KAPITULU 26
“No nema uarhiati”
Jiáni enga Pablu no sési ambe nitamakuarhipka marirhu, ima xarhataspti eska mintsikasïreenga Tata Diosïni ka eska xénchaasïreenga máteruechani
Pʼitakata jarhasti Úkuecha 27:1–28:10
1, 2. ¿Iásï nani pánhaia Pablu ka andisï inde ambe úpirini uandanhiatani?
FESTU arhispti Pabluni: “Engari uéjka eskakeni Roma anapu juramuti jusgariuaka, jiájkani Roma anapu juramutikeni jusgariuati”, ka Pablu méntku miáxapti ambe enga Festu arhipka, jimboka eratsexapka ambe enga úkuarhinchapiringa enga na nipiringia Roma anapu juramuti jingoni. Tsimani uéxurhiniistia enga Pablu ónhakata japka ka iásï Roma pánhapirindia, ísï jimbo, inde ambe úpirindia paraka ima nóteru xáni jimajku japiringia ka máteru ambe sáni exenia (Úku. 25:12). Joperu Pablu someni parhimesptia marirhisï ka no méntkisï sési nikuspti. Ísï jimbo, enga iásï ménderu mítepkia eska jatsispka para Roma anapu juramuti jingoni nirani, jamberi kánikua uandanhiatapti.
2 Apostoli Pablu, uánikua xanhari no sési nitamakuarhisptia marirhu, pori ejemplu tanimu uelta ima barkuecha jimbo enga ima nirani japka xerekuarhintasptiksï ka ma chúrikua ka ma jurhiatikua marirhu terumikua pakaraspti (2 Kor. 11:25, 26). Ístu, nóteru májkuenipirindia eska jiáni enga ima aianhpini nireenga máteru nanisï, jimboka iásï jupikakata pánhaxapkia. Ka no inde ambejkuesti, para Roma niárani Sesarea uératini kánikua iauaniispti 3,000 kilometrisï (2,000 miia). ¿Seguiriini jaua tsípiti jarhani? Nájkiruka sési niáraka ka no ma ambe úkuarhinchani, ju je miáni eska imasï jusgariuaka enga sánderu juramukua jatsika Noambakitiiri parhakpinirhu ¿joperu néna kʼamaraa ima juisiu?
3. ¿Ambe eratsetixapi apostoli Pablu úni ka ambechi exea ini kapitulu jimbo?
3 Míteparini na enga jásïipka apostoli Pablu, nóchi méni eranhaskapiringa imani kánikua chéni jarhani. Ísïisti, ima mítespti eska niárapiringa no sési ambe nitamakuarhini, joperu no mítespti ambe enga nitamakuarhipiringa. Ísï jimbo, ima seguiriipirindi tsípikua jingoni aianhpini Tata Diosïiri ambe nájkiruka niárapiringa no sési nitamakuarhini (Mat. 6:27, 34). Apostoli Pablu kurhanguspti eska Tata Diosï Jeoba uékasïreenga paraka jánguarhintapiringa aianguani Reinueri ambe, asta sánderu kʼérati juramutiichani jamberi (Úku. 9:15). Ka eratsetixapti ísï úni eska na juramuminhapka ambe uéjki enga úkuarhipiringa. Ka juchajtuchi májkueni uékasïnga úni eska ima, ísï jimbo ju je exeni ambe enga nitamakuarhipka jiáni, joperu ístuchi jatsiska para exeni ambe engachi uaaka jorhenguarhini apostoli Pablueri ambe.
No sési tarhiaxapti “ka tarhiatajtsïni kʼuanhaskuntasïreendi” (Úkuecha 27:1-7a)
4. ¿Náki barkuni jataspi Pablu ka neechaksï niraxapi imani jingoni?
