Jeoba uékasïndi eska iámindu ambe sési úkuarhiaka (1 Korintu 14:33). Jimbosï imeeri ireta jatsiti para sési ánchikuarhini. ¿Néna ánchikuarhisïni kúnguarhikua kristiana? ¿Ambechi jatsiski para úni paraka iámindu ambe sési uéraaka?

1. ¿Né orhejtsïkusïni kúnguarhikua kristianani?

‘Kristu jindeesti Juramuti jakajkuticheeri’ (Efesu 5:23). Jesúsi exesïndi auandarhu uératini na enga ánchikuarhijka Tata Diosï Jeobaeri ireta iámu parhakpinirhu. Jesúsi erakusti ‘jántspirini enga mintsinharhikueka ka jánhastiini’: máru orhejtsïkuticha engaksï sési mítekuka, enga ístu ísï mítekateeka komu Grupu enga Orhejtsïkuajka iámindu kúnguarhikuechani (arhinta je Mateu 24:45-47). Ísï eskaksï na ueenga apostolicha ka Jerusaléni anapu orhejtsïkuticha primeru siglurhu, Grupu enga Orhejtsïkuajka iámindu kúnguarhikuechani orhejtsïkusïndi interu parhakpini anapu kúnguarhikuani (Ukuecha 15:2). Joperu i grupu no juramukusïndi Tata Diosïri kúnguarhikuani. Sánderu sési, arhintasïndi Bibliani para míteni ambe enga Jeoba uéjka eska uaaka ka tsípikua jingoni úsïndi ambe enga Jesúsi juramujka.

2. ¿Neeskiksï orhejtsïkuticha ka ambeksï úsïni?

Orhejtsïkuticha—erachicha engaksï sési jorhendakata jaka—jindeestiksï jorhentpiricha engaksï Bibliani úrajka para jorhentpini ka engaksï jarhuajpejka ka uinhaperantaani kúnguarhikuarhu anapuechani. I erachichaksï no maiamunhasïndi imani ambe jimbo engaksï kúnguarhikuarhu újka. Sánderu sési, tsípikua jingonksï marhuasïndi para Tata Diosï, ‘ka no paraksï andakuekani enga no terukuntajka, sino tsípikua jingoni’ (1 Pedru 5:1, 2). Orhejtsïkutiri jarhuajpirichaksï erachichesti engaksï jarhuataajka orhejtsïkutichani ka íchaksï tátsekua niárasïndi orhejtsïkutini engaksï jánguarhintajka ísï úni eska Biblia na arhijka.

Grupu enga Orhejtsïkuajka iámindu kúnguarhikuechani, erakuasïndi máru orhejtsïkutichani paraksï sirkuitueri orhejtsïkutini. I erachichaksï pʼorhembiasïndi máru kúnguarhikuechani paraksï arhistakuani ka uinhaperantaani erachichani ka pirenchichani. Ístuksï sirkuitueri orhejtsïkuticha erakuasïndi orhejtsïkutichani ka orhejtsïkutiri jarhuajpirichani exeparini ambe enga Biblia uandajka eskaksï jatsiska para úni i erachicha (1 Timoteo 3:1-10, 12; Titu 1:5-9).

3. ¿Ambe ánchikuarhita úsïni mándani Jeobaeri testigu?

Iáminduecha engaksï kúnguarhikuarhu jaka, kʼéri ambeksï arhisïndi “Jeobaeri nombrini” engaksï komentarijka, arhijtsïkperata ma nitamatarani o parti ma íntspini ka pireni. Ístuksï ísï úni jarhasïndi engaksï aianhpijka na engaksï xáni uaaka (arhinta je Salmo 148:12, 13).

 JORHENGUARHI JE SÁNDERU AMBE

4. Jesúsi orhejtsïkuti máesti engajtsïni sési pʼikuastantajka

Jesúsijtsïni pʼímarhisïndi ambakiti ambe úni. Arhinta je Mateu 11:28-30 ka uandontskuarhi je íri ambe:

• ¿Na jásï orhejtsïkuti máeski Jesúsi ka néna uékasïni eskachi pʼikuarheraaka?

5. Orhejtsïkutichaksï imani ambe úsïndi ambe engaksï jorhentpijka

1. Orhejtsïkutichaksï jánguarhintasïndi paraksï sánderu ambakiti pájperakua ma jatsini Jeobani jingoni ka ístuksï jarhuataasïndi imeeri familiarhu anapuechani paraksï májkueni úni.

2. Orhejtsïkutichaksï uandanhiasïndi iámindu imeecha jimbo engaksï kúnguarhikuarhu jaka.

3.   Orhejtsïkutichaksï someni uérasïndi aianhpini.

4. Orhejtsïkutichaksï jorhentpisïndi Bibliaeri ambe. Ístuksï jarhuajpesïndi limpiarini ka máteru ambe úni.

6. Májku kʼérichi ánchikuarhisïnga orhejtsïkuticha jingoni

Bibliajtsïni arhisïndi andichisï jatsi para májku kʼéri ánchikuarhini orhejtsïkuticha jingoni. Arhinta je Ebreu 13:17 ka uandontskuarhi je íri ambe:

• ¿Andisï Biblia uandajki eskachi jatsiska para kurhajchaani orhejtsïkutichani ka ísï úni eskajtsïni na arhiaka nájkirukachi ménisï no tsitiaka? ¿Exesïntsï eska i ambe sési jarhaska? ¿Andi?

Arhinta je Lukasʌ 16:10 ka uandontskuarhi je íri ambe:

• ¿Andichisï jatsi para méntkisï kurhajchaani orhejtsïkutichani, nájkirukachi ísï exeaka eska no xáni jukaparhakua ambeeska?

 AMBE ENGACHI JORHENGUARHIKA

Jesúsi jindeesti enga orhejtsïkujka kúnguarhikuani. Ka orhejtsïkutichaksï ísï úsïndi eska Jesúsi na juramujka ka juchachi tsípikua jingoni májku kʼéri ánchikuarhisïnga imeecha jingoni, jimbokajtsïni kuidarisïnga ka jorhendani imeecheri ejemplu jingoni.

Ambejtsï jorhenguarhiski

• ¿Né orhejtsïkusïni kúnguarhikuani?

• ¿Nénaksï jarhuajpesïni orhejtsïkuticha kúnguarhikuarhu?

• ¿Náki ánchikuarhitaksï úsïni mándani Tata Diosïri marhuaricha?