Enga Jeoba kueraaka familiani, tátembechani jurajkukuasti paraksï kuidariani uájpechani (Kolosasi 3:20). Cha komueska táti, jatsiskajtsï para jorhendaani chári sapiichani uékani Jeobani ka engaksï kʼéakia eskaksï jorhenaaka iámindu ambe sési úni (2 Timoteo 1:5; 3:15). Ístujtsï jatsiska para exeni ambe jarhaski imecheri mintsitarhu. Ka chári ejemplu kánikua jukaparhakuesti. Sánderu ambakiti ambe para chári sapiichani jorhendaani Tata Diosïri Karakatani, jindesti eska cha orheta jatsiaka mintsitarhu (Salmo 40:8).

AMBE ENGA BIBLIA UANDAJKA: “Jorhenguarhi je iáminduecha sóntku kurhandini, peru ióndantsï mókukuarhini” (Santiagu 1:19). Chájtsï uéjka eskaksï chári sapiicha ísï pʼikuarheraaka eskaksïni uáka uandontskuarhicheni ambe uéjkiri. Peru paraksï ísï úni, jatsiskajtsï para xarhatakuani eskajtsï listu jauaka para kurhajchaani, méntkisï engaksï uétarhinchaaka. Ú je eska pínandikua jauaka paraksï sési pʼikuarherani ka uénhikuarhinksï (Santiagu 3:18). Engaksïni ima exeaka eskajtsï no kurhangukuauaka o eskajtsï no sési arhiauaka, jamberiksïni no uékaati eiangukuarhini imecheri ambe. Tekantsï je ka mémindu uénta je arhiani eskajtsï uékaasïnga (Mateu 3:17; 1 Korintu 8:1).

AMBE ENGAJTSÏ UÁKA ÚNI:

• Engaksï chári sapiicha uétarhinchani jauaka uandontskuarhini chánksïni jingoni kurhajchaa je

• Uandontskuarhi je chári sapiicha jingoni, no jiántku enga uandanhiata ambe jauaka

AMBE ENGA BIBLIA UANDAJKA: “Ima enga xarhatani jaka jánhaskakua ambe ma jimbo ambakiti ambe exentaati” (Proverbios 16:20). Ménisïjtsï jatsiaka para iauani jamberi eratsintani ambe engaksï uandajka chári sapiicha parajtsï úni jánhaskani ambeksïsï meru pʼikuarherajki. Tumbichaksï sáno méntkisï jukari jamberi uandasïndi o imani ambe engaksï no eratsijka. “Enga nema mókuntajka ante de kurhaani ambe ma, inde ambe tontuesti.” (Proverbios 18:13.) Ísï jimbo, asï sóntku ikia je (Proverbios 19:11).

AMBE ENGAJTSÏ UÁKA ÚNI:

• Jánguarhintsï je no pʼímukuni chári sapini engaksïni uandontskuarhicheni jauaka ni chérakuarhini ambe uéjki jimbo engaksïni eiangukuarhiaka

• Jánguarhintsï je miántani na engajtsï pʼikuarheraenga cha ka ambe sánderu jukaparhakuespi engajtsï májkueni jatiripka eska chári sapi

AMBE ENGA BIBLIA UANDAJKA: “Kurhaa, juchiti uátsï, chíti tátiri jurhimberantskuani, ka asï jurajku chíti nándiri leini” (Proverbios 1:8). Jeoba íntskusti sésikua tátembani ka amambani para juramukuani uájpechani. Tsimaranksï jatsisti para jorhendaani sapiichani respetarpini ka kurhandirani (Efesu 6:1-3). Imaksï kuenta íntskukuarhisïndi engaksï tátembecha no “májkuentstini jauaka para[ksï] májku ambe eratsini” (1 Korintu 1:10). Ísï jimbo, engajtsï no májkueni eratsiaka ambe ma jimbo, asï no sési arhijpera je imechani japarini, jimboka uáka úni eskaksïni nóteru respetariuakia.

AMBE ENGAJTSÏ UÁKA ÚNI:

• Pakatpera je nénajtsï jurhimberantaaua chári sapiichani

• Engajtsï no májkueni eratsiaka eska chári uarhiiti o achati néna jorhendaani sapiichani, jánguarhi je kurhangukuni andisï ísï eratsijki

AMBE ENGA BIBLIA UANDAJKA: “Kʼuiripera je [sapiichani] janhanharhikua jingoni, arhistakuaparini juchari Tatani jimbo” (Efesu 6:4). Engajtsï uéjka paraksïni sési nicheni engajtsï chári sapiichani jorhendaani jauaka, asï ísku jurajku je. Jatsiskajtsï para exeni ambejtsï uá para jorhendaani ka jurhimberantaani sapiichani (Salmo 127:4; Proverbios 29:17). Jurhimberantaani no solu jindesti kastigariani, sino jarhuataani eskaksï kurhanguaka andijtsïsï arhiajki ambeksï uá úni ka ambe nómbe (Proverbios 28:7). Ístu jorhendaa je uékani Tata Diosïri Karakatani ka kurhanguani Jeobaeri juramukuechani engaksï jima jataka (Salmo 1:2). Ísïksï uáti sési jarhani Jeoba jingoni (Ebreu 5:14).

AMBE ENGAJTSÏ UÁKA ÚNI:

• Jánguarhintsï je eskaksï chári sapiicha ísï exeaka Jeobani eska nema engaksï jingoni uáka pájperakua ma jatsini ka mintsikani

• Jarhuataa je paraksï úni mítiantani ka kuájpikuarhini imani ambe jimbo enga no sési úkuauaka imecheri jánguani, komueska ima ambe enga Internetirhu xarharajka o redesi sosialicharhu. Jorhendaa je nénaksï kuájpikuarhini imani kʼuiripuecheri engaksï tsitijka ísku ambe úkuani sapiichani