Eranhaska je naandi uékpitini ma enga mórhetani jaka imeeri sapini para eskuela nirani. Amamba asegurarikuarhisïndi eska jikuaska ka eska imeeri xukuparhakua limpiu jarhaska ka eska sési xarharaaka. I ambe úsïndi eska sapi no xáni pʼamenchaaka ka ístu xarhatasïndi eskaksï imeeri taati jémbeecha uandanhiasïnga imani jimbo. Tata Diosï Jeoba jindeesti juchaari Taati engajtsïni xénchajka, ístu uékasïndi eska juchaari kuerpu pímbinhasï jauaka ka ístu juchaari eratsekua ka jángua. Limpiu jarhani, marhuachesïndijtsïni ka ístu úsïndi eska sési ambe uandanhaaka Tata Diosïri ambe.

1. ¿Nénachi uaa pímbinhasïni iámindu ambe jimbo?

Tata Diosï Jeobajtsïni arhisïndi: “Pímbinhasïnta je” (1 Pedru 1:16). Parachi pímbinhasï jarhani jatsiskachi para juchaari kuerpuni limpiu jatsini ka ístu juchaari eratsekuani ka juchaari jánguani. Xarhatasïngachi eskachi pímbinhasï jarhasïnga engachi seguidu jikuajka ka engachi xukuparhakuani, kʼumanchikuani ka karruni limpiu jatsijka. Ístuchi jarhuajpesïnga paraka Kʼumanchikua Reinueri limpiu jauaka. Engachi limpiueska, jamberiksï máteruecha k’éri ambe arhiaati Tata Diosï Jeobani (2 Korintu 6:3, 4).

2. ¿Náki bisiuechanchi jatsiski para jurajkuani parachi úni pímbinhasï jarhani?

Bibliajtsïni arhisïndi: “Jaue pímbinhasïntani para iámindu indeni no sési jásï ambe jingoni enga kuerpu újka ka enga mintsita tamapu eratsejka” (2 Korintu 7:1). Ísï jimbochisï jánguarhintajka no úni imani ambe enga no sési úkuaka juchaari kuerpuni o juchaari eratsekuani. Ka jimbokachi uékasïnga eska Tata Diosï sési pʼikuarheraaka imani ambe jingoni engachi eratsejka, kánikuachi jánguarhintasïnga parachi no ikichakueni jásï ambe eratseni (Salmo 104:34). Ístuchi méntkisï jánguarhintasïnga imani ambe uandani enga sési jauaka (arhinta je Kolosasi 3:8).

¿Ambe máteru ambe úpirini úni eska no limpiu jauaka juchaari kuerpu o eratsekua? Jarhasti máru ambe enga uáka no sési úkuni juchaari kuerpuni. Ísï jimbo, nóchi itsutasïnga, nichi úrajki droga ambe ni jukari arhani medisina ambe. Engachi no újka ini ambe, kuidarinchi jarhasïnga juchaari kuerpuni ka xarhatasïngachi eskachi jukaparharasïnga tsípikuani. Ístu, paraka juchaari eratsekua ka jángua limpiu jauaka, jánguarhintasïngachi no úni ikichakueni jásï ambe komu masturbarhikuarhini o pornografia ambe exeni (Salmo 119:37; Efesu 5:5). Uaati úkua jukani jurajkuani ini bisiuechani, peru Jeoba listu jarhasti parajtsïni jarhuatani (arhinta je Isaías 41:13).

 JORHENGUARHI JE SÁNDERU AMBE

3. Limpiu jatsini juchaari kuerpuni k’éri ambe arhisïndi Jeobani

Engachi arhiantajka Jeobaeri leichani enga ióntki anapu Israelini íntsaapka, kurhangusïngachi na enga xáni jukaparhakueka para ima eskachi limpiu jauaka. Arhinta je Éxodo 19:10 ka 30:17-19, ka uandontskuarhi je íri ambe:

• ¿Ambejtsïni jorhendasïni i tekstuecha na enga exejka Tata Diosï Jeoba enga juchaari kuerpu limpiu jarhajka?

• ¿Náki ambakiti pʼindekuechajtsïni jarhuatasïni parachi méntkisï limpiu jarhani?

