JORHENGUARHIKUA 36
Ju je jurhimbitku jámani iámindu ambe jimbo
Iámindu kʼuiripuechaksï uékasïndi amiguechani jatsiani engaksï jurhimbitku jámajka ka Tata Diosï Jeobajtu uékasïndi eskaksï imeeri amiguecha májkueni uaaka. Peru no fásiliisti jurhimbitku jámani ini parhakpini jimbo engaksï xáni uánikua kʼuiripuecha támu jánhastaajka máteruechani. ¿Nénajtsïni marhuachesïni jurhimbitku jámani iámindu ambe jimbo?
1. ¿Andisï xáni jukaparhakue eskachi jurhimbitku jámaaka?
Engachi jurhimbitku jámajka máteruecha jingoni, xarhatakuni jarhasïngachi Tata Diosï Jeobani eskachi xénchasïnga ka eskachi janhanharhisïnga. Miá je eska Tata Diosï Jeoba míteska iámindu ambe engachi eratsejka ka úni (Ebreu 4:13). Engachi jurhimbitku jámajka, Tata Diosï kuenta íntskukuarhesïndi ka kánikua jukaparharasïndi. Imeeri Karakata uandasïndi: ‘Tata Diosï Jeoba kurhunhiasïndi k’uiripuechani engaksï no jurhimbitku jámajka, peru kánikua sési pájperasïndi imeecha jingoni engaksï jurhimbitku jámajka’ (Proverbios 3:32).
2. ¿Ambe ka ambe jingonchi jatsiski para jurhimbikua jingoni jámani pauani pauani?
Ambe enga Tata Diosï Jeoba uéjka eskachi uaaka, jindeesti eskachi ‘jurhimbikua jingoni uandaaka máteru ka máteruni jingoni’ (Zacarías 8:16, 17). ¿Ambe arhikuekasïni i ambe? Eskachi no chkuanderasïnga o imani ambe arhiani enga no ísïika juchaari familiani, kompanieruechani ánchikuarhitarhu, kúnguarhikuarhu anapu erachichani ni juramutiichani. Kʼuiripuecha engaksï jurhimbitku jámajka nóksï jámasïndi sïpani niksï fraude ambe úni o euakuarpini sentabu (arhinta je Proverbios 24:28 ka Efesu 4:28). Ístuksï maiampiasïndi impuestuechani (Roma 13:5-7). Ini ambe jimbo ka máteru ambe jimbo, uékasïngachi “iámindu ambe jimbo sési jámani” (Ebreu 13:18).
3. ¿Nénajtsïni marhuachesïni jurhimbikua jingoni jámani?
Engachi ísï mítekatejka komueska kʼuiripu ma enga jurhimbitku jámajka, máteruechajtsïni mintsikaati. Ístu, úsïngachi eskaksï kúnguarhikuarhu iáminduecha seguru p’ikuarheraaka ka mintsikperani ísï eska familiarhu ma. Ka ístuchi sési pʼikuarherasïnga jimbokachi ambakiti konsiensia ma jatsisïnga. Engachi jurhimbitku jámajka, úsïngachi “eska juchaari [Tata] Diosï ka Pʼímutantspitiri jorhengua iámindu ambe jimbo sési arhikateuaka”, ka ini ambe jimbo, jamberiksï máteruecha uékaati marhuakuni Tata Diosï Jeobani (Titu 2:10).
JORHENGUARHI JE SÁNDERU AMBE
Ju je exeni eska jurhimbitku jámani, úsïnga eskachi sánderu sési pájperaaka Tata Diosï Jeoba jingoni ka nénachi uaa jurhimbikua jingoni jámani mámaru ambe jimbo.
4. Tata Diosï Jeoba jaiapanhiantasïndi k’uiripuechani engaksï jurhimbitku jámajka
Arhinta je Salmo 44:21 ka Malaquías 3:16, ka uandontskuarhi je íri ambe:
-
¿Sési japirini eratseni eskachi uaaka jískani ambe enga jurhimbikueka? ¿Andijtsïsï ísï eratsejki?
