1, 2. a) ¿Andisï no májkueni mítini na enga arhinhajka nema enga iápuru mítinhaka ka eska sési mítini imani? b) ¿Ambe uandanhasïni Jesusiri ambe?

UÁNIKUA kʼuiripuechaksï jarhasti parhakpinirhu, engaksï kánikua mítikateka imeri iretarhu, o imeri paisirhu, ka máteruecha asta iámu parhakpinirhu. Peru enga cha mítijka nemaeri arhinhakuani enga iápuru mítinhaka, ¿arhikuekasïni eskajtsï sési mítiska imani? Nómbe, nójtsï mítiska iámindu ambe imeri, nójtsï mítiska ambe enga úka ióntki o na enga jásï kʼuiripueka.

² Nájkiruka dosmili uéxurhini ísï nitamakia enga tata Jesukristu Echerirhu irekapka, iámu parhakpinirhu uandanhasïndi imeri ambe. Peru no mítinhasti sési néspi ima. Máruksï uandasïndi eska ambakiti achatijku máespka. Máteruechaksï uandasïndi eska profetajku máespka. Ka máruksï uandasïndi eska Jesusi Tata Diosïska ka eskachi jatsiska para imani kómarhini. ¿Ísïski i ambe?

3. ¿Andisï jukaparhakue eskajtsï mítiaka Tata Diosï Jeobani ka tata Jesukristuni?

³ Jukaparhakuesti eska cha mítiaka jurhimbikua Jesusiri ambe. ¿Andi? Jimboka Biblia uandasïnga: “Ka i jindesti tsípikua para méntkisï, eskaksïni mítiaka tʼunksïni engari tʼujku jindeka Diosï engari sési jimboeka,  ka ístu Jesukristuni engari tʼu axaka” (Juanu 17:3). Ísïsti, meru uétarhisïndi mítini Tata Diosï Jeobani ka tata Jesukristuni, i ambesï uáti eskachi paraisurhu irekaaka para méntkisï (Juanu 14:6). Ístu, Jesusi kánikuajtsïni sési jorhendasti na engachi jatsika para irekani ka na engachi jatsika para kámpini (Juanu 13:34, 35). Ini librurhu, primeru kapitulu jimbo, jorhenguarhiskachi jurhimbikua Tata Diosïri ambe. Iásïchi exeaka ambejtsïni jorhendasïni Biblia tata Jesukristueri ambe.

4. ¿Ambe arhikuekasïni Mesiasi ka Kristu?

⁴ Uánikua uéxurhini ante de Jesusi andajpenuni,  Biblia uandasptia káni janopirini ima enga Tata Diosï eiatspipka, Mesiasi o Kristu. I arhinhakuecha Mesiasi (enga ebreu jimboeka) ka Kristu (enga griegu jimboeka) arhikuekasïndiksï “Erakukata”. Ísï jimbo, ima enga axanhapiringa, erakukatepirindi, i arhikuekasïndi eska Tata Diosï erakupiringa para ambakiti ánchikuarhita ma úni. Máteru kapituluechani jimbo, exeakachi sánderu sési ima ambakiti ánchikuarhitani enga Mesiasi jatsika, paraka úkuarhiaka ambe enga Tata Diosï aiatspikia. Ka ístuchi exeaka eskajtsïni Jesusi uáka újchakurani iásï. Ante de Jesusi andajpenuni, jamberi uánikuaksï uandaendi: “¿Né jindeua Mesiasi?”.

5. ¿Ambeksï jakajkusïreni Jesusiri ambe imeri jorhenguarhiticha?

⁵ Primeru siglurhu, Jesusiri jorhenguarhitichaksï sési mítitixapti eska ima jindespka Mesiasi enga jupiringa (Juanu 1:41). Ma enga arhinhaenga Simoni Pedru, arhispti: “Tʼuri jindeska Kristu” (Mateu 16:16). ¿Andiksïsï seguru japi ima jorhenguarhiticha eska Jesusi jindespka Mesiasi enga aiatspinhapka? ¿Ka nénachi uá jucha seguru jarhani?