Parachi limpiu jarhani uétarhisïndi arhutani tiempu ka jánguarhintani ísï úni. Peruchi uaaka limpiueni nani uéjkichi irekani o sinchi jatsikuarheriski o nómbe. Exe je BIDEUNI ka uandontskuarhi je íri ambe:

• Engaksï ima kʼuiripuecha engachi aianguajka Tata Diosïri ambe exejka eska ima ambe engachi kámajka limpiu jarhaska, ¿uaa úni inde ambe eskaksï sánderu janhanharhiaka Jeobani? ¿Andi?

4. Jurajkua je no sési járhati bisiuechani

Engajtsï chá itsutajka, jukari medisina ambe arhani o úrani droga ambe, jamberijtsï míteka eska úkua jukaska jurajkuni bisiuni ma. Ambe ma engaksïni uaaka jarhuatani jindeesti eratsentani eskaksïni no sési úchixaka chaari irekuarhu. Arhinta je Mateu 22:37-39, ka uandontskuarhi je na enga itsutani ka droga ambe úrani úsïnga eska...

• ... nema no uaaka ambakiti pájperakua ma jatsini Tata Diosï Jeoba jingoni.

• ... nema no sési úkuauaka imeeri familiarichani ka máteru k’uiripuechani.

Eratsenta je ambe engajtsï úpiringa úni parajtsï jurajkuni bisiu ma. a Exe je BIDEUNI.

Arhinta je Filipusʌ 4:13 ka uandontskuarhi je íri ambe:

• ¿Exesïntsï eska p’indeni kómarhini, Bibliani arhintani ka nirani tánguarhikuecharhu uaaka jarhuatani nemani para jurajkuani bisiuechani? ¿Andijtsïsï ísï eratsejki?

 5. Jánguarhinta je jurajkuani no sési járhati úkuechani ka no sési járhati eratsekuechani

Arhinta je Kolosasi 3:5 ka uandontskuarhi je íri ambe:

• ¿Nénachi míteski eska pornografia exeni, mensaji axatsperani fotuechani o bideuechani ísku jándikueri ambe ka masturbarhikuarhini jindeeska ikichakueni jásï ambe para Tata Diosï Jeoba?

• ¿Exesïntsï eska sési jarhaska engajtsïni Tata Diosï Jeoba arhijka eska juchaari jángua ka eratsekua pímbinhasïuaka? ¿Andi?

Exe je ambechi uaa úni parachi nóteru eratsenia ikichakueni jásï ambe. Exe je BIDEUNI.

Jesúsi úraspti ejemplu ma parajtsïni jorhendani ambechi jatsiski para úni engachi uéjka limpiu jarhani juchaari jángua ka eratsekua jingoni. Arhinta je Mateu 5:29, 30 ka uandontskuarhi je íri ambe:

• Jesúsi no arhikuekaxapti eskachi jatsiska para no sési ambe úkuarhini, sino eskachi jatsiska para úni ambe ma. ¿Ambechi jatsiski para úni parachi no ikichakueni jásï ambe eratseni? b

Engajtsï jánguarhintani jaka nóteru ikichakueni jásï ambe eratseni, uaakajtsï seguru jarhani eska Tata Diosï Jeoba kánikua jukaparharasïnga engajtsï ísï úni jaka. Arhinta je Salmo 103:13, 14 ka uandontskuarhi je íri ambe:

• Engajtsï no úni jaka jurajkuni bisiu ma, ¿exesïntsï eskaksïni i tekstuecha uaaka jarhuatani parajtsï úni orhepani uérani? ¿Andi?

 AMBE ENGACHI JORHENGUARHIKA

Sésichi pʼikuastasïnga Tata Diosï Jeobani engachi jánguarhintajka pímbinhasï jatsini juchaari kuerpuni, eratsekuani ka jánguani.

Ambejtsï jorhenguarhiski

• ¿Andisï xáni jukaparhakue pímbinhasï jarhani?

• ¿Ambechi jatsiski para úni para pímbinhasï jarhani juchaari kuerpu?

• ¿Ambechi jatsiski para úni paraka juchaari jángua ka ima ambe engachi eratsejka méntkisï pímbinhasï jauaka?