-
Engachi erakuska jurhimbitku ambe uandantani, nájkiruka no fásiliuaka ísï úni, ¿nájtsï exesïni eska p’ikuarheraaka Tata Diosï Jeoba?
Engaksï sapiicha jurhimbitku ambe uandantajka, taati jémbeecha sési pʼikuarherasïndi. Engachi jurhimbitku ambe uandantajka, Tata Diosï Jeoba sési p’ikuarherasïndi.
5. Ju je méntkisï jurhimbitku jámani
Nájkirukaksï uánikua kʼuiripuecha ísï exejka eska no méntkisï sési jarhasïnga jurhimbitku jámani, uánikua ambe jarhasti engachi jimbo jatsika para jurhimbitku jámani. Exe je nákiskiksï. Exe je BIDEUNI.
Arhinta je Ebreu 13:18 ka uandontskuarhi je nénachi uaa jurhimbitku jámani...
-
... familiarhu.
-
... ánchikuarhitarhu o eskuelarhu.
-
... máteru ambe jimbo.
6. Marhuachesïndijtsïni jurhimbitku jámani
Jamberijtsï ménisï ísï exeaka eska jurhimbitku jámani úsïnga eskachi problemechani jatsiauaka, peru méntkisï sánderu sésisïndi jurhimbitku jámani. Arhinta je Salmo 34:12-16 ka uandontskuarhi je íri ambe:
-
¿Andichisï sánderu sési irekajki engachi jurhimbitku jámajka?
-
Temungurhirichaksï sánderu sési pájperasïndi engaksï tsimarhani jurhimbitku jámajka.
-
Engaksï ánchikuarhiricha jurhimbitku jámajka, úsïndi eskaksï patronicha mintsinharhiauaka.
-
Engaksï kʼuiripuecha jurhimbitku jámajka, úsïndi eskaksï juramuticha sési exeauaka.
MÁRUKSÏ I AMBE UANDASÏNDI: “Sapirhati chkuanderakuechaksï no nemani no sési úkusïndi”.
-
¿Exesïntsï eska Tata Diosï Jeoba iámindu chkuanderakuechani kurhunhiasïnga? ¿Andijtsïsï ísï eratsejki?
AMBE ENGACHI JORHENGUARHIKA
Tata Diosï Jeoba uékasïndi eskaksï imeeri amiguecha jurhimbitku jámaaka iámindu ambe jimbo engaksï uandajka ka úni.
Ambejtsï jorhenguarhiski
-
¿Ambe ka ambe jimbochi jatsiski para jurhimbitku jámani?
-
¿Andisï no sési jaki eratseni eskachi uaaka jískani jurhimbikua ambe?
-
¿Andijtsïsï jatsi para méntkisï jurhimbitku jámani?
ÍSTU EXE JE INI AMBE
¿Nénaksï uaa taaticha jorhendaani uájpeechani paraksï jurhimbitku jámani?
¿Náki kóntperatechanksï jatsiaua imeecha engaksï méntkisï ísï újka ambe engaksï uandajka?
Ísï ú je eskajtsï na aiatspijka ka kóntperatechantsï jatsiauaka (9:09)
Exe je sinchi jatsiski para maiampini impuestuechani nájkiruka tumina no sési úrakuarheaka.
“¿Jatsiskijtsï para maiampiani impuestuechani?” (Aianhpiri, 1 de septiembri de 2011)
¿Ambe jarhuataspi acheetini ma para mójtakurini enga kánikua sentabu andeenga chkuanderaparini, ka niárani kʼuiripu máeni enga jurhimbitku jámajka?
Jamberijtsï ístu uéjka ini ambe míteni
KURHAMARHIKUECHA ENGAKSÏ SÁNDERU ÚKUARHIJKA
¿Nénaksï jorhentpisïni Biblieri ambe Jeobaeri testiguecha?
Parajtsï Jeobaeri testiguechani jingoni jorhenguarhini Biblieri ambe, chájtsï uaaka náki uéjki Bibliani jingoni jorhenguarhini. Ístujtsï uaaka pʼímarhini chaari familiani o amiguechani.
