¿Uarhiranchaskijtsï nemani engajtsï kánikua xéncheenga? Jiáni engajtsï kánikua no sési pʼikuarherani japka, jamberijtsï kurhamarhikuarhipka “¿Ambe úkuarhisïni enga nema uarhijkia? ¿Uaa ji ménderu exeani imeechani engani uarhiranchaakia?”. Ini jorhenguarhikua ka máteru jimbo, exenchi jauaka na engajtsïni sési pʼikuastantajka ambe enga Biblia jorhentpijka íri ambe.

1. ¿Ambe úkuarhisïni enga nema uarhijkia?

Jesúsi terukutantasti uarhikuani komu uinhamu kʼuíni jarhani. ¿Néna sáno májkueniski uarhini ka uinhamu kʼuíni jarhani? Enga kʼuiripu ma uinhamu kʼuíni jarhajka, no mítesïndi ambe enga úkuarhini jarhajka. Enga nema uarhijkia nóteru no sési pʼikuarherasïndia ni kómu nitamakuarhini. Biblia uandasïndi eskaksï ‘uarhiricha méntku nóteru ambe ma míteskia’ (arhinta je Eclesiastés 9:5).

2. ¿Nénajtsïni jarhuatasïni míteni jurhimbikua uarhikueri ambe?

Uánikua kʼuiripuechaksï chésïndi uarhini ka ístuksï chérhiasïndi uarhirichani. Engajtsï chájtu ísï pʼikuarherajka, míteni ambe enga Biblia uandajka uarhikueri ambe uaatiksïni jarhuatani parajtsï nóteru chénia. Jesúsi uandaspti: “Jimbokajtsï míteaka ambe enga jurhimbikueka, chájtsï nóteru jántspiriuakia” (Juan 8:32, TNM). Biblia no uandasïndi eska ambe ma tsípiti pakarasïnga enga nema uarhijkia, ísï eskaksï na jorhentpijka máru relijionicha. Ísï jimbo, enga nema uarhijkia no kómu nitamakuarhini jarhasïndi. Ka jimbokaksï uarhiricha nóteru ambe ma mítesïngia, nójtsïni úsïndi no sési ambe úchini. Jimbosï no uétarhijti uandatsekuarhikuani ni úni ambe ma parajtsïni no no sési ambe úchini o parachi kómarhiani.

Máru kʼuiripuechaksï uandasïndi eskaksï úsïnga uandontskuarheni uarhiricha jingoni, peru inde ambe no méni uaati ísï úkuarhini. Jimboka ísï eskachi na exekia, uarhirichaksï “méntku nóteru ambe ma mítestia”. Imeecha engaksï jakajkujka eskaksï uarhiricha jingoni uandontskuarhesïnga, jamberiksï demoniuecha jingoni uandontskuarheni jarhajti, engaksï uéjka ísï xarhatani eskaksï imeeska engaksï uarhikia. Ísï jimbo, míteni jurhimbikua uarhikueri ambe kuájchakusïndijtsïni demoniuecheri. Ka Jeobajtsïni arhisïndi eskachi no jámaaka uandontskuarheni uarhiricha jingoni, jimboka ima míteska eskachi demoniuecha jingonisï uandontskuarheni jarhajka ka i ambejtsïni uaati no sési úchini (arhinta je Deuteronomio 18:10-12).

3. Ambe enga meru úkuarhijka enga nema uarhijka

Interu parhakpinirhu, mámaru ambe jakajkunhasïndi ambe enga úkuarhijka enga nema uarhijkia. Peru no ísïisti iámindu ambe enga jakajkunhajka.

• ¿Ambeksï jakajkusïni kʼuiripuecha uarhiricheri ambe jimeesïsï engajtsï chá irekaka?

 4. Marhuachesïndijtsïni míteni jurhimbikua uarhikueri ambe

Engachi jorhenguarhijka jurhimbikua uarhikueri ambe, nóteruchi chérhiasïngia uarhirichani. Arhinta je Eclesiastés 9:10 ka uandontskuarhi je íri ambe:

• ¿Uaajtsïni no sési ambe úchini uarhiricha?

Míteni ambe enga Biblia jorhentpijka íri ambe, ístujtsïni jarhuatasïndi parachi nóteru jakajkuni eskachi jatsiska para úni ambe ma, parakajtsïni uarhiricha no no sési ambe úchiaka o eskachi jatsiska para kómarhiani. Arhinta je Isaías 8:19 ka Jaŋaskuecha 4:11, ka uandontskuarhi je íri ambe:

• ¿Chá na exesïni na pʼikuarherajki Tata Diosï Jeoba enga nema uarhirichani kómarhiajka o uékani eskaksï jarhuataaka?

5. Sésijtsïni pʼikuastantasïndi míteni jurhimbikua uarhikueri ambe

Uánikuechanksï jorhendaasïndi eska engaksï uarhiakia, no sésiksï nitamakuarhini jauaka imani no sési ambe jimbo engaksï úpka. Perujtsïni sési pʼikuastantasïndi míteni eska no nema kómu nitamakuarhisïnga jiáni enga ma uarhijkia, ka ni imeecha engaksï no sési jásï ambe úka. Arhinta je Roma 6:7 ka uandontskuarhi je íri ambe:

• • Biblia uandasïndi eskajtsïni Tata Diosï, uarhikua jingoni puácheantasïnga juchaari pekaduechani. Jiájkani, ¿exesïntsï eskaksï uarhiricha kómu nitamakuarhini jarhasïnga paraksï maiampintani imani ambe jimbo engaksï no sési úpka?

Engachi sánderu mítejka Tata Diosï Jeobani, sánderuchi sési kurhangusïnga eska ima no méni úpiringa eskaksï uarhiricha kómu nitamakuarhini japiringa. Arhinta je Deuteronomio 32:4 ka 1 Juanu 4:8, ka uandontskuarhi je íri ambe:

• Xásï Tata Diosï ma engaksï ini bersikuluecha jimbo uandajka, ¿jurajkupirini eskaksï kastigarinhapiringa kʼuiripuecha engaksï uarhijkia?

• ¿Nájtsï exesïni, sésijtsïni pʼikuastantasïni míteni jurhimbikua uarhikueri ambe? ¿Andi?

 AMBE ENGACHI JORHENGUARHIKA

Enga nema uarhijkia, jima kʼamakurhisïndi imeeri tsípikua. Uarhirichaksï no kómu nitamakuarhini jarhasïndi ka nóksï nemani úsïndi no sési ambe úkuni.

Ambejtsï jorhenguarhiski

• ¿Ambe úkuarhisïni enga nema uarhijkia?

• ¿Nénajtsïni marhuachesïni míteni jurhimbikua uarhikueri ambe?

• ¿Andijtsïnisï sési pʼikuastantajki míteni jurhimbikua uarhikueri ambe?