Imeecha engaksï apenasi tembuperaka, erokuarhisïndiksï eskaksï ísï tsípikua jingoni irekaaka komueska ima jurhiatikua engaksï tembuperaka. Ka uaatiksï ísï úni. Imeecha engaksï ióni páni jakaia tembuperatini, mítestiksï eskaksï uaaka ísï úni, jimbokaksï jánguarhintaxaka ísï úni eska Biblia na uandajka.

1. ¿Náki konsejuechani íntsaasïni Biblia acheetini?

Jeoba arhisti acheetini eska ima jindeeska orhejtsïkuti imeeri familiarhu (arhinta je Efesu 5:23). Ka erokuarhisïndi eskaksï acheeticha imani ambe erakuaka úni enga sésiuaka para imeeri familia. Biblia i ambe arhiasïndi acheetichani: “Acheeticha, uéa je chaari uarhiitichani” (Efesu 5:25). ¿Ambe arhikuekasïni i ambe? Acheeti enga xénchajka imeeri uarhiitini, uékperakua jingoni kámasïndi enga máteruecha jingoni jarhajka ka engaksï jandiajku jarhajka. Ka jánguarhintasïndi íntskuni imani ambe enga ima uétarhinchajka ka ístu sési pʼikuastasïndi (1 Timoteo 5:8). Joperu sánderu jukaparhakua ambe, jánguarhintasïndi paraka imeeri uarhiiti sési marhuakuaka Tata Diosïni (Mateu 4:4). Márkuksï kómarhisïndi ka márkuksï arhintasïndi Bibliani. Enga acheeti uékperakua jingoni kámaaka imeeri uarhiitini, imeeri pájperakua Tata Diosï Jeoba jingoni sési jarhasïndi (arhinta je 1 Pedru 3:7).

2. ¿Náki konsejuechani íntsaasïni Biblia uarhiitini?

Tata Diosïri Karakata arhisïndi uarhiitini eska janhanharhiaka imeeri acheetini (Efesu 5:33). ¿Néna uaa úni ini ambe? Uaati eratsentani ambe enga sési újka imeeri acheeti, na enga xáni jánguarhintajka para kuidarini imani ka imeeri sapiichani. Ístu, úpirindi janhanharhikua xarhatakuni enga apoiariuaka ambe enga ima erakuaka úni, enga uékperakua jingoni uandajpaaka, enga sési uandaaka imeeri ambe nájkiruka uámba no májkueni jakajkuaka eska ima.

3. ¿Néna uaa temungurhiri ma sánderu sési irekani?

Temungurhiricheri ambe uandaparini, Biblia uandasïndi: “Ka imaksï tsimani, májku kuerpueuatiksï” (Mateu 19:5). I ambe arhikuekasïndi eskaksï no jatsiska para úni ambe ma enga niáraaka jarharitaani. Jimboksïsï pʼindejti márku jarhani, uandani ambe engaksï eratsejka ka ambe engaksï pʼikuarherajka, peru i ambeksï uékperakua jingoni ísï úsïndi. Para imeecha, sánderu jukaparhakua ambe jindeesti Tata Diosï Jeoba, peru tátsekua, imeeri acheeti o imeeri uarhiiti. Ísï jimbo, nóksï jámasïndi máteru nema jingoni jukari sési pájperani.

 JORHENGUARHI JE SÁNDERU AMBE

4. Acheeti, xéncha ka kuidari chiiti uarhiitini

5. Uarhiiti, xéncha ka janhanharhi chiiti acheetini

Biblia arhisïndi uarhiitini eska jatsiska para janhanharhini imeeri uámbani nájkiruka i marhuakuaka Jeobani o nómbe. Arhinta je 1 Pedru 3:1, 2 ka uandontskuarhi je íri ambe:

• Enga chaari acheeti no marhuakuni jaka Jeobani, jamberijtsï chá uéjka eska ísï uaaka. ¿Ambe sánderu sésiipirini, méntku aianguni jarhani Tata Diosïri ambe o eskajtsï xarhatakuaka eskajtsï sési jámasïnga ka eskajtsï janhanharhisïnga? ¿Andijtsïsï ísï eratsejki?

Acheeti ka uarhiiti, uaatiksï tsimarhani ambakiti ambe erakuni úni. Joperu ísïisti, uarhiiti no méntkisï májkueni eratseati eska acheeti. Enga ísï úkuarhiaka, uarhiiti uaati  arhini acheetini iatsitakuarhu ka janhanharhikua jingoni ambe enga eratsejka. Peru jatsisti para miáni eska Jeoba acheetini íntskuska sésikua para erakuni ambe enga sánderu sésiika para imeeri familia. Ka erokuarhisïndi eska uarhiiti jánguarhintaaka apoiarini ambe enga acheeti eratseaka úni. Enga ísï úska, imeeri familia uaati sánderu sési irekani. Arhinta je 1 Pedru 3:3-5 ka uandontskuarhi je íri ambe:

• ¿Néna pʼikuarherasïni Jeoba enga exejka eska uarhiiti janhanharhisïnga uámbani?

6. Temungurhirichaksï uaati orhepani uérakuani problemechani

 AMBE ENGACHI JORHENGUARHIKA

Acheeti ka uarhiiti uaatiksï sési irekani engaksï xénchperaska, engaksï janhanharperaska ka engaksï úska ambe enga Biblia uandajka.

Ambejtsï jorhenguarhiski

• ¿Ambe uaa acheeti parakaksï sánderu sési irekaaka temungurhiri?

• ¿Ambe uaa uarhiiti parakaksï sánderu sési irekaaka temungurhiri?

• Engajtsï chá tembuperatini jaka, ¿náki Bibliarhu anapu prinsipiuksïni ma jarhuataa parakajtsï sánderu sési irekuarhiaka temungurhiri?