1. ¿Ambe uá Tata Diosï Echerini jingoni?

TATA Diosï ambakiti ambe eratsixati úni Echerini jingoni: uékasïndi uinirani kʼuiripuechani jingoni engaksï sési irekaaka no ma pʼamenchakua jingoni. Biblia uandasïndi eska “Tata Diosï Jeoba jardini ma úspka Edenirhu” ka “úspti eska japiringa [...] mámaru jásï ambakiti anhatapuecha para exeani ka paraksï úni akuni”. Tátsekua kueraaspti Adani ka Ebani, ka sési jándikua ma jimbo péraaspti ka arhiaspti: “Kánguarhia je uájpechani ka uánikua úkuarhi je, uinira je echerini ka ánchita je” (Génesis 1:28; 2:8, 9, 15). Eskachi na exejka, Tata Diosï uékasïrendi eskaksï kʼuiripuecha kánguarhiapiringa uájpechani, eska iámu Echerirhu sési jándepiringa ka eskaksï sési kaapiringa animalichani.

2. a) ¿Andichisï uá mintsikani eska úkuarhiaka Echerirhu ambe enga Tata Diosï uékajka? b) Eska na uandajka Biblia, ¿na jásï kʼuiripuechaksï irekaa para méntkisï?

² ¿Úkuarhia ma jurhiani ambe enga Jeoba uéjka, eskaksï irekaaka kʼuiripuecha paraisu ma jimbo echerirhu? Ima aiatspesti: “Uandaskia; ka ístuni, ísï uáka” (Isaías 46:9-11; 55:11). Ísïsti, Tata Kueraajpiri uáti iámindu  ambe enga ima uékajka. Ima mísmu uandasti eska “no ísku kueraaska [Echerini], sino paraka irekanhapiringa” (Isaías 45:18). ¿Na jásï kʼuiripu uékasïreni Tata Diosï eska irekapiringa ixú, ka na xáni tiempu? Biblia uandasïndi: “Echeri jurhimbiticheriuati, ka jimaksï irekaati para méntkisï” (Salmo 37:29; Jaŋaskuecha [Apocalipsis] 21:3, 4).

3. ¿Ambe no sési jásï ambechi exesïni Echerirhu, ka ambechi úpirini kurhamarhikuarhini?

³ Peru inde ambe nótki ísï úkuarhisïndi. Kʼuiripuechaksï pʼamenchasïndi ka uarhini, uarhiperasïndiksï ka uándikperani. Xarharasïndi eska nótki úkuarhixaka ambe enga Tata Diosï uékaenga. Peruchi uáka seguru jarhani eska Jeoba no méni uékaska eska ísï jánhaskuarhepiringa. Jiájkani, ¿ambe úkuarhiski? ¿Andisï nótki úkuarhijki ambe enga Tata Diosï uékajka? I mókuntskuechaksï no ma libru jimbo jarhasti engaksï kʼuiripuecha karaka, jimboka i ambe auandarhu uénaska.

4, 5. a) ¿Néspi ima enga Ebani jingoni uandontskuarhipka akuitsini ma úraparini? b) ¿Néna úpirini jurhimbiti kʼuiripu ma, sïpajkurha úkuarhini?

⁴ Primeru libru Bibliarhu, uandasïndi eska jardini Edenirhu uénaska Tata Diosïri ikiatspiti ma xarharani. Nájkiruka “akuitsi” arhinhajka, i no animali máesti. Últimu libru Bibliarhu, uandasïndi eska i, imaeska ‘enga arhinhajka Noambakiti ka Satanasi, ima enga enganiariani jaka iámindu parhakpini anapuechani’. Ka ístu arhinhasïndi “ióntki anapu akuitsi” (Génesis 3:1; Jaŋaskuecha 12:9). Ísïsti, uinhapiti ánjili máesti, espiritu ma enga no xarharajka ka enga úrapka akuitsini ma para Ebani jingoni uandontskuarhini. Májkueni eska nema enga  monuni ma úrajka para xarhatani eska monusï uandani jaka. Inde ánjili jima jarhaspti enga Tata Diosï sési jántskani japka Echerini para úni irekanhani (Job 38:4, 7).

