1, 2. ¿Nanichi uá exentani ambakiti kuájchakukua ma?

ERANHASKA je eskajtsï nirasïnga ma nanisï, ka eska uénasïnga janikua tánguarhintani. Ma repentku, úndasïndi piritani, charanchini, ka janikua tʼájpatsesïndi. Chájtsï uiriisïnga jirinhani nani kuájchakukuarhini. Jimajkani, exesïngajtsï xanharu jimbo kuákua ma. I kuákua sési úkata jarhasti ka jima no tsʼurhenasïndi. ¡Kánikuajtsï tsípisïnga jimbokajtsï exentaskia nani kuájchakukuarhini!

² Ari jurhiatikuechaksï kánikua no sési jándesti ka no sési jánhaskuarhexati. Peru jarhasti kuájchakukua ma engajtsïni uáka kuájpini imani ambe jingoni engajtsïni uáka kánikua no sési úcheni. ¿Nákiski? Exe je ambe enga Biblia uandajka: “Arhiaka Jeobani: ‘Tʼuri jindeska juchiti kuájchakukua, ka juchiti uinhapikua, juchiti Tata Diosï engani ji sési jimbo mintsikajka’” (Salmo 91:2).

3. ¿Nénachi uá eska Jeoba juchari kuájchakukueuaka?

 ³ Jeoba, Tata Kueraajpiri ka Juramuti iámindu ambeeri, uáti juchari kuájchakukueni. ¡Xáni ambakiti kóntperata ma! Ima sánderu uinhapisti eska né uéjki o ambe uéjki engajtsïni uékaaka no sési úcheni. Ka nájkirukachi no sési úminhaaka, Jeoba uáti iámindu ambe sési peentani. ¿Nénachi uá eska Jeoba juchari kuájchakukueuaka? Mintsikaparini. Ístu, Bibliajtsïni i ambe pʼímarhisïndi úni: “Diosïri xénchperakuarhu ja je” (Júdasïri 21, TDU). Jo ísïsti, jatsiskachi para Tata Diosïri xénchperakuarhu jarhani ka no jurajkuni juchari Táti auandarhu anapuni. Engachi ísï úska, seguruchi jauaka eska ima juchari kuájchakukueuaka. Peru, ¿nénachi uá xáni ambakiti pájperakua ma jatsini Tata Kueraajpiri jingoni?

4, 5. ¿Ambe xarhatasïni na engaksïni xáni uékajka Tata Diosï?

⁴ Jeobajtsïni mámaru ambe jimbo xarhatachestia uékperakua. Ju je exeni ambe ka ambeski i ambe, jimboka miántani i ambe, jarhuauatijtsïni parachi Tata Diosïri xénchperakuarhu jarhani. Eratsinta je máru Bibliarhu anapu ambe engajtsï jorhenguarhikia ini librurhu. Ari jindesti ma, parachi úni sési irekani, Tata Kueraajpirijtsïni ambakiti kʼumanchikua ma íntskusti, i Echeri, kánikua sési jándesti, kánikua tʼirekua jarhasti, itsï, ambakiti animalicha, ka uánikua ambe engajtsïni echeri íntskujka parachi úrani. Ístuchi mítiska eska Tata Diosï kararkuarhiska Bibliani, engajtsïni jimbo eiangujka na enga arhinhajka ka na enga jásïka. Bibliajtsïni eiangusïndi andisï Jeoba axapi Echerirhu imeri Uájpani enga ima sánderu uékenga ka andisï jurajkupi eska no sési kánhapiringa ka uarhini juchantsïni jimbo (Juanu 3:16). Ísïjtsïni íntskusti ambakiti regalu ma, engachi jimbo újka ambakiti  erokuarhikua ma jatsini para sánderu orhepatini.

