JORHENGUARHIKUA 38
Ju je xarhatani eskachi jukaparharasïnga tsípikuani
Uánikua ambakiti ambe jarhasti engachi jimbo újka tsípikuarhini. Asta jiáni engachi uandanhiatechani jatsiajka, úsïngachi seguirini jarhani tsípikuarhini imani ambakiti ambe jimbo engachi jatsika. ¿Nénachi uaa xarhatakuni Tata Diosï Jeobani eskachi jukaparharasïnga ini xáni ambakiti regaluni? ¿Ka nákiski sánderu jukaparhakua ambe engachi jimbo jatsika para ísï úni?
1. ¿Andichisï jatsipirini para jukaparharani tsípikuani?
Jatsipiringachi para jukaparharani tsípikuani jimboka regalu máeska juchaari Taati uékpitiiri, Jeoba. Imasï újti eska ‘tsípikua jauaka’, jimboka ima kueraaska iámindu ambe enga tsípiti jaka (Salmo 36:9). “Imamindu jindees[ti] enga tsípikua íntspijka ka jirejtakua ka iámindu ambe” (Ukuecha 17:25, 28). Ísï jimbo, Tata Diosï Jeobajtsïnisï íntskujti iámindu ambe engachi uétarhinchajka parachi seguirini irekani. Asta úsïndi eskachi tsípikua jingoni irekaaka (arhinta je Ukuecha 14:17).
2. ¿Nénachi uaa xarhatakuni Tata Diosï Jeobani eskachi jukaparharasïnga tsípikuani?
Desde jiáni enga chaari nándi embarasada pakarapka, Tata Diosï Jeobaksïni ueenaspti exeni. Tata Diosï Jeoba úspti eska imeeri marhuari Dabidi, kómarhikua ma jimbo uandapiringa: “Chiiti éskuechajtsïni exespti desde engani kánikua sapichkuepka matrisirhu” (Salmo 139:16). Chaari tsípikua kánikua jukaparhakuesti para Tata Diosï Jeoba (arhinta je Mateu 10:29-31). Tata Diosï Jeoba kánikua no sési pʼikuarherapirindi enga nema uékaparini uándikupiringa nemani o uándikukuarhini (Éxodo 20:13). a Ístu, no sési pʼikuarherapirindi engachi arriesgaripiringa juchaari tsípikuani o engachi no úpiringa ambe ma parachi kuájchakuni máteruecheri tsípikuani. Engachi jingontku jámajka parachi no ma ambe úkuarhinchani ka engachi jukaparharajka máteruecheri tsípikuani, xarhatanchi jarhasïnga eskachi jukaparharasïnga tsípikuani.
JORHENGUARHI JE SÁNDERU AMBE
Ju je exeni máru ambe engachi jimbo uaaka xarhatani eskachi jukaparharasïnga tsípikuani.
3. Kuidari je chaari kuerpuni
Kristianuecha engaksï aiakukuarhekia Tata Diosï Jeobani paraksï úni ambe enga ima uéjka, úrasïndiksï imeecheri tsípikuani ísï eska ima na uéjka. Íntskustiksï Tata Diosïni imeecheri kuerpuni komueska pímbinhasï kéjtsïtakua ma, jimboksïsï kuidarijti imeecheri kuerpuni. Arhinta je Roma 12:1, 2 ka uandontskuarhi je íri ambe:
-
¿Andijtsïsï jatsipirini para kuidarini chaari kuerpuni?
-
¿Nénajtsï uaa ísï úni?
4. Jingontku jáma je paraka no nema niáraaka no sési ambe úkuarhinchani o uarhini
Bibliajtsïni arhisïndi eskachi no uaaka imani ambe enga uaaka eskachi no sési úkuarhinchaaka. Exe je BIDEUNI ka exe je ambejtsï uaa úni paraksï iáminduecha seguru jarhani.
Arhinta je Proverbios 22:3 ka uandontskuarhi je na enga uaaka ma jingontku jámani...
-
... kʼumanchikuarhu.
-
... ánchikuarhitarhu.
-
... enga deporti úni jámaaka.
-
... enga manejarini jauaka o karrurhu ma nirani jarhani.
5. Jukaparhara je charhakuecheri tsípikuani engaksï nótki andajpenujka
Dabidi uandantaspti eska Tata Diosï Jeoba pendienti jarhasïnga charhakuni jimbo enga amambeeri matrisirhu jarhajka. Arhinta je Salmo 139:13-17 ka uandontskuarhi je íri ambe:
-
Para Jeoba, ¿káni ueenasïni tsípikua kʼuiripueri ma: enga andajpenujka o enga amamba embarasada pakarajka?
