1, 2. ¿Andichisï kʼéri kóntperata ma exejki kómarhikuani, ka andichisï jatsi para mítini ambe jorhentpisïni Biblia kómarhikueri ambe?

ARI PARHAKPINI kánikua sapichuesti engachi terokutantaska ima uánikua jóskuechani jingoni engaksï auandarhu jaka. Para Jeoba, ima enga “kueraaka auandani ka parhakpini”, iretechaksï ísïsti eska gota sapichu ma enga balderhu ma jatarini jarhajka (Jaŋaskuecha [Apocalipsis] 14:7; Isaías 40:15). Peru Biblia uandasïndi eska “Jeoba no iauani jarhas[ka] imecha jingoni engaksï kómarhijka, iámindu imecha jingoni engaksï jurhimbikua jingoni kómarhijka”, ka eska uáka “imani ambe engaksï uékajka imecha engaksï kurhajchajka, ka kurhaasïndi engaksï jarhuajperata kurhakujka” (Salmo 145:18, 19). Eratsi je ambe engaksï arhikuekajka i uandakuecha. Tata Kueraajpiri no iauani jarhasti juchantsïni jingoni ka kurhauatijtsïni engachi “jurhimbikua jingoni kómarhiska”, jo, iámu mintsita jingoni. ¡Kʼéri kóntperata máesti úni kómarhini!

² Peru engachi uékaaka eska Jeoba kurhauaka juchari  kómarhikuechani, jatsiskachi para kómarhini ísï eska ima na uékajka. Peruchi ¿néna uá ísï úni, engachi no mítika ambe enga Biblia uandajka kómarhikueri ambe? Kánikua jukaparhakuesti mítini i ambe, jimboka kómarhikua úsïnga eskachi andarheraka Jeobani.

3. Uanda je ma ambe engachi jimbo jatsika para kómarhini Jeobani.

³ Ma ambe engachi jimbo jatsika para kómarhini Jeobani, jindesti, jimbokajtsïni ima pʼímarhisïnga parachi ísï úni. Biblia uandasïndi: “Ka asï pendienti jatsi je ni ma ambe jimbo, sino Diosïni kómarhi je, ka kurhakuntsï ambe engajtsï uétarhinchajka, diosmeiamukua arhiparini Diosïni iámindu ambe jimbo, ka ísï Diosïri pínandikua enga no nema újka jánhaskani, kuájpiauati chári mintsitechani ka chári eratsikuani Kristu Jesusini jimbo” (Filipusʌ 4:6, 7). Ka jucha no uékasïnga no jiókuarhini ini pʼímarperakuani engajtsïni úchijka Tata Diosï enga Juramutiika iámindu amberi.

4. ¿Andijtsïsï uá uandani, eska someni kómarhini Jeobani, úsïnga eska sánderu kʼéaka juchari pájperakua imani jingoni?

⁴ Máteru ambe engachi jimbo jatsika para kómarhini, jindesti, eska juchari pájperakua Jeoba jingoni sánderu kʼéri úkuarhisïnga engachi méntkisï kómarhini jarhajka. Ambarhati amiguechaksï méntkisï uandajperasïndi, jimbokaksï tsimarani interesi pásïnga máteruni jimbo, ka no solu jiáni engaksï uétarhinchajka ambe ma. Ka engaksï aianhperajka na engaksï eratsijka, na engaksï pʼikuarherajka ka ambe enga uandanhiatarajka, imecheri pájperakua sánhani arhisïndi kʼéni. Ístu, sáno májkuenisti juchari pájperakua Jeobani jingoni. Ini libruni jimbo, chájtsï uánikua ambe jorhenguarhiskia, ambe enga Biblia jorhentpejka Jeobaeri  ambe, na enga jásïka, ka ambe enga eratsitini jaka úni. Chájtsï jorhenguarhiskia eska Jeoba nemaeska engajtsï jingoni uáka sési pájperakua ma jatsini. Kómarhikuaksïni jarhuatasïndi, parajtsï cha úni xarhatakuni chári Táti auandarhu anapuni, ambe engajtsï eratsijka ka na engajtsï pʼikuarhinhijka mintsitarhu. Ka ísïjtsï uáka sánderu andarherani Jeobani (Santiagu 4:8).

5. ¿Nénachi mítiski eska Jeoba no iámindu kómarhikuechani kurhaasïnga?

