JORHENGUARHIKUA 53
Imani ambe jingoni tsípikuarhi je enga Jeoba jaiapanhintajka
Jeoba, Tata Diosï máesti enga felisiika (1 Timoteo 1:11, TNM). Ima uékasïndi eskachi sési irekaaka ka eskachi tsípikuarhiaka. Ima tsitisïndi eskachi mintsikuarhiaka ka eskachi arhutaaka tiempu parachi tsípikuarhini. Ini jorhenguarhikua jimbo, exenchi jauaka nénachi uaa úrani juchaari tiempuni parachi tsípikuarhini ka ístu parachi jaiapanherantani Jeobani.
1. ¿Ambechi jatsiski para eratsentani engachi erakuni jámaaka néna tsípikuarhini?
¿Ambejtsï tsitisïni úni parajtsï mintsikuarhini ka sési pʼikuarherani? Máruksï tsitisïndi chenjembo pakarani paraksï libru ma arhintani, pirekuechani kurhaani jarhani, pelikula ma exeni o paraksï exeni jarhani ambe ma internetirhu. Ka máruksï tsitisïndi mámaru ambe úni imeecheri amiguecha jingoni, komu nirani xanharani, xarhiameni o chʼanani. Ambe uéjkichi erakuni, jatsiskachi para jánguarhintani imani ambe erakuni “enga juchaari Tata jaiapanhintajka” (Efesu 5:10). Kánikua jukaparhakuesti eskachi miáuaka ini ambe. ¿Andi? Jimboka uánikua ambe enga jingoni kʼuiripu tsípikuarhijka, Jeoba kurhunhisïnga, komu uarhiperakueri ambe, ísku jándikueri ambe o sïkuajperakueri ambe (arhinta je Salmo 11:5). ¿Ambejtsïni jarhuataa sési jásï ambe erakuni úni?
Engachi jánguarhintaska sési erakuani amiguechani engaksï xénchajka Jeobani, imajtsïni jarhuataati sési erakuni ambe engachi jingoni uaaka tsípikuarhini. Eskachi na exeka jorhenguarhikua 48 jimbo, “ima enga jánhastiicha jingoni jámajka, jánhasti úkuarhiati”. Joperu ima enga pʼindejka imeecha jingoni jámani engaksï no janhanharhijka Jeobaeri ambe “no sési nikuati” (Proverbios 13:20).
2. ¿Andisï xáni jukaparhakue eskachi exeaka na engachi xáni tiempu úrajka parachi tsípikuarhini?
Nájkirukachi imani ambe jingoni tsípikuarhijka enga sési jaka, jatsiskachi para jingontku jarhani parachi no xáni tiempu úrani. Jimboka engachi no ísï úpiringa, nóteruchi xáni tiempu jatsipiringia parachi imani ambe úni enga sánderu jukaparhaka. Bibliajtsïni arhisïndi eskachi no “xáni ísku tiempu tsïtani” jámaaka (arhinta je Efesu 5:15, 16).
JORHENGUARHI JE SÁNDERU AMBE
Ju je exeni ambe ma engajtsï uaaka úni parajtsï úni sési erakuni ambe engajtsï jingoni tsípikuarhiaka.
3. Asï imani ambe jingoni tsípikuarhi je enga no sési útspijka
¿Andichisï jatsi para sési erakuni ambe engachi jingoni tsípikuarhiaka? Exe je BIDEUNI ka uandontskuarhi je íri ambe:
-
¿Ambe jimboksï sáno májkueniski iásï anapu chʼanakuecha gladiadoricheri jingoni engaksï ióntki Roma chʼaneenga?
-
Eska na xarharajka bideurhu, ¿ambe jorhenguarhiski Danny chʼanakuecheri ambe?
Arhinta je Roma 12:9 ka uandontskuarhi je íri ambe:
-
¿Nénajtsïni jarhuatasïni i bersikulu parachi úni sési erakuni ambe engachi jingoni tsípikuarhiaka?
¿Nákiski máru ambe enga Tata Diosï Jeoba kurhunhijka? Arhinta je Proverbios 6:16, 17 ka Galasia 5:19-21. Engajtsï na arhiantauakia mándani tekstuechani, uandontskuarhi je íri ambe:
-
Inde amberi enga teksturhu uandajka, ¿ambe ka ambe jingoni sánderu tsípikuarhinhasïni ini jurhiatikuecha jimbo?