⁵ I ambakiti erokuarhikua úkuarhiati ambe ma jimbo enga Tata Diosï úkia. Jeoba gobiernu ma uaxastasti auandarhu, Mesiasiri Reinu. No ióni jimbo i Reinu, kʼamajkuati iámu kómu nitamakuani ka Paraisu ma úntaati Echerini. ¡Xáni ambakiti ambe! ¡Iásï kʼóruchi tsípikua jingoni irekaaka ka pínandikua jingoni para méntkisï! (Salmo 37:29.) Peru enga jamberi niáraaka ima jurhiatikua, Tata Diosïri mandamientuechajtsïni jarhuataati parachi sési irekani. Ístujtsïni Jeoba íntskusti máteru regalu: kómarhikuani, engachi jimbo újka imani jingoni uandontskuarhini. Íksï jindesti máru ambe enga jimbo xarharajka na engaksïni xáni uékajka Tata Diosï chánksïni ka iámindu kʼuiripuechani.

6. ¿Nénachi uá májkueni uékani Tata Diosïni eskajtsïni ima na uékajka?

⁶ Iásïjtsï jatsiska para ambakiti kurhamarhikua ma úkuarhini: “¿Néna mókuntaa Jeobaeri uékperakuani?”. Uánikuechaksï uandapirindi: “Uékaparini Jeobani”. ¿Májkuentsï eratsisïni cha? Jesusi uandasti eska i sánderu kʼéri mandamientueska: “Uékaakari chíti Tata Diosïni méntku iámindu chíti mintsita jingoni, ka iámindu alma jingoni, ka iámindu chíti eratsikua jingoni” (Mateu 22:37). Chájtsï uékasïngia Jeobani uánikua ambe jimbo. Peru, para uékani Tata Diosïni iámu mintsita, alma ka eratsikua jingoni, ¿uétarhisïni sántku uékani?

7. Para meru uékani Tata Diosïni, ¿uétarhisïni sántku uékani? Uandanta je andijtsïsï ísï mókuntajki.

⁷ Biblia xarhatasïndi eska uékani Tata Diosïni, sánderu ambe arhikuekasïnga eska solu sántku uékani. Jukaparhakuesti úndani uékani, peru solu uénakuarhuesti para  ma niárani meru uékani. Parachi úni kurhanguni, eranhaska je ini ambe: engajtsï cha mansana ma uékapiringa, ¿jiókuarhipirintsï mansaneri tskipunku? Nómbe. Ísïsti, tskipu kánikua jukaparhakuesti para úni jarhani mansaneri anhatapu ma, peru chájtsï mansanasï ma uékajka. Májkueni úkuarhisïndi inde sánitu uékperakua jingoni engachi jatsika Jeobani jimbo: májkueni eska tskipu, jatsisti para kʼéni ka para fruta jukani. Biblia jorhentpesïndi: “Jimboka para Diosïni uékani, jindeska eskaksï uáka eska imajtsïni na juramuchijka, ka no kʼuetsapiti ambesti engajtsïni ima juramuchijka” (1 Juanu 5:3). Ísïsti, ambakiti uékperakua Tata Diosïni jimbo, jatsisti para fruta íntspini, jo, jatsisti para úkuechani jingoni xarharani (arhinta je Mateu 7:16-20).

8, 9. ¿Nénachi xarhataa eskachi uékasïnga Tata Diosïni ka eskachi jukaparharasïnga iámindu ambe enga ima úka juchantsïni jimbo?

⁸ Xarhatasïngachi eskachi uékasïnga Tata Diosïni, engachi kurhajchajka imeri mandamientuechani ka  engachi újka ambe engajtsïni ima kurhachijka. I ambe no úkua jukasti, jimbokaksï Jeobaeri leicha no kʼuetsapiska. Sánderu sési, úkataksï jarhasti parachi sési irekani ka tsípikua jingoni (Isaías 48:17, 18). Engachi jurajkuska parajtsïni Jeoba orhechipani, xarhatasïngachi eskachi jukaparharasïnga iámindu ambe enga Jeoba úka juchantsïni jimbo. Peruksï no uánikuecha ísï eratsisïndi. Jucha no uékasïnga no jukaparharani i ambe, ísï eskaksï na úpka máru engaksï Jesusiri tiempu jimbo irekapka. Ma jurhiatikua, tata Jesukristu ambakerantaaspti diesi kʼuiripuechani engaksï lepra pʼamenchaenga, peru májkusï nípti diosmeiamukua íntskuntani (Lukasʌ 17:12-17). Jucha uékasïnga ísïni eska i kʼuiripu, ka no komueskaksï ima nuebi engaksï no nípka diosmeiamukua arhini Jesusini.

