JORHENGUARHIKUA 47
¿Listujtsï jarhaskia para itsï atakuarhini?
Biblia jingoni uánikua ambejtsï jorhenguarhiskia Jeobaeri ambe. Ístu, jamberijtsï uánikua ambe jorhenguarhikia chaari irekuarhu parajtsï ísï úni eska Biblia na arhijka. Joperu jati ambe ma engaksïni ójkutani jaka parajtsï úni aiakukuarheni Tata Diosï Jeobani ka itsï atakuarhini. Ini jorhenguarhikua jimbochi exeauaka máru ójkutakuechani engaksï uánikuecha úkia orhepani uérakuani paraksï úni itsï atakuarhini ka exeakachi ambe engajtsï uaaka úni chá parajtsï niárani itsï atakuarhini.
1. ¿Nájtsï xáni jatsiski para míteni Bibliaeri ambe ante dejtsï itsï atakuarhini?
Parajtsï itsï atakuarhini, chájtsï jatsiska para ‘míteni ambe enga ísïika’ (1 Timoteo 2:4). I ambe no arhikuekasïndi eskajtsï ante de itsï atakuarhini, jatsiskajtsï para úni mókuantani iámindu kurhamarhikuechani engaksïni úchiauaka Bibliaeri ambe. Asta ima erachicha engaksï ióni páni jakaia itsï atakuarhitini jatsistiksï para seguirini jarhani jorhenguarhini (Kolosasi 1:9, 10). Joperujtsï kʼóru jatsiska para sési kurhanguni imani ambe enga ma orhetku jorhenguarhijka Bibliarhu. Kúnguarhikuarhu anapu orhejtsïkutichaksïni jarhuataati exeni sintsï míteskia Bibliaeri ambe xáni eska na xáni uétarhijka.
2. ¿Ambejtsï jatsiski para úni ante dejtsï itsï atakuarhini?
Biblia arhisïndi: “Móanta je, ka kʼuanhatsentani” (arhinta je Ukuecha 3:19). I jindeesti ambe ma engajtsï chá jatsika para úni ante dejtsï itsï atakuarhini. Peru, ¿ambe arhikuekasïni i ambe? Eskajtsï jatsiska para kánikua no sési pʼikuarherani imani ambe jimbo engajtsï no sési úka ka arhini Tata Diosï Jeobani eskaksïni puáchentaaka. Ístu, arhikuekasïndi eskajtsï nóteru uaakia imani ambe enga no sési jaka ka eskajtsï ísï uékasïnga irekani eska Tata Diosï na jaiapanhintajka. Ístu arhikuekasïndi eskajtsï ueenaskia nirani tánguarhikuecharhu ka aianhpini kúnguarhikua jingoni.
3. ¿Andijtsïsï no jatsi para chéni itsï atakuarhini?
Máruksï chésïndi eskaksï no uaaka ísï úni eskaksï na aiakuaka Tata Diosï Jeobani. Ísïisti, chájtsï ménisï uaaka ambe ma enga no sési jauaka, ísï eskaksï máru enga Biblia uandaajka ka engaksï sési marhuakuka Tata Diosïni. Joperu miá je eska Tata Diosï no erokuarhisïnga eskaksï imeeri marhuaricha perfektueuaka (arhinta je Salmo 103:13, 14). Sésijtsï pʼikuastaaka Tata Diosïni engajtsï jánguarhintaaka na engajtsï xáni uaaka. Ístu, Tata Diosï Jeobaksïni jarhuataati. Asta uandasïndi eska no ma ambe “uaaka úni eskajtsïni [Tata] Diosï nóteru uékaaka” (arhinta je Roma 8:38, 39).
JORHENGUARHI JE SÁNDERU AMBE
Ju je exeni tsimani ambe engaksïni jarhuataaka orhepani uérakuani ójkutakuechani parajtsï úni itsï atakuarhini: sánderu sési míteni Tata Diosï Jeobani ka jiókuarhini imeeri jarhuajperata.
4. Sánderu sési míti je Tata Diosï Jeobani
¿Nájtsï xáni jatsiski para míteni Tata Diosï Jeobani ante dejtsï itsï atakuarhini? Jatsiskajtsï para sési míteni Tata Diosï Jeobani parajtsï úni xénchani ka isï úni ambe ma eska ima na uékajka. Exe je BIDEUNI parajtsï míteni eskaksï uánikua imeecha engaksï Bibliaeri ambe jorhenguarhini jaka úxakaksï ísï úni. Ka tátsekua uandontskuarhi je íri ambe:
-
Eska na xarharajka bideurhu, ¿ambe jarhuataaski máru Bibliaeri jorhenguarhirichani listu jarhani paraksï itsï atakuarhini?
Arhinta je Roma 12:2 ka uandontskuarhi je íri ambe:
-
¿Jarhaski ambe ma Bibliarhu engajtsï chá no seguru jaka eska ísïiska? ¿Exesïntsï eska ísïika ima ambe engaksï Jeobaeri testiguecha jorhentpijka?
-
Engajtsï no seguru jaka ambe máeri, ¿ambejtsï uaa úni?