6. ¿Ambe ejemplu jingonchi úsïni kurhanguni na enga Jeoba jarhuataaka ambakiti kʼuiripuechani paraksï mítintani Mesiasini?

⁶ Tata Diosïri profetecha engaksï irekapka ante de Jesusi, uánikua ambeksï uandaspti enga jarhuajpepiringa para mítintani Mesiasini. Exe je: enga cha nipiringa sentralirhu o aeropuerturhu erokani nemani engajtsï no mítika, sési japirindi eska cha orheta mítipiringa na jásï máeski, ¿no ísïski? Ísï úkuarhispti, Jeoba profetechani jimbo, uandasptia ambe úpirini Mesiasi ka ambe úkuarhinchapirini. Ambakiti kʼuiripuecha engaksï erokani japkia, úpirindiksï mítintani Mesiasini engaksï exepiringa eskaksï úkuarhixapkia iámindu ima profesiecha.

7. Uandanta je tsimani profesiechani engaksï Jesusini jingoni úkuarhipka.

 ⁷ Ju je tsimani ejempluechani exeani. Ma jindesti: profeta Mikeasi, jukari setesientu uéxurhini antesi uandasptia eska ima enga axanhapiringa, Beleni andajpenupiringa, ireta sapichu ma jimbo enga Judá japka (Miqueas 5:2). ¿Ka nani andajpenuspi Jesusi? Jo, imani iretani jimbo (Mateu 2:1, 3-9). Máteru ejemplu jindesti profesia enga Daniel 9:25 jimbo jaka, enga sánderu de 500 uéxurhini antesi uandaengia ambe uéxurhini xarharapirini Mesiasi: uéxurhini 29 jimbo. * Na engaksï i, ka máteru profesiecha úkuarhipka, xarhatasïndiksï eska Jesusi jindespka Mesiasi enga aiatspinhapka.

8, 9. Enga Jesusi itsï atakuarhipkia, ¿néna xarharaspi sánderu sési eska ima jindespka Mesiasi?

⁸ Enga kʼamarani jámaengia uéxurhini 29, jiáni xarharasti sánderu sési, eska Jesusi jindespka Mesiasi. Jiánispti enga Jesusi kurhakupka Juanu Bautistani eska itsï atapiringa riu Jordanirhu. Jeoba aiakuspti Juanuni eska xarhatapiringa ambe ma paraka Juanu úpiringa mítintani Mesiasini, ka jiáni xarhataspti enga Jesusi itsï atakuarhipka. Biblia uandasïndi: “Ka eska na bautisarikuarhipka Jesusi, luejku uémintaspti itsïrhu, ka auanda mítakuarhispti, ka ima exespti Diosïri Espirituni kétsini jarhani ísï jásï komueska ma palomasï, ka andajtsïkuerani imani. Ka luejku kurhaakuarhispti ma uandakua auandarhu uératini enga arhienga: ‘I jindesti juchiti Uátsï engani ji xáni uékajka ka engani jimbo xáni tsípikuarhijka’” (Mateu 3:16, 17). Enga Juanu exepka ka kurhaani imani ambe, sánderu jakajkuspti eska Tata Diosïsï axapka Jesusini (Juanu 1:32-34). Ima jurhiatikua  enga Jesusi espiritu santu intsïnhapka, —uinhapikua enga Tata Diosï úrajka— niárasti Mesiasiini, o Kristueni, ima enga erakunhapka para Orhejtsïkutiini ka Juramutiini (Isaías 55:4).

⁹ Jeobaeri uandakuecha ka profesiecha engaksï úkuarhikia, xarhatasïndiksï eska Jesusi jindespka Mesiasi enga aiatspinhapka. Peru Bibliajtsïni aiangusïndi máteru tsimani ambe tata Jesukristueri, enga jukaparhakueka: nani uératini jurhaski ka na jásï kʼuiripuespi.