⁹ Jiáni, ¿náki Jeobaeri mandamientuechanchi jatsiski para kurhajchaani? Máruchi exeaskia ini librurhu. Peru ju je ménderu exeani máru. Jimboka, engachi kurhajchaaska Tata Diosïri mandamientuechani, sánderuchi no úkua jukanchaaka imeri xénchperakuarhu jarhani.

10. ¿Andisï xáni jukaparhakue seguirini jorhenguarhini Jeobaeri ambe?

¹⁰ Sési mítini Jeobani kánikua jukaparhakuesti para sánderu andarherani. Ka jatsiskachi para pauani pauani ísï úni. Eranhaska je eskajtsï ma chúrikua juátarhu jarhaska, ka eska kánikua tsʼirakuarhisïnga, ka eskajtsï kurhikasïnga parajtsï jorhentani. ¿Jurajkupirintsï eska chpiri sánhani arhipiringa pátakuarhini? Nójtsï jurajkupiringa. Méntkujtsï úndapiringa chkari jatsijpani para uinhamu kurhini, jimbokajtsï úpiringa uarhini enga pátakuarhiska. Májkueni eska chkari na no jurajkujka eska chpiri pátakuarhiaka, “mítini Tata Diosïni” úsïndi eska no pátakuarhiaka chári uékperakua Jeobani jimbo (Proverbios 2:1-5).

11. ¿Néna marhuakuaspi ambe enga Jesusi jorhendaapka imeri jorhenguarhitichani?

 ¹¹ Jesusi uékasïrendi eska imeri jorhenguarhiticheri uékperakua no méni kʼamakurhipiringa Jeobani jimbo, ka imeri ambakiti Karakata jimbo. Enga na tsíntapkia, eianguaspti tsimani imeri jorhenguarhitichani, na engaksï Jesusini jimbo úkuarhipka máru profesiecha engaksï Karakata Ebreaecharhu japka. ¿Néna marhuaspi i ambe? Sánderu orhepatini; íksï jorhenguarhiticha uandaspti: “¿Andi no juchari mintsita pʼikuastaxapijtsïni engajtsïni xanharu jimbo jánhastapuni japka ambe engaksï arhikuekajka Karakatecha?” (Lukasʌ 24:32).

12, 13. a) Para sáno iáminduecha, ¿ambe úkuarhinchaski uékperakua para Tata Diosïni ka Biblia jimbo? b) ¿Ambechi uá para no kʼamakurhini juchari uékperakua?

¹² Engajtsï jorhenguarhipani japka ambe enga Biblia jorhentpejka, ¿a no eskajtsï chájtu mintsitarhu pʼikuarhinhisïrenga xáni tsípini, ka uékani Tata Diosïni? Seguruchi jarhaska eska jo. Uánikuechaksï májkueni pʼikuarherasïndi. Iásï ambe enga úkua jukaka, jindesti úni eska inde uékperakua no méni kʼamakurhiaka ka eska sánderu kʼéaka. Nochi uékasïnga ísïni eska imecha enga Jesusi uandapka eskaksï japiringa iásï, uánikua engaksï nóteru uékapiringia Tata Diosïni (Mateo 24:12, TNM). ¿Ambejtsï uá paraka chári uékperakua Jeobani jimbo ka ima jurhimbiti ambe jimbo engajtsï jorhenguarhikia Bibliarhu no kʼamakurhiaka?