⁵ Mítiskachi eska iámu ambe enga Jeoba újka sési úkata jarhaska. Jiájkani, ¿né úski imani engachi arhijka “Noambakiti” ka “Satanasi”? Jandiajku Noambakiti úkuarhesti ma Tata Diosïri ánjili enga kánikua uinhapipka. ¿Néna ísï úkuarhiski? Májkueni eska nema enga jurhimbiti jámajka na sïpajkurha úkuarhijka. ¿Néna úkuarhisïni i ambe? Kʼuiripu ma uáti úndani imeri mintsitarhu no sési jásï ambe tsitini. Enga méntku úndaaka indeni ambe eratsini, uénaati sánderu tsitini. Ka tátsekua, enga jauaka modu, uáti ambe enga eratsini japka (arhinta je Santiagu 1:13-15).

6. ¿Néna niáraski Tata Diosïri ánjili uinhapiti ma, Satanasi ka Noambakiti úkuarhini?

⁶ I ambesï úkuarheti Satanasini jingoni. Jamberi ima kurhaapti enga Jeoba arhipka Adani ka Ebani eskaksï kánguarhiapiringa uájpechani ka eskaksï uinirapiringa Echerini (Génesis 1:27, 28). Ima eratsipti: “¡Iámindu i kʼuiripuechajtsïni uáti jíndini marhuachini ka no Tata Diosïni!”. Inde no sési jásï eratsikua úndaspti mintsitarhu jatanheni, ka sánderu orhepatini inde eratsikua ústi eska Satanasi, támisï jánhastapiringa Ebani, chkuanderakua ambe arhiparini Tata Diosïri ambe (arhinta je Génesis 3:1-5). Ísï, ima ánjili niárasti “Noambakiti” úkuarhini, enga arhikuekajka “Nemani enga no sési jarhati chkuanderakua ambe uandajka máteru nemaeri”. Ístu “Satanasi” úkuarhesti, enga arhikuekajka “Ikiatspiti o Tájpanharikpeti”.

7. a) ¿Andiksïsï uarhi Adani ka Eba? b) ¿Andichisï tʼarhepijki ka uarhini iámindu Adaniri uájpecha?

⁷ Puru chkuanderakua ambe jimbo, Satanasi ústi eska Adani ka Eba nóteruksï kurhajchapiringa Tata Diosïni  (Génesis 2:17; 3:6). Ka i ambe jimbo Adani ka Eba niárastiksï uarhini, ísï eska Tata Diosï na arhiapka (Génesis 3:17-19). Iásï Adani pekadorisptia, ka iámindu imeri uájpecha ístu pekadu jingoniksï andajpenupirindi (arhinta je Roma 5:12). I ambe úpiringachi xarhatani moldeni ma jingoni engaksï úrajka para tabiki úni ka enga sánisï kʼepekurhipiringa, ¿nénaksï uéraa tabikicha engaksï ini moldeni jingoni únhaaka? Kʼepekurhitaksï uérati sánisï. Májkueni, iáminduchi ísï andajpenusïnga “kʼepekurhitani” jingoni, enga jindeeka Adaniri pekadu. Ini ambe jimbochisï tʼarhepijka ka uarhini (Roma 3:23).

8, 9. a) ¿Ambe uandaspi Satanasi, Jeobaeri ambe? b) ¿Jeoba andisï no jimajku kʼamajkuapi no kurhandichani?

⁸ Enga Satanasi úpka eska Adani ka Eba nóteruksï kurhajchapiringa Tata Diosïni, orhejtsïkuti úkuarhesti imecheri engaksï nóteru kurhajchapkia Tata Diosïni. No jiókuarhixapti na enga Jeoba juramuenga. Ísïspti eska uandani jarhani: “Jeoba no sési juramusïndi ka chkuanderakuasïndi imechani engaksï imani marhuakujka, ka no jurajkuasïndi eskaksï sési nitamanchaaka. Kʼuiripuechaksï no uétarhinchasïndi eska ima juramukuauaka, jandiajkuksï uáti erakukuarheni ambe sésiski ka ambe no sésiski. Ka sánderu sési nikuauati engajtsïni jíndeni kurhajchaska”. ¿Néna mókuntapirini Tata Diosï i xáni ikichakueni jásï chkuanderakuani? Máruksï uandasïndi eska sési japiringa enga Tata Diosï jimajku uándikuapiringa i no kurhandichani. Peru enga ísï úpiringa, ¿xarhatapirini eska Satanasi chkuanderaxapka? ¿Xarhatapirini eska sési juramusïnga?

