Tata Diosï Jeoba uékasïndi eskachi tsípikuarhiaka ka eskachi ménisï uántauaka kʼuínchikuechani. ¿Peru Tata Diosï jaiapanheantasïni iámindu kʼuínchikuechani? ¿Nénachi uaa xarhatakuni Tata Diosïni eskachi xénchasïnga ka eskachi no uékasïnga no sési pʼikuastani?

1. ¿Andisï Tata Diosï Jeoba uánikua kʼuínchikuechani no jaiapanheantajki?

Jamberijtsï ísku pakaraaka engajtsï míteaka eskaksï uánikua kʼuínchikuechani ima kʼuiripuecha uántasïreenga engaksï no Jeobani kómarhienga o eskaksï i kʼuínchikuecha no terukuntasïnga imani ambe jingoni enga Biblia jorhentpijka. Ístuksï máru i kʼuínchikuecha relijioni no jurhimbitirhu anapuesti oksï sïkuamikueri ambeeni oksï imani ambe jorhentpini eskachi alma ma jataska enga no méni uarhijka. Ístuksï máru pʼindekuecha kʼuiripuecheri jakajkukuesti ka máruksï suertiri ambeesti (Isaías 65:11). Ísï jimbosï Jeoba arhiajti imeeri marhuarichani: “Késtakukua je [...] ka ásteru jáma je pʼárhini no sési jásï ambe” (2 Korintu 6:17). a

2. ¿Na exeasïni Tata Diosï Jeoba imani kʼuínchikuechani engaksï uaantajka para kʼuiripu ma kʼéri ambe exenhani?

Tata Diosïjtsïni arhisïndi eskachi no ísïiuaka eskaksï ima kʼuiripuecha engaksï “imeechani mintsikaajka engaksï solu kʼuiripueka”, jimboka trampa máeska (arhinta je Jeremías 17:5). Máru kʼuínchikuechanksï juramutichani úkuantasïndi o imeechani engaksï paisi ma jimbo uarhika. Máteru kʼuínchikuechanksï banderani úkuntasïndi o imani jurhiatikuani enga paisi ma niáraka librini (1 Juanu 5:21). Ka máteru kʼuínchikuechanksï imani grupuechani úkuantasïndi engaksï politikarhisï jámajka. Engachi jukari kʼéri ambe arhipiringa kʼuiripuni ma o grupuni ma, ka sánderia enga imeeni járhati eratsekuechani jatsiapiringa enga no terukuntajka imani ambe jingoni enga Tata Diosï uéjka úni, ¿chá na exesïni, na pʼikuarherapirini Tata Diosï indeni ambe jimbo?

3. ¿Náki jánguechaksï úpirini úni eska kʼuínchikua ma no sési jauaka?

Biblia uandasïndi eska no sési jarhaska ‘kauini, enga xáni no sési jásï ambeeka’ (1 Pedru 4:3). Máru kʼuínchikuecharhu, máru kʼuiripuechaksï nóteru úsïndia pʼíngukuarhini ka nánterkuenksï jámasïndi. Engachi uéjka seguirini Jeobaeri amigueni, nóchi jatsiska para nirani nani enga i jásï ambe úkuarhijka.

 JORHENGUARHI JE SÁNDERU AMBE

 5. Jarhuataa je máteruechani paraksï respetarini ambe engajtsï chá jakajkujka

6. Tata Diosï Jeoba uékasïndi eskachi tsípikua jingoni irekaaka

Jeoba uékasïndi eskachi tsípikuarhiaka juchaari familia ka amiguecha jingoni. Arhinta je Eclesiastés 8:15 ka uandontskuarhi je íri ambe:

• ¿Néna xarhatasïni i tekstu eska Jeoba uékasïnga eskachi tsípikua jingoni irekaaka?

Ístu, Tata Diosï Jeoba uékasïndi eskaksï imeeri marhuaricha tsípikuarhiaka ka eskaksï sési nitamakuarhiaka. Exe je BIDEUNI enga xarhatajka eska i ambe ísïiska kʼéri tánguarhikua internasionalicha jimbo.

Arhinta je Galasia 6:10 ka uandontskuarhi je íri ambe:

• ¿Uétarhisïni eskachi kʼuínchikuechani uántauaka parachi ambakiti ambe úni máteruecha jimbo?

• Engaksïni regalu ma íntskujka, ¿nénajtsï sánderu tsitisïni: eskaksïni íntskuaka jimbokaksïni jatsiska para íntskuni jurhiatikua ma jimbo o engaksïni pʼikuarhinhiparini íntskujka na uéjki jatini?

• Uánikua Jeobaeri testiguechaksï ménisï úsïndi ambe ma paraksï imeecheri sapiicha tsípikuarhini ka astaksï regalu ambe íntsaani. Engajtsï chá kaajka sapiichani, ¿ambejtsï úpirini úni imeecha jimbo?

 AMBE ENGACHI JORHENGUARHIKA

Tata Diosï Jeoba uékasïndi eskachi tsípikuarhiaka familia ka amiguecha jingoni, peru no uékasïndi eskachi uántauaka imani kʼuínchikuechani enga ima no jaiapanheantajka.

Ambejtsï jorhenguarhiski

• ¿Náki kurhamarhikuechanchi jatsiski para úkuarhiani parachi míteni sini Jeoba jaiapanhentasïni kʼuínchikuani ma o nómbe?

• ¿Nénachi uaa jarhuataani juchaari familiarichani ka amiguechani paraksï kurhanguni andichisï no uántajki máru kʼuínchikuechani?

• ¿Nénachi míteski eska Tata Diosï uékasïnga eskachi sési irekaaka ka eskachi tsípikuarhiaka?