Iáminduechachi tsitisïnga erakukuarhini juchaari xukuparhakuani ka na engachi xarharaaka. Engachi ísï úska na engaksï arhijka máru Bibliarhu anapu prinsipiuecha, uaakachi sési xukuparhani ka ístuchi sési pʼikuastaaka juchaari Tata Diosï Jeobani. Ju je exeani máru prinsipiuechani.

1. ¿Náki prinsipiuechajtsïni jarhuataa parachi sési erakuni na engachi xukuparhaaka?

Kristianu ma jatsisti para ‘sési xukuparhani eska na terukuntajka, para eska xarhataaka eska eratsekua jukariska ka kaxumbitiini’. Ístu jatsisti para limpiu jarhani enga jimbo xarhataaka eska ‘janhanharhisïnga Tata Diosïni’ (1 Timoteo 2:9, 10). Exea je ini tʼámu prinsipiuechani engaksï ini tekstuecha jimbo jaka. 1) Jatsiskachi para ‘sési xukuparhani’. Jamberijtsï exekia tánguarhikuecharhu eskaksï Jeobaeri marhuaricha mámaru xukuparhasïnga, joperu na engachi xukuparhajka ka újtsïntani xarhatasïngachi eskachi janhanharhisïnga Tata Diosïni engachi kómarhijka. 2) ‘Kaxumbikua’ jingoni morhekuarhini, arhikuekasïndi no imani ambe jukani enga uaaka úni eskajtsïni juchantsïntku exeni jauaka ikichakueni jásï ambe eratseparini. 3) Xarhatasïngachi eskachi ‘eratsekua jukariska’ engachi no imani ambe xukuparhajka enga jimbanhi uératini jarhajka. 4) Juchaari xukuparhakua jingonchi jatsiska para xarhatani eskachi ‘janhanharhisïnga Tata Diosïni’ ka ísïchi uaaka xarhatani eskachi kómarhisïnga Tata Diosï jurhimbitini (1 Korintu 10:31).

2. ¿Andichisï jatsi para eratseni na engaksï pʼikuarheraaka erachicha juchaari xukuparhakua jimbo?

Ísïisti eskachi jucha uaaka erakukuarhini na engachi uékaaka xukuparhani. Joperuchi jatsiska para eratseni na engaksï pʼikuarheraaka máteruecha. Jánguarhintasïngachi parachi no nemani no sési pʼikuastani. Ísïchi úsïnga eska na uandajka i tekstu: “Uétarhisïndi eska jucha mándani arhini, uaaka ambakiti ambe enga sési pʼikuastaaka máteru kʼuiripuni para úni eska ima uinhapeni pʼikuarheraaka” (arhinta je Roma 15:1, 2).

3. Na engachi xukuparhajka ¿néna uaa eskaksï máteruecha uékaaka míteni Jeobaeri ambe?

Méntkisïchi jánguarhintasïnga sési xukuparhani, joperuchi sánderu jánguarhintasïnga sési xukuparhani engachi nirajka tánguarhikuecharhu ka aianhpini. Nóchi uékasïnga eska juchaari xukuparhakua jimbo kʼuiripuechajtsïni no kasu úchiaka engachi aianguani jauaka Tata Diosïri ambe. Sánderu sési, uékasïngachi eskaksï máteruecha uékaaka míteni Tata Diosï Jeobaeri ambe engaksï exeaka na engachi xukuparhajka ka eska “Pʼímutantspitiri jorhengua” sési arhikateuaka (Titu 2:10).

 JORHENGUARHI JE SÁNDERU AMBE

4. Engachi sési xukuparhajka xarhatasïngachi eskachi janhanharhisïnga Tata Diosï Jeobani

¿Ambe jindeeski engachi jimbo uéjka seguru jarhani eskachi sési xukuparhasïnga? Arhinta je Salmo 47:2 ka uandontskuarhi je íri ambe:

• Míteparini eskachi Tata Diosïni marhuakusïnga, ¿nénachi jatsipirini para xukuparhani?

• ¿Exesïntsï eska sési jarhaska jánguarhintani sési xukuparhani parachi tánguarhikuarhu nirani ka aianhpini? ¿Andijtsï ísï eratsejki?

 5. ¿Nénachi uaa sési erakuni juchaari xukuparhakuani ka na engachi arreglarikuarhijka?

Exe je BIDEUNI.

No arhiparini na enga xáni jukaparhaaka juchaari xukuparhakua, jatsisti para limpiu jarhani ka eskachi ísï xukuparhaaka seguni nani engachi niuaka. Arhinta je 1 Korintu 10:24 ka 1 Timoteo 2:9, 10. Tátsekua, uandontskuarhi je andijtsïsï no jukapirini xukuparhakuani enga...

• ... no limpiu japiringa o jukari no sési jásï.

• ... uaaka nemani ikichakueni jásï ambe eratsetarani jimboka jukari katsikatsisïska o jukari marhekuarhini o máteru ambe jimbo.

Nájkirukachi kristianuecha nóteru jatsikia para kurhajchani Juramukuani enga Moisési intsïnhapka, i juramukuajtsïni jarhuatasïndi kurhanguni na enga eratsejka Tata Diosï Jeoba. Arhinta je Deuteronomio 22:5 ka uandontskuarhi je íri ambe:

• ¿Andisï no sési jaki eska nanaka ma ísï xukuparhaaka enga jimbo ísï xarharaaka eska tataka ma o tataka ma enga ísï xarharaaka eska nanaka ma?

Arhinta je 1 Korintu 10:32, 33 ka 1 Juanu 2:15, 16, ka uandontskuarhi je íri ambe:

• Enga nemani no sési pʼikuastajka kúnguarhikuarhu o jima engachi irekaka na engachi xukuparhajka, ¿jatsipirinchi para kuenta úni? ¿Andi?

• ¿Néna pʼindeski xukuparhani kʼuiripu jima enga chá irekaka?

• ¿Exesïntsï eska máru inde xukuparhakua no sési jarhaska para kristianu ma? ¿Andijtsïsï ísï eratsejki?

 AMBE ENGACHI JORHENGUARHIKA

Engachi sési erakujka juchaari xukuparhakuani, xarhatasïngachi eskachi janhanharhisïnga Tata Diosïni ka ístu máteruechani.

Ambejtsï jorhenguarhiski

• ¿Andisï Tata Diosï Jeoba jukaparharajki na engachi arreglarikuarhijka?

• ¿Nákiskiksï máru prinsipiuecha engajtsïni jarhuatajka sési erakuni na engachi arreglarikuarhiaka?

• Na engachi arreglarikuarhijka, ¿néna úpirini kʼuiripu i ambe jimbo sési o no sési exeni jurhimbiti relijionini?