Engachi juchaari erachicha jingoni jarhajka, ísïchi pʼikuarherasïnga eska rei Dabidi. Ima ísï uandaspti: “¡Exe je! ¡Na enga xáni sésiika ka sési pʼikuarherakuarhini eskaksï erachicha májku kʼéri jauaka!” (Salmo 133:1). Engachi újka ísï májku kʼéri jarhani, jindeesti jimbokachi iáminduecha jánguarhintasïnga úni ambe ma.

1. ¿Ambe sánderu xarhatasïni Tata Diosïri ireta?

Engajtsï chá nipiringa tánguarhikuarhu ma, máteru paisi jimbo, jamberijtsï no kurhangupiringa idiomani; perujtsï uánikua ambe jimbo ísï pʼikuarherapiringa eskajtsï chaari kúnguarhikua jimbo jarhaska. ¿Andi? Jimboka no arhiparini nani engajtsï tánguarhiaka, exeakajtsï eskachi Jeobaeri testiguecha jorhenguarhisïnga Bibliani, mismu publikasionicha jingoni. Ístuchi iáminduecha jánguarhintasïnga xénchperani. No arhiparini nani engachi irekaka, iáminduechachi uékasïnga “kómarhini Jeobaeri nombrini ka májku kʼéri[chi] marhuakuni” (Sofonías 3:9; nota).

2. ¿Nénajtsï uaa chá jarhuajpeni paraka kúnguarhikua májku kʼéri jauaka?

“Jimajkani kánikua uékpera je pímbinhasï mintsita jingoni” (1 Pedru 1:22). ¿Nénajtsï uaa ini ambe úni? Ambakiti ambe exekua je máteruechani ka no imani ambe engaksï no sési újka. Asï imeecha jingontku kúnguarhi je engaksï májkueni eratsejka eska chá; ístu, jánguarhinta je míteani máteru kʼuiripuechani engaksï máteru nanisï anapueka o engaksï máteru pʼindekuechani jatsiaka. Ístu, jánguarhinta je kénditani mintsitarhu uératini engajtsï chá no sési exeajka máru naniisï anapuechani (arhinta je 1 Pedru 2:17). a

3. ¿Ambejtsï uaa engajtsï arhijperata ma jatsiaka erachi ma jingoni?

Ísïisti eskachi iáminduecha májku kʼéri jarhaska; peru jimbokachi pekadoriska, ménisïchi úpiringa ikiatsperani ochi no sési pʼikuatsperani. Jimbosï Tata Diosïri Karakata uandajti: “Seguiri je puátsperantani”. Ka tátsekua uandasïndi: “Ísï eskaksïni Tata Diosï Jeoba na puáchentaka chánksïni, chájtu ísï ú je” (arhinta je Colosenses 3:13, TNM). Juchachi mémindu no sési pʼikuastasïnga Tata Diosïni ka imajtsïni tekaachintasïndi. Jimbosï ima erokuarhijti eskachi juchajtu tekaakuantauaka juchaari erachichani. Engajtsï chá kuenta íntskukuarheska eskajtsï no sési pʼikuastaska erachini ma, chá ueena je úni ambe ma parajtsï sési peentani indeni ambe (arhinta je Mateu 5:23, 24). b

 JORHENGUARHI JE SÁNDERU AMBE

4. Iáminduechani májkueni kaa je

Uékasïngachi uékperakua xarhatakuani iámindu erachichani. Peru jamberi úkua jukaati jaiapanheantani máteruechani, sánderu imeechani engaksï ménderueniika eska jucha. ¿Ambejtsïni jarhuataa? Arhinta je Ukuecha 10:34, 35 ka uandontskuarhi je íri ambe:

• Jeoba jaiapanheantasïndi paraksï imani marhuakuni iámindu kʼuiripuechani nani uéjkisïksï anapueni. Ini ambe eratseparini, ¿nénajtsï jatsiski para exeani imani kʼuiripuechani engaksï no májkuenika eska chá?

• Jima engajtsï chá irekaka, ¿neechanksï no jaiapanheantasïni? ¿Andijtsïsï no jatsi para májkueni úni eska imeecha?

Arhinta je 2 Korintu 6:11-13 ka uandontskuarhi je íri ambe:

• ¿Ambejtsï úpirini úni parajtsï sánderu xénchaani iámindu erachichani ka pirenchichani?

5. Méntkisï tekaatsperanta je ka puátsperantani

Juchachi no méni jatsiaka para tekaakuntani Jeobani peru imajtsïni kʼóru someni tekaachintasïndi. Arhinta je Salmo 86:5 ka uandontskuarhi je íri ambe:

• ¿Ambejtsïni jorhendasïni i tekstu na enga tekaatspentajka Jeoba?

• ¿Jukaparharasïntsï enga Jeoba ísï tekaatspentajka? ¿Andi?

• ¿Káni úpirini úkua jukani eskachi sési pájperaaka máteruecha jingoni?

¿Ambechi jatsiski para úni parachi májkueni jámani eska Jeoba ka ísïchi úni májku kʼéri jarhani juchaari erachicha jingoni? Arhinta je Proverbios 19:11 ka uandontskuarhi je íri ambe:

• Enga nema uaaka ambe ma engaksïni no sési pʼikuastaaka o engaksïni ikiataaka, ¿ambejtsï uaa úni parajtsï sési pájperantani?

 Ménisï, juchachisï no sési pʼikuastaajka máteruechani. Enga i ambe úkuarhiska, ¿ambechi jatsipirini para úni? Exe je BIDEUNI ka uandontskuarhi je íri ambe:

• ¿Ambe úspi pirenchi enga bideurhu xarharajka para sési pájperantani máteru pirenchi jingoni?

 AMBE ENGACHI JORHENGUARHIKA

Engajtsï chá méntkisï tekaakuantaska chaari erachichani ka engajtsï xarhatakuaska eskajtsï xénchasïnga, jarhuajpiakajtsï paraka kúnguarhikua méntkisï májku kʼéri jauaka.

Ambejtsï jorhenguarhiski

• ¿Ambejtsï uaa parajtsï iámindu járhati kʼuiripuechani xénchaani?

• ¿Ambejtsï uaa engajtsï arhijperata ma jatsiaka máteru erachi jingoni?

• ¿Uékapirintsï ísï tekaakuantani máteruechani eska Jeoba na újka? ¿Andi?