⁵ ¿Kurhaasïni Jeoba iámindu kómarhikuechani? Exe je ambe enga Jeoba arhiapka ima no kurhandi israelitechani enga profeta Isaiasiri tiempu jimboksï irekapka: “Nájkirukajtsï uánikua kómarhikuechani uáuaka, ji no kurhaauasïnga; chári jájkichaksï iurhiri jáxetixati” (Isaías 1:15). Ísï jimbo, ima no kurhaauati juchari kómarhikuechani, enga jucha úska ima ambe enga Tata Diosï no jeiapanhintajka. Jiáni, para ima kurhaani juchari kómarhikuechani, jatsiskachi para máru ambe úni.

6. Paraka Tata Diosï kurhauaka juchari kómarhikuechani, ¿ambe uétarhisïni jatsini, ka nénachi xarhatasïni eskachi jatsiska?

 ⁶ Ma ambe enga kánikua uétarhijka, jindesti jakajkua jatsini (arhinta je Markusʌ 11:24). Apostuli Pablu karasti: “Peru enga nema no mintsikaska Diosïni, nómindu uáti jeiapanhitarantani, jimboka uétarhisïnga eska ima enga andarhientaaka Diosïni, jakajkuaka eska jarhaska Diosï ka eska ima jindeska enga premio íntsauaka imechani engaksï jirinhantajka imani” (Ebreu 11:6). Peru para ambakiti jakajkukua ma jatsini, no nomasi uétarhisïndi mítini eska jarhaska Tata Diosï ka eska kurhaasïnga ka mókuntani kómarhikuechani. Jakajkukua, úkuechani jingoni xarharasïndi. Juchari irekuarhu jatsisti para xarharani eskachi jakajkukua jatsiska (Santiagu 2:26).

7. a) ¿Andichisï jatsi para respetu jingoni kómarhini Jeobani? b) ¿Nénachi kómarhia Jeobani kaxumbikua ka mintsita jingoni?

⁷ Máteru ambe enga Jeoba kurhajkuarhijka, jindesti eska kómarhikua kaxumbikua jingoniuaka ka mintsita jingoni. Ka uánikua ambe jarhasti engachi jimbo jatsika para kaxumbikua xarhatani engachi uandontskuarhiaka Tata Diosïni jingoni, ¿no ísïski? Enga ma kʼuiripu sésikua intsïnhajka para uandontskuarhini rei ma jingoni o presidenti ma jingoni, kánikua respetu jingoni úsïndi, jimboka mítisïnga nákiski imeri ánchikuarhita. Peru sánderu respetu uétarhisïndi para Jeoba jingoni uandontskuarhini (Salmo 138:6). Jimboka Jeoba jindeska “Tata [Diosï] enga iámindu ambe újka úni” (2 Korintu 6:18). Na engachi uandajpajka, jatsisti para xarhatani eskachi kaxumbikua jingoni jiókuarhisïnga eska Jeoba iauani sánderu kʼériska eska jucha. I kaxumbikuajtsïni jarhuataati parachi mintsita jingoni kómarhini, ka no puru ma ambejku arhini jarhani o méntku repetirini jarhani ambe ma (Mateu 6:7, 8).

8. ¿Nénachi uá ísï jámani eskachi na kómarhikia?

 ⁸ Máteru ambe enga uétarhijka parajtsïni Tata Diosï kurhaani, jindesti eskachi ísï jámaaka eskachi na úkia kómarhikua. Enga jucha kurhakuska Jeobani “tʼirekua enga[chi] uétarhinchajka pauani pauani”, jatsiskachi para uinhamu ánchikuarhini náki uéjki ánchikuarhitani jimbo (Mateu 6:11; 2 Tesalonika 3:10). Ístu, engachi kurhakuaka parajtsïni jarhuatani jurajkuani no sési járhati pʼindekuechani, jatsiskachi para kéndikukuarhini enga inde ambe jauaka (Kolosasi 3:5). Mítiskachia máru ambe enga uétarhijka para kómarhini Tata Diosïni, peru ístu uétarhisïndi mókuantani máru kurhamarhikuechani kómarhikueri.

9. ¿Nénchi jatsiski para kómarhini, ka néri nombrini jimbo?

