Jesúsi jindeesti “juramuti jakajkuticheri” (Efesu 5:23). Ini jurhiatikuechani jimbo, tata Jesukristu orhekupaaxati imeeri chúxapatichani ixú Parhakpinirhu ‘jántspirini úraparini enga mintsinharhikueka ka jánhastiini’ (arhinta je Mateu 24:45). Ima mismu erakusti indeni “jántspirini” ka íntskusti juramukua sáni. Joperu útasï seguirixati Kristueri jántspirini ka Kristueri ermanuechani marhuakuasïndi. ¿Neeski inde jántspiri? ¿Ka nénajtsïni kuidarisïni?

1. ¿Neeski ‘jántspiri enga mintsinharhikueka ka jánhastiini’?

Jeoba méntkisï úrasti kʼuiripuni ma o grupuni ma kʼuiripuecheri para arhistakuni imeeri iretani (Malaquías 2:7; Ebreu 1:1). Pori ejemplu, enga na uarhipkia tata Jesukristu, apostolichani ka Jerusaléni anapu orhejtsïkutichani úraasti paraksï arhistakuni imeeri iretani (Ukuecha 15:2). Májkueni eska jiáni, iásï jarhasti grupu sapichu ma orhejtsïkuticheri engaksï Jeobaeri testigueka enga jindeeka Grupu enga Orhejtsïkuajka iámindu kúnguarhikuechani, imajtsïni íntskujti iámindu ambe parachi jorhenguarhini Tata Diosïri ambe ka orhejtsïkusïndi aianhpikuani. Inde grupu jindeesti ‘jántspiri enga mintsinharhikueka ka jánhastiini ka enga imeeri patroni [Jesúsi] enkargariaka’ imeeri ánchikuarhitechani (Mateu 24:45a). Iámindu imeecha engaksï Grupurhu jaka enga Orhejtsïkuajka iámindu kúnguarhikuechani, kristianuechestiksï engaksï erakunhaka espiritu santu jimbo ka erokaxatiksï imani jurhiatikuani engaksï juramuaka tata Jesukristu jingoni auandarhu anapu Juramukuarhu, ísï tátsekua engaksï na uarhiakia.

2. ¿Na jásï tʼirekuajtsïni íntskusïni jántspiri enga mintsinharhikueka?

Jesúsi uandaspti eska jántspiri enga mintsinharhikueka jatsipiringa ánchikuarhitani para ‘sési íntsaani tʼirekua [máteru kristianuechani] engaksï uétarhinchapiringa’ (Mateu 24:45b). Májkueni eskajtsïni t’irekua na uinhaperantajka ka úni eskachi no pʼamenchaaka, i t’irekua enga Bibliarhu p’itakata jaka uinhaperantasïndijtsïni ka jarhuatasïndijtsïni parachi no jurajkuni Tata Diosï Jeobani ka parachi úni ini ánchikuarhitani engajtsïni Jesúsi jurajkuchika (1 Timoteo 4:6). Intsïnhasïngachi ini t’irekuani enga Bibliarhu jaka, tánguarhikuecha jimbo, k’éri tánguarhikuecha jimbo, publikasionicha ka bideuecha jimbo engaksï Bibliarhu p’itakata jaka. Iámindu i ambejtsïni jarhuatasïndi parachi kurhanguni ambe enga Tata Diosï kurhajkuarhijka ka jarhuatasïndijtsïni parachi sánderu sési pájperani imani jingoni.

 JORHENGUARHI JE SÁNDERU AMBE

3. Tata Diosï Jeobaeri ireta jatsisti para organisadu jarhani

Jesúsi orhejtsïkusïndi Grupuni enga Orhejtsïkuajka iámindu kúnguarhikuechani parakaksï Jeobaeri testiguecha uaaka ánchikuarhitani. Májkueni ánchikuarhisïreendi kúnguarhikua kristianuecheri primeru siglurhu. Exe je BIDEUNI.

Arhinta je 1 Korintu 14:33, 40 ka uandontskuarhi je íri ambe:

• Eskaksï na arhijka i bersikuluecha, ¿uékasïni Jeoba eskaksï imeeri Testiguecha organisadu jauaka? ¿Andijtsïsï ísï eratsejki?