4 Pabluni ka máteru kʼuiripuechani engaksï ístu jupikakata japka, Roma anapu sondaduecheeri orhejtsïkuti ma kuidariuaxapti enga Juliu arhinheenga. Juliu uandaspi eskaksï imani barkuni jatapiringa enga merkansia ambe páni japka ka enga apenasi niárapka Sesarea, i barku Adramitiu uératini jurhasïreendi enga Asia Menor oesteisï japka. Ima enga barkuni xanhatatani japka, orheta nortisï nipirindi ka tátsekua oesteisï jimboka uápurisï anhaxurhipiringa para jatsiraani ka késkuni merkansia ambe. Nájkirukaksï ini barkuechani jimbo ueenga kʼuiripuecha nirani, nóksï xáni agustu úsïreendi nirani ka menusia imeecha engaksï jupikakata nirani jarheenga (exe je rekuadruni “ Barkuecha engaksï marirhisï parhimeenga ka engaksï merkansia ambe peenga”). Joperu diosmaiamu Tata Diosïni enga apostoli Pablu no jandiajku nirani japka xáni uánikua no sési úriichani jingoni, imani jingonksï niraxapti tsimani ambakiti erachiicha: Aristarku ka Lukasï. Ka xarharasïndi eska Lukasï jindeeska enga uandantajka ini ambe. Ambe engachi kʼóru no míteka, jindeesti sinksï imeecha maiampikuarhispi pasajini oksï ísï jataspi komueska Pablueri jántspiriicha (Úku. 27:1, 2).
5. ¿Pablu neechani jingoni úspi jarhani Sidóni ka ambechi jorhenguarhisïni jucha?
5 Engaksï na 110 kilometru (70 miia) iauani nípkia marirhu ka ma jurhiatikuaksï páni jarhani, barku Sidóni anhaxurhispti, Siria uanamukuteni. Ka peeka Juliu kánikua ménderueni kámapka Pabluni, jimboka Pablu Roma anapuespka ka ístu jimboka nótki mítekuarhixapka sini meru no sési ambe úspi (Úku. 22:27, 28; 26:31, 32). Asta jurajkuspti eska kétsepiringa barkurhu para nipirini exeani máteru erachiichani ka pirenchiichani. Erachiichaksï kánikua tsípikua jingoni erokapti jimboka ióniispkia engaksï nóteru exepkia. Kurhamarhikuarhi je: “¿Jaua ménisï engani jíjtuni uaaka sési kaani máteruechani?”. Exe je, engajtsï ísï úska kánikuaksïni jarhuataati jimbokaksïni uinhaperantaaka (Úku. 27:3).
6-8. ¿Nénaksï niáraspi Knidu Sidóni uératini ka ambe úspi Pablu indeni biaji jimbo?
6 Barku ménderu ueenaspti marirhisï nirani ka nortisï niraspti, tátsekua Silisia uanamukutenisï nitamaspti, Tarsu no iauanisï, imani ireta jimbo nani enga Pablu tʼarhexepka. Nájkiruka Lukasï nóteru uandantajkia nani engaksï útasï anhaxurhipka, kʼóru uandantasïndi eska no sési tarhiaxapka ka eska tarhiata kʼuanhaskuantasïreenga (Úku. 27:4, 5). Joperu eskachi na mítekia apostoli Pabluni, ima uandantaspti ambakiti aianhperakuani na uéjki no sési jánhaskuarhini jarhani, ísi jimbo aianguapti imeechani engaksï jupikakata nirani japka ka máteru kʼuiripuechani ka ístu imeechani engaksï barkuni páni japka ka sondaduechani ka imeechani jamberi engaksï jimeesïsï jarheenga nani enga barku anhaxurhienga. ¿Ka juchaia? ¿juchajtuchi jánguarhintasïni nani uéjkisï aianhpini?
