JORHENGUARHIKUA 50
¿Nénajtsï uaa tsípikua jingoni irekani chaari familia jingoni? (parti 2)
Sapiichaksï Tata Diosï Jeobaeri regalu máesti. Ima erokuarhisïndi eskaksï taaticha sési kuidariuaka ini regaluni. Jimbosï ambakiti konsejuechani íntskuajti parakaksï uaaka ísï úni. Ístu, ambakiti konsejuechani íntskuasïndi sapiichani parakaksï jarhuajpeaka familiarhu paraksï iáminduecha sési irekani.
1. ¿Náki konsejuechani íntsaasïni Tata Diosï Jeoba taatichani?
Tata Diosï Jeoba erokuarhisïndi eskaksï taaticha ka naandicha xénchauaka imeeri uájpeechani, ka eskaksï tiempu arhutaaka paraksï imeecha jingoni jarhani. Ístu, uékasïndi eskaksï taaticha kuájchakuauaka sapiichani paraksï no ma ambe ma úkuarhinchani ka eskaksï ísï tʼarhexerauaka eskaksï Bibliarhu anapu prinsipiuecha na uandajka (Proverbios 1:8). Sapiicheri ambe uandaparini, Tata Diosï arhiasïndi taatichani: “Kʼuiriperaa je [...], arhistakuaparini juchaari Tatani jimbo” (arhinta je Efesu 6:4). Jeoba kánikua tsitisïndi eskaksï taaticha kʼuiriperauaka sapiichani ísï eska ima na juramukuajka, eskaksï no jámaaka jurajkukuani máteruechani paraksï ima kʼuiriperaani.
2. ¿Náki konsejuechani íntsaasïni Jeoba sapiichani?
Tata Diosï Jeoba arhiasïndi sapiichani: “Janhanharhia je chaari taatichani” (arhinta je Kolosasi 3:20). Enga sapi ma kurhajchaajka ka janhanharhiani imeeri taatichani, sési pʼikuastaasïndi imeechani ka ístu Jeobani (Proverbios 23:22-25). Jesúsi ambakiti sapi máespti; nájkiruka perfektuepka, kurhajchaasïreendi ka janhanharhiani imeeri taatichani nájkirukaksï imeecha no perfektuepka (Lukasʌ 2:51, 52).
3. ¿Ambeksï uaa úni iámu familiarhu anapuecha paraksï sánderu andarhierani Tata Diosï Jeobani?
Engajtsï chá kaajka sapiichani, seguru eskajtsï ísï uékasïnga eskaksï xénchaaka Tata Diosï Jeobani eska chá na xénchajka. ¿Nénajtsï uaa ísï úni? Ísï úparini eska Biblia na arhijka: “Jatsiskari para jorhendani [Tata Diosï Jeobaeri uandakuani] chiiti sapini, ka uandontskuarhekuni íri ambe engari chiini jauaka, engari xanharisï jámaaka” (Deuteronomio 6:7). Jorhentpini, jindeesti arhistakuni nemani uánikua xanhari. Seguru eskajtsï chá míteka eska ménisï uánikua xanhari uétarhisïnga arhiani ambe ma sapiichani paraksï ima no mirikurhini. Ísï jimbo, i tekstu arhikuekasïndi eskajtsï jatsiska para jirinhakuntani mándani jurhiatikua parajtsï úni uandontskuarhekuani chaari sapiichani Tata Diosï Jeobaeri ambe. Ístu, kánikua jukaparhakuesti eskajtsï iámu familia arhutaaka tiempu mándani semana parajtsï k’éri ambe arhini Tata Diosï Jeobani Bibliaeri ambe jorhenguarhiparini. Ka engajtsï no kaajka sapiichani, ístuksïni kánikua marhuacheati engajtsï arhutaska tiempu mándani semana parajtsï jorhenguarhini Tata Diosï Jeobaeri Karakateri ambe.
