IDIOMECHANI jimbo enga Biblia karakuarhika, Biblia sánderu de setenta uelta úrasïndi uandakua scheʼóhl ebreu jimbo ka háides griegu jimbo, ka íksï uandakuecha, uarhikueri ambeksï uandasïndi. Máru Bibliaecharhu, ini uandakuechani ísïksï peentasïndi, “sepulkru”, “infiernu”, “posu” ka ístu máteru uandakuechani engaksï sáno májkuenika. Peru sáno iámindu idiomecha, nóksï jatsisti uandakua ma enga sési terokuntajka ambe engaksï arhikuekajka inde uandakuecha engaksï ebreu ka griegu jimbo jaka. Jimbosï Traducción del Nuevo Mundo  májkueni jatsikujti utusï jimbo “Seol” ka “Hades” notechani jimbo. ¿Ambeksï arhikuekasïni i uandakuecha? Ju je exeni nénaksï úrakuarhisïni Bibliarhu.

Eclesiastés 9:10 uandasïndi: “No jarhasti ánchikuarhita, ni ambe ma parari úni, níteru jarhajkia jánhaskua ka ni mímixekua jini sepulturarhu [Seol, nota], nani engari nirajka”. ¿Arhikuekasïni i ambe eska Seol jimaeska enga mándani uarhiri jántajka? Nómbe. Enga Biblia tumbecheri uandajka, no úrasïndi scheʼóhl ni háides, sino máteru uandakuechani, engaksï ístu ebreu ka griegu jimboeka (Génesis 23:7-9; Mateu 28:1). Uandakua “Seol”, nójtu arhikuekasïndi ma nani enga uánikuecha jatsinhantajka, komueska kamposantu ma o kʼéri ma posu engaksï uánikuecha jatsinhantajka (Génesis 49:30, 31).

Jiájkani, enga Biblia “Seol” o “Hades” uandajka, ¿ambe arhikuekasïni? Arhikuekasïndi ambe ma enga sánderu kʼéka eska kʼéri ma posu engaksï uánikuecha jatsinhantajka. Isaías 5:14 uandasïndi eska Sepultura o Seol ambe máeska enga “kánikua kʼéri úkuarhijka” ka enga “kánikua kánikua mítaka penchumikuani”. Úsïngachi uandani eska Seol uánikua uarhirichani auantaskia ka útasï sánderu uékaasïndi (Proverbios 30:15, 16). Kamposantu ma uinisïndi peru ‘Sepultura no méni uinisïndi’ (Proverbios 27:20). Ísïsti, Seol, o Hades, no méni uinisïndi ka no méni uiniati. Ísï jimbo, no jindesti ma nani engachi uáka exeni o exentani, no jindesti ambe ma o ma nani engaksï uarhiricha nirajka. Sánderu sési, sepulturani arhikuekasïndi jima engaksï iámindu uarhiricha nirajka, o parachi sánderu sési kurhanguni, jindesti komueska ma nani engaksï sáno iámindu uarhiricha mintsikuarhini jarhajka.

Engachi jorhenguarhijka ambe enga Biblia jorhentpijka tsíntskueri ambe, sánderu sésichi kurhangusïnga ambeski Seol o Hades. Biblia uandasïndi eska imecha engaksï Seolirhu o Hadesirhu jaka, uákaksï tsíntani (Job 14:13; Ukuecha 2:31; Jaŋaskuecha [Apocalipsis] 20:13). * Ka uandasïndi eskaksï jima jarhaska imecha engaksï Jeobani marhuakuka ka  ístu uánikuecha engaksï no úka marhuakuni (Génesis 37:35; Salmo 55:15). Jimbosï Biblia uandajti eskaksï “tsíntaaka uarhiricha imecha engaksï ambarhatika, ka ístu imecha engaksï malueka” (Ukuecha 24:15).