Para táticha uáti kʼéri ma tsípikuarhitaeni ka ístu uandanhiata ma engaksï uénaaka charhakuni ma kánguarhini. Jamberiksïni ísku pakataati exeni na enga xáni tiempu ka uinhapikua uétarhijka para charhakuni kuidarini. No sési mintsikuarhini ka no nani máru pʼikuarherani ístu uáti eskajtsï uandanhiata ambe jatsiaka temungurhirini. Ísï jimbo, uétarhiati eskajtsï tsimarani mójtakuaka máru ambe para charhakuni kuidarini ka chári temungurhirikuani. ¿Nénaksïni uá jarhuatani Bibliaeri arhistakuecha parajtsï orhepani uérakuani uandanhiatechani?

AMBE ENGA BIBLIA UANDAJKA: “Ima enga uékpijka, tekantasïndi ka sési útspini [...], no uékasïndi imeri ambejku, ka níjtu sóntku no sési exeni enga máruteruecha újka” (1 Korintu 13:4, 5). Cha eska nándi ma enga uénajka charhakuni ma kánguarhini, jamberijtsï uékaaka imantku kuidarini jarhani. Peru inde ambe úpirindi ísï pʼikuastani chári achatini eskajtsï támu jurajkuxaka, ísï jimbo asï mirikurhi je eska imajtu uétarhinchasïnga eskajtsï imani jingoni jauaka. Tekantskua jingoni ka sési kámaparini, uákajtsï xarhatakuni eskajtsï uétarhinchasïnga ka eskajtsï jukaparharasïnga imeri jarhuajperata para charhakuni kuidarini.

“Chájtu achaticha, ístu ireka je chári uarhiitichani jingoni [...] [kurhangukupariani].” (1 Pedru 3:7.) Enga cha jindeka táti, kurhangu je eska iásï chári uarhiiti sánderu charhakuni míndakuakia imeri uinhapikua, ka eska jamberi kánikua uandanhiani ka kuatarani pʼikuarheraaka o jamberi kómu pʼikuarherani imeri jimbanhi ánchikuarhita jimbo. Jamberiksïni ménisï ikiachiaati, peru tekantsï je, jimboka “ima enga ióndajka ikiani sánderu ambakitisti eska achati uinhapiti ma” (Proverbios 16:32). Xarhata je jánhaskakua ka íntsku je ambe enga uétarhinchani jaka (Proverbios 14:29).

AMBE ENGAJTSÏ UÁKA ÚNI:

• Táti: Jarhuata je chári uarhiitini charhakuni kuidarini, ístu chúrikuechani jimbo. Asï xáni tiempu úra je máteru ambe úni parakajtsï uáka sánderu ióni jarhani chári uarhiiti ka chári sapi jingoni

• Nándi: Engaksïni chári achati uékaaka jarhuatani charhaku jingoni jiókuarhi je. Enga no uáka sési kuidarini, asï no sési arhi je, sési kámaparini jorhenda je néna úni

AMBE ENGA BIBLIA UANDAJKA: “Tsimarani májku kuerpueuatiksï” (Génesis 2:24). Nájkirukajtsï iásï kánguarhikia sapini ma asï mirikurhi je eskajtsï cha ka chári uarhiiti o achati útasï májkueska. Jánguarhintsï je paraka chári temungurhirikua no kʼamakurhiaka.

Uarhiiti, agradeseri je chári achatiri jarhuajperata. Uandakuecha para agradeseritspini uátiksï “sési pʼikuastpentani” (Proverbios 12:18). Achati, arhi je chári uarhiitini na engajtsï xáni uékajka ka jukaparharani, ka na xántsï jukaparharasïni ambe enga újka familia jimbo (Proverbios 31:10, 28).

“Asï nema jirinhakuarhie solu indeni ambe enga para imajkumindu sési uéraaka sino ambe enga jarhuataaka máteruntu.” (1 Korintu 10:24.) Méntkisï ú je ambe enga sánderu sésiuaka para chári uarhiiti o achati ka exe je na enga xáni jánguarhintajka. Arhuta je tiempu parajtsï uandontskuarhini ka kurhajchperani. Engajtsï uékaaka apondini para relasioni sexuali jatsini, asï chájku uéka je sési pʼikuarherani. Uandanhia je chári uarhiiti o achatiri ambe jimbo. Biblia uandasïndi: “Asï jáma je jarharperani, solu engajtsï tsimarani májku jásï tantiariaka” (1 Korintu 7:3-5). Asï kʼuratsi je íri ambe uandontskuarhini. Chári tekantskua ka kurhangutsperakua uinhaperaati temungurhirikuani.

AMBE ENGAJTSÏ UÁKA ÚNI:

• Asï mirikurhi je arhutani tiempu parajtsï chári achati o uarhiiti jingontku jarhani

• Xarhatatspera je eskajtsï uékperasïnga sapichu ambe jimbo, komueska nota sapichu ma o intsïmperakua sapichu ma

AMBE ENGA BIBLIA UANDAJKA: “Desde sapichutki[ri] mítiska pímbinhasï karakatani engakini uáka sési eratsitarani parari pʼímutantskata jarhani” (2 Timoteo 3:15). Eratsi je nénajtsï jorhendaa chári sapini. Exe je eska ante de andajpenuni jamberi, imeri jánhaskakua para jorhenguarhini kánikueska. Ma ejemplu jindesti eska desdeka matrisirhu jarhajka míchakusïndiksïni ka engajtsï ambe ma pʼikuarheraaka imajtu pʼikuarherasïndi. Nájtuka charhaku no kurhanguaka ambe engajtsï arhintaaka, i ambe jarhuataati eska tsitiaka arhintani enga kʼéakia.

Asï eratsi je eska charhaku jukari sapichueska parajtsï Jeobaeri ambe uandontskuarhikuni. Jurajkuksïni kurhajchani kómarhini Jeobani (Deuteronomio 11:19). Engajtsï márku chʼanani jauaka, uandontskuarhiku je Jeobaeri kueraakateri ambe (Salmo 78:3, 4). Eska na kʼépani jauaka, chári sapi kuenta íntskukuarhiati na xántsï uékasïni Jeobani ka imajtu jorhenguarhiati uékani.

AMBE ENGAJTSÏ UÁKA ÚNI:

• Kurhaku je Jeobani jánhaskakua parajtsï úni sési jorhendani chári sapini

• Repetirikua je charhakuni uandakuechani engaksï jukaparhakueka para sóntku jorhenguarhiani