JORHENGUARHIKUA 5
Bibliajtsïni aiangusïndi ambe engajtsïni Tata Diosï uéjka arhini
Jeobajtsïni ambakiti regalu ma íntskusti: 66 libruechani engaksï Bibliarhu jaka. Perujtsï jamberi kurhamarhikuarhijka: “¿Nani uéraski Biblia? ¿Né kararkuarhiski?”. Parachi úni mókuantani ini kurhamarhikuechani, ju je exeni nénachi niáraski jucha iásï jamberi jatsini Tata Diosïri uandakuani.
1. Engaksï kʼuiripuecha karaka, ¿andichisï uandajki eska Tata Diosïsï kararkuarhika?
Ma 40 kʼuiripuechaksï karasti Bibliani engaksï mámaru ambe ánchikuarhienga ka uápurisïksï anapueni. Uéxurhini 1513 uénasti karanhani antesi de Jesúsi jurhani ixú Echerirhu ka kʼamarasti karanhani uéxurhini 98 jimbo enga Jesúsi jupkia ixú Echerirhu. Ísï jimbo, ma 1,600 uéxurhinisïksï kámasti karani. Nájkiruka ísïika, Bibliarhu iámu ambe terukuntasïndi. ¿Néna úski i ambe úkuarhini? Jimboka Tata Diosïsï kararkuarhika (arhinta je 1 Tesalonika 2:13). I kʼuiripuechaksï no imeeri eratsekuani karasti. Sino Tata “Diosïni jimboksïsï uandenti ka eska Espiritu Santu na uandarauenga” (2 Pedru 1:21). a Espiritu santuni úraparini, Tata Diosï úspti eskaksï i kʼuiripuecha jatsikupiringa Bibliarhu ambe enga ima eratsenga (2 Timoteo 3:16).
2. ¿Néksï uaa jatsini Bibliani?
“Iámindu nasionicha ka tribuecha ka imeecha engaksï táchani jásï idioma uandajka ka iámindu kʼuiripuecha” uaatiksï arhinta ambakiti aianhperakuani enga Bibliarhu jaka (arhinta je Jaŋaskuecha 14:6). Tata Diosï ústi eska Biblia uánikua idiomecha jimbo jauaka. I libru jindeesti enga sánderu tradusirikuarhikia desde iónisï. Sáno iámindu kʼuiripuechaksï úsïndi arhintani no arhiparini nani engaksï irekaka o náki idiomaksï uandani.
3. ¿Néna kuájchakuski Jeoba Bibliani?
Biblia ueenakuarhu sïkuiri jimbo karhakuarhispti ka ístu ambe ma jimbo enga ísïipka eska sïranda engaksï papiru arhienga ka íksï sóntku ampendurhikuarhisïrendi. Peru máru kʼuiripuecha engaksï kánikua tsitienga Bibliani uánikua kopiechanksï uaaspti. Jájki jimboksï karasïrendi ka kánikua jingontku. Nájkirukaksï japka máru kʼuiripuecha engaksï uékenga kʼamajkuni Bibliani, jarhasptiksï máteruecha engaksï jamberi imeecheri tsípikuani íntspienga paraksï úni kuájchakuni Bibliani. Jeoba no jurhajkusïndi eska nema o ambe ma ójkutaaka parajtsïni ima no aianguni imeeri eratsekuani. Biblia uandasïndi: “Juchaari Tata Diosïri uandakua, méntkisï jauati” (Isaías 40:8).
JORHENGUARHI JE SÁNDERU AMBE
Ju je exeni sánderu ambe parachi míteni, néna úski Tata Diosï parakaksï máru kʼuiripuecha karapiringa Bibliani ka ambe enga xáni úkia para kuájchakuni Bibliani ka parakaksï kʼuiripuecha úpiringa jatsini.
4. Biblia mismujtsïni arhisïndi neenga kararkuarhika Bibliani
Exe je BIDEUNI. Tátsekua arhinta je 2 Timoteo 3:16 ka uandontskuarhi je íri ambe:
-
Engaksï kʼuiripuecha karaka Bibliani, ¿andiksïsï arhijki eska Tata Diosïri Karakateska?
-
¿Sési jarhaski jakajkuni eska Tata Diosïsï arhiaka kʼuiripuechani ambeksïsï karapirini?
Sekretariu karasïndi kartani, peru jefesï arhijti ambesï karaa, májkueni úkuarhisti Biblia jingoni. Kʼuiripuechaksï karasti peru Tata Diosï arhiaspti ambeksïsï karapirini.