¹³ Seguiri je jorhenguarhini Tata Diosï Jeobaeri ambe ka tata Jesukristueri ambe (Juanu 17:3). Sési eratsinta je ambe engajtsï arhintaaka Bibliarhu ka kurhamarhikuarhi je: “¿Amberini jorhendasïni Jeobaeri ambe? ¿Jarhuatasïndini parani uékani Jeobani, iámu mintsita, eratsikua ka alma jingoni?” (arhinta je 1 Timoteo 4:15). Engajtsï ísï úska, chári uékperakua Jeoba jimbo no méni kʼamakurhiati.

14. ¿Andisï xáni jukaparhakue kómarhikua para no kʼamakurhini juchari uékperakua Jeobani jimbo?

 ¹⁴ Pauani pauani kómarhikua úni, ístujtsïni jarhuataati para no kʼamakurhini uékperakua Jeobani jimbo (1 Tesalonika 5:17). Kapitulu 17 jimbo, jorhenguarhiskachia eska kómarhikua ambakiti regalu máeska Tata Diosïri. Parachi úni sési pájperani máteruechani jingoni, uétarhisïndi pauani pauani uandontskuarhini ka uénhikuarhini. Ístu májkueni, juchari pájperakua Jeoba jingoni, no méni kʼamakurhiati engachi pauani pauani kómarhiska. Jánguarhintaakachi para mintsita jingoni uandajpani; nochi jámaaka méntku repetirini jarhani uandakuechani, ka no jamberi eratsintani ambe engachi arhiaka. Ísïchi uandajpaaka Jeobani, eska sapi ma na uandontskuarhijka imeri tátini jingoni enga kánikua uékajka. Jo ísïsti, jatsiskachi para janhanharhikua jingoni uandajpani, peru no chékua jingoni sino mintsita jingoni (Salmo 62:8). Para úni marhuakuni Tata Diosïni, kánikua jukaparhakuesti eskachi jatsiaka juchari jorhenguarhikua Bibliaeri ka eskachi mintsita jingoni kómarhiaka. Engachi ísï úska, sánderu fásiliuati Tata Diosïri xénchperakuarhu jarhani.

15, 16. ¿Andichisï jatsi para kóntperata ma exeni ka kánikua jukaparharani aianhpeni Tata Diosïri Reinueri ambe?

¹⁵ Bibliani jorhenguarhini ka kómarhikua úni, jindestiksï máru ambe engachi jimbo jandiajku marhuakujka Tata Diosïni. Peru iásïchi uandaaka ma amberi engachi újka máteruechani jingoni: uandontskuarhikuani ambe engachi jakajkujka. ¿Aianguskijtsïa nemani ambe enga jorhentpejka Biblia? Enga ísïka, kʼéri kóntperatajtsï ma niáraska jatsini (Efesu 3:8). Engachi eianhpijka ambe engachi jorhenguarhikia Jeobaeri ambe, úsïngachi  kʼéri ma ánchikuarhita engaksï iámindu jurhimbiti kristianuecha intsïnhaka: eianhpini ambakiti eianhperakua Tata Diosïri Reinueri (arhinta je Mateu 24:14; 28:19, 20).

¹⁶ Apostuli Pablu jukaparharasïrendi aianhpeni, jimbosï uandapti eska aianhpikua kánikua jukaparhakua ambespka (2 Korintu 4:7). No jarhasti sánderu ambakiti ánchikuarhita ma, ka eska uandantani Jeobaeri ambe ka ambe enga eratsitini jaka úni. Ka úsïngachi i ambe, para marhuakuni Jeobani, ka jimbokachi ambakiti ambe intsïnhasïnga. Engachi aianhpijka, jarhuataasïngachi imechani engaksï uékajka, paraksï andarherani juchari Táti auandarhu anapuni, ka paraksï jámani imani xanharu jimbo enga pájpijka para jatsini tsípikua para méntkisï. ¿Úpirini máteru ánchikuarhita xáni sési pʼikuastpini? Ka ístu, engachi eianhpijka Jeobaeri ka imeri Karakateri ambe, kʼésïndi juchari mintsikakua ka juchari uékperakua Tata Diosïni jimbo. Ka Jeoba kánikua jukaparharasïndi engachi jánguarhintajka ísï úni (Ebreu 6:10). Eskachi na exekia, no kueratani aianhpeni, jarhuatasïndijtsïni parachi Tata Diosïri xénchperakuarhu jarhani (arhinta je 1 Korintu 15:58).

