Eranhaska arini ambe: enga Julia espejurhu eratikuarhijka kánikua tepari exekuarhisïndi. Eratsisïndi: “Jatsiska parani tsʼauapintani”. Nájkirukaksï imeri táticha ka amiguecha arhijka eska kánikua kʼarhisïska.

Iásï sáni, Julia uénasti eratsini ambe ma úni para sóntku kétsini “sikiera” tsimani kilu ísï (cinco libras). Ambe engajku jatsika para úni jindesti no tʼireni máru jurhiatikuechani...

¿Amberi úpirini engari ísï pʼikuarherapiringa eska Julia?

No no sési jarhasti eskari uandanhiauaka na engari jáxeka. Asta Biblia uandasïndi uánikua achaticheri ka uarhiiticheri engaksï sési jáxepka, komueska Sara, Rakeli, Jose, Dabidi ka Abigaili. Ejemplu ma, uandasïndi uátsïri ma enga Abisagi arhinhaenga eska ima ‘kánikua sési jáxespka’ (1 Reyes 1:4).

Peru uánikua tumbiichaksï jukari uandanhiasïndi na engaksï jáxeka. Ka inde ambe uáti úni eskaksï kʼérati problemechani jatsiauaka. Eratsi arini ambe:

• Estudiu ma jimbo, 58% uátsïchaksï uandasïrendi eskaksï jukari tepaspka, peru soluksï 17% jukari tepaspti.

• Máteru estudiu engaksï úkuapka uarhiitichani, xarhataspti eska 45% eratsisïrenga eska jukari tepaspka, peruksï no jamberi kʼuetsapispti xáni eskaksï na xáni jatsispka para kʼuetsapini.

• Máru uátsïcha ka tumbiicha engaksï meru uéjka tsʼauapintani, niárastiksï anorexia pʼirani. I problema máesti tʼirekua jingoni enga peligru máeka para tsípikua ka enga jindeka nóteru tʼirenia.

 Engari exejka eskari uénaxaka anorexia pʼamenchani o eskari jatsiska máteru problema tʼirekua jingoni, kurhajkuarhi jarhuajperata. Eiangua chíti tátichani o máteru nemani engari mintsikajka. Biblia arhisïndi: “Amigu ma méntkisï uékpisïndi, ka ermanu máesïndi para jiáni enga uandanhiata ambe jarhajka” (Proverbios 17:17).

Ambe enga meru újka eskachi sési xarharaaka, jindesti na engachi jásïka incharini ísï. Exe ambe enga uandajka Biblia Absaloniri, rei Dabidiri uájperi:

“No ma achati jarhaspti iámu Israeli enga xáni sési jáxepka komu para xáni kʼéri ambe arhinhani. No ma ambe no sési jáxespti desde jantsirirhu uératini asta éjpurhu” (2 Samuel 14:25).

Peru tumbi máespti enga no sáni kaxumbipka, enga tsitienga tuminani ka enga traidori máepka. Jimbosï Biblia no sáni sési jásï ambe uandajti imeri; sánderu sési, uandasïndi eska achati máespka enga no mintsinharhikuepka ka uándikpiti ma enga kánikua ikiauenga.

Jimbojtsïnisï Biblia arhijti:

‘Ménderueni jáxenta je’ (Kolosasi 3:10, TDU).

“Parajtsï kasïpeni, no uétarhisïndi [...] jukari chinijtsïni [...], sino uétarhisïndi eskajtsï sési jájkuntaaka mintsitani enga no exenhajka” (1 Pedru 3:3, 4).

No no sési jarhasti uékani sési xarharani, peru sánderu jukaparhakuesti na engari jásï kʼuiripu máeka. Sánderu orhepani, exenhaati na jásï kʼuiripu máeskiri ka no na engari jáxeka. Uátsï ma enga Phylicia arhinhajka uandasïndi: “Engari sési jáxeka uérakua ísï, máteruechaksïni sóntku exeati, peru ambe enga uáka eskaksïni uékperakua jingoni miáuaka, jindesti na engari jásïka incharini ísï, chíti kualidadicha”.

¿Nori tsitisïni na engari jáxeka?

¿Eratsiskiri ménisï kánikua dieta úni parari sési jájkuntani chíti kuerpuni?

¿Ambe ka amberi mójtakupirini chíti kuerpueri? (Eraku ambe ka ambe).

• IÓJTARHAKUA

• KʼUETSAPIKUA

• JAUIRI

• NA ENGARI JÁXEKA

• KÁNHARHIKUA

• NA ENGARI JÁNHARHIKA

Engari mókuntaka eska “jo” orheta tsimani kurhamarhikuecharhu ka tanimu o sánderu amberi erakuni kurhamarhikua tanimurhu, eratsi arini ambe: jamberiksïni máteruecha no xáni no sési exejti eskari tʼu na exekuarhijka. Miá eska fásiliska jukari jamberi eratsini ka jukari uandanhiani ini ambe jimbo (1 Samuel 16:7).