Na engachi uaaka sési erakuni ambe jingoni tsípikuarhini
Kurhamarhikuarhi je:
-
¿Ambe uaa? ¿Imani ambe únhasïni enga Jeoba kurhunhijka?
-
¿Káni uaa? ¿Jiániua engani máteru ambe úkua jatsijka enga sánderu jukaparhakueka?
-
¿Né jingoni uaa? ¿Ióni ka someni jaua imeecha jingoni engaksï no xénchajka Tata Diosï Jeobani?
Parachi no ma ambe úkuarhinchani, jatsiskachi para jarharini peligruni na engachi xáni uaaka. Ísï jimbo nóchi jatsiska para tsípikuarhini imani ambe jingoni engachi exeaka eskajtsïni uaaka no sési úchini.
4. Sési úra je chaari tiempuni
Exe je BIDEUNI ka uandontskuarhi je íri ambe:
-
Nájkiruka bideurhu anapu erachi no no sési jásï ambe úni japka, ¿néna no sési úraxapi imeeri tiempuni?
Arhinta je Filipusʌ 1:10 ka uandontskuarhi je íri ambe:
-
¿Nénajtsïni jarhuataa i bersikulu parachi exeni na engachi xáni tiempu úraaka parachi tsípikuarhini?
5. Imani ambe jingoni tsípikuarhi je enga sési jaka
Ísïisti eska Jeoba no jaiapanheantasïnga máru ambe enga jingoni kʼuiripu tsípikuarhijka, peru jarhasti máteru ambe enga jaiapanhentajka ka engachi jingoni uaaka tsípikuarhini. Arhinta je Eclesiastés 8:15 ka Filipusʌ 4:8, ka uandontskuarhi je íri ambe:
-
¿Ambe jingontsï tsitisïni tsípikuarhini enga sési jaka?
Uaakachi tsípikuarhini imani ambe jingoni enga no no sési jaka.
MÁRUKSÏ I AMBE UANDASÏNDI: “¿Andi meru xáni no sési jarhaski imani ambe jingoni tsípikuarhini enga sïkuamikueri ambeeka, uarhiperakueri ambe o ísku jándikueri ambe? ¡Imasï no sési jati enga ma méru indeni ambe niátapiringa!”.
-
¿Ambejtsï uandapirini chá?
AMBE ENGACHI JORHENGUARHIKA
Jeoba uékasïndi eskachi imani ambe jingoni tsípikuarhiaka enga sési jauaka ka engajtsïni sési pʼikuastaaka.
Ambejtsï jorhenguarhiski
-
¿Kristianuechachi ambe jingoni no tsípikuarhisïni?
-
¿Andichisï jatsi para exeparini jámani na engachi xáni tiempu úrajka para tsípikuarhini?
-
¿Imani jingontsï uékasïni tsípikuarhini enga Tata Diosï Jeoba jaiapanhintajka? ¿Andi?
ÍSTU EXE JE INI AMBE
Exe je nésï jatsi para erakuni ambe engachi jingoni tsípikuarhiaka.
Exe je nénajtsï uaa sési erakuni ambe jingoni tsípikuarhini.
“¿Sési jarhaski ima ambe engachi jingoni tsípikuarhijka?” (Aianhpiri, 15 de oktubri de 2011)
Exe je andisï achamasï ma nóteru imani ambe jingoni tsípikuarhipia enga antesi tsípikuarhienga, ini eksperiensia jimbo “Nóteruni menusi uaasïngia máteru kʼuiripuechani”.
“Biblia jarhuataasti mójtakuni irekua” (Aianhpiri, 1 de febreru de 2010)
Exe je ambe enga úka uarhiiti ma para nóteru imani ambe jingoni tsípikuarhinia enga sïkuamikueri ambeeka.
Asï imani ambe jingoni tsípikuarhi je enga sïkuamikueri ambeeka (2:02)
Jamberijtsï ístu uéjka ini ambe míteni
KURHAMARHIKUECHA ENGAKSÏ SÁNDERU ÚKUARHIJKA
¿Nénaksï jorhentpisïni Biblieri ambe Jeobaeri testiguecha?
Parajtsï Jeobaeri testiguechani jingoni jorhenguarhini Biblieri ambe, chájtsï uaaka náki uéjki Bibliani jingoni jorhenguarhini. Ístujtsï uaaka pʼímarhini chaari familiani o amiguechani.