Leicha enga Tata Diosï Jeoba ióntki anapu Israelini íntsaapka, kuájchakuasïreendi uarhiitichani engaksï embarasada jarheenga ka ístu charhakuni enga imeecheri matrisirhu jarheenga. Arhinta je Éxodo 21:22, 23 ka uandontskuarhi je íri ambe:
-
¿Néna exesïreni Tata Diosï Jeoba enga nema no uékaparini uándikupiringa charhakuni ma enga nótki andajpenuni jarheenga?
-
Jiájkani, ¿néna pʼikuarheraa Tata Diosï Jeoba enga nema uékaparini uándikuaka charhakuni ma? b
-
Ka chá, ¿néna exesïni ambe enga Tata Diosï eratsejka?
Asta uarhiiti ma enga jukaparharajka tsípikuani úpirindi eratseni eska no jarhaska máteru ambe enga uaaka úni ka eska tsïtani charhakuni. Arhinta je Isaías 41:10 ka uandontskuarhi je íri ambe:
-
Engaksï máteruecha afuersa uékani jauaka para uarhiiti ma tsïtani imeeri charhakuni, ¿néni jatsipirini para kurhakuni jarhuajperata? ¿Andi?
MÁRUKSÏ I AMBE UANDASÏNDI: “Mándani uarhiiti jatsisti para erakukuarhini tsïtani charhakuni o nómbe. Jimboka imasï embarasada jaka”.
-
¿Andijtsïsï uaa seguru jarhani eska Tata Diosï Jeoba májkueni jukaparharasïnga uarhiitiri tsípikuani enga embarasada jaka ka charhakuni enga matrisirhu jaka?
AMBE ENGACHI JORHENGUARHIKA
Tsípikua, Tata Diosï Jeobaeri regalu máesti. Bibliajtsïni jorhendasïndi janhanharhini, kuájchakuni ka xénchani juchaari tsípikuani ka ístu máteruecherini.
Ambejtsï jorhenguarhiski
-
¿Andichisï míti eska Tata Diosï Jeoba jukaparharasïnga kʼuiripuecheri tsípikuani?
-
¿Néna pʼikuarherasïni Tata Diosï Jeoba enga nema uékaparini uándikukuarhijka o uándikuni máteru nemani?
-
¿Ambejtsï sánderu tsitisïni regalueri engajtsïni Tata Diosï Jeoba íntskuka?
ÍSTU EXE JE INI AMBE
¿Nénachi uaa diosmaiamukua arhini Tata Diosï Jeobani engajtsïni íntskuka tsípikuani?
Intsïnhani tsípikuani, sési jásï ma regaluesti (pirekua 141) (2:41)
¿Uaa Tata Diosï puákuntani uarhiitini ma enga ióntki uékaparini tsïtapka charhakuni ma?
“¿Ambe uandasïni Biblia abortueri ambe?” (Artikulu ma enga jw.org jimbo jaka)
Jorhenguarhi je eska míteni na enga exejka Tata Diosï tsípikuani, jarhuatasïngajtsïni parachi no imani ambe jingoni tsípikuarhini engachi jimbo úpiringa no sési ambe úkuarhinchani.
¿Ka enga nema ménisï eratsepka uándikukuarhini? Exe je ambe enga Biblia uandajka íri ambe.
a Tata Diosï Jeoba kánikua uandanhiasïndi imeecha jimbo engaksï no sési pʼikuarhinheni jarhajka mintsitarhu (Salmo 34:18). Ima kurhangusïndi enga nema xáni no sési pʼikuarherani jarhajka enga jamberi uékajka uarhini ka uékasïndi jarhuataani imeechani engaksï ísï pʼikuarherani jarhajka. Exe je na engaksïni uaaka kánikua jarhuatani ari artikulu “¿Nénarini uaa jarhuatani Biblia engani nóteruni uékajkia irekani ka eratseni jarhani uándikukuarhini?”, enga partirhu jaka “Ístu exe je ini ambe” i jorhenguarhikueri.
b Enga nema ióntki erakupka tsïtani charhakuni ma no jatsisti para útasï no sési pʼikuarherani; jimboka Tata Diosï Jeoba listu jarhasïnga para puátspentani. Exentaakajtsï sánderu informasioni íri ambe artikulurhu “¿Ambe uandasïni Biblia abortueri ambe?”, enga partirhu jaka “Ístu exe je ini ambe” ini jorhenguarhikuarhu.
Jamberijtsï ístu uéjka ini ambe míteni
KURHAMARHIKUECHA ENGAKSÏ SÁNDERU ÚKUARHIJKA
¿Nénaksï jorhentpisïni Biblieri ambe Jeobaeri testiguecha?
Parajtsï Jeobaeri testiguechani jingoni jorhenguarhini Biblieri ambe, chájtsï uaaka náki uéjki Bibliani jingoni jorhenguarhini. Ístujtsï uaaka pʼímarhini chaari familiani o amiguechani.
