Iámu parhakpinirhu anapu kʼuiripuechaksï no májkueni eratsesïndi kauikueri ambe. Máruksï ménisï arhasïndi sáni imeecheri amiguecha jingoni. Máteruechaksï no ma ambe arhasïndi enga alkoli jukaaka. Ka máruksï xáni arhasïndi astakaksï kauiaka. ¿Ambe uandasïndi Biblia kauikueri ambe?

1. ¿No sési jarhaski alkoli arhani?

Biblia no uandasïndi eska no sési jarhaska alkoli arhani. Sánderu sési, Tata Diosïri Karakata uandasïndi “binu enga sési pʼikuastajka kʼuiripueri mintsitani” ka eska i jindeeska máteru Tata Diosï Jeobaeri intsïmperata (Salmo 104:14, 15). Ístu, Biblia uandasïndi eskaksï máru kʼuiripuecha engaksï sési marhuakuenga Tata Diosïni arhasïrengaksï sáni alkoli (1 Timoteo 5:23).

2. ¿Náki konseju íntsaasïni Biblia imeechani engaksï uéjka alkoli arhani?

Tata Diosï Jeoba no solu uandasïndi eska no sési jarhaska kauini, sino ístu uandasïndi eska no sési jarhaska kánikua alkoli arhani (Galasia 5:21). Biblia uandasïndi: “Asï jáma imeecha jingoni jarhani engaksï jukari binu arhajka” (Proverbios 23:20). Ísï jimbo, engachi uékaaka arhani alkoli—jandiajku o nema jingoni—nóchi jámapiringa xáni arhani engachi tátsekua nóteru úpiringia sési uandani, sési jámani o sési eratseni. Ístu, para jukari arhani alkoli úpirindijtsïni pʼamenchakua ambe úchini. Engachi no úpiringa pʼíngukuarhini parachi sántku arhani, sánderu sési japirindi méntku no sáni jámani arhani.

3. ¿Nénachi uaa respetarini ambe engaksï máteruecha eratseaka úni?

Iáminduechachi jatsiska para erakukuarhini arhani alkoli o nómbe. Nóchi jatsiska para no sési ambe uandani imeeri ambe enga sántku arhajka alkoli. Nijtuchi jatsi para afuersa íntskuni nemani enga no uékaaka arhani (Roma 14:10). Ka nóchi arhasïnga alkoli engachi i ambe jimbo úpiringa no sési pʼikuastaani máteruechani (arhinta je Roma 14:21). Kristianu ma no imani ambe úsïndi “enga para imajkumindu sési uéraaka sino ambe enga jarhuataaka máteruntu” (arhinta je 1 Korintu 10:23, 24).

 JORHENGUARHI JE SÁNDERU AMBE

4. Eratsi je sintsï aua alkoli o nómbe

¿Ambe eratsisïreeni Jesúsi alkoliri ambe? Parachi míteni, ju je exeni primeru milagruni enga ima úpka. Arhinta je Juanu 2:1-11 ka uandontskuarhi je íri ambe:

• ¿Ambejtsïni jorhendasïni i uandantskua na enga exejka Jesúsi alkoliri ambe ka imeechani engaksï arhajka?

• Eratseparini eska Jesúsi no no sési exesïreenga alkoli sáni arhani, ¿ambe jatsipirini para eratseni kristianu ma ima kʼuiripueri enga uéjka arhani sáni?

Joperu enga no no sési jaka eska kristianu ma auaka alkoli, no arhikuekasïndi eska sési jarhaska méntkisï arhani. Arhinta je Proverbios 22:3 ka eratsi je sini sési japirini arhani alkoli enga ari ambe japiringa:

• Karruntsï ma manejariuaka o mákinani ma.

• Embarasadajtsï jarhani.

• Doktoriksïni arhini eskajtsï no jámaaka alkoli arhani.

• Nójtsï úsïnga pʼíngukuarhini engajtsï ueenajka alkoli arhani.

• Juramukua ma uandasïndi eskajtsï no jámaaka arhani alkoli.

• Nema jingontsï jarhani enga ióntki jukari arheenga alkoli ka enga iásï uandakia eska nóteru sáni auakia.

¿Sési japirini parajtsï alkoli íntspini tembuchakua ma jimbo o jiáni engajtsï tánguarhintaaka parajtsï tsípikuarhini sáni? Parajtsï míteni ambe ka ambejtsï jatsiski para exeni, exe je BIDEUNI.

Arhinta je Roma 13:13 ka 1 Korintu 10:31, 32. Engajtsï na arhintaakia mándani tekstu, uandontskuarhi je íri ambe:

• ¿Nénaksïni jarhuataa i tekstu parajtsï imani ambe úni enga sési pʼikuastaaka Tata Diosï Jeobani?

 5. Exe na xántkujtsï aua alkoli

Engajtsï eratseska arhani alkoli, miá je eska, nájkiruka Tata Diosï no no sési exejka para ma alkoli arhani, uandasïnga eska no sési jarhaska jukari arhani. ¿Andi? Arhinta je Oseas 4:11, 18 ka uandontskuarhi je íri ambe:

• ¿Ambe uaa úkuarhini enga kʼuiripu ma jukari alkoli auaka?

¿Ambejtsïni jarhuataa parachi no jámani jukari alkoli arhani? Jatsiskachi para sési míteni na engachi xántku uaaka arhani. Arhinta je Proverbios 11:2 ka uandontskuarhi je íri ambe:

• ¿Andisï sési jaki parajtsï eratsetini jatsinia na engajtsï xántku auaka alkoli?

6. Ambe engaksïni jarhuataaka parajtsï no jukari arhani alkoli

 AMBE ENGACHI JORHENGUARHIKA

Tata Diosï Jeobajtsïni íntskusti alkoli parachi tsípikuarhini, peru uandasïndi eska no sési jarhaska kauini ka ístu jukari arhani.

Ambejtsï jorhenguarhiski

• ¿Ambe uandasïni Biblia alkoliiri ambe?

• ¿Ambe uaa úkuarhinchani nema enga jukari alkoli auaka?

• ¿Nénachi xarhatasïni eskachi respetarisïnga ambe engaksï máteruecha erakuajka úni alkoli jingoni?