Tata Diosï Jeoba a ústi orheta temungurhirikuani. Biblia uandasïndi eska ima kueraaska uarhiitini ka “íntskuspti achatini”. Adani xáni tsípispti enga uandapka: “I kʼóru úkata jarhasti juchiti únichani jingoni ka juchiti kʼuiripeta jingoni” (Génesis 2:22, 23). Jeoba útasï uékasïndi eskaksï temungurhiricha sési irekaaka.

Engaksï kʼuiripuecha tembuperajka, jamberiksï eratsijti eska iámu ambe sésiuaka. Peru ambe enga ísïka, jindesti eska temungurhiricha jamberi engaksï sánderu uékperajka jatsiatiksï uandanhiatechani (1 Korintu 7:28). Ini foieturhu exeantauakajtsï Tata Diosïri juramukuechani, engajtsï úraaska jarhuataatiksïni eska chári temungurhirikua ka chári familia sési irekaaka (Salmo 19:8-11).

AMBE ENGA BIBLIA UANDAJKA: Achati orhejtsïkutisti familiarhu (Efesu 5:23).

Engajtsï uámbeka, Jeoba erokasïndi eskajtsï uékperakua jingoni kuidariuaka chári uarhiitini (1 Pedru 3:7). Jeoba kueraasti uarhiitini komueska chári jarhuajpiri ka uékasïndi eskajtsï sési kámaaka ka uékperakua jingoni (Génesis 2:18). Xántsï uékaaka chári uarhiitini engajtsï jamberi sánderu jukaparharaaka imeri ambe ka eska chári ambe (Efesu 5:25-29).

Engajtsï témbaeka, Jeoba erokasïndi eskajtsï respetariuaka chári achatini ka jarhuatantsï úni imeri ánchikuarhita (1 Korintu 11:3; Efesu 5:33). Apoiari je ambe enga eratsiaka úni ka tsípikua jingoni jarhuata je (Kolosasi 3:18). Engajtsï ísï úska, kánikuajtsï jukaparhaaka para ima ka para Jeoba (1 Pedru 3:1-6).

AMBE ENGAJTSÏ UÁKA ÚNI:

• Kurhamarhi je chári achatini o uarhiitini ambejtsï uá úni parajtsï sánderu ambakiti achati o uarhiitini. Jingontku kurhaa je ambe engaksïni arhiaka ka jánguarhintsï je ísï úni

• Tekantsï je. Tiempu pásïndi jorhenguarhini sési pʼikuastperani

AMBE ENGA BIBLIA UANDAJKA: Uétarhisïndi eskajtsï uandanhiauaka imani ambe jimbo enga sánderu jukaparhakueka para chári achati o uarhiiti (Filipusʌ 2:3, 4). Sési kámbera je, miá je eska Jeoba erokasïnga eskaksï imeri marhuatspiricha méntkisï sési kámpiaka (2 Timoteo 2:24). Eratsi je ambe engajtsï uandaaka, jimboka Biblia uandasïnga: “Jarhasti ima enga no eratsiparini uandajka enga ísïka eska espada jimbo chʼurhurpini jarhani, peru ima enga jánhaskakua jingoni uandajka sési pʼikuaskpentasïndi” (Proverbios 12:18). Jeobaeri espirituksïni jarhuataati parajtsï uékperakua ka ambarhati uandakuecha jingoni uandontskuarhini (Galasia 5:22, 23; Kolosasi 4:6).

AMBE ENGAJTSÏ UÁKA ÚNI:

• Ante de uandontskuarhintsï ambe enga jukaparhakueka para tsimarani, kurhaku je Tata Diosïni eskaksïni jarhuataaka tekantskua jatsini ka ambakiti eratsikua ma

• Sési eratsi je ambe ka nénajtsï uandaa

AMBE ENGA BIBLIA UANDAJKA: Engaksï tembuperaaka, “májku kuerpueuatiksï” (Mateu 19:5). Peruksï útasï tsimani kʼuiripuesti engaksï méni ísï ménderueni eratsiaka. Jimbosï uétarhijti eskajtsï jorhenguarhiaka májkueni eratsini ka pʼikuarherani (Filipusʌ 2:2). Uétarhisïndi márku úkuarhini engajtsï eratsiaka ambe ma úni. ¿Nénajtsï uá? Biblia uandasïndi: “Ambe enga eratsini jauaka úni arhistakua jimbo [...] sési uaxastakata pakarasïndi” (Proverbios 20:18). Engajtsï márku erakuaka ambe ma úni enga jukaparhakueka, jurajku je eskaksïni Jeobaeri juramukuecha jarhuataaka (Proverbios 8:32, 33).

AMBE ENGAJTSÏ UÁKA ÚNI:

• No solu uétarhisïndi eskajtsï uandontskuarhiaka iámindu amberi; uandontskuarhi je chári pʼikuarherakuecheri ambe

• Ante de aiatspikuarhintsï ambe ma úni, uandontskuarhi je tsimarani