JORHENGUARHIKUA 7
¿Na jásïiski Jeoba?
Engajtsï eratsejka Jeobani, ¿nénajtsï eranhaskasïni? ¿Ísïjtsï exesïni eska kʼéri ambeeska, peru eska xáni iauani jarhaska eskaksï jóskuecha engaksï auandarhu jaka? ¿Ojtsï ísï eranhaskasïni eska ambe ma enga kánikua uinhapika peru enga no ma ambe pʼikuarherajka komueska piritakua ma? ¿Meru námindu jásïiski Jeoba? Imeeri Karakatarhu, Jeobajtsïni xarhatacheasïndi máru imeeri kualidadichani ka ístu na enga xáni pendienti pájka chánksïni jimbo.
1. ¿Andichisï no újki exeni Tata Diosïni?
“[Tata] Diosï espirituesti” (Juanu 4:24). Jeoba no uniristi ni kʼuiripiteri. Ima espiritu máesti enga auandarhu irekaka engachi ístu no újka exeni.
2. ¿Nákiskiksï máru Jeobaeri kualidadicha?
Nájkirukachi no újka exeni Jeobani, engachi mítejka niárasïngachi xénchani, jimboka jindeeska nema enga meru jaka ka enga sési járhati kualidadichani jatsiaka. Biblia arhisïndi: “Jeoba kánikua xénchasïndi jurhimbikuani, ka no méni jurhajkuauati imeechani engaksï no méni jurajkujka imani” (Salmo 37:28). Ístu arhisïndi eska “kánikua kóntpintasïnga ka pʼamojpini”, sánderia imeechani engaksï komu nitamakuarhini jarhajka (Santiagu 5:11). “Jeoba imeecha jingoni jarhasti engaksï no sési pʼikuarhinhijka mintsitarhu ka pʼímutantaasïndi imeechani engaksï kómu pʼikuarherajka” (Salmo 34:18). ¿Ka míteskijtsï eskachi uaaka sési o komu pʼikuastani Jeobani? Nema enga no sési ambe újka no sési pʼikuastasïndi Jeobani ka úsïndi eska komu pʼikuarheraaka (Salmo 78:40, 41). Peru ima enga újka ambe enga sési jaka kánikua sési pʼikuastasïndi Jeobani (arhinta je Proverbios 27:11).
3. ¿Néna xarhatasïni Jeoba eskajtsïni xénchasïnga?
Jeobaeri kualidadi enga sánderu xarhatajka jindeesti uékperakua. ‘Tata Diosï jindeesti uékperakua’ (1 Juanu 4:8). Jeobajtsïni xarhatachesti uékperakua jimbokajtsïni íntskuska Bibliani ka ístu imani ambe jimbo enga kueraaka (arhinta je Ukuecha 14:17). Pori ejemplu, eratsi je na engajtsïni xáni sési úka Jeoba. Ústi eskachi uaaka exeani sési járhati kolorichani, tsípikuarhini kústakua jingoni ka áspiti tʼirekua jingoni. Jeoba uékasïndi eskachi sési irekuarhiaka.
JORHENGUARHI JE SÁNDERU AMBE
Exeakachi ambe úrasïni Jeoba para xáni ambakiti ambe úni. Ka tátsekuachi exeaka eska Jeoba uékasïnga eskachi míteauaka imeeri sési járhati kualidadichani.
4. Espiritu santu: Tata Diosïri uinhapikua
Juchachi jájkichani úraasïnga para ánchikuarhini ka Jeoba imeeri espiritu santuni úrasïndi. Biblia no arhisïndi eska espiritu santu kʼuiripu máeska, sánderu sési eska Tata Diosïri uinhapikueska enga ima úrajka para iámindu ambe úni. Arhinta je Lukasʌ 11:13 ka Ukuecha 2:17 ka uandontskuarhi je íri ambe:
-
Uaakachi kurhakuni Tata Diosïni espiritu santu ka imajtsïni íntskuati. Ísï jimbo, ¿chá eratsesïni eska espiritu santu kʼuiripu máeska o sánderu sési eska Tata Diosïri uinhapikueska? ¿Andijtsïsï ísï eratsejki?
Jeoba úrasïndi imeeri espiritu santuni para ambakiti ambe úni. Arhinta je Salmo 33:6 ka 2 Pedru 1:20, 21 ka uandontskuarhi je íri ambe:
-
¿Ambe ka ambe xáni úskia Jeoba imeeri espiritu santuni úraparini?