7 Tátsekuaksï Mira niáraspti, Asia Menor uanamukuteni surisï. Jima, Pablu ka ístu máteruecha engaksï imani barkuni jimbo nirani japka, iásïksï máteru barkurhu jatapirindia paraksï úni Roma niárani (Úku. 27:6). Primeru sigluni, Roma kánikua trigu piákusïreendi Ejiptuni, jimboksïsï uánikua barkuecha niáreendi Mira engaksï Ejiptu uératini jurheenga. Ka Juliu indeni barkuni ma jirinhaspti ka arhiaspti sondaduechani ka imeechani engaksï jupikakata nirani japka eskaksï jima jatapiringa, ka jamberi inde barku sánderu kʼépti eska primeru, jimboka kánikua trigu páxapka ka ístu 276 kʼuiripuechaksï niraxapti. Jimaksï niraxapti imeecha engaksï barkuni páni japka, sondaduecha, ístu imeecha engaksï jupikakata nirani japka ka máteru kʼuiripuecha. Ka enga iásï apostoli Pablu máteru barkuni jatapkia, exespti eska úpiringa sánderu aianhpini, ka uaakachi seguru jarhani eska ísï úspka.
8 Mira uératini, Kniduksï niraspti, ireta ma enga Asia Menor japka suroesteisï. Imeechaksï úpirindi ma jurhiatikua jimbojku niárani Knidu enga sési jánhaskuarhipiringa ka no xáni tarhiani jarhani. Joperu Lukasï uandantasïndi eska barku kánikua tsitapaxapka ka eskaksï no na niáraspka Knidu (Úku. 27:7a). Ka úkua jukanchasptiksï niárani jimboka no sési tarhiaxapka ka tátsekua sánderu no sési jánhaskuarhispti (exe je rekuadruni “ Mari ka enga no sési tarhiani jarhajka”). Kánikuaksï kuatantaptia imeecha engaksï imani barku jimbo nirani japka jimboka tarhiata méntku jiniani ka ixúani kántaxapka barkuni.
‘Kʼéri ma janixapti ka barku méntku no sési niraxapti manakuarhini’ (Úkuecha 27:7b-26)
9, 10. ¿Ambeksï nitamakuarhispi Kreta no iauanisï?
9 Desde Knidu uératini, barkueri kapitani oesteisï uékasïreendi nirani, joperu Lukasï i ambe uandantasïndi: “Jimboka uinhamu tarhiaxapka, jucha nóna niraxapka barkurhu” (Úku. 27:7b). Ka engaksï sáni iauani nípkia, nóteruksï úsptia páni barkuni jimeesïsï enga nipiringa jimboka tarhiata enga noresteisï uératini jurheenga surirhisï paaspka, jamberi uinhamu pʼakchakuauendi. Ka ísï eskaksï na ma xanhari kuájchakukuarhipkia Chipre anapu islarhu, májkuenksï úspti Kreta anapu islani jingoni. Enga barku na Salmoneisï nitamapkia, islarhu uanamukutenisï, suririsïksï niraspti ka tarhiata nóteru xáni no sési kántasptia barkuni ka sáni sési jánhaskuarhintasptia. ¡Kánikuaksï sési pʼikuarherapti engaksï jima japkia! Joperuksï no úpirindi ióni pakarani, jimboka no ióni jimbo iauapiringia, ka enga na xánhaskuarhiengia, marineruechaksï exesïreendi eska úkua jukapiringia marirhisï jámani.
10 Nájkirukaksï Kreta anapu islani jimbo kuájchakukuarhipka nóksï úxapti pʼínguni barkuni, Lukasï uandantasïndi: “Nónachi jámaxapka barku jingoni astakachi andamukuentapka jima engaksï barkuecha niárajka enga ísï arhinhajka Bellos Puertos”. Ka exesptiksï isla sapichu ma nani engaksï úpiringa barkuni anhaxustani, peeka nortisïipka islarhu uanamukuteni. ¿Náksï xáni ióni pakaraspi jima? Lukasï uandantasïndi eskaksï ióni pakaraspka. Joperuksï nóteru úpirindia jima pakarani jimboka septiembri o oktubrini ísïispkia. Engaksï sánderu ióni pakarapiringa, sánderu úkua jukapirindi para barku jimbo jámani marirhisï (Úku. 27:8, 9).
11. ¿Ambe arhiaspi Pablu imeechani engaksï imani jingoni nirani japka joperu ambeksï úspi?
