparharani i ambe enga Jesusi uandapka. ¿Andi? Jimboka enga Noambakitiri parhakpini kʼamajkunhaaka, imecha enga Tata Diosï Jeoba ka enga ístu “Uájpa Achatiri”, tata Jesukristu, jaiapanhintauaka, tsípitiksï pakaraati. Ka ístu, uátiksï irekani para méntkisï imani ambakiti parhakpinirhu enga janoni jakaia (Juanu 3:16; 2 Pedru 3:13).