10. Eska na jorhentpejka Biblia, ¿nani irekaspi Jesusi ante de Echerirhu jurhani?

¹⁰ Biblia jorhentpesïndi eska Jesusi auandarhu irekaspka ante de Echerirhu jurhani. Profeta Mikeasi uandaspti eska Mesiasi, Beleni andajpenupiringa, peru ístu uandaspti eska ima “iótki anapuespka” (Miqueas 5:2). Ístu Jesusi, uánikua uelta uandasti eska auandarhu irekaspka ante de jurhani echerirhu komueska kʼuiripu ma (arhinta je Juanu 3:13; 6:38, 62; 17:4, 5). Enga Jesusi auandarhu japka, kánikua sési pájperakua ma jatsispti Jeobani jingoni.

11. ¿Néna xarhatasïni Biblia eska Jesusi jindeska Uájpa enga Jeoba sánderu uékajka?

¹¹ Uánikua ambe jimbo, Jesusi jindesti ima uájpa enga Jeoba sánderu uékajka. Biblia uandasïndi eska ima “tʼuini jinde[s]pkia enga nótki ambe kueraakatenga”, jo, Jesusi jindesti orheta uájpa Jeobaeri, imanisï uénati kueraani Tata Diosï (Kolosasi 1:15). * Máteru ambe jimbo enga no májkuenika eska iámindu máteruecha,  jindesti jimboka imajku jindeska “máechakua Uájpa” (Juanu 3:16). I arhikuekasïndi eska Jesusijku jindeska uájpa enga Tata Diosï jandiajkumindu kueraaka. Ístu imajku jindesti enga jarhuataka Jeobani kueraani iámindu máteru ambe (Kolosia 1:16, TDU). Ístu, arhinhasïndi “Uandakua” (Juanu 1:14). I arhinhakua arhikuekasïndi eska Tátemberi uandakua párispka. Ima arhiasïrendi ánjilichani ka kʼuiripuechani ambe engaksï úpiringa.

12. ¿Andichisï újki uandani eska Jesusi no májkueniska eska Tata Diosï?

¹² ¿Májkueniski Jesusi eska Tata Diosï, ísï eskaksï máru na jakajkujka? Biblia no jorhentpesïndi i ambe. Eskachi na exekia máteru párrafurhu, Uájpa kueraanhasti. Ka ísï úndaspti irekani, peru Jeoba méntkisï jarhasti ka no méni uarhiati (Salmo 90:2). Jesusi no méni uékasti májkueni úkuarhini eska imeri Táti. Biblia jorhentpesïndi eska Tátemba sánderu kʼériska eska Uájpa (arhinta je Juanu 14:28; 1 Korintu 11:3). Jeobajkusï jindeti Tata Diosï “enga Iámindu ambe Újka úni” (2 Korintu 6:18). Ísï jimbo, no nema jarhasti enga májkuenika eska ima. *

13. ¿Ambe arhikuekasïni Biblia enga uandajka eska Uájpa “jindes[ka] enga terokukuntajka Diosïni enga no nema újka exeni”?

¹³ Ante de kueraanhanksï jóskuecha ka Echeri, Jeoba ka Jesusi uánikua miioni uéxurhini, ambakiti pájperakuaksï ma jatsisptia. ¡Kánikuaksï uékperaendi! (Juanu 3:35; 14:31.) I Uájpa sáno májkuenisti eska Tátemba. Jimbosï Biblia uandajti eska “ima jindes[ka] enga terokukuntajka Diosïni enga no nema újka exeni” (Kolosasi 1:15). Ísï eskaksï uájpecha na májkuenijka eska tátembecha,  Tata Diosïri Uájpajtu májkueni úsïrendi ka májkueni eratsisïrendi eska Tátemba.

14. ¿Néna niáraski Jeobaeri Uájpa kʼuiripu úkuarhintani?

¹⁴ Jesusi mísmu uékasti jurajkuni ánchikuarhitani auandarhu para kʼuiripu úkuarhintani ka jurhani Echerirhu. Perujtsï úpiringa kurhamarhikuarhini: “Jesusi auandarhu irekaspti, jiáni, ¿néna niáraspi kʼuiripu úkuarhini?”. Jeoba milagru ma úspti. Peeraspti Jesusiri tsípikuani, enga auandarhu japka, Mariaeri matrisirhu. Ka jimboka Jesusi Tata Diosïri Uájpeska, Maria kánguarhispti sapini ma enga no ma pekadu jukarapka ka Jesusi arhiraspti (Lukasʌ 1:30-35).

