JORHENGUARHIKUA 17
¿Na jásï kʼuiripueski Jesúsi?
Engachi na jorhenguarhipani jarhajka ambe enga Jesúsi uandapka ka úni ixú Echerirhu, jorhenguarhiasïngachi kualidadichani engaksï újka eskachi sánderu andarhieraaka imani ka imeeri Taati jémbani, Tata Diosï Jeobani. ¿Nákiskiksï máru i sési járhati kualidadicha? ¿Ka nénachi uaa májkueni úni eska Jesúsi?
1. ¿Ambe jimbo májkueniski Jesúsi imeeri Taati jémba jingoni?
Jesúsi ióni auandarhu jarhaspti exeni imeeri Taati uékpitini ka jorhenguarhini imeeri ambe. Jimbosï májkueni eratsejti, pʼikuarherani ka jámani eska Taati jémba (arhinta je Juanu 5:19). Jesúsi xáni sési xarhataspti na enga jásïika imeeri Taati jémba enga jamberi uandapka: “Ima engareni exeka jíndeni, exesti Diosï Taatini” (Juanu 14:9). Ísï jimbo, engajtsï chá sánderu míteaka Jesúsini, ístujtsï sánderu sési míteaka Jeobani. Komu na enga Jesúsi pʼamojkuapka kʼuiripuechani, xarhatasïndi na enga pʼikuarherajka Jeoba chánksïni jimbo.
2. ¿Néna xarhataspi Jesúsi eska xénchasïnga imeeri Taati jémbani?
Jesúsi uandaspti: “Para eska parhakpini anapuecha míteaka eskani ji uékasïnga Taatini, ji ísï uaaka eskarini Taati na juramuchika” (Juanu 14:31). Enga Jesúsi Echerirhu japka, xarhataspti eska kánikua xénchasïreenga imeeri Taati jémbani jimboka kurhajchaspka asta jiáni jamberi enga úka jukanchani japka. Ístu, Jesúsi tsitisïreendi uandani imeeri Taatiri ambe ka jarhuataani máteruechani paraksï Tata Diosïri amigu úkuarhini (Juanu 14:23).
3. ¿Néna xarhataski Jesúsi eska xénchaasïnga kʼuiripuechani?
Biblia uandasïndi eska Jesúsi ‘kánikua xénchaasïnga kʼuiripuechani’ (Proverbios 8:31). Xarhataspti eska xénchaasïnga kʼuiripuechani enga uinhaperantaapka ka jarhuataani no ma ambe erokuarhiparini. Uaaspti milagruechani enga no solu imeeri uinhapikua xarhatapka, sino ístu na enga xáni pʼamojkuauenga kʼuiripuechani (Markusʌ 1:40-42). Sési kaasïreendi kʼuiripuechani ka iáminduechani májkueni kaasïreendi. Sési pʼikuastantasïreendi ka erokuarhikua ma íntsaani ambakiti kʼuiripuechani engaksï kurhajcheenga. Ístu, uékaspti no sési nitamakuarhini ka uarhini jimboka xénchaasïnga iámindu kʼuiripuechani, peru sánderu xénchaasïndi imeechani engaksï kurhajchajka ambe enga ima jorhentpika (arhinta je Juanu 15:13, 14).
JORHENGUARHI JE SÁNDERU AMBE
Ju je sánderu sési míteni na enga jásïika Jesúsi ka exeni na engachi uaaka májkueni uékpitiini ka intsïmpitini eska ima.
4. Jesúsi xénchasïndi imeeri Taati jémbani
Jesúsijtsïni jorhendasti imeeri ejemplu jingoni nénachi uaa xarhatakuni Tata Diosïni eskachi xénchasïnga. Arhinta je Lukasʌ 6:12 ka ístu Juanu 15:10 ka 17:26. Engajtsï na arhiantauakia mándani tekstuechani, uandontskuarhi je íri ambe:
-
Exeparini ambe enga úpka Jesúsi, ¿nénachi uaa xarhatakuni Tata Diosï Jeobani eskachi xénchasïnga?
Jesúsi xénchasïreendi imeeri Taati auandarhu anapuni ka someni kómarhisïreendi.
