MÍTA je Bibliani Salmo 83:18 jimbo (82:19 máru Bibliaecharhu). ¿Ambe arhisïni i bersikulu? Traducción del Nuevo Mundo de las Santas Escrituras uandasïndi: “Eska kʼuiripu mítiaka eska tʼu, engari arhinhajka Jeoba, tʼujkuri jindeska enga Sánderu Kʼéri ambeeka iámu parhakpinirhu”. Máteru Bibliaechaksï sáno májkueni arhisïndi. Peru uánikuaksï pʼikuntasïndi arhinhakua Jeoba ka jatsikusïndiksï “Señor” o “Eterno”. Peru, ¿ambe jatsiski para jukani i textu? ¿Títulu ma o arhinhakua Jeoba?

I bersikulu, uénakuarhu ebreu jimbo karakuarhisti, eska sáno iámu Biblia, ka jima arhinhakua ma jukanharhisti. I arhinhakua ísïsti ebreu jimbo יהוה (YHWH). Ka pʼurhe jimbo Jeoba ka Yavé. ¿Mápurujku jukanharhiski Bibliarhu i arhinhakua? Nómbe, Karakata Ebreaechani jimbo engaksï orijinalika, sáno siete mili uelta jukanharhisti.

¿Na xáni jukaparhakueski Tata Diosïri arhinhakua? Eratsi je padrenuestruni engajtsïni Jesukristu arhistachika. Ísï uénasïndi: “Juchari Táti engari auandarhu jaka, kómarhisïngaksïni eska mítinhaka chíti nombri eska pímbinhasïtiska” (Mateu 6:9). Sánisï tátsekua enga Jesusi jorhentpipkia i kómarhikuani, arhispti Tata Diosïni: “Táti, ú eska kʼéri ambe arhinhaaka chíti nombri”. Ka Tata Kueraajpiri arhispti auandarhu uératini: “Úskania eska kʼéri ambe arhinhaaka ka ménderuni ísï uáka” (Juanu 12:28). Ísï jimbo, xarharasïndi eska Tata Diosïri arhinhakua kánikua jukaparhakueska. Jiájkani, ¿andiksïsï máru pʼikunta arhinhakuani ka títuluechanksï jatsikuani?

Tsimani ambe jimbo. Orheta, uánikuaksï uandasïndi eskachi no jatsiska para úrani Tata Diosïri arhinhakuani, jimbokachi no mítiska na enga kurhaakuarhienga. Idioma ebreu ióntki anapu, no bokali jingoni karakuarhisïrendi, jimbosï iásï no nema újti uandani náki bokalichaksï úrakuarhisïreni i letrechani jingoni  YHWH ima tiempurhu. Jiájkani, ¿nóteruchi jatsiskia para úrani Tata Diosïri arhinhakuani? Bibliaeri jurhiatikuecharhu, arhinhakua Jesusi, jamberi ísï kurhaakuarhiendi Yeshúa o Yehoshúa; no nema mítisti sési néna. Peru iámu parhakpinirhu, eskaksï na pʼindekia uandani mándani idioma, mámaruksï úrasïndi arhinhakua Jesusi. Kʼuiripu úrasïndi ini arhinhakuani, nájkiruka no mítika na enga kurhaakuarhienga primeru siglurhu. Ístu, engajtsï cha nipiringa máteru nani, chári arhinhakua ménderueni kurhaakuarhipirindi máteru idioma jimbo. Ísï jimbo, nájkirukachi no mítika na enga meru kurhaakuarhienga Tata Diosïri arhinhakua, nochi jatsiska para uandani eskachi no úraaka.

Máteru ambe jimbo engaksï pʼikuntaka Tata Diosïri arhinhakuani Bibliaecharhu, jindesti judiuecheri pʼindekua ma jimbo. Uánikua imechaksï uandasïndi eska Tata Diosïri arhinhakua no jatsiska para úranhani. Jimbokaksï ménderueni kurhangusïnga ini juramukuani: “Nori jatsiska para ísku na uéjki úrani chíti Tata Diosï Jeobaeri arhinhakuani, jimboka Jeoba kastigariaka imani enga ísku na uéjki úraaka Imeri arhinhakuani” (Éxodo 20:7).