11 Jamberi máru kʼuiripuecha engaksï barkurhu nirani japka níptiksï Pabluni kurhamarhini ambeksï úpirini, jamberi jimbokaksï mítespka eska Pablu ióni jámaspka marirhisï. Pablu arhiaspti eskaksï no manakuarhipiringa jima, jimbokaksï no sési ambe úkuarhinchapiringa ka iámu ambeksï tsïtani ka jamberiksï niárapirindi uarhini. Joperu ima enga barkuni páni japka ka barkueri dueniu, uékasïreendiksï seguiriini jimbokaksï eratsesïreenga eskaksï úpiringa jima niárani nani engaksï úpiringa sánderu sési kuájchakukuarhini. Ka Juliu nóteru ambe ma úsptia úni jimboka sánoksï iáminduecha uandaspti eskaksï seguiriipiringa uanamukutenisï nirani astaksï Fenisia niárani. Ka ísïksï uandasïreendi jimbokaksï eratsespka eska Fenisia sánderu ambandespka para barkuni anhaxustani ka eskaksï úpiringa jima pakarani enga jamberi iauapiringa. Exesptiksï eska nóteru xáni uinhamu tarhiaxapkia surirhisï uératiniʼ, ísï jimbo, seguirisptiksï nirani (Úku. 27:10-13).
12. ¿Ambeksï nitamakuarhispi engaksï na uéntapkia Kreta ka ambeksï úspi marineruecha paraksï no no sési ambe úkuarhinchani?
12 Úndaspti sánderu no sési tarhiani noroesteisï uératini ka úndasptiksï sánderu úkua jukanchania. Nóksï ióni kuájchakukuarhispti isla sapichurhu enga Kauda arhinheenga ka enga 65 kilometrisï (40 miia) iauani japka Bellos Puertos uératini, joperu tarhiata útasï úpirini surirhisï paani ka barku jimeesïsï mátseni enga kánikua arena japka África uanamukutenisï. Ka jimbokaksï no uékasïreenga eskaksï indeni ambe nitamakuarhipiringa, antsimantasptiksï barku sapichuni engaksï antsitapani japka ka jamberiksï kánikua úkua jukanchapti ísï úni jimboka iámu itsï uinispkia. Tátsekua, uinhamuksï jótaspti barkuni kadeneecha jingoni paraka uiuinhasï japiringa barku. Ístuksï antsitaantaspti sïndariichani paraksï irhiantani takusïichani. Ka ístuksï kánikua jánguarhintaxapti paraka tarhiata orhepanisï niárakupiringa barkuni. Kánikuaksï uandanhiaxapti jimboka no jarhuataaspka ambe engaksï úpka. Lukasï uandantasïndi eska “kʼéri ma janixapka ka barku méntku no sési niraxapti manakuarhini”. Ka ísï tanimu jurhiatikua, imeechaksï marirhu kʼuanimaspti barkurhu anapu ambe paraka barku nóteru xáni kʼuetsapepiringia ka eska no inchamepiringa marirhu (Úku. 27:14-19).
13. ¿Nénaksï pʼikuarherani japi imeecha engaksï barkurhu nirani japka jiáni enga xáni kʼéri janini japka?
13 Iáminduecha engaksï barkurhu nirani japka, úndasptiksï sánderu chéni. Joperu Pablu ka máteru erachiicha engaksï imani jingoni nirani japka nómbe, jimbokaksï mintsikaxapka ambe enga Jesúsi arhipka Pabluni ka ísï tátsekua ánjeli ma, eska ima uandantapiringa Roma ambakiti aianhperakuani (Úku. 19:21; 23:11). Joperu tsimani semana chúrikua ka jurhiakua, kʼéri janikua útasï méntku no sési kántaxapti barkuni, ka jimboka kánikua ónhaskuarhispka xúmu jimbo ka no sési nirani jarhani tarhiani, ima enga barkuni páni japka no úsïreendi exeni Jurhiatani ka ni jóskuechani para úni exeni naniisïsï páni barkuni. Nóksï jamberi úsïreendi tʼireni jimboka tsʼirakuarhispka, janixapti, no sési tarhiaxapti ka chékuarhini, ¿a no eska ísï no nema niárapiringa kʼarhimani?
