Timoteu tumbi máespti enga kánikua tsipienga jarhuatani máteruechani. Uápuru ísï niraspti para úni jarhuatani kʼuiripuni. Uánikua ambakiti ambe nitamakuarhispti. ¿Uékasïniri eskakini sánderu ambe eianguaka imeri ambe?...

Timoteu kʼuiripespti iretarhu ma enga Listra arhinhaenga. Amamba, Eunise arhinhasïrendi ka nanita, Loida. Íksï uandontskuarhikusïrendi Timoteuni, Jeobaeri ambe, desdeka charhakuepka. Jimbosï Timoteu desde sapichku uénani, uékasïrendi jarhuatani kʼuiripuni paraksï úni mítini Jeobani.

Ma jurhiatikua, enga Timoteu tumbiipkia, Pablu arhispti: “Ji niuaka máteru nani ísï eianhpini. ¿Nori uékasïni jindeni jingoni jurhani?”. Timoteu kánikua tsípispti ka arhispti: “¡Jo, uékasïnga nirani!”. Ima uékasïrendi jarhuatani kʼuiripuni.

 Niraspti Pabluni jingoni Tesalonika, enga Gresia japka. Paraksï úni jima niárani, kánikuaksï xanharaspti ka tátsekua barku jimboksï niraspti. Engaksï niárapkia, uánikua kʼuiripunksï jarhuataspti paraksï Jeobani mítini. Peru máru kʼuiripuechaksï kánikua ikiaspti ka uékasptiksï no sési ambe úkuani. Jimbosï Pablu ka Timoteu níptiksï máteru nani ísï eianhpini.

Máru kutsï tátsekua, Pablu arhispti Timoteuni eska kʼuanhatsintapiringa Tesalonika. Uékasïrendi mítini náksï jarhaspi erachicha. Peru Tesalonika máru kʼuiripuechaksï no sési kaaspti kristianuechani. ¡Timoteu jatsispti para kánikua tsʼiueni para úni kʼuanhatsintani jima! ¿Ambe úspi Timoteu? Uékaspti nirani jimboka uandanhiaxapka erachichani jimbo. Ka enga kʼuanhatsentapka, ambakiti ambe aianguspti Pabluni. ¡Tesalonika anapu erachichaksï seguirixapti marhuakuni Jeobani!

Timoteu uánikua uéxurhini marhuakuspti Jeobani, Pablu jingoni. Jimbosï ma uelta, Pablu karapti Timoteueri ambe: “Timoteuni axaaka para jarhuataani erachichani. No jarhasti nema enga ísïka eska ima. Ima uékasïndi Jeobani ka ístu kʼuiripuni”.

Tʼujturi uékasïnga máteruechani, ¿no ísïski? ¿Tsitipiriniri jarhuataani paraksï ima mítini Jeobani?... Ísïri uáka ambakiti tsípikuarhita ma jatsini ka ísïri irekani eska Timoteu.