4. Jántspiri enga mintsinharhikueka organisarisïndi aianhpikuani

Para orheta kristianuecha, aianhpikua jindeespti ánchikuarhita enga sánderu jukaparhakuepka. Arhinta je Ukuecha 8:14, 25 ka uandontskuarhi je íri ambe:

• Orheta siglurhu, ¿néksï orhejtsïkusïreni aianhpikuani?

• ¿Ambeksï úspi Pedru ka Juanu engaksï apostolicha arhiapka ambe engaksï úpiringa?

Aianhpikua jindeesti ánchikuarhita enga sánderu jukaparhakueka enga Grupu enga Orhejtsïkuajka iámindu kúnguarhikuechani organisarijka. Exe je BIDEUNI.

 Jesúsi uandaspti na enga xáni jukaparhakueka aianhpini. Arhinta je Markusʌ 13:10 ka uandontskuarhi je íri ambe:

• ¿Andisï xáni jukaparharajki aianhpikuani Grupu enga Orhejtsïkuajka iámindu kúnguarhikuechani?

• ¿Andichisï uétarhinchajki eska ‘jántspiri enga mintsinharhikueka ka jánhastiini’ organisariuaka ini ánchikuarhitani enga iámu parhakpinirhu úkuarhijka?

5. Jántspiri enga mintsinharhikueka arhisïndijtsïni na engachi uaaka ini ánchikuarhitani

Grupu enga Orhejtsïkuajka iámindu kúnguarhikuechani arhistakuasïndi iámu parhakpinirhu anapu kristianuechani. ¿Néna mítesïni ambe enga arhistakuauaka? Exe je na enga uénga grupu enga orhejtsïkuauenga iámindu kúnguarhikuechani primeru siglurhu. Arhinta je Ukuecha 15:1, 2 ka uandontskuarhi je íri ambe:

• ¿Ambe jimboksï arhirperakua jatsispi máru kristianuecha primeru siglurhu?

• ¿Neechanksï kurhakuaspi jarhuajperata Pablu, Bernabé ka máteru kristianuecha paraksï sési péntani ini ambe?

Arhinta je Ukuecha 15:12-18 ka 23-29, ka uandontskuarhi je íri ambe:

• Ante deksï erakuni ambe úni, ¿ambe úspi grupu enga orhejtsïkuauenga iámindu kúnguarhikuechani primeru siglurhu paraka Tata Diosï jarhuataapiringa ini ambe jimbo? (Exea je bersikuluechani 12, 15 ka 28).

Arhinta je Ukuecha 15:30, 31 ka 16:4, 5, ka uandontskuarhi je íri ambe:

• ¿Ambeksï úspi orheta kristianuecha enga grupu enga orhejtsïkuajka iámindu kúnguarhikuechani arhiapka ambe engaksï úpiringa?

• ¿Nénachi míteski eska Jeoba újchakuraaspka engaksï ísï úpka?

Arhinta je 2 Timoteo 3:16 ka Santiagu 1:5, ka uandontskuarhi je íri ambe:

• Ini jurhiatikuecha jimbo enga Grupu enga Orhejtsïkuajka iámindu kúnguarhikuechani erakuni jámaaka na enga úkuarhiaka ambe ma, ¿néna jámasïni para úni míteni ambe enga uaaka?

 AMBE ENGACHI JORHENGUARHIKA

Grupu enga Orhejtsïkuajka iámindu kúnguarhikuechani jindeesti ‘jántspiri enga mintsinharhikueka ka jánhastiini’ enga tata Jesukristu erakuka. I jántspiri arhistakuasïndi ka jorhendaani Bibliaeri ambe iámu parhakpinirhu anapu kristianuechani.

Ambejtsï jorhenguarhiski

• ¿Né erakuski ‘jántspirini enga mintsinharhikueka ka jánhastiini’?

• ¿Nénajtsïni kuidarisïni Grupu enga Orhejtsïkuajka iámindu kúnguarhikuechani?

• ¿Chá jakajkusïni eska Grupu enga Orhejtsïkuajka iámindu kúnguarhikuechani jindeeska ‘jántspiri enga mintsinharhikueka ka jánhastiini’?