KAPITULU 28
“Asta jima jamberi enga sánderu iauaniika parhakpinirhu”
Jeobaeri testiguechachi seguiriixaka imani ánchikuarhitani úni engaksï kristianuecha ueenapka primeru sigluni
1. ¿Nénaksï májkueni ambe nitamakuarhixaki iásï anapu kristianuecha eska primeru siglurhu anapuecha?
PRIMERU siglurhu anapu kristianuechaksï kánikua tsípikua jingoni aianhpispti. Imeechaksï tsípikua jingoni jiókuarhispti eska espiritu santu jarhuatapiringa ka orherukuani. Nájkirukaksï niárapka no sési kánhani, imeechaksï seguiriixapti aianhpini ka exesptiksï na enga xáni újchakuraapka Tata Diosï. Ambe engaksï primeru siglurhu anapu kristianuecha nitamakuarhipka, iásïjtuksï májkueni nitamakuarhixati Jeobaeri testiguecha.
2, 3. ¿Andisï xáni ambakiti libru máe Úkuecha?
2 Seguruchi jarhaska eskachi iásï sánderu mintsikasïngia Tata Diosïni engachi exeka Apostoliicheeri Úkuechani. ¡Nóteru ma karakata jarhastia enga ísïika eska i libru! Jimboka Tata Diosï ixújkusï uandantajka ambe engaksï úpka primeru kristianuecha.
3 Libru Úkuecha 95 kʼuiripuechani uandaasïndi, 32 paisiichani, 54 ireteechani ka 9 isleechani. Kánikua ambakiti ambejtsïni aiangusïndi ima kʼuiripuecheeri engaksï primeru siglurhu irekapka, relijioniiri orhejtsïkutiicheeri ambe engaksï kʼéramakuarhienga, politikuecheeri engaksï sési xékuarhienga ka kʼuiripuecheeri engaksï kánikua no sési káuenga kristianuechani. Peru sánderu ambakiti ambe engajtsïni aiangujka jindeesti primeru siglurhu anapu kristianuecheeri ambe. Májkueni eska jucha, imajtuksï jatsiaspti uandanhiateechani, peruksï no méni jurajkuspti aianhpini ambakiti aianhperakuani.
4. ¿Andichisï ísï pʼikuarherajki eskachi Pablu jingoni jarhaska, Tabita jingoni ka máteru ambakiti kristianuecha jingoni engaksï primeru siglurhu irekapka?
4 Nájkiruka sáno 2,000 uéxurhini nitamakia enga irekapka apostoli Pedru ka Pablu engaksï xáni jánguarhinteenga aianhpini, Lukasï enga xáni xénchakateepka, Bernabé enga xáni intsïmpitiipka, Estebani enga méntku no sáni cheenga, Tabita enga xáni sési kámpienga, Lidia enga sési eropienga imeo ka máteru kristianuecha engaksï no méni jurajkupka Tata Diosïni. Peru, ¿andichisï ísï pʼikuarherajki enajkichi imeechani jingoni jaki? Jimbokachi juchajtu úxaka indeni ánchikuarhitani enga jindeeka jarhuataani kʼuiripuechani paraksï Jesúsiiri chúxapatiini (Mat. 28:19, 20). Kʼéri kóntperata máesti, ¿a no?
“Asta jima jamberi enga sánderu iauaniika parhakpinirhu” (Úkuecha 1:8).
5. ¿Nákiksï ueenaspi aianhpini?