17. ¿Andisï uétarhijki jánguarhintani aianhpeni?

¹⁷ Jukaparhakuesti miáni eska kánikua uétarhisïnga aianhpeni Reinueri ambe. Biblia uandasïndi: ‘Eianhpi Diosïri uandakuani, ka jánguarhintsï ísï úni’ (2 Timoteo 4:2). ¿Andisï uétarhijki xáni jánguarhintani iásï? Ini ambe jimbo enga Biblia uandajka: jimboka “Juchari Tateeri jurhiatikua janoxamkia” (Ebreu 10:25). Ísïsti, axuterku jarhastia jurhiatikua enga Jeoba kʼamajkuaka no sési jásï parhakpinini. ¡Kʼuiripu jatsisti para mítini! Jatsistiksï para kurhanguni eska iásïsï uétarhijka jiókuarhini Jeobani komueska imecheri Juramuti, jimboka kʼamajperakua “¡no ióndaati janoni!” (Habacuc 2:3).

18. ¿Andichisï jatsi para marhuakuni Jeobani máteruechani japarini, juchari erachichani jingoni?

 ¹⁸ Jeoba uékasïndi eskachi marhuakuaka máteruechani japarini, juchari erachichani jingoni. Jimbosï imeri Karakata uandajti: “Ka jaue no kueratani siemprini  tánguarhini, ka no ísï úni komueska máru engaksï no pʼindejka tánguarhini, sino jaue uinhaperperantani jarhani máteru ka máteruni jingoni, ka sánderu iásï engajtsï exeni jaka eska juchari Tateeri jurhiatikua janoxamkia” (Ebreu 10:24, 25). Engachi nirajka tánguarhikuecharhu erachichani jingoni, úsïngachi kómarhini ka marhuakuni juchari Tata Diosïni engachi xáni uékajka. Ístuchi uinhapintasïnga ka uinhaperperantani iáminduecha.

19. ¿Nénachi uá eska kʼéaka uékperakua kúnguarhikuarhu?

¹⁹ Engachi tánguarhintajka máteru Jeobaeri marhuatspirichani jingoni, sánderuchi uékperasïnga ka sánderuchi sési pájperasïnga kúnguarhikuarhu. Jukaparhakuesti exeni ima ambakiti ambe engaksï juchari erachicha újka, ísï eska Jeoba na újka juchantsïni jingoni. Asï erokuarhi je eskaksï chári erachicha no ma pekadu jukaraaka. Iáminduchi pekadu úsïnga, ka nochi iámindu májkueni kʼuiripesïnga para Tata Diosïri ambe jimbo (arhinta je Efesu 4:32). Imechani jingoni kúnguarhi je engaksï kánikua uékajka Jeobani, ka sóntkujtsï kʼuiripeaka Tata Diosïri ambe jimbo. Engajtsï marhuakuska Jeobani chári erachicha jingoni, sánderujtsï no úkua exeaka Tata Diosïri xénchperakuarhu jarhani. Iásï ju je exeni, ambe íntsaasïni Jeoba imechani engaksï no méni jurajkujka ka engaksï imeri xénchperakuarhu jarhajka.

20, 21. ¿Ambeski “tsípikua enga meru tsípikueka”, ka andisï kánikua ambakitii jatsini?