⁹ Jeoba sési mítisti ambesï jurhimbikue. Ísï jimbo, no úpirindi jimajku kʼamajkuani no kurhandichani. Jeoba mítispti eska tiempu uétarhisïrenga para mókuntani  ambe enga Satanasi uandapka ka para xarhatani eska Satanasi chkuandera máeska. Ísï jimbo, jurajkusti eskaksï kʼuiripuecha jandiajku juramukuarhipiringa ma tiempu ka eska Noambakiti juramukuapiringa. Kapitulu 11 jimbo, exeakachi andisï i ambe ú, ka andisï xáni tiempu jurajkuni jaki para sési peentani iámu ambe. Peru exe je: Satanasi no méni jarhuataaspti Adani ka Ebani, ¿sésiksï úspi engaksï Satanasini jakajkukupka? ¿Sésiksï  úspi jakajkuni eska Jeoba enga iámindu ambe íntskuapka, chkuandera máespka? ¿Ambejtsï úpirini cha?

10. ¿Nénajtsï uá cha Jeobani jingoni jarhani ka mókuntani imani ambe enga Satanasi uandaka?

¹⁰ Sési jarhasti eratsiani i kurhamarhikuechani jimbokachi iámindu májkueni jarhaska. Ísïsti, chájtsï uáka Jeoba jingoni jarhani ka ísïjtsï uáka mókuntani imani ambe enga Satanasi uandapka. Uákajtsï jiókuarhini Tata Diosïni eska chári Juramuti ka ísï xarhatakuni Noambakitini eska chkuandera máeska (Salmo 73:28; arhinta je Proverbios 27:11). Peru uánikuaksï no ísï úsïndi, uánikua miioni kʼuiripuechaksï irekasti ini parhakpinirhu, peru namunitkuksïsï marhuakujti Tata Diosïni. I ambe úsïndi eskachi kurhamarhikuarhiaka ambe ma: ¿jorhentpisïni Biblia eska Satanasi juramusïnga ixú?

11, 12. a) Tsʼéjkukua ma enga Jesusi jatsipka, ¿néna xarhatasïni eska Satanasi juramutiska i parhakpinirhu? b) ¿Ambe máteru ambe jimbo xarharasïni eska Satanasi juramutiska i parhakpinirhu?

¹¹ Jesusi mítispti eska Satanasi jindeeska juramuti i parhakpinirhu. Ma jurhiatikua, Noambakiti exeraspti milagru ma jimbo “iámindu parhakpini anapu nasionichani, ka exerani imeri tʼíntskuani”, ka aiakuspti: “Jíkini tʼungini íntskuaka iámindu ini ambe engarini tinguixurhichiska ka kʼéri ambe arhindini” (Mateu 4:8, 9; Lukasʌ 4:5, 6). Eratsi je i ambe, ¿úpirini Satanasi aiakuni Jesusini iámu parhakpinirhu anapu juramukuechani engaksï no imeripiringa? Jesusi no méni arhisti Satanasini eskaksï i nasionicha no imerispka, engaksï no imeripiringa, Jesusi arhipirindi ambe ma.

¹² Peru ísïsti, Jeoba jindeesti Tata Diosï enga iámindu ambe újka úni, enga iámindu ambe kueraaka (Jaŋaskuecha 4:11). Peru Bibliarhu, no nani uandasïndi eska  Jeoba o eska Jesukristu juramutiska parhakpinirhu. Sánderu sési, Jesusi uandaspti eska Noambakiti jindeeska “i parhakpini anapu juramuti” (Juanu 12:31; 14:30; 16:11). Ka Biblia ístu uandasïndi eska tájpanharikpeti o Satanasi jindeeska “diosï i parhakpiniri” (2 Korintu 4:3, 4). Apostuli Juanu mísmu uandaspti: “Iámindu parhakpini anapuecha Noambakitiri juramukua jimbo jarhas[ti]” (1 Juanu 5:19).