5 Ju je eratsentani ma ratu imani ánchikuarhitani enga Jesúsi íntsaapka imeeri chúxapatiichani. Arhiaspti: Chájtsï “intsïnhaaka uinhapikua jiáni engaksïni espiritu santu juuaka andarhierani. Ka chájtsï juchiiti ambe uandantaaka Jerusaléni ka iámu Judea ka Samariaisï ka asta jima jamberi enga sánderu iauaniika parhakpinirhu” (Úku. 1:8). Orheta, espiritu santu íntsaaspti uinhapikua paraksï “Jerusaléni” aianhpini (Úku. 1:1–8:3). Tátsekua, jarhuataaspti paraksï aianhpini “iámu Judea ka Samariaisï” (Úku. 8:4–13:3). Ka últimu, jarhuataaspti paraksï sánderu iápurisï aianhpini ambakiti aianhperakuani “asta jima jamberi enga sánderu iauaniika parhakpinirhu” (Úku. 13:4–28:31).
6, 7. Para aianhpini, ¿ambechi jatsiski jucha iásï engaksï primeru siglurhu anapu erachiicha no jatsipka?
6 Juchaari erachiicha engaksï primeru siglurhu anapuepka jatsisptiksï para aianhpini ambakiti aianhperakuani, joperuksï no jatsikuarhespti iámu Bibliani. Libru Mateu karanhasti uéxurhini 41 jimboisï. Libru Úkuecha kʼamaranhaspti karanhani uéxurhini 61 jimboisï ka jiánisï namunitu karteechajkusï japti enga apostoli Pablu karaapka. Ísï jimbo, kristianuecha engaksï judiuepka tʼuinksï kurhauasïrendia Bibliaeri arhintskuani jima engaksï judiuecha tánguarhienga para Tata Diosïni kómarhini ante deksï Kristueri chúxapati úkuarhini (2 Kor. 3:14-16). Peruksï i Kristueri chúxapatiicha jatsispti para jánguarhintani estudiarini, jimbokaksï jatsisïreenga para miáni jarhani ambe enga arhienga karakata ma.
7 Iásï, sáno iámindu Testiguechachi jatsikuarheska Biblia ma ka uánikua publikasioniichani. Ka ístu, jarhuataaxakachi kʼuiripuechani paraksï Jesúsiiri chúxapatiini jimbokachi jukari 240 paisiicha jimbo aianhpixaka ka uánikua idiomeecha jimbo.
Espiritu santu, uinhapikua íntspisïndi
8, 9. a) ¿Ambeksï xáni úxaki Jesúsiiri chúxapatiicha espiritu santuni jimbo? b) ¿Jántspiri enga mintsinharhikueka ambe úxaki Tata Diosïiri espiritu santu jimbo?
8 Imani jurhiatikua enga Jesúsi arhiapka imeeri chúxapatiichani eskaksï nipiringa aianhpini, arhiaspti: Chájtsï “intsïnhaaka uinhapikua jiáni engaksïni espiritu santu juuaka andarhierani”. Enga na Tata Diosï íntsaapiringuia imeeri espiritu santu Jesúsiiri chúxapatiichani, niárapirindiksï aianhpini ma interu parhakpini. Espiritu santu jarhuataaspti Pedruni ka Pabluni paraksï ambakerantaani imeechani engaksï pʼamenchani japka, petarhitantaani demoniuechani ka asta tsítantaani uarhiriichani. Peru ístu, espiritu íntsaaspti uinhapikua primeru siglurhu anapu kristianuechani paraksï úni jukaparhakua ambe: jarhuataani kʼuiripuechani paraksï sési míteni jurhimbikuani ka paraksï úni jatsini tsípikua para méntkisï (Juanu 17:3).