5. Jánguarhinta je orhepani uérakuani ójkutakuechani
Iáminduechachi jatsiasïnga ójkutakuechani engachi eratsejkia aiakukuarheni Tata Diosïni ka itsï atakuarhini. Parajtsï míteni ma, exe je BIDEUNI. Tátsekua uandontskuarhi je íri ambe:
-
¿Náki ójkutakuechani jatsispi para orhepani uérakuani Narangerel para úni marhuakuni Tata Diosï Jeobani?
-
¿Néna úspi orhepani uérakuani ójkutakuechani enga niárapka xénchani Tata Diosï Jeobani?
Arhinta je Proverbios 29:25 ka 2 Timoteo 1:7, ka uandontskuarhi je íri ambe:
-
¿Néjtsïni íntskusïni balori parachi úni orhepani uérakuani ójkutakuechani?
6. Mintsika je eskaksïni Tata Diosï Jeoba jarhuataaka
Tata Diosï Jeobaksïni jarhuataati parajtsï imani ambe úni enga ima jaiapanhintajka. Exeje BIDEUNI ka uandontskuarhi je íri ambe:
-
¿Andisï nótki uékeeni itsï atakuarhini jorhenguarhiri enga bideurhu xarharajka?
-
¿Ambe jarhuataspi mintsikani Tata Diosï Jeobani?
Arhinta je Isaías 41:10, 13 ka uandontskuarhi je íri ambe:
-
¿Andijtsïsï uaa seguru jarhani eskajtsï uaaka ísï úni eskajtsï na aiakuaka Tata Diosïni?
7. Agradeseriku je Tata Diosïni engaksïni xáni xénchajka
Engajtsï sánderu eratsentajka na engaksïni xáni xénchajka Tata Diosï Jeoba, sánderujtsï agradeserikuaka ka ístujtsï sánderu uékaaka marhuakuni para méntkisï. Arhinta je Salmo 40:5 ka uandontskuarhi je íri ambe:
-
¿Náki regaluechantsï sánderu jukaparharaasïni engaksïni Tata Diosï Jeoba íntsaaka?
Profeta Jeremíasi xénchasïreendi Tata Diosï Jeobani ka imeeri karakatani ka ístu kánikua jukaparharasïreendi Tata Diosï Jeobaeri nombrini páni. Ima uandaspti: “Chiiti uandakuechaksï kánikua tsíperasti ka sési pʼikuastani juchiiti mintsitani, jimbokani ji chiiti nombrini pásïnga, oh, Tata Diosï Jeoba” (Jeremías 15:16). Iásï mókuanta je arhini kurhamarhikuechani:
-
¿Andisï k’éri kóntperata máe Jeobaeri testigueni?
-
¿Chájtsï uékasïni itsï atakuarhini parajtsï Jeobaeri testigueni?
-
¿Jarhaski ambe ma engaksïni ójkutani jaka?
-
¿Ambejtsï uaa úni parajtsï niárani itsï atakuarhini?
MÁRUKSÏ I AMBE UANDASÏNDI: “Chésïnga engani no uaaka ísï úni ambe ma eska Tata Diosï na erokuarhijka imeeri enga itsï atakuarhijkia”.
-
¿Ísïjtsï pʼikuarherasïni chá?
AMBE ENGACHI JORHENGUARHIKA
Tata Diosï Jeobaksïni jarhuataati parajtsï úni orhepani uérakuni náki uéjki ójkutakuani ma engajtsï jimbo no úni jaka itsï atakuarhini.
Ambejtsï jorhenguarhiski
-
¿Nájtsï xáni jatsiski para míteni Bibliaeri ambe parajtsï úni itsï atakuarhini?
-
¿Ambe ka ambejtsï jatsiski para úni ante dejtsï itsï atakuarhini?
-
¿Andijtsïsï no jatsi para chéni itsï atakuarhini?
ÍSTU EXE JE INI AMBE
Exe je ambe jimbo sési japirini eskajtsï itsï atakuarhipiringa.
“¿Exesïntsï eskajtsï uákia itsï atakuarhini?” (Aianhpiri, marsu de 2020)
Exe je na engajtsï uaaka orhepani uérakuani máru ójkutakuechani engaksïni jamberi pʼínguni jaka parajtsï itsï atakuarhini.
“¿Amberini pʼínguxaki parani no itsï atakuarhini?” (Aianhpiri, marsu de 2019)
Exe je na enga nema úpka orhepani uérakuani kʼérati ójkutakuechani para úni itsï atakuarhini.
Uénani jámani, Ataa no seguru jarhaspti sini itsï atakuarhipirini. Exe je ambe jarhuataspi para niárani itsï atakuarhini.
Jamberijtsï ístu uéjka ini ambe míteni
KURHAMARHIKUECHA ENGAKSÏ SÁNDERU ÚKUARHIJKA
¿Nénaksï jorhentpisïni Biblieri ambe Jeobaeri testiguecha?
Parajtsï Jeobaeri testiguechani jingoni jorhenguarhini Biblieri ambe, chájtsï uaaka náki uéjki Bibliani jingoni jorhenguarhini. Ístujtsï uaaka pʼímarhini chaari familiani o amiguechani.