Jo, i juramukua uandasïndi eskachi no jatsiska para ísku na uéjki úrani Tata Diosïri arhinhakuani. Peru ¿uandasïni eskachi no uáka respetu jingoni úrani? No, no ísï uandasïndi. Iámindu imecha engaksï Karakata Ebreaechani karaapka (“Antiguo Testamentu”) ambakiti achamasïsptiksï engaksï kurhajchauenga Leichani enga Tata Diosï israelitechani íntskuapka. ¿Ambeksï úspi i achaticha Tata Diosïri arhinhakuani jingoni? Méminduksï úrasti. Jatsinharhikustiksï salmuecharhu engaksï uánikuecha uinhachaparini pirenga paraksï kómarhini Tata Diosïni. Ístu, Jeoba juramukuaspti imeri marhuarichani eskaksï imeri arhinhakua jimbo uandajpapiringa ka imechaksï ísï úspti (Joel 2: 32; Ukuecha 2:21). Ísï jimbo, iásï kristianuechachi úrasïnga Tata Diosïri arhinhakuani kánikua respetu jingoni eska Jesusi na úpka (Ebreu 2:12).

Engaksï máteru idioma jimbo karantajka Bibliani, no sésiksï úsïndi engaksï no úrajka Tata Diosïri arhinhakuani. Úsïndiksï eska Tata Diosï iauani exenhaaka o eska no mítikuarhiaka néski ima. Peru Bibliajtsïni arhisïndi eskachi jánguarhintaaka “ambakiti  pájperakua ma jatsini Jeobani jingoni” (Salmo 25:14). Eranhaska je chári ambakiti amiguni ma. Engajtsï no mítipiringa na enga arhinhajka, ¿ambakiti pájperakuajtsï ma jatsipirini? Májkuenisti Tata Diosïni jingoni. ¿Nénachi uá sési pájperakua ma jatsini imani jingoni engachi no mítika eska ima Jeoba arhinhasïnga? Ístu, imecha engaksï no úrajka ini arhinhakuani nójtuksï mítisïndi na enga xáni ambakiti ambe arhikuekajka i arhinhakua. ¿Ambe arhikuekasïni?

Tata Diosï eianguspti imeri jántspiri Moisesini. Enga i kurhamarhipka na arhinhasïreni, Jeoba arhispti: “Ji jindeuaka ambe engani uékaaka jindeeni” (Éxodo 3:14). O eska na uandajka Biblia enga Rotherham karaka: “Ji niáraaka jindeeni ambe engani ji uékaaka”. Ísï jimbo, Tata Diosï niáraati jindeeni ambe enga ima uékaaka paraka úkuarheaka imeri eratsikua, ka ima uáti úni ambe enga uétarhiaka imeri kueraakata jingoni paraka úkuarhiaka ambe enga eratsitini jaka úni.

Engajtsï úpiringa úkuarhintani ambe engajtsï uékapiringa. ¿Nénajtsï jarhuaatapirini chári amiguechani? Enga nema pʼamenchapiringa, chájtsï úpiringa ambakiti doktori ma úkuarhini ka sóntkujtsï tsinani. Enga nema uáni tumina tsïtapiringa, chájtsï úpiringa riku úkuarhini, ka jarhuatantsï. Peru ísïsti, cha, ka jucha, nochi úsïnga úni iámindu ambe engachi uékajka. Peru engajtsï jorhenguarhini jauaka Bibliani, exeakajtsï eska Jeoba úsïnga úkuarhintani iámindu ambe paraka úkuarhiaka ambe enga ima uékajka. Ka tsitisïndi úrani imeri uinhapikuani para jarhuataani imechani engaksï uékajka imani (2 Crónicas 16:9). Imecha engaksï no jorhenguarhijka Tata Diosïri arhinhakuani, nóksï niárasïndi mítini i ambakiti ambe enga Jeoba xarhatajka.

Xarharasïndi jiájkani eska Tata Diosïri arhinhakua jatsiska para jukanharhini Bibliarhu. Engachi mítijka ambe arhikuekasïni arhinhakua Jeoba, ka engachi úrajka para kómarhini juchari Táti auandarhu anapuni, sánderu fásilisïndi andarherani. *