9 Pentekostesi jimbo uéxurhini 33, Jesúsiiri chúxapatiicha “ueenasptiksï mámaru jásï idioma uandani ísï eska espiritu santu na uandarauenga”, ka niáraspti mítekuarhini “indeni xáni ambakiti ambeeri enga Tata Diosï úka” (Úku. 2:1-4, 11). Iásïchi no úsïnguia milagru ma jimbo mámaru jásï idiomechani uandaani. Joperu, espiritu santueri jarhuajperata jimbo, jántspiri enga mintsinharhikueka petaaxati mámaru járhati publikasionichani engaksï Bibliarhu pʼitakata jaka uánikua idiomechani jimbo. Pori ejemplu, rebista Aianhpiri ka ¡Tsínharhi!, mándani mesi uánikuaksï imprimirinhaasïndi ka pájinarhu jw.org jimbo jarhastiksï publikasionicha ka bideuecha jukari 1,000 idiomeecha jimbo. Inde ambe enga jaka, jarhuatasïndijtsïni parachi aianguani kʼérati ireteecharhu anapuechani, tribuecharhu anapuechani ka imeechani engaksï táchani jásï idioma uandajka “indeni xáni ambakiti ambeeri enga Tata Diosï úka” (Apok. 7:9, nota).
10. ¿Ambe úkuarhiskia Biblia jingoni desde 1989 uératini?
10 Uéxurhini 1989 jimbo uératini, jántspiri enga mintsinharhikueka jánguarhintaxati eska Biblia sánderu uánikua idiomeechani jimbo tradusirikuarhiaka. Ka iásï Traducción del Nuevo Mundo de las Santas Escrituras jukari 240 idiomeecha jimbo jarhasti ka uánikua miioniichani jimbo imprimirinhastia ka seguiriini jauati imprimirikuarhini. I ambe no úpirindi ísï úkuarhini enga no Tata Diosïni ka imeeri espirituni jimboepiringa.
11. ¿Nénaksï tradusirikuarhisïni juchaari publikasioniicha?
11 Ju je eratsentani na engaksï xáni tradusirinhaakia juchaari publikasioniicha. Uánikua erachiichaksï jarhasti engaksï tradusiriuani jaka jukari 150 paisiicha jimbo ka ireteecharhu. I ambejtsïni no ísku pakatasïndi, ¿andi? Jimboka no jarhaska máteru organisasioni ixú echerirhu enga espiritu santu jarhuatani jaka paraksï sési aianhpini Tata Diosï Jeobaeri ambe, Mesíasiiri ambe ka inde Reinueri enga auandarhu jaka (Úku. 28:23).
12. ¿Ambe jarhuataspi Pabluni ka máteru kristianuechani paraksï úni sési aianhpini?
12 Primeru siglurhu anapu kristianuechaksï jánguarhintaspti sési aianhpini, nitamataraasptiksï arhijtsïkperateechani, ka espiritu santu jarhuataaspti paraksï ísï úni. Enga Pablu aianguapka Tata Diosïiri ambe judiuechani ka no judiuechani jiáni enga Antiokía de Pisidia japka, “imeecha engaksï mintsita jingoni uékeenga tsípikua para méntkisï jatsini niárasptiksï jakajkuni” (Úku. 13:48). Enga na kʼamarajkia karakuarhini libru Úkuecha, Lukasï uandasïndi Pablueri ambe: “Aianguasïreendi Tata Diosïiri Reinueri ambe ka no sáni chéparini jorhendaasïreendi Tata Jesukristueri ambe, méntku no ma ambe pʼíngusïreendi para ísï úni” (Úku. 28:31). ¿Nani jámaxapi apostoli? Ima Roma jámaxapti, imani ireta jimbo enga sánderu uinhapikua jatsipka iámu parhakpinirhu. Úsïngachi exeni eska espiritu santu uinhaperaantaxapka imani kristianuechani.
Seguiriixakachi aianhpini nájkirukachi no sési kánhani jaka
13. ¿Andisï xánimendu uétarhijki eskachi kómarhiaka jiáni engachi no sési kánhani jauaka?
