Nájkirukajtsï jánguarhintaaka para chári temungurhirikua ka chári familia sési irekani, ma repentku úkuarhiati ambe ma enga cha no erokuarhienga ka enga uáka eskajtsï nóteru tsípini pʼikuarheraakia (Eclesiastés 9:11). Perujtsïni Jeoba íntsasïndi jarhuajperatechani engachi kómu nitamakuarhini jauaka. Engajtsï úska ambe engaksï uandajka Jeobaeri juramukuecha engachi exeani jauaka, cha ka chári familia uákajtsï tekaantaani uandanhiatechani engaksïni sánderu no sési pʼikuastajka.

AMBE ENGA BIBLIA UANDAJKA: “Jurajkua je iámindu chári pendientichani imani jingoni, jimboka ima pendienti pásïnga chánksïni jimbo” (1 Pedru 5:7). Méntkisï miá je eska no Tata Diosïsï újka eskajtsï uandanhiatechani jatsiauaka (Santiagu 1:13). Engajtsï andarheraska imani, kánikuaksïni jarhuataati (Isaías 41:10). “Imeri orhepani jimbo mintsita jingoni uandajpa je.” (Salmo 62:8.)

Máteru ambe engaksïni uinhaperantaaka jindesti arhintani ka jorhenguarhini Bibliaeri ambe pauani pauani. Engajtsï ísï úska, exeakajtsï eska ísïska eska Jeoba jindeska “engajtsïni uinhaperantajka para iámindu juchari mískuarhitechani jimbo” (2 Korintu 1:3, 4; Roma 15:4). Imaksïni aiachesïndi íntskuni “Diosïri pínandikua enga no nema újka jánhaskani” (Filipusʌ 4:6, 7; Filipenses 4:13, TNM).

AMBE ENGAJTSÏ UÁKA ÚNI:

• Kurhaku je Jeobani eskaksïni jarhuataaka parajtsï no xáni uandanhiani ka eskajtsï sési eratsiaka

• Exe je ambe ka ambejtsï uá úni ka eraku je ambe engaksïni sánderu marhuachiaka

AMBE ENGA BIBLIA UANDAJKA: “Imeri mintsita enga kurhangujka, jánhaskakua jatsisïndi, ka imani ambe jimbo engaksï kurhajka jánhasticha jánguarhintasïndiksï mímixekua exentani” (Proverbios 18:15). ¿Ambe uétarhinchasïni mándani familiarhu anapu? Jánguarhi je mítini iámu ambe. Uandontskuarhi je imecha jingoni ka kurhajchaa je (Proverbios 20:5).

¿Ka ambejtsï uá enga uarhiska nema engajtsï uékajka? Asï kʼuratsi je xarhatani na engajtsï kómu pʼikuarherani jaka. Miá je eska Jesukristu jamberi “pʼiarasp[ka] uerani” (Juanu 11:35; Eclesiastés 3:4). Ístu, jukaparhakuesti sési mintsikuarhini ka sési kʼuíni (Eclesiastés 4:6). Ísï sánderu fásiliuati orhepani uérakuni uandanhiatani.

AMBE ENGAJTSÏ UÁKA ÚNI:

• Pʼinde je uandontskuarhini chári familia jingoni ante de no sési jásï ambe úkuarhini. Ka ísï, enga uandanhiata ambe jauaka, sésiksï pʼikuarheraati chánksïni jingoni uandontskuarhini

• Uandontskuarhi je kʼuiripuecha jingoni engaksï májkueni jásï ambe nitamakuarhika

AMBE ENGA BIBLIA UANDAJKA: “Ambakiti kompanieru ma méntkisï uékpisïndi, ka ermanu máesti enga andajpenuka para jiáni enga uandanhiata jauaka” (Proverbios 17:17). Seguru eskaksïni chári amiguecha uékajka jarhuatani, peruksï jamberi no mítiti néna úni. Arhia je ambe engaksï uáka úni chánksïni jimbo (Proverbios 12:25). Ístu jirinha je jarhuajperata imecheri engaksï kurhangujka Bibliani parajtsï mítini néna úni ambe engaksï uandajka Jeobaeri juramukuecha. Bibliaeri jarhuajperata jingoni engaksïni íntskuaka, uákajtsï orhepani uérani (Santiagu 5:14).

Engajtsï pʼindeka kúnguarhini imecha jingoni engaksï mintsikajka Jeobani ka imeri eiatsperakuechani, jatsiakajtsï jarhuajperata engajtsï uétarhinchajka. Ístuksïni uinhaperantaati jarhuataani imechani engaksï chkerini jaka. Uandontskuarhikua je na engajtsï xáni mintsikajka Jeobani ka ambe enga ima eiatspijka. Úra je chári tiempu para máteruechani jarhuataani ka asï jarharia je imechani engaksïni uékajka ka uandanhiani chánksïni jimbo (Proverbios 18:1; 1 Korintu 15:58).

AMBE ENGAJTSÏ UÁKA ÚNI:

• Uandontskuarhi je ambakiti amigu ma jingoni ka jurajku je eskaksïni jarhuataaka

• Jurhimbitku uanda je ka arhi je ambe engajtsï uétarhinchajka