¿Ménisïjtsï niáraski kánikua uandanhiani ánchikuarhita o sentabu jimbo? Úpirindi úkua jukani ánchikuarhini para jatsini ambe engachi uétarhinchajka ka ístu marhuakuni Tata Diosï Jeobani ísï eska ima na uéjka. Bibliajtsïni ambakiti konsejuechani íntsaasïndi engajtsïni uaaka jarhuatani.

1. ¿Ambe uandasïni Biblia ánchikuarhiteri ambe?

Tata Diosï uékasïndi eskachi sési pʼikuarheraaka juchaari ánchikuarhita jimbo. Jimbosï Biblia uandajti eska “no jarhaska sánderu ambakiti ambe para kʼuiripu ma eska [...] sési pʼikuarherani imeeri kánikua ánchikuarhita jimbo” (Eclesiastés 2:24). Tata Diosï Jeoba kánikua ánchikuarhisïndi. Engachi juchajtu májkueni újka ka kánikuachi ánchikuarhini, imani ambechi úni jarhasïnga enga ima tsitijka ka sésichi pʼikuarherasïnga.

Ánchikuarhita kánikua jukaparhakuesti, peruchi no méni jatsipiringa para sánderu jukaparharani eska Tata Diosï Jeobani marhuakuni (Juanu 6:27). Tata Diosïjtsïni aiachisïndi eskajtsïni íntskuaka ambe engachi uétarhinchajka para irekani engachi orheta peeraska imeeri ambe juchaari tsípikuarhu.

2. ¿Ambe uandasïni Biblia sentabueri ambe?

Nájkiruka Biblia uandajka eska ‘sentabu kuájchakukua máeska’, ístu arhisïndi eska sentabujku no uaaka úni eskachi tsípikua jingoni irekaaka (Eclesiastés 7:12). Ísï jimbo, Bibliajtsïni arhisïndi eskachi no jukari xénchaaka sentabuni ka arhisïndijtsïni: “Tsípi je indeni ambe jingoni engajtsï jatsika” (arhinta je Ebreu 13:5). Engachi sési pʼikuarherajka imani ambe jingontku engachi jatsika nóchi uandanhiauaka sánderu ambe uékani jatsini. Ístuchi no ísku kántspeni jauaka (Proverbios 22:7). Ka nóchi jámasïnga chʼanani tumina jimbo nichi uéjki úni ambe ma parachi sóntku riku úkuarhini.

3. ¿Nénachi uaa úrani tuminani parachi intsïmpitiini?

Jeoba, Tata Diosï máesti enga intsïmpitiika ka májkuenchi úni jarhasïnga engachi tsípikua jingoni úrajka ambe engachi jatsikuarheka parachi ‘intsïmpini’ ka “jarhuajpeni” (1 Timoteo 6:18). Ma ambe engachi uaaka úni parachi sési úrani juchaari tuminani, jindeesti íntspini kúnguarhikuarhu para ima ambe enga uétarhijka ka jarhuataani imeechani engaksï uétarhinchani jarhajka, sánderia juchaari erachichani. Ambe enga Tata Diosï Jeoba sánderu jukaparharajka jindeesti andichisï íntspijki ka no, na engachi xáni íntspijka. Engachi mintsita jingoni íntspiska ka tsípikua jingoni, sésichi pʼikuarheraaka ka ístuchi uaaka eska Tata Diosï Jeoba sési pʼikuarheraaka (arhinta je Ukuecha 20:35).

 JORHENGUARHI JE SÁNDERU AMBE

4. K’éri ambe arhi je Tata Diosï Jeobani chaari ánchikuarhita jimbo

 5. Nénajtsïni marhuachesïni sési pʼikuarherani imani ambe jingontku engachi jatsika

Uánikua kʼuiripuechaksï jánguarhintasïndi para kánikua sentabu jatsini, peru Biblia ménderueni uandasïndi. Arhinta je 1 Timoteo 6:6-8 ka uandontskuarhi je íri ambe:

• ¿Ambejtsïni arhistachisïni Biblia?

6. Tata Diosï Jeobajtsïni íntskuati ambe engachi xáni uétarhinchaaka

 AMBE ENGACHI JORHENGUARHIKA

Uétarhisïndi sentabu ka jatsini ánchikuarhita ma, perujtsïni i ambe no méni jatsipirindi para ójkutani parachi Tata Diosï Jeobani marhuakuni.

Ambejtsï jorhenguarhiski

• ¿Ambeksïni jarhuataa parajtsï no jukari jukaparharani ánchikuarhitani?

• ¿Nénajtsïni marhuachesïni sési pʼikuarherani imani ambe jingontku engachi jatsika?

• Enga Tata Diosï Jeoba aiakuajka imeeri marhuarichani eska íntsauaka ambe engaksï xáni uétarhinchajka, ¿nénajtsï uaa xarhatani eskajtsï mintsikasïnga imani?