13 Engaksï Jesúsiiri chúxapatiicha ueenapka no sési kánhani primeru siglurhu, kómarhisptiksï Tata Diosï Jeobani eska jarhuataapiringa paraksï no chéni. ¿Ambe úspi Tata Diosï? Espiritu santu íntsaaspti uinhapikua parakaksï no sáni chéparini uandantapiringa Tata Diosïiri ambe (Úku. 4:18-31). Juchajtuchi kómarhisïnga Tata Diosïni parakajtsïni íntskuaka uinhapikua parachi seguiriini sési aianhpini nájkirukachi no sési kánhaaka (Sant. 1:2-8). Ka, jimbokajtsïni Tata Diosï újchakuraasïnga ka íntskuni imeeri espiritu, juchachi úsïnga seguiriini aianhpini, nójtsïni ambe ma ójkutaati, na uéjkijtsïni kʼuiripuecha xáni no sési kámani ka nójtsïni jurajkuni aianhpini. Joperu parachi ísï úni, jatsiskachi para kurhakuni Tata Diosïni Jeobani eskajtsïni íntskuaka espiritu santu, jánhaskakua ka uinhapikua (Luk. 11:13).
14, 15. a) ¿Ambe úkuarhispi jiáni uératini engaksï Estebanini uándikupka? b) ¿Nénaksï niáraspi míteni jurhimbikuani uánikua Siberia anapuecha?
14 Estebani no sáni uandantaspti Tata Diosïiri ambe imeeri ikiatspiticheeri orhepatini jimbo ante deksï uándikuni (Úku. 6:5; 7:54-60). Ka jiájkanksï ueenaspti “kánikua no sési kaani” Jesúsiiri chúxapatiichani engaksï Jerusaléni japka, ka iichaksï iámu Judea ka Samariaisï etsakuarhispti, joperu apostoliichaksï jima pakaraspti. Peru seguiriixapti aianhpinhani. Felipe Samaria niraspti ka “ueenaspti Kristueri ambe aianguani kʼuiripuechani” ka kánikua sési nikuspti (Úku. 8:1-8, 14, 15, 25). Biblia arhisïndi: “Imeecha engaksï etsakuarhipka engaksï no sési kánhapkaa jiáni engaksï Estebanini uándikupka, Fenisiaksï jamberi niáraspti, Chipre ka Antiokíaisï jamberi. Joperu judiuechantkuksïsï aianguauendi ambakiti aianhperakuani. Joperu máru achamasïicha engaksï Chipre ka Sirene anapuepka, Antiokíaksï niraspti ka ueenasptiksï aianguani imani kʼuiripuechani engaksï griegu uandeenga ka ambakiti aianhperakuaksï aianguaspti Jesúsiiri ambe” (Úku. 11:19, 20). Eskachi na exekia, nájkirukaksï kristianuecha no sési kánhapka, úspti eskaksï sánderu uápurisï aianhpepiringa ambakiti aianhperakuani.
15 Juchaari jurhiatikuechani jimbo, sáno májkueni ambe úkuarhispti jima enga Unión Soviética japka. Uéxurhini 1950 jimboisï, uánikua Jeobaeri testiguechaksï Siberia pánhaspti. Ka engaksï ísï etsakunhapka, imeechaksï sánderu etsakuspti ambakiti aianhperakuani. Enga no inde ambe úkuarhipiringa, erachiichaksï no úpirindi xáni iauanisï nirani, ménisï jukari 10,000 kilometrisï (6,000 miia), jimbokaksï no jatsispka sentabu paraksï maiampini biajini. Eska na uandantajka erachi ma: “Gobiernu mismu úspti eskaksï uánikua Siberia anapu kʼuiripuecha niárapiringa míteni jurhimbikuani”.
Tata Diosï Jeobajtsïni kánikua újchakurasïndi
16, 17. ¿Néna xarhatasïni libru Úkuecha eska Tata Diosï Jeoba újchakuraaspka kristianuechani?
