JORHENGUARHIKUA 15
¿Neeski Jesúsi?
Jesúsi jindeesti kʼuiripu ma enga desde iónisï sánderu mítekateka. Uánikuaksï mítesti imeeri nombrini, peruksï no mítesti sánderu imeeri ambe ka uánikuechaksï mámaru ambe uandasïndi némindu jindeeski ima. ¿Ambe jorhentpisïni Biblia Jesúsiri ambe?
1. ¿Neeski Jesúsi?
Jesúsi ánjeli uinhapiti máesti enga auandarhu irekaka. Tata Diosï Jeoba imani orheta kueraasti ante de kueraani iámindu máteru ambe. Jimbosï Biblia arhijti eska ‘tʼuini jindeespkia enga nótki ambe ma kueraakateenga’ (Kolosasi 1:15). Biblia uandasïndi eska Jesúsi jindeeska ‘máechakua Uájpa’ Tata Diosïri, jimboka Tata Diosï Jeoba imantkusï jandiajku kueraaka (Juanu 3:16). Jesúsi ánchikuarhispti imeeri Taati jémba Jeoba jingoni jarhuataparini iámindu ambe kueraani (arhinta je Proverbios 8:30). Ka tsimarhanksï seguirixati ambakiti pájperakua ma jatsini. Jesúsi jindeesti “Uandakua”, i ambe arhikuekasïndi eska Tata Diosïri uandakua páriska engajtsïni aiangujka ambe enga Tata Diosï uéjka eskachi uaaka ka eskachi míteaka imeeri Taati jémbeeri ambe (Juanu 1:14).
2. ¿Ambe úni jurhaspi Jesúsi Echerirhu?
Ma 2,000 uéxurhini ísïistia enga Tata Diosï Jeoba úraka imeeri espiritu santuni para milagru ma úni: auandarhu uératini, Jesúsiri tsípikua—ima ánjeli uinhapiti—Maríeri matrisirhu niáraspti. Ka ísï úspti Jesúsi andajpenuni komu kʼuiripu ma (arhinta je Lukasʌ 1:34, 35). Ima jurhasti ixú Echerirhu para Kristueni o Mesíasi enga aiatspenhapka ka para pʼímutantaani kʼuiripuechani. a Ambe enga karakata japkia Mesíasiri ambe, Jesúsini jimbo kumplirikuarhisti. Indeni ambe jingoni, kʼuiripu úpirindi mítentani eska ima jindeespka ‘Kristu, Tata Diosïri Uájpa enga tsípiti jaka’ (Mateu 16:16).
3. ¿Nani jarhaski Jesúsi iásï?
Enga Jesúsi uarhipkia, Tata Diosï tsítantaspti komu ánjeli ma ka kʼuanhatsentaspti auandarhu. Jini Tata Diosï ʻíntskusti ma nombri enga sánderu k’éri ambeekaʼ (Filipusʌ 2:9). Iásï Jesúsi ánjeli uinhapiti máestia, peru Tata Diosï Jeoba sánderu uinhapikua jatsisti eska Jesúsi.
JORHENGUARHI JE SÁNDERU AMBE
Ju je sánderu ambe exeni, némindu jindeeski Jesúsi ka andisï xáni jukaparhakue eskachi míteaka Jesúsini.
4. Jesúsi no jindeesti Tata Diosï enga Iámindu ambe Újka Úni
Nájkiruka Jesúsi ánjeli uinhapiti máeka jini auandarhu, Biblia uandasïndi eska kurhajchasïnga Tata Diosï Jeobani, enga jindeeka imeeri Tata Diosï ka imeeri Taati jémba. ¿Andichisï ísï uandajki? Exe je BIDEUNI parajtsï kurhanguni eska Biblia jorhentpisïnga eska Jesúsi no májkueniska eska Tata Diosï enga Iámindu ambe Újka Úni.
I tekstuechajtsïni jarhuatasïndi kurhanguni eska Tata Diosï Jeoba no májkueniska eska Jesúsi. Arhianta je tekstuechani ka uandontskuarhi je íri ambe:
Arhinta je Lukasʌ 1:30-32.
-
Eska na uandapka ánjeli, ¿ambeeski Jesúsi, Tata Diosï Jeoba jingoni “enga Sánderu K’éri Ambeeka”?
Arhinta je Mateu 3:16, 17.
-
¿Ambe kurhaakuarhispi auandarhu uératini enga Jesúsi itsï atakuarhipka?
-
¿Neespi ima enga uandapka?
Arhinta je Juanu 14:28.