14, 15. a) ¿Andisï Pablu miátaantapi ambe enga arhiapka antesi imani kʼuiripuechani engaksï barkurhu nirani japka? b) ¿Ambechi jorhenguarhisïni enga Pablu ísï ambakiti ambe aianguapka kʼuiripuechani?
14 Pablu jauaraspti ka miátaantaspti eska arhiaxapka eskaksï no ísï úpiringa, joperu no ísï arhiaspti para xukaani, sino para arhiani eska sési japiringa engaksï kasu úkupiringa. Tátsekua arhiaspti: “Asï ché je jimboka no nema uarhiaka, barkujkusï iámu xerekuarhentaati” (Úku. 27:21, 22). ¡Kánikuaksï sési pʼikuarherapti engaksï ísï kurhaapka! Ka uaakachi seguru jarhani eska apostoli Pablu kánikua sési pʼikuarheraspka jimboka aianguaspka ambe enga Tata Diosï arhipka. Ísï jimbo, ju je no mirikurhini eska juchaari Taati uandanhiasïnga mándani arhini juchantsïni jimbo. Ima uandanhiasïndi kʼuiripuechani jimbo, “jimboka no uékasïnga eska nema kʼamajkunhaaka, sino eskaksï iámindu kʼuiripuecha móantaaka” (2 Ped. 3:9). Ísï jimbo, uétarhisïndi eskachi aianguauaka uánikua kʼuiripuechani ambakiti aianhperakuani. Útasïksï uánikua kʼuiripuecha jarhasti enga Tata Diosï Jeoba jukaparharaajka ka engaksï uaaka tsípiti pakarani.
15 Pablu aianguaptia uánikua kʼuiripuechani engaksï barkurhu nirani japka eska Tata Diosï ísï uaaka eska na aiatspeka (Úku. 26:6; Kol. 1:5). Joperu enga exepka eskaksï no sési ambe úkuarhinchapiringia, aianguaspti andisï seguru japi eska no nema uarhipiringa, arhiaspti: “Chúri, juchiiti Tata Diosï, [...] axasti imeeri ánjelini ka arhistirini: ‘Pablu, asï jáma chéni. Tʼuri jatsiska para Roma anapu juramuti jingoni niárani; ístu, Tata Diosïkeni tsípiti pakataati tʼungini ka ístu iáminduechani engaksï tʼungini jingoni nirani jaka’. Ísï jimbo tateecha, asï jáma je chéni jimbokani ji jakajkukusïnga Tata Diosïni ka mítetixaka eska ísïmindu úkuarhiaka eskarini ima na arhika. Joperu barku iámu xerekuarhentaati jima no iauani enga isla ma jaka” (Úku. 27:23-26).
Úkuecha 27:27-44)
“Iáminduechaksï sési andantaspti” (“Iáminduechani japarini diosmaiamukua íntskuntaspti Tata Diosïni” (Úkuecha 27:35).
16, 17. a) ¿Káni kómarhispi apostoli Pablu ka néna jarhuataaspi inde ambe máteruechani? b) ¿Néna ísï úkuarhispi ambe enga apostoli Pablu t’uini uandarini japkia?