JORHENGUARHI JE SÁNDERU AMBE
Ju je exeani máru ambakiti konsejuechani enga jarhuataajka familiechani parakaksï seguru p’ikuarheraaka ka sési irekani.
4. Uékperakua jingoni kʼuiriperaa je chaari sapiichani
Úpirindi úkua jukani sési kʼuiriperaani sapiichani. ¿Nénaksïni uaa jarhuatani Biblia? Arhinta je Santiagu 1:19, 20 ka uandontskuarhi je íri ambe:
-
¿Nénaksï uaa taaticha xarhatakuani imeecheri sapiichani eskaksï xénchaasïnga jiáni engaksï uandontskuarhekuani jarhajka?
-
¿Andisï taati ma no méni jatsipirini para jiáni jurhimberantaani uájpeechani enga ikiani jauaka? a
5. Kuájchakua je chaari sapiichani
Parajtsï kuájchakuani chaari sapiichani, kánikua jukaparhakuesti eskajtsï mándani imeecha jingoni uandontskuarheaka seksueri ambe. Ísïisti, úpirindi úkua jukani íri ambe uandontskuarhekuani. Exe je BIDEUNI ka uandontskuarhi je íri ambe.
-
¿Andiksïsï máru taaticha úkua jukanchajki seksueri ambe uandontskuarhekuani imeecheri sapiichani?
-
¿Ambe jarhuataaski máru taatichani paraksï íri ambe uandontskuarhekuani imeecheri sapiichani?
Eska na uandakata japkia sánhani arhixati sánderu no sési jánhaskuarhini Satanasiri parhakpini jimbo. Arhinta je 2 Timoteo 3:1, 13 ka uandontskuarhi je íri ambe:
-
Máru i járhati kʼuiripuecha enga bersikulu 13 jimbo uandajka ísku ambemaksï úkuasïndi sapiichani. Jimajkani, ¿andisï jukaparhakue eskaksï taaticha arhistakuauaka seksueri ambe imeecheri sapiichani? ¿Ka ambeksï uaa úni paraka no nema ísku ambe ma úkuauaka?
¿Mítespijtsï ini ambe?
Jeobaeri testiguechaksï uánikua ambe petasïndi enga jarhuataajka taatichani paraksï jorhendaani seksueri ambe imeecheri sapiichani ka ísïksï kuájchakuani paraka no nema ísku ambe ma úkuauaka. Máruksï i jindeesti:
-
Kuájchakua je chári sapiichani (bideu)
-
“Nénajtsï uaaka uandontskuarheni seksueri ambe chaari sapi jingoni” (¡Tsínharhi!, núm. 5 2016)
6. Janhanharhia chiiti taatichani
Sapiicha ka tumbiichaksï jatsisti para janhanharhiani taati jémbechani ka na engaksï uandajpaajka xarhatasïndi eskaksï ísï úni jarhasïnga. Exe je BIDEUNI ka uandontskuarhi je íri ambe
-
¿Andisï sésii eska tumbi ma janhanharhikua jingoni uandajpauaka taati jémbechani?
-
¿Néna uaa tumbi ma janhanharhiani taati jémbechani?
Arhinta je Proverbios 1:8 ka uandontskuarhi je íri ambe:
-
¿Ambe jatsipirini para úni tumbi ma jiáni enga taati jémba o amamba arhiaka ambe enga jatsika para úni?
7. Kʼéri ambe arhi je Tata Diosï Jeobani iámu familia jingoni
Jeobaeri testiguechaksï mándani semana arhutasïndi tiempu paraka iámu familia kʼéri ambe arhiaka Tata Diosïni. ¿Ambeksï úsïni ini familieri jorhenguarhikuarhu? Exe je BIDEUNI ka uandontskuarhi je íri ambe:
-
¿Ambeksïni jarhuataa parakajtsï mándani semana jatsiaka familieri jorhenguarhikua?