13. ¿Andisï uétarhijki jimbanhi parhakpini ma?

¹³ Mándani uéxurhini, méntku úndasïndi sánderu no sési jánhaskuarheni. Iápuru ísïksï jarhasti guerrecha, politikuecha engaksï no jurhimbiti ánchikuarhijka, relijioniri orhejtsïkuticha engaksï no újka ambe engaksï jorhentpejka ka uándikpiticha engaksï no pʼamojpijka. I parhakpini nóteru uátia jurhimbintani. Biblia uandasïndi eska no ióni jimbo, Tata Diosï, Armajedonirhu kʼamajkuaka parhakpinini enga xáni no sési jásï ambe únhajka ka uénakuarhiati jimbanhi parhakpini ma enga jurhimbitiuaka (Jaŋaskuecha 16:14-16).

14. ¿Néni erakuski Tata Diosï para juramuni auandarhu uératini, ka néna uandanhaspi eska úkuarhipiringa i ambe?

¹⁴ Jeoba, Jesukristuni erakusti para juramuni auandarhu uératini. Ióntki Biblia uandasptia: “Sapinchi ma kóndinhaska, uájpanchi ma intsïnhaska, ka ima juramukua intsïnhaati; ka imeri arhinhakua jindeuati [...] Juramuti Pínandikueri. Ka imeri gobiernu ka pínandikua nóksï méni kʼamakurhiati” (Isaías 9:6, 7, nota). Jesusi jorhendaaspti imeri jorhenguarhitichani eskaksï kurhajkuarhipiringa kómarhikuecharhu ini gobiernuni, enga uandapka: “Jaue ixú parhakpinirhu chíti juramukua. Úkuarhie eska tʼu na uékajka ixú parhakpinirhu, májku jásï eska na úkuarhijka auandarhu”  (Mateu 6:10). Eskachi na exeaka sánderu orhepatini, Tata Diosïri Reinu nóteru ióni jimbo, kʼamajkuauati i parhakpinirhu anapu gobiernuechani ka Tata Diosïri Gobiernujkusï pakaraati (arhinta je Daniel 2:44). Ka jiánisï Jeoba ini Echerini, paraisu ma úntaati.

15. ¿Ambeski “jimbanhi parhakpini”?

¹⁵ Bibliajtsïni aiachesïndi eskachi “erokaxaka jimbanhi auandani ka jimbanhi parhakpinini jimanga jurhimbitku jánhaaka, eskajtsïni Diosï na eiachika” (2 Pedru 3:13; Isaías 65:17). Enga Bibliarhu arhijka “parhakpini”, ménichani kʼuiripuechanisï arhikuekaajti (Génesis 11:1). Ísï jimbo, “jimbanhi parhakpini” jindeesti ma grupu kʼuiripuecheri enga Tata Diosï jaiapanhiantajka.

16. ¿Ambe ambakiti regalu íntskuaua Tata Diosï imechani enga jaiapanhiantajka, ka ambechi jatsiski para úni parachi úni intsïnhani?

¹⁶ Jesusi aiatspesti eska Tata Diosï íntsauaka “tsípikua para méntkisï”, imechani enga ima jaiapanhiantauaka, jiáni enga janoakia jimbanhi parhakpini (Markusʌ 10:30). Jirinhanta je chári Bibliarhu, Juanu 3:16 ka 17:3, ka exe je ambe uandaspi Jesusi eskachi úpiringa parachi úni irekani para méntkisï. Iásï ju je exeni Bibliarhu, ambeksï kóntperatechani jatsiaua Paraisurhu imecha engaksï intsïnhaaka ini ambakiti regaluni enga Tata Diosï íntspiaka.

17, 18. ¿Andichisï uá mintsikani eska pínandikua jauaka ka eska nóteru nema chéparini irekaaka?

¹⁷ Nóteru jauatia no sési jásï ambe, guerrecha, uándikperakuecha, ka atajperakuecha. “No sési úrichaksï nóteru jauatia [...]. Peru echeri kaxumbiticheriuati.” (Salmo 37:10, 11; Mateu 5:5.) Pínandikua jauati, jimboka Tata Diosï “kʼamajkuauaka guerrechani iámu parhakpinirhu”  (Salmo 46:9; Isaías 2:4). Enga niáraakia ima jurhiatikua, “jurhimbitichaksï uániati” ka “kánikua pínandikua jauati astaka luna nóteru jauakia”, i arhikuekasïndi eska jindeuaka para méntkisï (Salmo 72:7).