5. Nóksï úspti kʼamajkuni Bibliani
Biblia Tata Diosïri karakatesti, jimbosï ima méntkisï kuájchakujti. Desde iónisïa, uánikua juramutichaksï jánguarhintasti kʼamajkuni Bibliani. Ístu jarhasptiksï uánikua relijioniri orhejtsïkuticha engaksï no uékenga eskaksï kʼuiripuecha arhintapiringa Bibliani. Uánikuechaksï jánguarhintasti kuájchakuni Bibliani, nájkirukaksïni ini ambe jimbo niárapiringa no sési kánhani ka asta uándikunhani. Parajtsï míteni ini jásï kʼuiripuni ma, exe je BIDEUNI ka uandontskuarhi je íri ambe:
-
Iásï engajtsï mítekia na enga xáni jánguarhinhantaka kuájchakuni Bibliani, ¿tsitixakijtsïa arhintani? ¿Andi?
Arhinta je Salmo 119:97 ka uandontskuarhi je íri ambe:
-
¿Andiksïsï xáni uánikua kʼuiripuecha tradusirinta ka etsakuni Bibliani, nájkirukaksï úpiringa uándikunhani?
6. Libru ma para iámindu kʼuiripuecha
No ma libru jarhasti enga xáni tradusirhinhajka ka etsakunhani. Arhinta je Ukuecha 10:34, 35 ka uandontskuarhi je íri ambe:
-
¿Andisï uéjki Tata Diosï eska xáni uánikua idiomecha jimbo tradusirhinhaaka imeeri karakata ka eska xáni etsakurhiaka?
-
¿Ambejtsï sánderu tsitisïni Biblieri?
Sáno
100%
iápurisï anapu kʼuiripu
úsïndi arhintani Bibliani imani idioma jimbo enga újka kurhanguni
Jukari
3,000
idiomecha jimbo jarhasti,
iámindu o ma parti
5,000 miioni
Xánisï imprimirinhastia Bibliecha.
No ma libru jarhasti enga xáni uánikua imprimirinhakia
MÁRUKSÏ I AMBE UANDASÏNDI: “Biblia ióntki anapu libru máestia engaksï kʼuiripuecha karaka”.
-
¿Chá na exesïni?
-
¿Ambe ka ambe xarhatasïni eska Biblia Tata Diosïri Karakateska?
AMBE ENGACHI JORHENGUARHIKA
Biblia Tata Diosïri Karakatesti ka ima ústi eskaksï iámindu kʼuiripuecha uaaka jatsini.
Ambejtsï jorhenguarhiski
-
¿Ambe arhikuekasïni eska Tata Diosï kararkuarhiska Bibliani?
-
¿Ambeksïni ísku pakatasïni na enga Tata Diosï kuájchakuka Bibliani paraksï no kʼamajkuni? ¿Nájtsï exesïni na enga tradusirhinhajka ka etsakunhani?
-
¿Nájtsï pʼikuarherasïni ini ambe jimbo enga úkia Tata Diosï paraksïni úni uandontskuarhechini?
ÍSTU EXE JE INI AMBE
Jorhenguarhi je Biblieri, na enga uénaka kararkuarhini ka na enga tradusirinhani jaka asta iásï jamberi.
“Nénachi niáraski jatsini Bibliani” (¡Tsinharhi!, nobiembri de 2007)
Jorhenguarhi je na enga Biblia úka orhepani uérakuani tanimuni ambe engaksï uékenga kʼamajkuni.
“Na enga úka orhepani uérani Biblia” (Aianhpiri, núm. 4 2016)
Exe je ambe engaksï nitamakuarhinchaka máru paraksï úni tradusirini Bibliani.
Uánikua kopiecha ka traduksionichaksï jarhasti Biblieri. ¿Nénajtsï uaa chá seguru jarhani eska útasï ima ambeeska enga Tata Diosï kararkuarhika?
“¿Nema mójtakuski Tata Diosïri Karatani?” (Artikulu ma enga jw.org jimbo jaka)
a Eska na arhijka jorhenguarhikua 7, Tata Diosïri espiritu santu jindeesti imeeri uinhapikua.
Jamberijtsï ístu uéjka ini ambe míteni
KURHAMARHIKUECHA ENGAKSÏ SÁNDERU ÚKUARHIJKA
¿Nénaksï jorhentpisïni Biblieri ambe Jeobaeri testiguecha?
Parajtsï Jeobaeri testiguechani jingoni jorhenguarhini Biblieri ambe, chájtsï uaaka náki uéjki Bibliani jingoni jorhenguarhini. Ístujtsï uaaka pʼímarhini chaari familiani o amiguechani.