-
¿Ambeksï uaa úni taaticha parakaksï iáminduecha tsitiaka ka marhuakuani familieri jorhenguarhikua? (Exe je fotuni enga uénakuarhu jaka).
-
¿Ambeksïni úpirini ójkutani parajtsï úni jorhenguarhini familia jingoni?
Ióntki, Jeoba uékasïreendi eskaksï Israeli anapu familiecha pʼindepiringa uandontskuarheni Tata Diosïri Karakateri ambe. Arhinta je Deuteronomio 6:6, 7 ka uandontskuarhi je íri ambe:
-
¿Nénajtsï úpirini ísï úni eska na uandajka i konseju?
Máru ambe engajtsï uaaka úni familieri jorhenguarhikuarhu:
-
Prepararikuarhi je para tánguarhikuecha.
-
Arhinta je Bibliaeri istoria ma enga iámu familia tsitiaka ka uanda je indeeri ambe.
-
Engaksï chaari uájpeecha sapirhaka, késku je o imprimiri je ánchikuarhita ma para sapiicha enga jw.org jimbo jaka.
-
Engajtsï tumbiichani kaajka, eraku je jorhenguarhikua ma para tumbiicha engaksï jw.org jimbo jaka.
-
Iáminduecha ísï xukuparhanta je eska Bibliarhu anapu istoria ma.
-
Exe je bideu ma enga jw.org jimbo jaka.
MÁRUKSÏ I AMBE UANDASÏNDI: “Kánikua úkua jukasti parakaksï sapiicha uaaka kurhanguni Bibliani”.
-
¿Chájtsï na exesïni?
AMBE ENGACHI JORHENGUARHIKA
Jeoba uékasïndi eskaksï taaticha xénchauaka uájpeechani, eskaksï jorhendauaka ka kuájchakuani; eskaksï sapiicha janhanharhiauaka ka kurhajchaani taati jémbechani ka eska iámu familia kʼéri ambe arhiaka Tata Diosïni.
Ambejtsï jorhenguarhiski
-
¿Nénaksï uaa taaticha jorhendaani ka kuájchakuani uájpeechani?
-
¿Nénaksï uaa sapiicha xarhatakuani taati jémbechani eskaksï janhanharhiasïnga?
-
¿Néna marhuakuasïni familiechani engaksï mándani semana arhutajka tiempu paraksï jatsini familieri jorhenguarhikuani?
ÍSTU EXE JE INI AMBE
¿Náki jorhenguarhikuechaksï uaa jarhuataani chaari sapiichani para jiáni engaksï kʼéakia?
“6 jorhenguarhikuecha para chári sapiicha” (¡Tsínharhi!, núm. 2 2019)
Arhianta je máru konsejuechani enga jarhuatauaka imeechani engaksï jatirichani kuidariuajka.
Exe je na enga kʼuiripu ma enga no mítepka néna tʼarhexeraani uájpeechani niárapka ambakiti taati máeni.
Jeobajtsïni jorhendasti néna tʼarhexeraani juchari sapiichani (5:58)
Exe je na enga taati ma uaaka sánderu sési pájperani imeeri sapiicha jingoni.
a Enga Biblia uandajka jurhimberantani, arhikuekasïndi jorhendaani ka arhistakuani sapiichani parakaksï jorhenguarhiaka sési úni ambe ma. No arhikuekasïndi eskaksï jatsiska para no sési kaani (Proverbios 4:1).
Jamberijtsï ístu uéjka ini ambe míteni
KURHAMARHIKUECHA ENGAKSÏ SÁNDERU ÚKUARHIJKA
¿Nénaksï jorhentpisïni Biblieri ambe Jeobaeri testiguecha?
Parajtsï Jeobaeri testiguechani jingoni jorhenguarhini Biblieri ambe, chájtsï uaaka náki uéjki Bibliani jingoni jorhenguarhini. Ístujtsï uaaka pʼímarhini chaari familiani o amiguechani.