5. Jeobaeri kualidadichaksï úsïndi eskachi uékaaka míteni imani
Nájkiruka Moisesi sési marhuakuni japka Tata Diosïni, uékasïrendi sánderu sési míteni imeeri Kueraajpirini. Jimbosï arhipti: “Jorhendarini chiiti xanharuechani parakakini uaaka míteni” (Éxodo 33:13). Para mókukuntani Jeoba aianguspti na enga jásïka ima. Arhinta je Éxodo 34:4-6 ka uandontskuarhi je íri ambe:
-
¿Náki kualidadichani aianguaspi Jeoba Moisesini?
-
¿Náki Jeobaeri kualidadichantsï chá sánderu tsitiasïni?
6. Jeoba pendienti pásïndi kʼuiripuecha jimbo
Ebreuecha, ióntki anapu Tata Diosïri ireta, jántspirisptiksï jini Egiptu. ¿Na pʼikuarherasïreni Jeoba enga exenga imeeri ireta komu nitamakuarhini jarhani? Kuraa je AUDIUNI ka chúnguma je arhintskuani o arhinta je Éxodo 3:1-10. Tátsekua uandontskuarhi je íri ambe:
-
¿Ambeksïni jorhendasïni i Bibliaeri arhintskua na enga pʼikuarherajka Jeoba enga exejka kʼuiripuni eska no sési nitamakuarhini jarhasïnga? (Exea je bersikuluechani 7 ka 8).
-
¿Exesïntsï eska Jeoba meru uékasïnga jarhuataani kʼuiripuechani? ¿Exesïntsï eska úsïnga ísï úni? ¿Andijtsïsï ísï eratsejki?
7. Úsïngachi exeani Jeobaeri kualidadichani imeeri kueraakata ambe jimbo
Úsïngachi míteni Jeobani imani ambe jimbo enga ima kueraaka. Exe je BIDEUNI. Tátsekua arhinta je Roma 1:20 ka uandontskuarhi je íri ambe:
-
¿Náki Jeobaeri kualidadichantsï exeasïni kueraakata ambe jimbo?
MÁRUKSÏ I AMBE UANDASÏNDI: “Tata Diosï no kʼuiripu máesti enga ma uaaka míteni, solu uinhapikua máesti enga iápurisï jaka”.
-
¿Chá na eratsesïni?
-
¿Andijtsïsï ísï eratsejki?
AMBE ENGACHI JORHENGUARHIKA
Jeoba espiritu máesti, jimbochisï no újka exeni. Jeoba sési járhati kualidadichani jatsiasti ka enga sánderu xarhatajka jindeesti uékperakua.
Ambejtsï jorhenguarhiski
-
¿Andichisï no újki exeni Jeobani?
-
¿Ambeeski espiritu santu?
-
¿Nákiskiksï máru Jeobaeri kualidadicha?
ÍSTU EXE JE INI AMBE
Jorhenguarhi je sánderu Jeobaeri ambe exepariani imeeri tʼámu kualidadichani enga sánderu xarhataajka.
Exe je andichisï uandajki eska Jeoba no iápurisï jarhaska.
“¿Iápurisï jarhasïni Tata Diosï?” (Artikulu ma enga jw.org jimbo jaka)
Exe je andisï Biblia terukutantajki espiritu santuni Tata Diosïri “jájkicha” jingoni.
“¿Ambeeski espiritu santu?” (Artikulu ma enga jw.org jimbo jaka)
Acheeti ma enga no újka exeni úkua jukanchasïrendi jakajkuni eska Tata Diosï uandanhiasïnga imani jimbo. Exe je ambe úspi paraka ménderueni eratsepiringa.
“Iásï exesïnguia eskani úsïnga jarhuataani máteruechani” (Aianhpiri, 1 de oktubri de 2015)
Jamberijtsï ístu uéjka ini ambe míteni
KURHAMARHIKUECHA ENGAKSÏ SÁNDERU ÚKUARHIJKA
¿Nénaksï jorhentpisïni Biblieri ambe Jeobaeri testiguecha?
Parajtsï Jeobaeri testiguechani jingoni jorhenguarhini Biblieri ambe, chájtsï uaaka náki uéjki Bibliani jingoni jorhenguarhini. Ístujtsï uaaka pʼímarhini chaari familiani o amiguechani.