15. ¿Nénachi úsïni sánderu sési mítini Jeobani, Jesusini jimbo?

¹⁵ Ambe enga Jesusi uandapka ka ambe enga úpka Echerirhu, jarhuatasïndijtsïni parachi sánderu sési mítini. Ka Jesusini jimbo ístuchi úsïnga sánderu sési mítini Jeobani. ¿Néna? Miá je eska ambe enga Tátemba újka imani ambesï újti Uájpa. Jimbosï arhipti imeri jorhenguarhitini ma: “Ima engarini exeka jíndini, exesti Diosï Tátini” (Juanu 14:9). Tʼámu libruechani jimbo engaksï jindeka Ebanjeliuecha —Mateu, Markusʌ, Lukasʌ ka Juanu—, uánikua ambechi exentasïnga na enga irekapka Jesukristu, ambe enga úpka ka na enga kámpipka.

16. ¿Ambespi enga Jesusi sánderu jorhentpienga, ka nérispi ambe enga jorhentpienga?

¹⁶ Jesusinksï ístu arhisïrendi “Jorhentpiti” (Juanu 1:38; 13:13). ¿Ambe jorhentpisïreni? “Ambakiti eianhperakua Diosïri juramukuerini”, ima ambakiti ambe enga Tata Diosïri Reinu uáka. I gobiernu auandarhu uératini juramukuauati iáminduechani Echerirhu, ka ístu uánikua kóntperatechani íntsauati imechani engaksï no méni jurajkuaka Tata Diosïni (Mateu 4:23). ¿Peru  nérispi ambe enga Jesusi jorhentpienga? Jesusi uandaspti: “I ambe engani ji jorhentpejka, no juchiti ambesti sino imeeristi engarini axaka”, jo Jeobaeri (Juanu 7:16). Jesusi mítispti eska imeri Táti uékasïrenga eskaksï kʼuiripuecha kurhaapiringa ambakiti eianhperakuechani Tata Diosïri Reinueri. Kapitulu 8 jimbo exeakachi sánderu i gobiernueri ambe ka exeakachi ambe uá i gobiernu.

17. ¿Nani jorhentpisïreni Jesusi, ka andisï xáni jánguarhintaeni ísï úni?

¹⁷ ¿Nani jorhentpisïreni Jesusi? Nani uéjkisï enga kʼuiripu jámaenga: kampurhu, ranchuecharhu, kʼéri iretecharhu, merkaduecharhu ka kʼumanchikuecharhu. Jesusi no méni erokuarhisïrendi eskaksï kʼuiripuecha nipiringa jirinhani, Jesusi nirasïrendi jirinhaani kʼuiripuechani (Markusʌ 6:56; Lukasʌ 19:5, 6). ¿Andisï xáni jánguarhintaeni eianhpini ka jorhentpini? Jimboka imeri Táti ísï uékasïrenga, ka Jesusi méntkisï kurhajchasti (Juanu 8:28, 29). Peru ístu jindespti jimboka Jesusi  pʼamojkuasïrenga kʼuiripuechani engaksï niraenga exeni (arhinta je Mateu 9:35, 36). Relijioniri orhejtsïkutichaksï jatsispti para jorhentpini jurhimbikua Tata Diosïri ambe ka ístu ambe enga Jeoba uékajka úni, peruksï no ísï úspti. Peru Jesusi mítispti na engaksï xáni uétarhinchaenga mítini Tata Diosïri Reinueri ambe.

18. ¿Ambejtsï sánderu tsitisïni Jesusiri ambe?

¹⁸ Jesusi kánikua sési kámpisti, uékpitispti, uékperakua jingoni kaasïrendi máteruechani ka no kʼéramakuarhesïrendi, asta sapiichaksï jamberi sési pʼikuarherasïrendi imani jingoni jarhani (Markusʌ 10:13-16). No sési exesïrendi enga nema tumina jimbo uáenga ambe ma o enga nema no sési kámaenga máteruni (Mateu 21:12, 13). Ima jurhiatikuechani jimbo, no sésiksï kánhasïrendi uarhiiticha, peru Jesusi méntkisï sési kaasti (Juanu 4:9, 27). Jesusi kaxumbitispti. Ma jurhiatikua, jupandukuaspti imeri apostulichani, ka i ambe jántspirichajkuksïsï uéndi.