¹⁸ Engaksï Jeobani marhuakujka nóksï chéparini irekaati. Ióntki, engaksï israelitecha kurhajchaenga Tata Diosïni, sésiksï irekasïrendi (Levítico 25:18, 19). ¡Na xáni sésiua májkueni irekani Paraisurhu! (Arhinta je Isaías 32:18; Miqueas 4:4.)

19. ¿Andichisï uá mintsikani eska Tata Diosï uáka eska kánikua tʼirekua jauaka jimbanhi parhakpinirhu?

¹⁹ Iáminduksï jatsiati tʼirekua. Salmista pirespti: “Kánikua tʼirekua jauati echerirhu; juátecharhu karakua, kánikua tʼirekua jauati” (Salmo 72:16). Jeoba újchakurauati imechani engaksï méntkisï marhuakuaka, ka “echeri kánikua tʼirekua íntspiati” (Salmo 67:6).

20. ¿Andichisï uá mintsikani eska Parhakpini paraisu máeuaka?

²⁰ Iámu Echeri paraisu ma úkuarhintaati. Ini echerini jimbo enga kʼuiripuecha xáni no sési jántskakia, sési járhati kʼumanchikuechaksï ka jardinicha jauati (arhinta je Isaías 65:21-24; Jaŋaskuecha 11:18). Enga nitamapani jauaka tiempu, sánhani arhiati sési jándentani Parhakpinirhu ka iápuru ísï xándiati eska jardini enga Edeni arhinhaenga ka echeri mámaru ambejtsïni íntskuati. Ka para méntkisï, Tata Diosï “mítani jauati [imeri] jájkini para íntskuani iáminduechani ambe engaksï uétarhinchaaka” (Salmo 145:16).

21. ¿Ambe jimbo xarharasïni eska kʼuiripu ka animalicha uákaksï márku irekani?

²¹ Animalichaksï uáti kʼuiripuechani jingoni irekani. Animali juátarhu anapuecha ka kʼumanchikuarhu anapuecha, márkuksï tʼireati. Sapi ma, nóteru chérhiauatia imani animalichani engachi iásï no újka andarheraani (arhinta je Isaías 11:6-9; 65:25).

22. ¿Ambe úkuarhia pʼamenchakuechani jingoni?

 ²² Nóteruksï jauati pʼamenchakuecha. Enga Jesusi juramuni jauakia auandarhu uératini, sánderu uánikua pʼamenchakuechani kénditauati ka eska jiáni enga Echerirhu japka (Mateu 9:35; Markusʌ 1:40-42; Juanu 5:5-9). “No nema enga jima irekaaka uandaati: ‘Pʼamenchaxaka’.” (Isaías 33:24; 35:5, 6.)

23. ¿Andisï kánikua tsípinhaa enga tsíntskua jauaka?

²³ Imecha engachi uarhiranchaka, tsíntaatiksï ka engaksï kurhajchaaka Tata Diosïni, nóteruksï méni uarhiaati. Iáminduecha engaksï kʼuíni jaka uarhikuarhu ka Tata Diosï miáuani jarhani, tsíntaatiksï. Jo, “tsíntaa[tiksï] uarhiricha imecha engaksï ambarhatika, ka ístu imecha engaksï malueka, [imecha engaksï no úka mítini Jeobani]” (Ukuecha 24:15; arhinta je Juanu 5:28, 29).

24. ¿Nájtsï exesïni cha Paraisu ma jimbo irekani Echerirhu?

²⁴ Sési jásï ambeksï erokuarhisïndi imecha engaksï uékaaka sánderu jorhenguarhini juchari Kʼéri Kueraajpiri Jeobaeri ambe, ka engaksï uékaaka marhuakuni. Kánikua jukaparhakuesti eskachi jorhenguarhiaka sánderu tata Jesukristueri ambe, jimbokaksï i kóntperatecha imani jimboksïsï úkuarhiaka.