-
¿Né sánderu kʼériski ka sánderu juramukua jatsini: taati ma o imeeri uájpa?
-
¿Ambe arhikuekaxapi Jesúsi enga arhipka Tata Diosï Jeobani “Taati”?
Arhinta je Juanu 12:49.
-
¿Eratsesïreni Jesúsi eska ima májkuenispka Taati jémba jingoni? ¿Chájtsï na exesïni?
5. Jesúsi niárasti jindeeni Mesíasi
Bibliarhu, uánikua profesiechaksï jarhasti engaksï jarhuataapiringa kʼuiripuechani paraksï úni kurhanguni neeski Mesíasi enga Tata Diosï erakuka para iáminduechani pʼímutantaani. Exe je BIDEUNI, nani engajtsï exeantauaka máru profesiechani engaksï Jesúsini jimbo úkuarhipka jiáni enga ima ixú Echerirhu jámani japka.
Arhianta je ini profesiechani engaksï Bibliarhu jaka ka uandontskuarhi je íri ambe:
Arhinta je Miqueas 5:2 parajtsï jorhenguarhini nani andajpenupirini Mesíasi. b
-
¿Úkuarhispi i profesia jiáni enga Jesúsi andajpenupka? (Mateu 2:1).
Arhinta je Salmo 34:20 ka Zacarías 12:10 parajtsï exeni máru ambe enga uandakata japkia na enga uarhipiringa Mesíasi.
-
¿Úkuarhiskiksï i profesiecha? (Juanu 19:33-37).
-
¿Exesïntsï eska Jesúsi úspka ambe ma nomasi parakaksï úkuarhipiringa máru i profesiecha?
-
Iámindu i ambe, ¿ambe xarhatasïni Jesúsiri ambe?
6. Marhuachesïndijtsïni míteni Jesúsini
Bibliarhu uandasïndi eska kánikua jukaparhakueska jorhenguarhini Jesúsiri ambe ka ambe enga Tata Diosï uéjka eska ima uaaka. Arhinta je Juanu 14:6 ka 17:3, ka uandontskuarhi je íri ambe:
-
¿Andisï xáni uétarhijki eskachi míteaka Jesúsiri ambe?
Jesúsi mítasti xanharuni parachi úni Tata Diosïri amigueni ka jorhentpispti jurhimbikua Tata Diosï Jeobaeri ambe. Ka ístuchi uaaka irekani para méntkisï Jesúsini jimbo.
MÁRUKSÏ I AMBE UANDASÏNDI: “Jeobaeri testiguechaksï no jakajkusïndi Tata Jesukristuni”.
-
¿Ambejtsï mókuntapirini chá?
AMBE ENGACHI JORHENGUARHIKA
Jesúsi ánjeli uinhapiti máesti, Tata Diosïri Uájpa ka Mesíasi.
Ambejtsï jorhenguarhiski
-
¿Andiksïsï uandajki eska Jesúsi ‘tʼuini jindeespkia enga nótki ambe ma kueraakateenga’?
-
¿Ambe úsïreni Jesúsi ante de jurhani ixú Echerirhu?
-
¿Nénachi míteski eska Jesúsi Mesíasiska?
ÍSTU EXE JE INI AMBE
Exe je máteru ambe enga xarhatajka eska Jesúsi Mesíasiska.
¿Jorhentpisïni Biblia eska Tata Diosï ísï kánguarhiska Jesúsini eskaksï kʼuiripuecha na kánguarhiajka uájpeechani?
“¿Andisï uandanhajki eska Jesúsi Tata Diosïri Uájpeeska?” (Artikulu ma enga jw.org jimbo jaka)
Exe je andisï Biblia no jorhentpijki trinidadiri ambe.
Exe je na enga uarhiiti ma mójtakuka imeeri irekuani enga jorhenguarhipka Jesúsiri ambe Bibliarhu.
a Jorhenguarhikuecha 26 ka 27 jimbo, uandasïndi andisï kʼuiripu uétarhincheni eska pʼímutanhantapiringa ka na engajtsïni pʼímutantaka Jesúsi.
Jamberijtsï ístu uéjka ini ambe míteni
KURHAMARHIKUECHA ENGAKSÏ SÁNDERU ÚKUARHIJKA
¿Nénaksï jorhentpisïni Biblieri ambe Jeobaeri testiguecha?
Parajtsï Jeobaeri testiguechani jingoni jorhenguarhini Biblieri ambe, chájtsï uaaka náki uéjki Bibliani jingoni jorhenguarhini. Ístujtsï uaaka pʼímarhini chaari familiani o amiguechani.