⁹ ¿Nénchi jatsiski para kómarhini? Tata Jesukristu arhiaspti imeri jorhenguarhitichani eskaksï ísï kómarhipiringa: “Juchari Táti engari auandarhu jaka” (Mateu 6:9). Jimajkani, jatsiskachi para Tata Diosï Jeobantku kómarhini. Peru Tata Diosï uékasïndi eskachi kómarhiaka úraparini tata Jesukristueri arhinhakuani, ¿andi? jimboka eskachi na exekia kapitulu 5 jimbo, Jeoba axasti Jesusini parhakpinirhu parajtsïni pʼímutantani pekadurhu ka uarhikuarhu (Juanu 3:16; Roma 5:12). Ka ístu, Kʼéri Saserdoti ústi ka Juesi (Juanu 5:22; Ebreu 6:20). Jimbojtsïnisï Biblia arhijti eskachi kómarhiaka Jeobani, tata Jesukristueri arhinhakuani úraparini. Jesusi mísmu uandasti: “Ji jindeska xanharu, ka ji jindeska engani sési jimboeka, ka ístu ji jindeska tsípikua. Ka no nema jurhasïndi andarhierani Diosï Tátini enga no jindeni jimbo[euaka]” (Juanu 14:6). Paraka kurhaanhaka juchari kómarhikuecha,  uétarhisïndi Jeobantku kómarhini imeri uájperi nombrini jimbo.

10. ¿Andisï no uétarhijki néna niárani para kómarhikua úni?

¹⁰ ¿Uétarhijki néna niárani? Nómbe. Jeoba, nójtsïni kurhachesïndi na engachi jatsika para jarhani o peerani juchari jájkichani. Biblia jorhentpesïndi eskachi uáka mámaru niárani para kómarhini. Uákachi uaxakatini jarhani, kʼutitsetini o tinguixurhitini (1 Crónicas 17:16; Mateu 26:39; Ukuecha 21:5). Ambe enga jukaparhakueka, jindesti eskachi kaxumbikua jingoni uáka ka no na engachi jauaka parajtsïni máteruecha exeni. Uákachi jamberi kómarhikua úni, no ma ambe uandaparini ka nani uéjki ísï, nájkirukachi ambe ma úni jauaka o enga no sési jásï ambe úkuarhiaka. Jamberi no nema kuenta íntskukuarhiati eskachi kómarhikua úxaka, peru Jeobajtsïni kʼóru kurhauati (Nehemías 2:1-6).

11. ¿Ambe juchari ambe uáchi uandani kómarhikuecharhu?

¹¹ ¿Ambechi uá uandani juchari kómarhikuecharhu? Biblia uandasïndi eska ambe uéjkichi “kurhajkuarhi[ni]” peru enga méntkisï jindeuaka “eska ima na uékajka, [Jeobajtsïni] kurhajchaa[ti]” (1 Juanu 5:14). Ísï jimbo, uákachi uandani ambe uéjki enga terokuntaaka imani ambe jingoni enga Tata Diosï uékajka. ¿Tsitijki ima eskachi eianguaka juchari uandanhiatechani? ¡Jo! Kómarhini Jeobani, ísïsti komueska ambakiti amigu ma jingoni uandontskuarhini. Uákachi ‘mintsita jingoni uandajpani’, jo, mintsikakua jingoni eiangukuarhini na engachi pʼikuarherajka (Salmo 62:8). Ístu sésisti kurhakuni eskajtsïni jarhuataaka imeri espiritu santu jingoni parachi sési jásï ambe úni (Lukasʌ 11:13). Ístuchi kómarhisïnga parajtsïni jarhuatani sési eratsini ka parajtsïni uinhapikua íntskuni parachi úni tekaantani  uandanhiatechani (Santiagu 1:5). Engachi pekadu ma uáka, jatsiskachi para kómarhini eskajtsïni puáchentaaka, jimbokachi jakajkusïnga Jesusiri uarhikuani (Efesu 1:3, 7). Peru ístu uétarhisïndi kómarhijpikuani máteruechani, kómu juchari familiani o juchari erachichani (Ukuecha 12:5; Kolosasi 4:12).

12. ¿Nénachi uá kómarhikuecharhu xarhatani eska sánderu jukaparhakueska Jeobaeri ambe?

