Enga no sési ambe úkuarhijka, uánikua kʼuiripuechaksï kurhamarhikuarhisïndi “¿Andisï ísï úkuarhi?”. Sésijtsïni pʼikuastantasïndi míteni ambe enga Biblia uandajka íri ambe.

1. ¿Ambe úspi Satanasi paraka ueenapiringa no sési ambe úkuarhini ixú parhakpinirhu?

Noambakiti, Satanasi, nóteru uékasptia kurhajchani Tata Diosïni. Ka jimboka ima uékasïreenga máteruechani juramukuani, úspti eskaksï Adáni ka Ebajtu nóteru kurhajchapiringia Tata Diosïni. Ka ísï úspti, Ebani chkuanderakuparini (Génesis 3:1-5). Ka jakajkutaraspti Ebani eska Tata Diosï Jeoba no uékasïreenga eska jatsipiringa ambakiti ambe ka eska no sési jarhaspka ambe enga Tata Diosï úni japka. Satanasi indeni ambe jingoni arhikuekaxapti eskaksï kʼuiripuecha sánderu tsípikua jingoni irekapiringa engaksï no kurhajchapiringa Tata Diosïni. Satanasi ueenaspti chkuanderani enga arhipka Ebani eska no uarhipiringa. Jimbosï Biblia uandajti eska Satanasi jindeeska “ma chkuanderari ka taati jémba chkuanderaricheri” (Juanu 8:44).

2. ¿Ambeksï úspi Adáni ka Eba?

Tata Diosï Jeoba ambakiti ambe íntsaaspti Adáni ka Ebani. Arhiaspti eskaksï úpiringa arhani fruta náki uéjki anhatapueri engaksï jardini de Edénirhu japka menusi máechakueri (Génesis 2:15-17). Nájkirukaksï mítepkia ini ambe, arhasptiksï frutani ini anhatapueri. Eba “úndaspti pʼikuni frutani ka arhani”. Ka tátsekua Adáni “ueenaspti arhani” (Génesis 3:6). Ísï jimbo, tsimarhanksï no kurhajchaspti Tata Diosïni. Jimbokaksï Adáni ka Eba no ma pekadu jatsispka, úpirindiksï imani ambe úni enga sési jaka. Peru jimbokaksï uékaparini no kurhajchaspka Tata Diosïni, pekaduksï úspti ka nóteruksï uékasptia eska ima juramukuapiringa. Engaksï ini ambe úpka, ueenasptiksï kánikua kómu nitamakuarhini (Génesis 3:16-19).

3. ¿Nénajtsïni niáraski no sési úchini ambe engaksï Adáni ka Eba úpka?

Engaksï Adáni ka Eba pekadu úpka, nóteruksï perfektuesptia ka ísïksï kéritaaspti pekaduni iámindu imeeri uájpeechani. Biblia i ambe uandasïndi Adániri ambe: “Eska pekadu na juka parhakpinirhu, máechakua kʼuiripuni jimbo ka pekaduni jimbo uarhikua, ka ísï uarhikua pakarani para iámindu kʼuiripuecha” (Roma 5:12).

Jiájkani, ¿andichisï kómu nitamakuarhijki? Ménisï jimbokachi imani ambe erakusïnga úni enga no sési jaka. Ka ménisï imani no sési jásï ambe jimbo engaksï máteruecha újka. Ka ístu, ménisïchi no sési nitamakuarhisïnga jimbokachi imani lugari jimbo jarhasïnga ka jiáni engachi no jatsipiringa para jarhani (arhinta je Eclesiastés 9:11).

 JORHENGUARHI JE SÁNDERU AMBE

4. Né enga újka eskachi kómu nitamakuarhiaka

Uánikua kʼuiripuechaksï eratsesïndi eska Tata Diosï juramuxaka parhakpinirhu. ¿Peru ísïiski i ambe? Exe je BIDEUNI.

Arhinta je Santiagu 1:13 ka 1 Juanu 5:19, ka uandontskuarhi je íri ambe:

• ¿Tata Diosï kulpa jatsiski enga kómu nitamakua ambe jaka ka enga no sési jásï ambe úkuarhijka?

5. No sési ambe úkuarhixati jimboka Satanasi juramuxaka

1. Adáni ka Ebaksï perfektuespti ka paraisurhuksï irekaspti, peruksï úspti ambe enga Satanasi arhiapka ka nóteruksï uékasptia kurhajchani Tata Diosïni.

2.   Engaksï Adáni ka Eba nóteru uékapkia kurhajchani Jeobani, i ambe úspti eska iápurisï japiringa pekadu, kómu nitamakua ka uarhikua.

3. Tata Diosï kʼamajkuati pekaduni, kómu nitamakua ambe ka uarhikuani. Ka kʼuiripuechaksï ménderu perfektueuati ka Paraisurhuksï irekaati.

6. Tata Diosï Jeoba no sési pʼikuarherasïndi engachi kómu nitamakuarhini jarhajka

¿Uandanhiasïni Tata Diosï engachi kómu nitamakuarhini jarhajka? Exe je ambe engaksï karapka rei Dabidi ka apostoli Pedru. Arhinta je Salmo 31:7 ka 1 Pedru 5:7, ka uandontskuarhi je íri ambe:

• ¿Nájtsï pʼikuarherasïni míteni eska Tata Diosï Jeoba pendienti jarhasïnga engachi uandanhiatechani jatsiajka ka eska kánikua no sési pʼikuarherasïnga engachi kómu nitamakuarhini jarhajka?

 AMBE ENGACHI JORHENGUARHIKA

Satanasi, Adáni ka Ebaksï úspti eska no sési jásï ambe japiringa parhakpinirhu. Tata Diosï Jeoba kánikua no sési pʼikuarherasïndi engachi kómu nitamakuarhini jarhajka ka no ióni jimbo kʼamajkuati kómu nitamakua ambe.

Ambejtsï jorhenguarhiski

• ¿Ambe chkuanderakuspi Noambakiti Ebani?

• ¿Nénajtsïni no sési úchiski engaksï Adáni ka Eba nóteru uékapkia kurhajchani Tata Diosïni?

• ¿Andichisï uandajki eska Tata Diosï Jeoba no sési pʼikuarherasïnga engachi kómu nitamakuarhini jarhajka?