19. ¿Ambe ejemplu xarhatasïni eska Jesusi pʼamojkuasïrenga imechani engaksï no sési nitamakuarhienga?

 ¹⁹ Jesusi pʼamojkuasïrendi imechani engaksï no sési nitamakuarhienga, ka xarhataspti i ambe jimboka uánikuechani tsinaaspka espiritu santuni jimbo (Mateu 14:14). Ma jurhiatikua, achati ma enga lepra pʼamenchaenga niraspti jirinhani ka arhispti: “Engari tʼu uékajka, uákarini ambakerantani”. Jesusi mintsitarhu pʼikuarhinhespti na enga pʼikuarheraenga ima achati. Pʼamojkuspti, iójkurhantaspti, pʼárhispti ka arhispti: “Jo uékasïngani, ambakintia”. ¡Ka pʼamenchati ambakintaspti! (Markusʌ 1:40-42.) ¿Eranhaskasïntsï na enga pʼikuarherapka ima achati?

20, 21. ¿Andichisï uandajki eskajtsïni Jesusi sési xarhatachiska na enga jatsika ma para marhuakuni ka kurhajchani Tata Diosïni?

²⁰ Jesusi kánikua sési xarhatasti na enga jatsika ma para kurhajchani ka marhuakuni Tata Diosïni. Ima méntkisï marhuakusti imeri Táti auandarhu anapuni, nájkiruka no sési kánhaenga, ka nájkiruka kánikua no sési nitamakuarhienga. Ka no jiókuarhisti imani ambe enga Satanasi aiakuni japka (Mateu 4:1-11). Ma tiempu, imeri parientichaksï jamberi no jakajkukusïrendi. Niárasptiksï jamberi uandani: ‘Loku úkuarhixati’ (Markusʌ 3:21). Peru Jesusi no méni chkespti ka seguirispti úni Tata Diosïri ánchikuarhitani. Engaksï imeri ikiatspiticha no sési arhienga ka engaksï no sési kámaenga, ima méntkisï pʼíngukuarhisti, ka no ma ambe úkuantasti (1 Pedru 2:21-23).

²¹ Jesusi marhuakusti Tata Diosïni asta uarhikuarhu jamberi, nájkirukaksï imeri ikiatspiticha kánikua no sési kámapka uándikuni (arhinta je Filipusʌ 2:8). Eranhaska je na enga xáni ambe nitamakuarhinchapka  últimu jurhiatikua ante de uarhini. Jurajkuspti eskaksï juramuticha jupikapiringa, eskaksï kʼuiripuecha chkuanderakua ambe uandapiringa imeri ambe, eskaksï juesicha uándikutarkuarhipiringa, eskaksï kʼuiripuecha teresmarhupiringa ka eskaksï sondaduecha no sési kámapiringa. Enga tirhipakuarhetini japkia chkarirhu, ante de uarhini, uandaspti: “¡Úkata jarhasti iámindu ambe!” (Juanu 19:30). Tanimu jurhiatikua tátsekua, imeri Táti tsítantasti kómu espiritu ma (1 Pedro 3:18, TNM). Ka kuarenta jurhiatikua tátsekua níntasti auandarhu, ka jima ‘uaxakasti Diosïri jurhijkandani ladu jimbo’ para erokuarhini astaka intsïnhapiringa uinhapikua para juramuni (Ebreu 10:12, 13).

22. ¿Náki xanharuni mítaspi Jesusi enga ísï no méni jurajkupka Tata Diosïni?

²² ¿Náki xanharuni mítaspi Jesusi enga ísï no méni jurajkupka Tata Diosïni? Imeri uarhikua mítasti xanharu ma para jucha úni irekani para méntkisï ixú echerirhu, ísï eska Jeoba na uékaenga uénakuarhu. Máteru kapitulurhu, exeakachi néna uá Jesusiri uarhikua eska úkuarhiaka i ambe.