KʼUIRIPUECHA uánikua kurhamarhikuechani úkuarhiasïndiksï engaksï kánikua jukaparhakueka. Jamberi chájtu úkuarhijka ari kurhamarhikuechani:

• ¿Tatá Diosïjtsïni uékasïni?

• ¿Kániksï kʼamakuaria atajperakuecha ka no sési nitamakuecha?

• ¿Naniksï nirasïni uarhiricha?

• ¿Uá jucha ménderu exeantani uarhirichani?

• ¿Jucha néna kómarhikuarhia Tatá Diosïni para imajtsïni kurhanguchini?

• ¿Jucha néna uá tsípikua jingoni irékani?

¿Cha nani uá exeantani mókuntskuechani para tsʼïmi kurhamarhikuecha? Iásï jarhastiksï uánikua takukatecha engaksï uandajka jatsini mókuntskua para tsʼïmi kurhamarhikuecha. Joperu inde takukatecha mámaru járhati mókuntskuechani íntspiasïndiksï. Máteruecha jukanhariasïndi mókuntskuechani joperu namuntku jurhiatikua marhoasïndiksï ka tátsekua mójtakurhisïndiksï.

Joperu jarhasti ma takukata engajtsïni jurhimbiti mókunchintajka. Tatá Jesúkristu kómarhispti Tatá Diosïni ísï arhiparini: «Chíti uandakua ísïsti [jurhimbikuesti]» (Juanu 17:17). Iásï inde Uandakua ísï mítinhasti eska Santa Biblia. Sánderu orhepatini chájtsï arhintani jauaka ná enga Biblia mókuantajka indeni kurhamarhikuechani engaksï karhakua jaka.

¿ANDISÏ KʼUIRIPUECHA UKUARIJKI ARI KURHAMARHIKUANI? Iásï kʼuiripuecha no sési úkuasïndiksï máteruechani ka nóksï uékperasïndiksï. Ka máru religiónicha jorhentpesïndiksï eska Tatá Diosï ísï uékasïnga, eska jucha ísï irékani jauaka.

NA ENGA JORHENTPIJKA DIOSÏRI KARÁKATA. Tatá Diosï no méni úsïndi eska jucha no sési nitamakuarhinchaka. Job 34:10 uandasïndi: «¡Tatá Diosï enga sési jimboeka ka enga sánderu uinhapitika, no méni úsïndi no sési jásï ambe ka níjtu imani ambe enga no jurhimbikueka!» Tatá Diosï kánikuajtsïni uékasïndi, ka ísï jimbo ambakiti ambe uáti para iámindu kʼuiripuecha. Tatá Jesúkristujtsïni jorhendasti kurhajkuarhini indeni ambe kómarhikua ma jimbo: «Juchari táti engari auandarhu jaka [...]. [Eska juuaka] ixu parhakpinirhu chíti juramukua. Úkuarhie eska tʼu ná uékajka ixú parhakpinirhu, májku jásï eska ná úkuarhijka auandarhu» (Mateu 6:9, 10). Sési jimbo Tatá Diosï kánikuajtsïni uékasïndi, ka íntspesti iméri uájpani, paraka úpiringa úkuarhini ambe enga ima eratsini jaka úni (Juanu 3:16).

Ístu arhinta je Génesis 1:26-28; Santiagu 1:13, ka 1 Pedru 5:6, 7.

¿ANDISÏ KʼUIRIPUECHA UKUARIJKI ARI KURHAMARHIKUANI? Uánikua kʼuiripuecha uarhisïndiksï atajperakuechani jimbo. Ka iámindu jucha kómu nitamakuaresïnga mámaru ambe jimbo.

NA ENGA JORHENTPIJKA DIOSÏRI KARÁKATA. Tatá Diosï eiatspesïndi eska iámindu parhakpinini nóteru jauakia atajperakuecha. Enga Jesúkristu auandarhu uératini juramuni jauakia íni parhakpinini, kʼuiripuechaksï «nóteruksï jorhenguarhiati uarhiperani», ka imani ambe engaksï iásï úrajka paraksï uarhiperani, tekatsikua uántauatiksï (Isaías 2:4). Ístu Tatá Diosï kénditauati no sési nitamakuechani ka imani kʼuiripuechani engaksï no sési ambe úkuajka máteruechani. Biblia ini ambe eiachisïndijtsïni: «Diosï kutsunharikuauati iámindu uekua, ka nóteru jauatia uarhikua, ka ni uandanhiata, ka nóteru nema uerati o pʼamenchani, jimboka nitamakia iámindu uénani anapu ambe» (Jaŋaskuecha 21:3, 4).

