Tata Diosï Jeoba uékasïndi eskachi míteaka imeeri familiani enga auandarhu jaka. Ka ini familia jimboksï jarhasti ánjelicha, engaksï ístu mítekateka komueska ‘Tata Diosïri uájpeecha’ (Job 38:7). ¿Ambe jorhentpisïni Biblia ánjelicheri ambe? ¿Ánjelichaksï úsïni ambe ma juchantsïni jimbo ka néna? ¿Tata Diosïri familieskiksï iámindu ánjelicha?

1. ¿Neeskiksï ánjelicha?

Tata Diosï Jeoba kuerauasti ánjelichani ante de úni Echerini. Májkueni eska Tata Diosï, espirituestiksï engachi no újka exeani ka auandarhuksï irekasti (Ebreu 1:14). Uánikua ánjelichaksï jarhasti ka nóksï iáminduecha májkuenisti (Jaŋaskuecha 5:11). Ánjelichaksï úsïndi ‘ambe enga ima [Tata Diosï Jeoba] uandajka ka kurhajchaasïndiksï imeeri juramukuechani’ (Salmo 103:20). Ióntki, Tata Diosï Jeoba ménichanisï úraaspti imeeri ánjelichani paraksï aianhpini ambe ma ka para jarhuataani ka pʼímutantani imeeri iretani. Ka iásïksï ánjelicha orhekupaasïndi kristianuechani paraksï exeantani imani kʼuiripuechani engaksï uékajka sánderu míteni Tata Diosïri ambe.

2. ¿Neeskiksï Satanasi ka imeeri demoniuecha?

Máru ánjelichaksï nóteru uékasptia marhuakuni Tata Diosï Jeobani. Ima enga ueenapka no kurhajchani jindeesti ‘enga arhinhajka Noambakiti ka Satanasi ima enga kʼarhaani jaka iámindu parhakpini anapuechani’ (Jaŋaskuecha 12:9). Satanasi uékasïreendi máteruechani juramukuani, jimbosï úpti eskaksï Adáni ka Eba nóteru kurhajchapiringa Tata Diosïni. Ka tátsekua úspti eskaksï máteru ánjelicha májkueni úpiringa. Ka ima ánjelicha engaksï nóteru kurhajchapkia Tata Diosïni, arhinhasïndiksï demoniuecha. Tata Diosï Jeoba petantaasti auandarhu uératini ka Echerirhu kʼuanijpaasti ka kʼamajkunhaatiksï (arhinta je Jaŋaskuecha 12:9, 12).

3. ¿Nénajtsïni uékasïni támisï jánhastani Satanasi ka imeeri demoniuecha?

Satanasi ka imeeri demoniuechaksï támisï jánhastaasïndi uánikua kʼuiripuechani sïkuamikua ambe úraparini ka i no sési jásï ambe, úsïndi eskaksï demoniuecha jingoni pájperakua ma jatsiaka. Pori ejemplu, máru kʼuiripuechaksï arhiantasïndi oroskopuechani, ka máteruechaksï nirasïndi exerkuarhini o imeecha jingoni engaksï jóskuecheri ambe exejka, sïkuamicha jingoni ka kuranderuecha jingoni. Ka máruksï úrasïndi sïpiata ambe enga sïkuamikueri ambe jingoniika. Ka máteruechaksï ísï jakajkutaraasïndi máteruechani eskaksï úsïnga uarhiricha jingoni uandontskuarheni. Perujtsïni Jeoba arhisïndi: “Asï jáma je sïkuamicha jingoni nirani ka ni jámani nirani exerkuarhini” (Levítico 19:31). Ka Tata Diosï Jeobajtsïni uékasïndi kuájchakuni, jimboka Satanasi ka imeeri demoniuechaksï imeeri ikiatspiticheska ka uékasïndijtsïni no sési ambe úchini.

 JORHENGUARHI JE SÁNDERU AMBE

6. Asï jurajkutakuarhi je eskaksïni Satanasi ka imeeri demoniuecha andaaka

Satanasi juramukuasïndi demoniuechani. Peru ánjelicha engaksï Tata Diosïni marhuakujka arkanjeli Migueli juramukuasïndi, enga jindeeka máteru Jesúsiri nombri. ¿Na xáni uinhapikua jatsiski Migueli? Arhinta je Jaŋaskuecha 12:7-9 ka uandontskuarhi je íri ambe:

• ¿Neechaksï sánderu uinhapikua jatsiski: Migueli ka imeeri ánjelicha, o Satanasi ka imeeri demoniuecha?

• ¿Exesïntsï eskaksï Kristueri chúxapaticha jatsipiringa para chérhini Satanasini ka imeeri demoniuechani?

Chájtsï uaaka andani Satanasini ka imeeri demoniuechani. Arhinta je Santiagu 4:7 ka uandontskuarhi je íri ambe:

• ¿Chájtsï néna uaa kuájchakukuarhini Satanasiri ka imeeri demoniuecheri?

 AMBE ENGACHI JORHENGUARHIKA

Ánjelicha engaksï Tata Diosïni marhuakujka jarhuatasïndijtsïni. Satanasi ka imeeri demoniuechaksï Tata Diosï Jeobaeri ikiatspitichesti ka úrasïndiksï sïkuamikua ambe para támisï jánhastaani kʼuiripuechani.

Ambejtsï jorhenguarhiski

• ¿Ambeksï úsïni ánjelicha engaksï Tata Diosïni marhuakujka parakaksï kʼuiripuecha míteaka Tata Diosï Jeobani?

• ¿Neeskiksï Satanasi ka imeeri demoniuecha?

• ¿Andijtsïsï no jatsi para jiókuarhini ambe enga sïkuamikueri ambeuaka?