5. Jesúsi uandanhiasïndi no jatsikuarhericha jimbo
Jesúsi sánderu uandanhiasïreendi kʼuiripuecha jimbo ka eska imeeri ambe jimbo. Asta jiáni enga kuataratini jarheenga úrasïreendi imeeri tiempuni ka uinhapikuani para máteruechani jarhuataani. Arhinta je Markusʌ 6:30-44 ka uandontskuarhi je íri ambe:
-
Eska na uandajka i relatu, ¿Jesúsi néna xarhataspi eska uandanhiasïreenga máteruecha jimbo? (Exea je bersikuluechani 31, 34, 41 ka 42).
-
¿Andisï Jesúsi jarhuataapi ini kʼuiripuechani? (Exe je bersikulu 34).
-
Enga Jesúsi sési xarhatapka na enga jásïika imeeri Taati jémba, ¿ambeksïni jorhendasïni i ambe Tata Diosï Jeobaeri ambe?
-
¿Nénachi uaa xarhatakuani máteruechani eskachi uandanhiasïnga máteruecha jimbo ísï eska na ueenga Jesúsi?
6. Jesúsi intsïmpitisti
Nájkiruka Jesúsi no uánikua ambe jatsikuarhepka, intsïmpitispti ka uékasïndi eskachi juchajtu májkueni intsïmpitiuaka. Arhinta je Ukuecha 20:35 ka uandontskuarhi je íri ambe:
-
Eska na uandapka Jesúsi, ¿ambe úsïni eskachi sési pʼikuarheraaka?
Exe je BIDEUNI ka uandontskuarhi je íri ambe:
-
¿Nénachi uaa íntspini ambe ma nájkirukachi no kánikua ambe jatsikuarheaka?
¿Mítespijtsï ini ambe?
Bibliajtsïni jorhendasïndi eskachi jatsiska para kómarhini Jeobani, Jesúsiri nombrini úraparini (arhinta je Juanu 16:23, 24). Ísïchi xarhataaka eskachi jukaparharasïnga ambe enga Jesúsi úka parajtsïni jarhuatani Jeobaeri amigueni.
MÁRUKSÏ I AMBE UANDASÏNDI: “Tata Diosï no uandanhiasïndi enga kʼuiripu kómu nitamakuarhini jarhajka”.
-
Jimboka Jesúsi sési xarhatasïnga na enga jásïika Taati jémba, ¿néna xarhatasïni imeeri ejemplu eska Tata Diosï Jeoba uandanhiasïnga juchantsïni jimbo?
AMBE ENGACHI JORHENGUARHIKA
Jesúsi xénchasïndi Jeobani ka ístu kʼuiripuechani. Exeparini eska Jesúsi ísïiska eska Taati jémba, engajtsï sánderu sési míteska Jesúsini, sánderujtsï sési míteaka Tata Diosï Jeobani.
Ambejtsï jorhenguarhiski
-
Jesúsiri ejempluni úraparini, ¿nénachi uaa xarhatani eskachi xénchasïnga Tata Diosï Jeobani?
-
Jesúsiri ejempluni úraparini, ¿nénachi uaa xarhatani eskachi xénchaasïnga kʼuiripuechani?
-
¿Ambejtsï sánderu tsitisïni na enga jásïika Jesúsi?
ÍSTU EXE JE INI AMBE
Exe je máru ambe enga Jesúsi xarhatapka engachi ístu jucha uaaka xarhatani.
“Ju je májkueni úni eska Jesúsi” (Jesús: el camino, la verdad y la vida, pájina 317)
Exe je na enga xáni jukaparhakueka Jesúsi kómarhikuecharhu.
“¿Andichisï jatsi para Jesúsiri nombri jimbo kómarhini?” (Aianhpiri, 1 de febreru de 2008)
¿Uandasïni Biblia na enga jáxepka Jesúsi?
¿Ambejtsï jorhenguarhisïni na enga kaapka Jesúsi nanakechani?
“Tata Diosï janhanharhiasïndi ka jukaparharaani nanakechani” (Aianhpiri, 1 de septiembri de 2012)
Jamberijtsï ístu uéjka ini ambe míteni
KURHAMARHIKUECHA ENGAKSÏ SÁNDERU ÚKUARHIJKA
¿Nénaksï jorhentpisïni Biblieri ambe Jeobaeri testiguecha?
Parajtsï Jeobaeri testiguechani jingoni jorhenguarhini Biblieri ambe, chájtsï uaaka náki uéjki Bibliani jingoni jorhenguarhini. Ístujtsï uaaka pʼímarhini chaari familiani o amiguechani.