Ístu arhinta je Salmo 37:10, 11; 46:9, ka Miqueas 4:1-4.

¿ANDISÏ KʼUIRIPUECHA UKUARIJKI ARI KURHAMARHIKUANI? Uánikua religiónicha jorhentpesïndi eska jucha jatasïnga ma espíritu ka eska ima espíritu tsípiti pakarasïnga enga jucha uarhijka. Kʼuiripuechaksï uandasïndi eska uarhiricha no sési úkuasïngaksï tsípitichani, o eska Tatá Diosï méntkisï kómu nitamatarani jarhasïnga no sési úrichani infiernuru.

NA ENGA JORHENTPIJKA DIOSÏRI KARÁKATA. Enga ma kʼuiripu uarhijka, iméri tsípikua jima kʼamarhasïndi. Eclesiastés 9:5 uandasïndi eskaksï uarhiricha nóteru ma ambe miásïnkia ni pʼikuarherani. Ísï jimbo uarhiricha nóksï úsïndi jarhoatani, níjtu no sési úkuani tsípitichani (Salmo 146:3, 4).

Ístu arhinta je Génesis 3:19 ka Eclesiastés 9:6, 10.

¿ANDISÏ KʼUIRIPUECHA UKUARIJKI ARI KURHAMARHIKUANI? No nema uékasïndi uarhini, jucha uékasïnga tsípekua jingoni irékani para méntkisï iméchani jingoni enga jucha kánikua uékajka. Ka ísï jimbo, jucha uékasïnga ménderu exeantani imani kʼuiripuechani engaksï uarhikia.

NA ENGA JORHENTPIJKA DIOSÏRI KARÁKATA. Uánikua kʼuiripuecha engaksï uarhikia ménderuksï iréntati. Tatá Jesúkristu eiatspesti eska niáraka jurhiatikua enga iámindu tsʼïma engaksï inchatsïkurhini jaka, kurhauaka iméri uandakuani ka tsíntatiksï paraksï ménderu tsípikua jatsini (Juanu 5:28, 29). Ima kʼuiripuecha engaksï tsíntaka ixú echerirhu, uátiksï irékani sési jándekuarhu ma jimbo, ísï eska ná eratsitini jápka Tatá Diosï uénakuarhu (Isaías 65:21-25). Imani jurhiatikuechani jimbo enga sési jándentakia echerirhu, kʼuiripuecha engaksï no méni jurajkuaka Tatá Diosïni, irékatiksï para méntkisï ka nóteruksï méni pʼamenchatia. Biblia uandasïndi: «Jurhimbitichajkuksï pakarati echerirhu, ka irékatiksï para méntkisï» (Salmo 37:29).

Ístu arhinta je Job 14:14, 15; Lukasʌ 7:11-17, ka Ukuecha 24:15.

¿ANDISÏ KʼUIRIPUECHA UKUARIJKI ARI KURHAMARHIKUANI? Sano iámindu religiónicharhu kómarhikuarhisïndiksï nemani. Joperu uánikua kʼuiripuechaksï eratsisïndi eska imécheri kómarhikuecha nóksï intsïnhasïnga mókuntskua.

NA ENGA JORHENTPIJKA DIOSÏRI KARÁKATA. Tatá Jesúkristu uandaspti eska jucha no jatsiska para mémindu májku uandakuechani úrani jarhani kómarhikuarhu. Ima ísï uandaspti: «Ka ekajtsï kómarhini jauaka, ásï jama je sontku méni kʼuanhatsintani jarhani májku ambe kómarhini» (Mateu 6:7). Enga jucha uéjka eska Tatá Diosïjtsïni kurhanguchiaka, jucha jatsiska para kómarhikuarheni ná enga ima jaiapanhintajka. Ísï jimbo, jucha jatsiska para jorhenguarhini ambe jaiapanhintasïni Tatá Diosï para ísï kómarhikuarheni imani. Biabliarhu 1 Juanu 5:14 uandasïndi eska i jindésti míntsinharhikua enga jucha jatsika imani jingoni: eska ambe enga jucha kurhajkuarhiaka ísï eska Tatá Diosï ná uékajka, imajtsïni kurhanguchiati.

Ístu arhinta je Salmo 65:2; Juanu 14:6, 14, ka 1 Juanu 3:22.