16 Xarharasïndi eska Tata Diosï Jeoba újchakuraaspka primeru siglurhu anapu kristianuechani. Ísïisti, Pablu ka máteru kristianuechaksï ikarasti ka itsï jatsikuni, joperu eska Biblia na arhijka, “Tata Diosïsï úti eska kʼépiringa” (1 Kor. 3:5, 6). Libru Úkuecha, uandantasïndi na enga sánderu aianhpinhani japka jimboka Tata Diosï Jeoba újchakuraxapka. Pori ejemplu, arhintasïngachi eska uápurisï mítekuarhixapkia “Tata Diosïiri uandakua, ka Jerusaléni, sánderuksï uániixaptia Jesúsiiri chúxapatiicha” (Úku. 6:7). Ístu, “iámindu kúnguarhikuarhu anapuecha engaksï Judea, Galilea ka Samariaisï japka, úndasptiksï pínandikua jatsini ka uíuinhasïksï jarhasptia. Ka sánderuksï uániixaptia jimbokaksï chénharhisïreenga “Tata Diosï Jeobani ka ístu jimboka espiritu santu sési pʼikuastaantasïreenga” (Úku. 9:31).
17 Antiokía de Siria, kristianuecha engaksï no cheenga aianguasptiksï jurhimbikueri ambe imeechani engaksï ebreu uandeenga ka griegu: “Ka Tata Diosï Jeoba jarhuataaxapti ka uánikua kʼuiripuechaksï ueenaspti jakajkuni ka Tateeri chúxapatiksï úkuarhispti” (Úku. 11:21). ¿Ka ambe úkuarhispi tátsekua? “Uápurisï mítekuarhixaptia Tata Diosï Jeobaeri uandakua ka sánderu uánikua kʼuiripuechaksï jakajkuxaptia” (Úku. 12:24). Ka jimboka apostoli Pablu ka máteru erachiichaksï aianhpixapka, “Tata Diosï Jeobaeri uandakua sánderu etsakurhixaptia ka sánhani arhixapti sánderu uinhapikua jatsini” (Úku. 19:20).
18, 19. a) ¿Nénachi míteski eskajtsïni Tata Diosï Jeoba jarhuataxaka? b) ¿Náki ejemplu jarhaski enga xarhatajka eska Tata Diosï Jeoba jarhuatasïnga imeeri iretani?
18 Seguruchi jarhaska eskajtsïni Tata Diosï Jeoba juchantsïntu jarhuataxaka. Jimboksïsï xáni uánikuecha míteni jati jurhimbikueri ambe, aiakukuarheni Tata Diosïni ka itsï atakuarhini. Ístu, eskaksï na úkuarhinchapka Pablu ka máteru primeru siglurhu anapu kristianuecha, engajtsïni Tata Diosï no újchakurapiringa ka jarhuatani, nóchi úpiringa seguiriini aianhpini engachi no sési kánhapiringa ka no jurajkunhani parachi aianhpini (Úku. 14:19-21). Tata Diosï Jeobajtsïni méntkisï jarhuatasïndi úrapariani “imeeri jájkicha[ni] engaksï méntkisï jauaka” (Deut. 33:27). Ju je méntkisï miáni eska ima no méni jurajkuaka imeeri iretani jimboka xénchasïnga imeeri pímbinhasï nombrini (1 Sam. 12:22; Sal. 94:14).
19 Ju je exeni ejemplu ma. Enga Segunda Guerra Mundiali úkuarhini japka, nasiichaksï ónhaspti erachi Harald Abtini kampurhu ma engaksï ónhauenga kʼuiripuechani enga Sachsenhausen japka. Maiuni 1942 jimbo, polisiecha engaksï nasiipka, pasptiksï uájpani ka ónhasptiksï témbani, Elsa. Tátsekuaksï méntku úndaspti kárseliicharhu móskuni. Elsa uandaspti: “Imani uéxurhiniichani jimbo engani Alemania anapu kampuecharhu pánhapka ambakiti ambe jorhenguarhiska: espiritu santu kánikua uinhaperaantasïndi imeechani engaksï marhuakujka Tata Diosï Jeobani jiáni engaksï no sési ambe nitamakuarhini jarhajka. Ante dejtsïni jupikani, pirenchiiri karta ma jimbo arhintaspka eska jiáni engachi no sési nitamakuarhini jarhajka, Tata Diosï Jeobaeri espiritu úsïnga eskachi no xáni uandanhiauaka. Eratsexapka eska pirenchi jukari ambe uandaxapka. Joperu jiáni engani ji no sési ambe nitamakuarhini japkia, exespka eska pirenchi sési jimbosï uandani japka. Ísïispti eska ima na uandapka. Ma jiáni niárasïndi indeni ambe kurhanguni enga no sési nitamakuarhini jarhajka. Ka ji indeni ambesï nitamakuarhinchaka”.