16 Engaksï na tsimani semana no sési nitamakuarhipkia, tarhiata 870 kilometrisï (540 miia) támisï páspti barkuni. Marineruechaksï exespti eska jima no iauani uanamukuteniispkia. Jamberiksï niárapti ísï pʼikuarhetsini jimbokaksï oleecha ueenaspkia no sési kurhakuarhini uanamukutenisï o jamberi máteru ambe jimboepti, jimboksïsï sési exepti kʼuanimaani ankleechani barkurhu tátsepani. Ka ísïksï úspti jimbokaksï no uékasïreenga eska útasï tarhiata támisï paapiringa ka ístu jimbokaksï uékasïreenga eska barku sési andantapiringa echerirhu paraksï sési anhaxustani barkuni ambakiti lugari ma jimbo. Ka enga i ambe úkuarhini japka, máru kʼuiripuechaksï uékasïreendi sïpakuarhini, joperu Juliu ka sondaduechaksï no jurajkuaspti jimboka Pablu arhiaspka iichani: “Chájtsï ixú uarhiaka engaksï i achamasïicha sïpakuarhiska”. Ka jimboka barku nóteru xáni manakuarhixapkia, apostoli Pablu arhiaspti iáminduechani eskaksï tʼirepiringa sáni, ka ístu arhiaspti eskaksï iáminduecha sési japiringa ka eska no nema uarhipiringa. Tátsekua, “iáminduechani japarini diosmaiamukua íntskuntaspti Tata Diosïni” (Úku. 27:31, 35). Enga ísï kómarhipka Tata Diosïni, ambakiti ambe exeraspti Lukasïni ka Aristarkuni ka ístu iámindu kristianuechani engachi arhintajka ambe enga nitamakuarhipka Pablu. Ísï jimbo, jatsipiringachi para kurhamarhikuarhini: “Engani máteruechani japarini kómarhijka Tata Diosïni, ¿jarhuataasïni ka sési pʼikuastaantasïni?
17 Enga apostoli Pablu na kómarhipkia, “iáminduechaksï sési pʼikuarherantaspti ka ueenasptiksï tʼireni” (Úku. 27:36). Ka para barku nóteru xáni kʼuetsapenia, itsïirhuksï kʼuanimaspti triguni ka ísï karhantaspti sáni barku ka sánderu fásilipirindia uanamukuteni niántani. Enga na erandepkia, imeecha engaksï barkuni páni japka katsïkuasptiksï imani sïndariichani engaksï ankleechani pʼínguani japka ka chkétaasptiksï sïndariichani engaksï pʼakamatarakuechani o remuechani pʼínguani japka paraka barku marirhu uanamukutenisï nipiringa ka ístuksï pʼirakuspti imani takusïni enga barkurhu jukarhupka (o trinketeni) para úni eska barku andantapiringa echerirhu. Tátsekua, barku jima mátsespti nani enga kánikua kutsari jatamepka ka tátsepani anapu ueenaspti iámu xerekuarhentani jimbokaksï oleecha no sési manamixapka. Ka máru sondaduechaksï uékasïreendi uándikuani imeechani engaksï jupikakata nirani japka paraksï no sïpakuarhini. Joperu Juliu no jurajkuaspti ka arhiaspti eskaksï nipiringa uanamukuteni andantani, ia sea xarhiameparini o barkueri tableechani úrapariani. Ka ísï eska Pablu na uandapkia, ima 276 kʼuiripuecha engaksï barkurhu nirani japka, “iáminduechaksï sési andantaspti” (Úku. 27:44). ¿Joperu naniksï andantaspi?
“Kʼuiripuechajtsïni kánikua sési kámaspti” (Úkuecha 28:1-10)
18-20. ¿Nénaksï sési kámpispi Malta anapuecha ka náki milagru úkuarhispi?
18 Maltaksï andantaspti, isla ma enga surisï jaka Sisilia (exe je rekuadruni enga ini pájinarhu jaka “ ¿Náki jindeeski isla Malta?”). Nájkirukaksï Malta anapuecha máteru idioma uandeenga, kánikuaksï sési kaaspti iámindu imeechani engaksï xáni no sési úkuarhinchapka barkurhu jimbokaksï sési kuakarini niáraspka ka chétku (Úku. 28:2). Ka astaksï jamberi kurhikaspti paraksï imeecha jorhentani, jimboka kánikua tsʼirakuarhispka ka janini jarhani. Ka milagru ma úkuarhispti.
