Enga Tata Diosï uékperakueka ka relijionichaksï uandani eskaksï imani ambe jorhentpisïnga ka úni enga Tata Diosï uéjka, ¿andiksïsï xáni no sési jásï ambe niátajki? Jimbokaksï i relijionicha no jurhimbitiska. Imeecheri chkuanderakuechani jingoni ka ambe engaksï újka no sésiksï pakatasïndi Tata Diosïni. ¿Nénaksï ísï úsïni? ¿Na pʼíkuastasïni Tata Diosïni i ambe? ¿Ka ambe uaa ima para xarhatani eska i ambe no ísïiska?

1. ¿Nénaksï no sési pakatasïni Tata Diosïni imani ambe jingoni engaksï jorhentpijka?

Relijioni no jurhimbitichaksï ‘sánderu jaiapanhentasti chkuanderakua ambeni ka eska Tata Diosïri uandakuani enga ísïika’ (Roma 1:25). Uánikua i relijionichaksï no jorhentpisïndi Tata Diosïri nombrini. Peru Biblia arhisïndi eskachi jatsiska para úrani (Roma 10:13, 14). Enga no sési jásï ambe úkuarhijka, máru relijioniri orhejtsïkutichaksï uandasïndi eska Tata Diosï ísï uékaska. Peru i ambe chkuanderakua ambeesti. Tata Diosï no kulpa jatsisïndi enga no sési ambe úkuarhijka (arhinta je Santiagu 1:13). Xáni enga no sésiika engaksï i chkuanderakuecha újka eskaksï kʼuiripuecha jarhariaka Tata Diosïni.

2. ¿Nénaksï no sési pakatasïni Tata Diosïni imani ambe jingoni engaksï újka?

Relijioni no jurhimbitichaksï no ísï kaasïndi kʼuiripuechani eska Tata Diosï Jeoba. Biblia arhisïndi eskaksï “imeecheri pekaduecha asta auandarhu niáraska” (Jaŋaskuecha 18:5). Desde iónisïa, relijionichaksï inchaakusïndi politikarisï, jarhuajpesïndiksï guerrecharhu ka jaiapanhintasïndiksï eska xáni uánikua kʼuiripu uándikperanhaaka. Máru relijioniri orhejtsïkutichaksï rikuesti ka sentabuksï euajpisïndi paraksï seguirini sési irekani. Indeni ambe jingoni engaksï újka, xarhatani jarhasïndiksï eskaksï no míteska Tata Diosïni. Ísï jimbo, ¿nénaksï uaa imeecha Tata Diosïri marhuarini? (Arhinta je 1 Juanu 4:8).

3. ¿Na pʼikuarherasïni Tata Diosï imani ambe jingoni engaksï relijioni no jurhimbiticha újka?

Engajtsï chá no sési exejka imani ambe engaksï relijioni no jurhimbiticha újka, ¡eranhaska je na enga pʼikuarherajka Tata Diosï Jeoba! Ima xénchaasïndi kʼuiripuechani, joperu ikiaxati relijioniri orhejtsïkuticha jingoni engaksï no sési pakatajka imani ka engaksï no sési kaajka kʼuiripuechani engaksï imani marhuakujka. Tata Diosï aiatspesïndi eska relijioni no jurhimbiti kʼamajkunhaaka “ka nóteru méni exenhantaati” (Jaŋaskuecha 18:21). No ióni jimbo, Tata Diosï kʼamajkuauati iámindu relijioni no jurhimbitichani (Jaŋaskuecha 18:8).

 JORHENGUARHI JE SÁNDERU AMBE

4. Tata Diosï no iámindu relijionichani jaiapanheantasïndi

Uánikua kʼuiripuechaksï uandasïndi eskaksï relijionicha ísïiska komueska uánikua xanharuecha engaksï újka eskachi andarhieraaka Tata Diosïni. Peru, ¿ísïiski i ambe? Arhinta je Mateu 7:13, 14 ka uandontskuarhi je íri ambe:

• Eska na arhijka Biblia, ¿nákiski ima xanharu enga tsípikuarhu pájpijka?

Exe je BIDEUNI ka uandontskuarhi je íri ambe:

• ¿Jorhentpisïni Biblia eska Tata Diosï uánikua relijionichani jaiapanheantasïnga?

 6. Tata Diosï uékasïndi jarhuataani kʼuiripuechani paraksï jurajkuni relijioni no jurhimbitichani

Arhinta je Jaŋaskuecha 18:4 a ka uandontskuarhi je íri ambe:

• Tata Diosï uékasïndi jarhuataani imani kʼuiripuechani engaksï relijioni no jurhimbiticha támu jánhastaaka. ¿Na exesïni chá ini ambe?

7. Seguiri je jorhenguarhini Tata Diosï jurhimbitiri ambe

Indeni ambe jimbo engaksï relijioni no jurhimbiticha no sési úka, ¿jatsipirintsï para no sési ambe eratseni Tata Diosïri ambe? Eranhaska je nemani enga no jiókuarhiajka taati jémbeeri konsejuechani, i támu nirasïndi irekani ka no sési ambe niátani ka taati jémba no jaiapanhentasïndi ambe enga uájpa újka. ¿Sési japirini taati jémbani kulparini na enga uájpa irekaka jimboka no kurhandiska?

• ¿Sési japirini Tata Diosï Jeobani kulparini imani ambe jimbo engaksï relijioni no jurhimbiticha újka ka nóteru seguirinia jorhenguarhini imeeri ambe?

 AMBE ENGACHI JORHENGUARHIKA

Relijioni no jurhimbitichaksï no sési pakatasïndi Tata Diosïni imani ambe jingoni engaksï jorhentpijka ka engaksï no sési ambe újka, jimbosï Tata Diosï kʼamajkuauati.

Ambejtsï jorhenguarhiski

• ¿Chá na exesïni ambe engaksï xáni úkia relijioni no jurhimbiticha ka ambe engaksï jorhentpijka?

• ¿Na exeasïni Tata Diosï relijioni no jurhimbitichani?

• ¿Ambe úkuaua Tata Diosï relijioni no jurhimbitichani?