²⁰ Kóntperata enga Jeoba íntsajka imechani engaksï no méni jurajkujka, jindesti tsípikua, peru ¿na jásï tsípikua? Sáno iáminduchi uandapiringa eskachi jatsiskia tsípikua, jimbokachi jirejtasïnga, tʼireni ka itsïmani. Engachi sési nitamakuarhini jarhajka, úpiringachi uandani:  “¡I kʼóru tsípikuarhitesti!”. Peru Biblia uandasïndi, eska iásï ísïska komueska no nema meru tsípiti jarhani.

²¹ Biblia pʼímarhiasïndi iáminduechani paraksï jupikuarhini imani jimbo enga jindeka “tsípikua [para] méntkisï”, o eska na uandajka Nuevo Testamento de José María Valverde, “jatsini tsípikua enga meru tsípikueka” (1 Timoteo 6:19). Uandakua “tsípikua enga meru tsípikueka”, arhikuekasïndi ima tsípikuani engachi erokuarhini jaka jatsini sánderu orhepatini. Engachi jatsiakia tsípikua para méntkisï paraisurhu, nóteruchi pʼamenchaakia ni tʼarhepini. Pínandikua jingonchi irekaaka ka tsípikua jingoni. Jiáni kʼóruchi jatsiakia “tsípikuani enga meru tsípikueka”. Jimbokachi jiáni kʼóru ísï irekaaka eska Tata Diosï na uékaenga uénakuarhu, jatsiakachi tsípikua para méntkisï (1 Timoteo 6:12). Ambakiti erokuarhikuachi ma jatsiska, ¿nójtsï ísï exeni?

22. ¿Nénajtsï uá jatsini “tsípikua enga meru tsípikueka”?

²² ¿Néna uá nema jatsini “tsípikua enga meru tsípikueka”? Ante de uandani ini uandakuechani, apostuli Pablu arhiasïndi kristianuechani eskaksï “ambakiti ambe uáka” ka “jatsikuarhianksï uánikua ambakiti úkuechani” (1 Timoteo 6:18). Jo ísïsti, uákachi ini ambe jatsini engachi úska ambe engachi jorhenguarhikia Bibliarhu. Peru ¿arhikuekaxapi Pablu eska ambakiti úkuechanchi jimbo úsïnga andakuarhini “tsípikuani enga meru tsípikueka”? Nómbe, jimboka i xáni ambakiti kóntperatani, uákachi jatsini solu Tata “Diosïri kóntperata” jimbo (Roma 5:15). Peru, Jeoba kánikua tsitisïndi kóntperata íntsaani imechani engaksï no méni jurajkujka. Ima uékasïndi eskajtsï jatsiaka “tsípikua enga meru tsípikueka”, jo, tsípikua para méntkisï, nani engajtsï sési irekaaka pínandikua jingoni. I jásï tsípikuaksï jatsiati imecha engaksï Tata Diosïri xénchperakuarhu jauaka.

23. ¿Andisï xáni jukaparhakue Tata Diosïri xénchperakuarhu jarhani?

 ²³ Kánikua sésisti kurhamarhikuarhini: “¿Marhuakuxaki ji Tata Diosïni ísï eska ima na uandajka Bibliarhu?”. Engachi pauani pauani mókuntaska eska jo, jimajkanchi sési úxaka. Uákachi mintsikani eska Jeoba jindeska juchari kuájchakukua. Ima kuájchakuati imeri iretani, ini últimu jurhiatikuechani jimbo enga xáni no sési jánhaskuarheni jaka. Ka incharaatijtsïni imani xáni ambakiti parhakpini jimbo, enga axuterku jakaia. ¡Kʼéri tsípikuarhita máeuati! ¡Kánikuachi tsípiaka mítini eskachi ambakiti ambe erakuska úni, ini últimu jurhiatikuechani jimbo! Engachi ambakiti ambe erakuska úni iásï, jatsiakachi para méntkisï “tsípikuani enga meru tsípikueka”, jo, imani enga Tata Diosï Jeoba méntkisï uékaka eskachi jatsipiringa.