JORHENGUARHIKUA 21
¿Néna aianhpinhaxaki ambakiti aianhperakua?
No ióni jimbo, Tata Diosï Jeoba úraati imeeri Reinuni para kʼamajkuni iámu no sési jásï ambe enga úkuarhini jaka. ¡Jimbochisï jatsika para aianguani kʼuiripuechani ini xáni ambakiti ambe! Jesúsi uékasïreendi eskaksï imeeri chúxapaticha interu parhakpini aianhpepiringa ini ambe (Mateu 28:19, 20). ¿Ambeksï xáni úskia Jeobaeri testiguecha paraksï ísï úni eska Jesúsi na juramupka?
1. ¿Néna kumplirikuarhixaki iásï ambe enga uandajka Mateu 24:14?
Jesúsi uandaspti: “I ambakiti aianhperakua [Tata] Diosïri Juramukueri, aianhpinhaati iápuru parhakpinirhu” (Mateu 24:14). Jeobaeri testiguechachi kánikua tsitisïnga ini ánchikuarhitani úni enga xáni jukaparhakueka. Interu parhakpinirhuchi aianhpisïnga ambakiti aianhperakuani jukari 1,000 idiomecha jimbo. Uétarhisïndi kánikua jánguarhintani ka sési organisadu jarhani para ini xáni k’eri ánchikuarhitani úni. Nóchi úpiringa úni ini ambe engajtsïni Jeoba no jarhuatapiringa.
2. ¿Ambechi xáni úsïni parachi úni aianguani kʼuiripuechani Tata Diosïri ambe?
Aianhpisïngachi nani uéjkisï engaksï kʼuiripuecha jauaka. Ka ísï eskaksï na ueenga primeru siglurhu anapuecha, nirasïngachi “kʼumanchikuecharhu” (Ukuecha 5:42). Ísïchi úsïnga mándani uéxurhini uánikua kʼuiripuecha jingoni uandontskuarheni. Peru jimbokaksï kʼuiripuecha ménisï no jarhasïnga imeecho, ístuchi aianhpisïnga jimeesïsï enga uánikua kʼuiripu jámani jarhajka. Méntkisïchi jánguarhintasïnga aianguani kʼuiripuechani Tata Diosï Jeobaeri ambe ka ambe enga ima eratsetini jaka úni.
3. ¿Neechaksï jatsiski para aianhpini ambakiti aianhperakuani?
Iámindu imeecha engaksï jánguarhintajka ísï úni eska Kristu na uandapka, jatsistiksï para aianhpini ambakiti aianhperakuani. Ka juchachi kánikua jukaparharasïnga ini ánchikuarhitani. Jánguarhintasïngachi aianhpini na engachi xáni uaaka jimbokachi míteska eskaksï ísï uaaka kʼuiripuecha pʼímutantskata uérani (arhinta je 1 Timoteo 4:16). Nójtsïni nema maiamusïndi ini ánchikuarhitani jimbo, jimboka Biblia uandasïnga: “Chájtsï no maiampiska indeni ambe jimbo engajtsï intsïnhaka, jimajkani chájtu íntspinta je ka no kobrarpini” (Mateu 10:7, 8). Ka nájkirukajtsïni no iámindu kʼuiripuecha kurhajchajka, seguirisïngachi aianhpini jimbokachi ísï kʼéri ambe arhini jarhasïnga Tata Diosï Jeobani ka ístuchi sési pʼikuastasïnga.
JORHENGUARHI JE SÁNDERU AMBE
Ju je exeni ambe engachi újka Jeobaeri testiguecha para interu parhakpinirhu aianhpini ka na engajtsïni jarhuatajka Jeoba.
Interu parhakpinirhuchi aianhpisïnga: A) Costa Rica; B) Estados Unidos; C) Benín; D) Tailandia; E) Yap (Micronesia); F) Suecia.
4. Jánguarhintasïngachi iámindu kʼuiripuechani aianguani
Jeobaeri testiguechachi kánikua jánguarhintasïnga aianguani kʼuiripuechani ambakiti aianhperakuani nani uéjkiksï jarhani. Exe je BIDEUNI ka uandontskuarhi je íri ambe:
-
¿Ambejtsï sánderu tsitisïni ima amberi engachi Jeobaeri testiguecha újka para aianhpini?
Arhinta je Mateu 22:39 ka Roma 10:13-15, ka uandontskuarhi je íri ambe:
-
¿Nénachi xarhatasïni eskachi xénchaasïnga kʼuiripuechani engachi nirajka aianhpini?
-
¿Néna exeasïni Jeoba imeechani engaksï ambakiti ambe aianhpijka? (Exe je bersikulu 15).