¹² Ambe enga jatsika para sánderu jukaparhakueni juchari kómarhikuecharhu, jindesti ima ambe enga Jeobaeri ambeuaka. Uánikua ambe jarhasti engachi jimbo uáka kʼéri ambe arhini, ka mintsita jingoni meiamukua íntskuntani imeri pʼamojperakua jimbo (1 Crónicas 29:10-13). Mateu 6:9-13 jimbo, jarhasti kómarhikua enga tata Jesukristu íntspika komueska ejemplu (arhinta je). Jimajtsïni jorhendasïndi, eskachi kurhajkuarhiaka eska pímbinhajkunhantaaka Tata Diosïri arhinhakua, o eska ísï kánhaaka eska ambe ma enga kánikua pímbinhasïtika. Ka tátsekua, kurhajkuarhinhasïndi eska juuaka Tata Diosïri Reinu ka eska úkuarhiaka Tata Diosïri eratsikua Echerirhu, ísï eska na úkuarhijka auandarhu. Ini kómarhikuarhu, tata Jesukristu orheta péraaspti iámindu Jeobaeri ambe, ka tátsekua ima ambe enga ma uétarhinchajka. Engachi juchajtu orheta peeraka Jeobaeri ambe juchari kómarhikuecharhu, xarhataakachi eskachi no solu pendienti jarhasïnga para juchari ambejku kurhajkuarhini.

13. ¿Na xáni uandasïni Biblia eskaksï jatsiski para ióskani kómarhikuecha?

¹³ ¿Na xánksï jatsiski para ióskani juchari kómarhikuecha? Biblia no uandasïndi na xánksï jatsiski para ióskani kómarhikuecha engachi jandiajku uáuaka o máteruechani japarini. Uátiksï sapichueni, kómu imecha engachi uájka ante de tʼireni, o ióskani kómu  imecha engachi uájka engachi mintsitarhu uératini eiangukuarhijka ambe ma Jeobani (1 Samuel 1:12, 15). Peru Jesusi xukaaspti imani ísku aparichani engaksï iórhati kómarhikuechani uáuenga nomasi paraksï máteruecha exeani (Lukasʌ 20:46, 47). Jeoba no jeiapanhintasïndi i ambe. Ambe enga jukaparhakueka jindesti eska kómarhikua mintsitarhu uéraaka. Ísï jimbo, kómarhikua ma xáni ióskaati seguni ambe engachi uétarhinchaaka ka seguni eskachi na nitamakuarhini jauaka.

14. Uandanta je ambe arhikuekasïni “méntku jauena je kómarhini” ka ambe kóntperatachi jatsiski.

¹⁴ ¿Kada na xánchi jatsiski para kómarhikua úni? Biblia uandasïndi: “Méntku jauenani jarhani kómarhini”, “méntku jauena je kómarhini Diosïni” ka “méntku jauenani kómarhini” (Lukasʌ 18:1; Roma 12:12; 1 Tesalonika 5:17). I ambe no arhikuekasïndi eskachi jatsiska para chúskutani ka erantskutani kómarhini. Sánderu sési, arhikuekasïndi eskachi pauani pauani kómarhiaka Jeobani parachi diosmeiamukua arhini imeri pʼamojperakua jimbo ka parachi kurhakuni eskajtsïni jurhimberantaaka, eskajtsïni sési pʼikuastaaka ka eskajtsïni uinhapikua íntskuaka. ¡Kʼéri ma kóntperatesti! Jeoba sésikuajtsïni íntskusïndi parachi kómarhini na engachi xáni uékaaka ka na engachi jatini uékaaka. Engachi jukaparharaska ini kóntperatani enga jindeka kómarhini juchari Táti Jeobani, uékaakachi méntkisï, ísï úni jarhani.

15. ¿Andichisï jatsi para kʼamarhukuani kómarhikuechani engachi jandiajku uájka o máteruechani japarini uandaparini “eska ísï úkuarhiaka”?

¹⁵ ¿Andisï uétarhijki uandani “ameni”? I uandakua arhikuekasïndi “eska ísï úkuarhiaka”, “eska ísïuaka”. Bibliarhuksï jarhasti ejempluecha engaksï xarhatajka eska  sésiska kʼamarhukuani kómarhikuechani engachi jandiajku uájka o máteruechani japarini uandaparini “eska ísï úkuarhiaka” (1 Crónicas 16:36; Salmo 41:13). Enga jucha jandiajku kómarhini jarhajka, ka uandanchi “eska ísï úkuarhiaka”, xarhatasïngachi eskachi mintsita jingoni kómarhini jarhasïnga. O engachi máteruechani japarini ísï újka (sea uandaparini o nómbe), xarhatasïngachi eskachi jeiapanhintasïnga ambe enga uandanhakia (1 Korintu 14:16).

16. ¿Ambechi uá mintsikani engachi kómarhijka Tata Diosïni?

¹⁶ ¿Meru mókuntasïni Tata Diosï juchari kómarhikuechani? ¡Seguruchi jarhaska eska jo! Uánikua ambechi jimbo úsïnga mintsikani eska ima “enga Kurhauajka kómarhikuechani”, mókuantaasïnga imani kómarhikuechani enga uánikua miioni kʼuiripuecha mintsita jingoni úkujka (Salmo 65:2). Ka mámarujtsïni mókuchentasïndi.