19 Pablu uékasïreendi jarhuajpeni, ka ueenaspti chkari tántani ka chpirirhu jatsikuni. Ka enga na kʼuanijpapka chpirirhu, akuitsi ma jimajku uéraspti ka mápkuspti Pabluni ka no jurajkusïreendi. Malta anapuechaksï eratsespti eska Tata Diosïsï kastigarini japka apostoli Pabluni. a
20 Engaksï Malta anapuecha exepka eska akuitsi ma katsarhespka Pabluni, uandasptiksï eska kʼújkurhapiringa. Libru ma uandasïndi eska inde uandakua enga ini karakata jimbo úrakuarhika, imeeska engaksï doktoriicha úrajka. Ka inde ambejtsïni no ísku pakatasïndi, jimboka ima enga ini ambe uandantaka, jindeesti Lukasï enga doktoriipka (Úku. 28:6; Kol. 4:14). Ka nájkiruka i ambe úkuarhipka, apostoli Pablu uauajkurhantaspti akuitsini ka no ma ambe úkuarhinchaspti.
21. a) ¿Náki ejempluechaksï jarhaski engaksï xarhatajka eska meru ísïiska ambe enga Lukasï uandantaka? b) ¿Náki milagruechani uaaspi Pablu ka ambeksï úspi Malta anapuecha?
21 Imani lugari jimbo, achamasï ma irekaspti enga Roma anapuepka ka Publiu arhinhasïreendi ka peeka ima sánderu juramukua jatsipka Malta, ka ístu jatsiaspti máru echeriichani. Lukasï uandasïndi eska achamasï máespka enga sánderu kʼéri ambeepka imani isla jimbo, ka ísïksï xarhatasïndi tsimani karakateecha engaksï Malta exenhantaka. Ka nájkiruka Publiueri taati jémba pʼamenchani japka, tanimu jurhiatikua pakataspti imeo Pabluni ka imeechani engaksï imani jingoni jámani japka. Ménderu Lukasï sési uandantasïndi ambe enga pʼamenchani japka Publiueri taati jémba: “Ísku apondikuspti, jimboka tinharaxapka ka iurhiri éskua pʼiraspti”. Ísï jimbo, apostoli Pablu kómarhispti Tata Diosïni ka tátsekua pʼárhispti ka ambakerantaspti. Malta anapuechaksï ísku pakaraspti indeni milagru jimbo, ka ueenasptiksï pákuani máteru pʼamenchatiichani paraka Pablu ambakeraantapiringa, ka uánikua ambe intsïkuarhispti Pabluni ka imeeri kompanieruechani ka ístu uánikua ambe íntskuaspti para biaji enga kueratani japka (Úku. 28:7-10).
22. a) ¿Ambe uandaspi kʼuiripu ma enga sési mítekuka Biblieri ambe ima ambeeri enga Lukasï uandantaka jiáni engaksï Roma nirani japka? b) ¿Ambechi exea máteru kapitulu jimbo?
22 Ambe enga xáni nitamakuarhipka Pablu ini biaji jimbo engachi kʼamaraka exeni, xarhatasïndi eska meru ísï úkuarhispka. Kʼuiripu ma enga sési mítekuka Biblieri ambe, uandaspti: “Ambe enga Lukasï karaka, Biblieri karakata máesti enga sési xarhatajka nani enga úkuarhipka ambe ma ka néna enga úkuarhipka. Sési uandantasïndi na enga jindeepka marirhisï jámani barku jimbo primeru siglurhu ka ístu na enga jásïika klima oesteisï. Ka indeni ambe imajku úpirindi uandantani né enga barkurhu nirani japiringa”. Jiájkani Lukasïipti enga karapka ambe enga xáni úkuarhipka engaksï marirhisï nirani japka. Ka engaksï ménderu nipiringa barku jimbo, ménderu uánikua ambe karapirindi. ¿Ambe úkuarhipirinia apostoli Pablu jingoni engaksï na niárapiringia Roma? Ju je exeni máteru kapitulu jimbo.
a Malta anapuechaksï pʼindesptia exeani akuitsichani, ísï jimbo, inde ambe xarhatasïndi eska jiáni enga inde ambe úkuarhipka, úpiringaksï akuitsiicha jámani jarhani. Iásï, Maltaksï nóteru jarhastia akuitsiicha. Jamberi tiempu jingoni máteru naniisïksï mótsiti oksï nóteru jarhani jimboka iásï sánderu uánikua kʼuiripu irekaxakaia.