JORHENGUARHIKUA 57
¿Ambe úkuarhipirini engani k’éri pekadu ma úpiringa?
Nájkirukajtsï kánikua xénchajka Jeobani ka ístujtsï jánguarhintani jarhani parajtsï no no sési pʼikuastani, ménisï jauati engajtsï uaaka ambe ma enga no sési jaka. Peruksï jarhasti máru pekaduecha engaksï sánderu kʼéraka eska máteruecha (1 Korintu 6:9, 10). Engajtsï chá niárapiringa k’éri pekadu ma úni, miá je eskaksïni Tata Diosï Jeoba seguiriuaka xénchani; imaksïni puáchentaati ka jarhuatani.
1. ¿Ambechi jatsiski para úni parakajtsïni Tata Diosï Jeoba puáchentaaka?
Enga nema enga xénchajka Tata Diosï Jeobani ka kuenta íntskukuarheni eska k’éri pekadu ma úska, kánikua kómu pʼikuarherasïndi. Peru Tata Diosï Jeoba sési pʼikuastantasïndi ini aiatsperakua jingoni enga imeeri iretani íntskupka: “Nájkirukaksï chaari pekaduecha ísïiuaka komueska charhapiti ambe, urapintaatiksï komueska niebi” (Isaías 1:18). Engachi mintsita jingoni móantaska, Tata Diosï Jeobajtsïni puáchentaati. ¿Ambe arhikuekasïni sési jimbo moántani? Arhikuekasïndi eska ma no sési pʼikuarherasïnga imani ambe jimbo enga úka, eska nóteru uaakia imani ambe enga no sési jaka ka eska kurhakuaka Jeobani eska puákuntaaka. Jimajkani, ma jánguarhintasïndi para nóteru únia o eratseni imani ambe enga újka eska niárapiringa pekadu ma úni ka jánguarhintasïndi kurhajchaani Tata Diosïri juramukuechani engaksï pímbinharhatika (arhinta je Isaías 55:6, 7).
2. Engachi pekadu ma újka, ¿nénajtsïni jarhuatasïni Tata Diosï Jeoba orhejtsïkutichani úrapariani?
Tata Diosï Jeoba arini konseju íntskusïndi imani enga k’éri pekadu ma uaaka: ‘Eska ióarhiauaka tánguarhikuarhu anapu arhistatspitichani’ o orhejtsïkutichani (arhinta je Santiagu 5:14, 15). Íksï orhejtsïkuticha engaksï espiritu santu jimbo erakunhaka, xénchasïndiksï Tata Diosï Jeobani ka Tata Diosïri marhuarichani, ka jorhendakataksï jarhasti parajtsïni jarhuatani sési pájperantani Tata Diosï Jeoba jingoni (Galasia 6:1).
¿Nénajtsïni jarhuatasïni orhejtsïkuticha engachi niárajka pekadu ma úni? Tsimani o tanimu orhejtsïkutichajtsïni jarhuatasïndi kurhanguni Biblia jingoni eska no sési jarhaska ambe engachi úka. Ístujtsïni uinhaperantaati ka íntsaani ambakiti konsejuechani parachi nóteru únia imani ambe enga no sési jaka. Enga kʼuiripu ma kʼéri pekadu ma újka ka no móantani, orhejtsïkutiichaksï petantaati kúnguarhikuarhu paraka inde kʼuiripu no pájtamauaka máteru erachiichani.
JORHENGUARHI JE SÁNDERU AMBE
Jánguarhinta je kurhanguni ka ístu jukaparharani ambe enga Jeoba újka parajtsïni jarhuatani engachi k’éri pekadu ma újka.
3. Uandantani eskachi no sési ambe úska jarhuatasïndijtsïni sési pájperantani Jeobani jingoni
Náki uéjki pekaduchi niátani, no sési pʼikuastasïndi Tata Diosï Jeobani, jimbochisï jatsika para uandantani. Arhinta je Salmo 32:1-5 ka uandontskuarhi je íri ambe:
-
¿Andisï sánderu sésii aianguni Tata Diosï Jeobani ambe engachi no sési úka ka no jámani jískani?
Engachi aiangujkia Tata Diosï Jeobani ambe engachi no sési úka, ka ístuchi arhiani orhejtsïkutichani eskajtsïni jarhuataaka, sésichi p’ikuarherantasïnga. Exe je BIDEUNI ka uandontskuarhi je íri ambe:
-
¿Nénaksï jarhuataski orhejtsïkuticha Canonini para sési pájperantani Tata Diosï Jeoba jingoni?
Kánikua jukaparhakuesti eskachi jurhimbitku ambe aianguauaka orhejtsïkutichani, jimbokajtsïni imeecha uékasïnga jarhuatani. Arhinta je Santiagu 5:16 ka uandontskuarhi je íri ambe:
-
¿Exesïntsï eska sánderu no úkua jukaaka parajtsïni orhejtsïkuticha jarhuatani engachi jurhimbitku aianguaska iámu ambe? ¿Andi?