17. ¿Andichisï újki uandani eska Tata Diosï úraasïnga ánjilichani ka kʼuiripuechani para mókuantani kómarhikuechani?

¹⁷ Para mókuantani kómarhikuechani, Jeoba úraasïndi imeri ánjilichani ka kʼuiripuechani engaksï marhuakujka (Ebreu 1:13, 14). Uánikua imecha engaksï kurhakuka Tata Diosïni eska jarhuataapiringa kurhanguni Bibliani, ísï no ióni jimbo Jeobaeri testigu ma nirasti pʼorhembini. I járhati uandantskuechaksï xarhatasïndi eskaksï ánjilichasï orhepani petani jaka Tata Diosïri Reinueri eianhperakuani (Jaŋaskuecha 14:6). Ístu, engachi jucha kómu nitamakuarhini jauaka, Jeoba uáti mókuntani juchari kómarhikuani úparini eskajtsïni erachi ma jarhuaataka (Proverbios 12:25; Santiagu 2:16).

18. ¿Néna úrasïni Jeoba imeri espiritu santuni ka imeri Karakatani para mókuantani imeri marhuatspiricheri kómarhikuechani?

 ¹⁸ Tata Diosï Jeoba ístu mókuntasïndi imeri marhuatspiricheri kómarhikuechani, espiritu santu jimbo ka imeri Karakatani jimbo, Biblia. Engachi jarhuajperata kurhakujka uandanhiata ma jimbo, imajtsïni uáti jarhuatani ka uinhaperantani imeri espiritu santu jingoni (2 Korintu 4:7). Ka engachi kómarhijka parachi sési ambe úni, mémindujtsïni mókuchentasïndi imeri Karakata jingoni. Engachi jandiajku jorhenguarhini jarhajka Bibliani o publikasionichani, komueska ini libruni, úpiringachi bersikuluechani máru exeantani engajtsïni marhuachiaka. Ístu orhejtsïkuti ma enga uandanhiajka juchantsïni jimbo ka engajtsïni jarhuajperata íntskuni jauaka o tánguarhikua ma jimbo, úpiringachi miátanhantani máru textuechani engachi no jatsika para mirikurhini (Galasia 6:1).

19. ¿Ambechi miántaa engachi ménisï ísï pʼikuarheraaka enajki Jeoba ióndajki mókuantani juchari kómarhikuechani?

¹⁹ Ménisïchi úpiringa ísï pʼikuarherani enajki Jeoba ióndajki mókuantani juchari kómarhikuechani, peru i ambe no arhikuekasïndi eska Jeoba no úsïnga mókuantani. Ju je miáni eska Jeoba ísï mókuantauaka ka jiáni enga ima sési exeaka. Ima sési mítisti ambechisï uétarhinchajki ka uátijtsïni íntskuni i ambe, asta sánderu jamberi enga jucha úpiringa. Jeoba ménisï jurajkusïndi eskachi seguiriuaka “kurhajkuarhi[ni]”, “jirinhan[i]” ka “tentena[stani]” (Lukasʌ 11:5-10). Engachi ísï uáka, xarhatakuakachi Tata Diosïni eskachi meru uékasïnga ambe engachi kurhakuni jaka, ka  eskachi mintsikasïnga eskajtsïni mókuchentaaka. Ka ístu, ménisï Jeobaeri mókuntskua úpirindi no ísïni eska jucha na erokuarhienga. Ari jindesti ejemplu ma, úpiringachi ménisï kurhakuni eskajtsïni jarhuataaka orhepani uérakuni uandanhiatani ma, peru Jeoba úpirindi no kénditani, sino uinhapikuajtsïni íntskuni parachi úni tekaantani (arhinta je Filipenses 4:13, TNM).

20. ¿Andisï uétarhijki sési úrani kóntperatani enga jindeka kómarhikua úni?

²⁰ Kánikuajtsïni sési pʼikuastasïndi Tata Kueraajpiri iámindu amberi, jimboka no iauani jarhaska imecha jingoni engaksï kómarhijka ísï eska ima na uékajka (arhinta je Salmo 145:18). Ju je sési úrani ini kóntperatani enga jindeka kómarhikua. Engachi ísï úska, sésichi pʼikuarheraaka mítini eskachi uáka sánhani arhini andarherani Jeobani, imani enga Kurhaajka juchari kómarhikuechani.