5. Tata Diosïri jarhuajpiriskachi
Uánikua ejempluechaksï xarhatasïndi eskajtsïni Jeoba orhejtsïkuxaka aianhpikuarhu. Ju je exeni ambe enga úkuarhipka jini Nueva Zelanda. Inchatiru ma, Testigu ma enga Paul arhinhajka niraspti aianhpini kʼumanchikuecharhu ka uarhiiti ma jingoni uandontskuarhespti. Ima mismu jurhiatikua tsípa jimbo, ima uarhiiti kómarhispti Tata Diosïni imeeri nombrini úraparini, Jeoba, ka kurhakuspti eska nema jarhuatapiringa míteni imani. Paul uandasïndi: “Ka tanimu orisï tátsekua, ji kústaxapkia imeeri puertarhu”.
Arhinta je 1 Korintu 3:9 ka uandontskuarhi je íri ambe:
-
¿Nénaksï xarhatasïni i járhati eksperiensiecha eskajtsïni Tata Diosï Jeoba orhechepaxaka aianhpikuarhu?
Arhinta je Ukuecha 1:8 ka uandontskuarhi je íri ambe:
-
¿Andichisï uétarhinchajki eskajtsïni Tata Diosï Jeoba jarhuataaka engachi nirajka aianhpini?
¿Mítespijtsï ini ambe?
Tánguarhikuarhu engachi entre semana jimbo jatsijka jorhendasïndijtsïni aianhpini. Engajtsï chá ménisï nikaia tánguarhikuarhu ma, ¿nájtsï exeski na engajtsïni jima jorhendajka?
6. Engachi aianhpijka, kurhajchanchi jarhasïnga Tata Diosïri juramukuani ma
Primeru siglurhu, imeecha engaksï kurhunhiauenga Jesúsiri chúxapatichani nóksï jurajkuasïrendi paraksï aianhpini. I primeru siglurhu anapu kristianuechaksï jirinhakuntaspti néna aianhpini para “kuájpini ambakiti aianhperakuani” (Filipusʌ 1:7). Ka iásï, Jeobaeri testiguechachi májkueni úsïnga. a
Arhinta je Ukuecha 5:27-42 ka uandontskuarhi je íri ambe:
-
¿Andichisï seguiriua aianhpini? (Exea je bersikuluecha 29, 38 ka 39).
MÁRUKSÏ I AMBE KURHANGUARHISÏNDI: “¿Andiksïsï Jeobaeri testiguecha kʼumanchikuecharhu aianhpijki?”.
-
¿Ambejtsï mókuntapirini?
AMBE ENGACHI JORHENGUARHIKA
Jesúsi arhiaspti imeeri chúxapatichani eskaksï aianhpepiringa ambakiti aianhperakuani iápurisï. Ka Jeoba jarhuataxati imeeri iretani paraka uaaka ini ánchikuarhitani.
Ambejtsï jorhenguarhiski
-
¿Ambe xáni úkuarhixaki interu parhakpinirhu para aianhpinhani ambakiti aianhperakuani?
-
¿Nénachi xarhatasïni eskachi xénchaasïnga kʼuiripuechani engachi nirajka aianhpini?
-
¿Exesïntsï chá eska nirani aianhpini uaaka úni eskachi tsípikua jingoni irekaaka? ¿Andi?
ÍSTU EXE JE INI AMBE
Exe je na engaksï Jeobaeri testiguecha aianhpijka kʼérati iretecharhu.
Aianhpikua espesiali kʼérati iretecha jimbo jini París (5:11)
¿Ambeksï úsïni Jeobaeri testiguecha paraksï úni aianguani Tata Diosïri ambe imeechani engaksï máteru nanisï uératini nirajka kuájchakukuarhini?
Jorhendaaskachi Tata Diosïri ambe imeechani engaksï juka kuájchakukuarhini (5:59)
Exe je na enga pirenchi ma uandantajka andisï nema tsípikua jingoni irekajki enga úrajka imeeri tsípikuani para aianhpini.
Exe je máru ambakiti ambe engaksï juesicha uandapka tribunalicharhu para úni seguirini aianhpinhani ambakiti aianhperakua.
a Tata Diosïjtsïnisï juramuchijti eskachi aianhpiaka. Ísï jimbo, Jeobaeri testiguechachi no uétarhinchasïnga eskajtsïni juramuticha sésikua íntskuaka parachi aianhpini ambakiti aianhperakuani.
Jamberijtsï ístu uéjka ini ambe míteni
KURHAMARHIKUECHA ENGAKSÏ SÁNDERU ÚKUARHIJKA
¿Nénaksï jorhentpisïni Biblieri ambe Jeobaeri testiguecha?
Parajtsï Jeobaeri testiguechani jingoni jorhenguarhini Biblieri ambe, chájtsï uaaka náki uéjki Bibliani jingoni jorhenguarhini. Ístujtsï uaaka pʼímarhini chaari familiani o amiguechani.