¡Ju je seguiriini sési aianhpini!
20. ¿Ambe úspi Pablu enga kʼumanchikua ma jimbo ónhakata japka ka néna uinhaperaantasïni imeeri ejemplu uánikua kristianuechani?
20 Últimu karakatarhu enga libru Úkuecha jimbo jaka, uandasïndi eska Pablu máteru kʼumanchikua jimbo ónhakata jarhaspka Roma, no úsïreendi ísï aianhpini eska antesi na ueenga. Joperu, seguiriixapti aianguani kʼuiripuechani “Tata Diosïiri Reinueri ambe” (Úku. 28:31). Iásï, uánikua erachiichaksï jarhasti engaksï ístu no újka uérani kʼumanchikuarhu, jamberi jimbokaksï nóteru újtia jámani oksï ima kʼumanchikuarhu jarhani engaksï jatirichani exeajka o imeechani engaksï pʼamenchani jarhajka. Nájkiruka ísïika, imeechaksï sánderu xénchasïndi Tata Diosïni ka ístuksï uékasïndi sánderu aianhpini. Ísï jimbo, engachi kómarhijpikuauaka uaakachi arhini juchaari Taati auandarhu anapuni eska jarhuatauaka parakaksï uaaka uandontskuarekuni nemani enga ueekaaka míteni imani ka ístu imani xáni ambakiti ambe enga ima aiatspejka.
21. ¿Andisï xáni jukaparhakue nirani aianhpini?
21 Sáno iáminduechachi úsïnga aianhpini kʼumanchikuecharhu ka ístu máteru ambe úparini. Ísï jimbo, jatsiskachi para jánguarhintani sési aianhpini Reinueri ambe ka jarhuajpeni paraka aianhpinhaaka “asta jima jamberi enga sánderu iauaniika parhakpinirhu”. Jimboka xarharasïnga eskachi últimu jurhiatikuechani jimbo irekaxakaia (Mat. 24:3-14). Ísï jimbo, no uétarhisïndi ísku jarhani. Ju je méntku ánchikuarhikuni jarhani Tatani (1 Kor. 15:58).
22. ¿Ambechi uékasïni úni jarhani enga jamberi juuaka Tata Diosï Jeobaeri jurhiatikua?
22 Sánderkusï kueratajtia paraka juuaka Tateeri jurhiatikua (Joel 2:31). Enga jamberi niáraaka inde jurhiatikua, ju je seguiriini jarhani aianhpini no sáni chéparini. Útasïksï uánikua kʼuiripuecha jarhasti engaksï ísïika komueska Berea anapuecha, engaksï ‘mintsita jingoni jiókuarhipka Tata Diosïiri uandakuani’ (Úku. 17:10, 11). Ju je no jurajkuni aianhpini astakachi kurhauaka arini ambe: “¡Sésiri úska, tʼuri ambakiti jántspiriiska ka mintsinharhikueskari!” (Mat. 25:23). Engachi jánguarhintaska úni juchaari ánchikuarhitani ka nóchi méni jurajkuni Tata Diosï Jeobani, méntkisïchi kánikua sési pʼikuarheraaka jimbokachi sési aianhpiska Tata Diosïiri Reinueri ambe.