Uandanta je ambe engajtsï no sési úka, jurhimbitku aiangua je orhejtsïkutichani ka jiókuarhi je Jeobaeri jarhuajperatani.
4. Jeoba xarhatasïndi eska pʼamojkuasïnga imeechani engaksï kʼéri pekadu ma úka
Enga nema k’éri pekadu ma újka ka no uékani kurhajchaani Tata Diosï Jeobaeri juramukuechani, nóteru úsïndia kúnguarhikuarhu jarhani. Ísï jimbo, petanhantasïndi. Ka nóteruchi kúnguarhisïngia imani jingoni. Arhinta je 1 Korintu 5:6, 11 ka uandontskuarhi je íri ambe:
-
Eratseparini na enga lebadura kʼúrajka jarineri tsïrerini, ¿úpirini no sési úkuni kúnguarhikuani engachi kúnguarhipiringa imani jingoni enga k’éri pekadu ma úka ka no uékani moántani? ¿Andi?
Ísï eska Tata Diosï Jeoba na pʼamojpejka, orhejtsïkutiichaksï májkueni úsïndi, ka nirasïndiksï jirinhaantani imeechani engaksï petanhantapka kúnguarhikuarhu ka uékasïndiksï jarhuataani. Ka uánikuechaksï kʼuanhatsentasïndi jimboka nájkirukaksï no sési pʼikuarherapka engaksï ísï petanhantapka, inde ambe jarhuataaspti paraksï móantani (Salmo 141:5).
Na enga kaajka Tata Diosï imeechani engaksï kʼéri pekadu ma újka, ¿néna xarhatasïni eska kurhangukuasïnga, eska pʼamojkuasïnga ka xénchaani?
5. Jeobajtsïni puáchentasïndi engachi moántajka
Jesúsi úraspti ejemplu ma parachi úni kurhanguni na enga pʼikuarherajka Jeoba engachi jucha moántajka. Arhinta je Lukasʌ 15:1-7 ka uandontskuarhi je íri ambe:
-
¿Ambejtsïni jorhendasïni Jeobaeri ambe i ejemplu?
Arhinta je Ezequiel 33:11 ka uandontskuarhi je íri ambe:
-
¿Ambe uétarhisïni eskachi uaaka parachi xarhatani eskachi meru moántaskia?
Jeoba ísïisti eska karichi eranguti ma: kánikua uandanhiasïndi imeeri karichicha jimbo.
MÁRUKSÏ I AMBE UANDASÏNDI: “Chésïnga orhejtsïkuticha jingoni uandontskuarheni. Jimboka engani aianguaska ambe engani no sési úka ekspulsariuakajtsïni”.
-
¿Ambejtsï arhipirini chá nemani enga ísï eratsejka?
AMBE ENGACHI JORHENGUARHIKA
Engachi k’éri pekadu ma úska peruchi meru moántani ka eratsetinchi jarhania nóteru méni ísï úni, Jeobajtsïni puáchentaati.
Ambejtsï jorhenguarhiski
-
¿Andisï sésii eskachi aianguaka Jeobani engachi k’éri pekadu ma uaaka?
-
¿Ambechi jatsiski para úni parajtsïni Jeoba puáchentani engachi pekadu ma úska?
-
¿Andisï sési jaki jarhuajperata kurhakuani orhejtsïkutichani engachi k’éri pekadu ma úska?
ÍSTU EXE JE INI AMBE
Exe je na enga marhuakupka kʼuiripuni ma Tata Diosï Jeobaeri pʼamojperakua enga Isaías 1:18 jimbo uandajka.
¿Nénaksï jarhuataasïni orhejtsïkutiicha paraksï móantani imeecha engaksï kʼéri pekadu ma újka?
¿Nénachi xarhatakuasïni eskachi xénchaasïnga ka pʼamojkuani imeechani engaksï nótki moántani jaka?
“Nénaksï jarhuatanhasïni imeechani engaksï petanhantaka kúnguarhikuarhu” (Aianhpiri, agostu de 2024)
Jorhenguarhi je na enga acheeti ma pʼikuarherapka eska Jeoba uékasïreenga eska kʼuanhatsentapiringa kúnguarhikua jingoni, eksperiensiarhu “Uétarhinchasïreendi kʼuanhatsentani Jeoba jingoni”.
“Biblia jarhuataasti mójtakuni irekua” (Aianhpiri, 1 de abrili de 2012)
Jamberijtsï ístu uéjka ini ambe míteni
KURHAMARHIKUECHA ENGAKSÏ SÁNDERU ÚKUARHIJKA
¿Nénaksï jorhentpisïni Biblieri ambe Jeobaeri testiguecha?
Parajtsï Jeobaeri testiguechani jingoni jorhenguarhini Biblieri ambe, chájtsï uaaka náki uéjki Bibliani jingoni jorhenguarhini. Ístujtsï uaaka pʼímarhini chaari familiani o amiguechani.