¿ANDISÏ KʼUIRIPUECHA UKUARIJKI ARI KURHAMARHIKUANI? Uánikua kʼuiripuecha eratsisïndi eska tumina jatsikuarhini ka kʼéri ambeni ixú parhakpinirhu inde ambe uáka tsíperani ka ísï eratsiparini uánikuaksï chúngumaxati jirinhani indeni ambe. Joperu no ísïsïndi.

NA ENGA JORHENTPIJKA DIOSÏRI KARÁKATA. Tatá Jesúkristu uandaspti ma ambe engajtsïni jarhoataka para úni tsípikua jingoni irékani. Ima uandaspti: «Sánderuksï tsípisïndi tsʼïma engaksï kurhandijka Diosïri uandakuani ka únhksï eska ná arhijka» (Lucasʌ 11:28). Jucha uáka irékani tsípikua jingoni joperu enga jucha jorhenguarhini jauaka jurhimbikua Tatá Diosïri ambe ka mítini jarhani ambe enga ima uáka juchantsïni jimbo. Inde jurhimbikua Bibliarhu jarhasti, ka mítini indeni jurhimbikuani, jarhoauatijtsïni exerhani ambe sánderu jukaparhakueski. Enga jucha jurajkuska eska Biblia jurhimberaka juchari eratsikuechani ka juchari úkuechani, jucha uáka sánderu sési irékani.

Ístu arhinta je Proverbios 3:5, 6, 13-18 ka 1 Timoteo 6:9, 10.

 Jucha exeaskia kuimu kurhamarhikuechani enga Biblia mókuantajka. ¿Uékapirini chájtsï sánderu mítini? Enga cha jindeka ma, ima jásï kʼuiripuni, enga mítika eska uétarhinchasïnga Tatá Diosïni, jimajkani uékani jakajtsï sánderu jorhenguarhini. Cha jamberi uandajka, ¿enga Tatá Diosïjtsïni uékajka, andisï jurajkuni jaki eska jauaka kʼuiripu no sési úricha ka andisï jurajkuni jaki eska jucha no sési nitamakuarhinchaka? O jamberi cha uékajka mítini néna úni sési irékani chári kʼumanchikuarhu anapuechani jingoni. Biblia jurhimbikua jingoni mókuantasïndi indeni ka máteru kurhamarhikuechani.

Joperu uánikua kʼuiripuecha nóksï uékasïndi arhintani Bibliani, jimbokaksï eratsisïnga eska inde takukata jukari teiapitiska ka eska úkua jukaska para kurhanguntani. ¿Uékapirini cha eskaksïni nema jarhoataka jirinhantani mókuntskuechani enga Biblia íntspejka? Jeobéri eianhpiricha jatsiastiksï tsimani jarhoajperakuechani engaksïni uáka jarhoatani.

Ma jarhoajperakua, jindesti libru enga arhikuarhijka ¿Ambemindusï jorhentpejki Biblia? Ari libru úkata jarhasti para ima kʼuiripuecha engaksï no káni andajkuarhijka ka exerasïndijtsïni ná enga Biblia mókuantajka imani kurhamarhikuechani engaksï kánikua jukaparhakueka. Máteru jarhoajperata jindesti eskaksïni, nema pʼorhembiaka chári kʼumanchikuarhu para cha jorhenguarhini Bibliarhu ambe. Enga cha uéjka, ma Jeobéri eianhpiri uáti nirani mándani semana jimbo chári kʼumanchikuarhu o nani enga cha uékaka parajtsï jorhenguarhini Bibliari ambe, ka nóksïni ma tumina euati. Iámindu parhakpinirhu, uánikua kʼuiripuechaksï exestia eska kánikua sésiska pʼirani indeni jorhenguarhikuani, ka uandasïndiksï tsípikua jingoni: «¡Exentaskia jurhimbikuani!».

Chájtu uáka exeni eska inde jurhimbikua enga Bibliarhu jaka kánikua jukaparhakueska. Ka mítini indeni jurhimbikuani, úsïndi eska jucha nóteru chéakia imani jakajkukuechani jimbo engaksï no sési jimboeka, inde jurhimbikua úsïndi eska jucha irékaka tsípikua jingoni ka erokani jarhani imani ambakiti ambeni enga Tatá Diosï uáka juchantsïni jimbo. Tatá Jesúkristu uandasti: «Ka mítiakajtsï indeni ambe enga sési jimboeka, ka inde enga sési jimboeka, uáti eska cha nóteru jinde[u]aka jántspiricha» (Juanu 8:32).